راكوبة المجادعات.. النمة والدوباي

[سجمان]

المشاركة الأصلية كتبت بواسطة حافظ حسن مختار

حباب سجمان سليل القبائل الحرة
نضمك سمح خاطري بيهو انسرة
وكت قريت حروفك قلبي المتيم فرة
ألهبت المشاعر نيران تبق لا بره

شيطان الغنا يا خلي أصلو مدرب
وللزول العشوق كم من حبيباً قرّب
الساكن المروخ أنا عقلي بيهو مشرّب
محلول في الوريد بي حقنة ما بت سرّب

[تماضر حمزة]

المشاركة الأصلية كتبت بواسطة سجمان

شيطان الغنا يا خلي أصلو مدرب
وللزول العشوق كم من حبيباً قرّب
الساكن المروخ أنا عقلي بيهو مشرّب
محلول في الوريد بي حقنة ما بت سرّب

حالي بريد غناهو ال بي لهيجو مَكرّب
عاصي عليَّ بعدو وهوّ عندي مَقرّب
وياخلّايَ زول قامة وجفيرو مَجرّب
وواساي للكلام أفرنجي ولّا مَعرّب

سنة يالخواجة!

[حافظ حسن مختار]

المشاركة الأصلية كتبت بواسطة سجمان

القلب العلي حار الطبيب في ضبطو
يوم جس العمومي لقاهو زايد نبطو
الشاغل الفؤاد يا خلي أحكم ربطو
مشنون جبال تقلي الغلبني اشفطو

ودعيني مجافي النوم دوام يتبكا
سببي فريع البانة المع النسيم تتكا
الخلاني أكتب وبي الحروف أتشكا
حسسي المنها منو الجبال تندكا

[سارة]

المشاركة الأصلية كتبت بواسطة سجمان

القلب العلي حار الطبيب في ضبطو
يوم جس العمومي لقاهو زايد نبطو
الشاغل الفؤاد يا خلي أحكم ربطو
مشنون جبال تقلي الغلبني اشفطو

الوجع العلى حار الطبيب فى دربو
ساكن فى القليب وكبيدتى ما بتخبربو
الشاغل فؤادى وكل الخلوق دارينبو
عطًاى باليمين واليسرى ما بتعلمبو

[مي هاشم]

لا لا لا .. موبااااااااااااالغة؟!!
انا كُتّ وين يعني؟؟!!


ما بقدر عليكم والله.. إلاّ أكب القهوة واغسل العدة بعد ده..

[حافظ حسن مختار]

اليوم الجمعة ربي الكريم عظم شانه
المكيف شغال الا الجو بشوفو سخانه
الشتيلة صدرو يا دااااب رمى الرمانه
خلى قلبنا لاهو مفارق لاهو معانا

[سجمان]

المشاركة الأصلية كتبت بواسطة تماضر حمزة

حالي بريد غناهو ال بي لهيجو مَكرّب
عاصي عليَّ بعدو وهوّ عندي مَقرّب
وياخلّايَ زول قامة وجفيرو مَجرّب
وواساي للكلام أفرنجي ولّا مَعرّب

سنة يالخواجة!

لواعجاً في السدر شوق وانتظار وبشاتن
فوق ظبيات خدور كم تعبو في منشاتن
قلبي العلين متقطع شالنو في شاشاتن
رضيان يوم، يحنو، يرمنّو في كشناتن

[سجمان]

المشاركة الأصلية كتبت بواسطة حافظ حسن مختار

ودعيني مجافي النوم دوام يتبكا
سببي فريع البانة المع النسيم تتكا
الخلاني أكتب وبي الحروف أتشكا
حسسي المنها منو الجبال تندكا

ود العين أخوي عارف براك أسبابو
والشاغل فكورك محروس مقفل بابو
دربو صعيب عليك كم غيرك اتسكّابو
جمبو مدرعات واقف عليها جنابو

[طارق صديق كانديك]

ود مختار حباب زولا عزيزا جانا
الراكوبة مَهَلَة فيها النفوس طيبانا
ودالزين وسجمان هم رؤوس تيجانا
سارة وتماضر ومي معليات من شانا

مع تقديري لجميع من كتب

مرحبتين حبابك آخوي.

[سجمان]

المشاركة الأصلية كتبت بواسطة سارة

الوجع العلى حار الطبيب فى دربو
ساكن فى القليب وكبيدتى ما بتخبربو
الشاغل فؤادى وكل الخلوق دارينبو
عطًاى باليمين واليسرى ما بتعلمبو

كُرْ

ننشل من صباح والري موالي سوانا
نبهل في الغنا والشكرة تب تختانا
مكتوب في الأمد يالسارة نبقى حزانى
ما نضوق ليم حبيب لمن يحين مثوانا

[سجمان]

المشاركة الأصلية كتبت بواسطة مي هاشم

لا لا لا .. موبااااااااااااالغة؟!!
انا كُتّ وين يعني؟؟!!


ما بقدر عليكم والله.. إلاّ أكب القهوة واغسل العدة بعد ده..

والله في البال لكن الوكت داهمني فعذراً أختي..

أردب عذر معاو مكنتل حزني
ما ودعت ناس "فيحا" الوكت أوجزني
يا مي النضم بي عذري تب أعجزني
طالبين السماح الشيخ حسن يحجزني

[زول الله]

المشاركة الأصلية كتبت بواسطة سجمان

كُرْ

ننشل من صباح والري موالي سوانا
نبهل في الغنا والشكرة تب تختانا
مكتوب في الأمد يالسارة نبقى حزانى
ما نضوق ليم حبيب لمن يحين مثوانا

آآمنت بالله
آآمنت بالله
صح لسانك يالـ ماك سجمان




اقول قولي هذا واستغفر الله لي.............

[حافظ حسن مختار]

المشاركة الأصلية كتبت بواسطة طارق صديق كانديك

ود مختار حباب زولا عزيزا جانا
الراكوبة مَهَلَة فيها النفوس طيبانا
ودالزين وسجمان هم رؤوس تيجانا
سارة وتماضر ومي معليات من شانا

مع تقديري لجميع من كتب

مرحبتين حبابك آخوي.

حباب كانديك نسمة جــات طالانا
تاني مرحبتين بي حروفك النديانا
طوعت القوافـي بدعته في أوزانا
والكلام عندي بقى زي التكنو رطانا

[سارة]

المشاركة الأصلية كتبت بواسطة سجمان

كُرْ

ننشل من صباح والري موالي سوانا
نبهل في الغنا والشكرة تب تختانا
مكتوب في الأمد يالسارة نبقى حزانى
ما نضوق ليم حبيب لمن يحين مثوانا

ننشل من وكت وحر السموم لافحانا
ننظم فى القصيد وحديثنا كلو رطانا
مكتوب فى الجبين لا يجينا لا يطرانا
تتخابت قلوبنا زى مدافع الدانا

وتانى كروكر على خالد غالى

[حافظ حسن مختار]

المشاركة الأصلية كتبت بواسطة سارة

ننشل من وكت وحر السموم لافحانا
ننظم فى القصيد وحديثنا كلو رطانا
مكتوب فى الجبين لا يجينا لا يطرانا
تتخابت قلوبنا زى مدافع الدانا

وتانى كروكر على خالد غالى

قول لي ام سماح هجرانك نار لافحانا
و كاتمنو ريدك الا الأشواق فاضحانا
الخلاني بين حجر الرحى ومسحانا
في سوق هواك تجارتنا مي ربحانا

كر ساي...