وفاة الشاعر العظيم محمد الحسن سالم حميد

[النور يوسف محمد]

بسم الله الرحمن الرحيم

لاحول ولا قوة إلا بالله
إنا لله وإنا إليه راجعون ...

[مجاهد عبد الرحمن]

انا لله وانا اليه راجعون ...
رحمة الله عليك يا حميد ...
مصطفى
وردي
حميد
تاني البلد فضل فيها منو
رحمة الله عليهم ...

[ام التيمان]

حميد اراد الحياة
حفر فى الارض
و اراد الموت
حفرو له الارض

يا حميد انت لست براك
فى الطريق كتار ماشين معاك
بس انت خطواتك سريعة سبقتهم

[الفاتح]

خبر مؤسف ياخ لا حولتن

[عبد الجليل سليمان]

ذهب حميد إلى (حاله) بمستشفى أم درمان ، إثر حادث سير بطريق مروي، الآن ذهب الزميلان محمد جمال وأمل أبو القاسم .. لإلقاء نظرة أخير على الجثمان بمشرحة مستشفى أم درمان ...
أحاول .. لو تمكنت .. عمل بروفايل عن الراحل المقيم في عدد الغد .. أو (بعد غد) بحسب وضعي النفسي ...

[سمراء]

الى جنات الخلود حميد
والعزاء موصول لكل محبيه بالوطن
ولك عبد الجليل

[احمد زين]

توفى حميد بمستشفى امبدة
وسيوارى جثمانه اليوم بمقابر البنداري بالحاج يوسف

له الرحمة
ولا حول ولا قوة الا بالله

[يحي عثمان عيسي]

الآن فهمنا ارضا سلاح

اللهم لا راد لقضائك
إنا لله وأنا إليه راجعون
نعزي الشعب السوداني والسودان
النيل والصحراء والغاب
رحل من احبنا واحب السودان
لك الرحمة يا حميد
وحقا يعجل الله بخيارنا

[شبارقة]

لاحول ولا قوة إلا بالله

إنا لله وإنا إليه راجعون ...

[خال فاطنة]

لا حولا و لا قوة إلا بالله

ربنا يرحمه و يسكنه فسيح الجنات

[جيجي]

له الرحمة
ولاله
ولمحبيه جميعا العزاء

[رحاب سليمان]

يوم حزين جدًا
فقد موجع

[واحة]

يا ما شايلك بيني حايم
لا الليالي المخملية
لا العمارات السوامق
لا الأسامي الأجنبية
بتمحى من عيني ملامح
وإنتي جاية المغربية
دايشي داقسي المغربية
وشك المكدود مكندك
صمصونايتك زمزمية

ربنا يرحمه ... ويصبرك ويصبر ناس كتار هنا وشعبنا الذى ارتحل الجميلين
عنه تباعاً .... !!! اللهم أرحمهم ..

واحة

[عبد الجليل سليمان]

نورا

وكتين يضيع
عرق الجباه الشُّم
شمار فى مرقة ..
آه .. يا نورة آه
من دربك التوّر
نفس خيل الصبر
فتـّر خطاوى الشوق
وراه .. يانورة .. آه
ساعة الشموس الغُر تهضلم
تلحق الصِّح .. فى المغارب
يدفر الضو الكهارب
تستر المدن السرابية ..
الضبابية .. الكآبة
حائط التيه .. والطشاشات ..
فوق قفيِّك يا أمْ عوارض...
يا أمْ عوارض .. مو دُعاشة
ماها شبـُّورة وتقيف ..
جايى ليك يا نورة غيمة
تملا ماعونِك خريف
يملا عينيكى ويفضـِّل
يروى جوّاك العطاشة
جاة ليك يا نورة غيمة
تملا ماعونك خريف .
**************
يا نفس فجر القصايد يا بلادى
دا القطع قلب الروادى ..
بى اللّواج الجاى .. وغادى
ماهو صوتك .. لاها صورتك
هى البترقش نادى
فوق صدر الجرايد
إنتى يا حُضن الصحارى
شُفّع العرب الفتارى
البفنـّوا الشايلا إيدمْ
ويجروا كايسين القطارى
لا سراب الصحرا .. موية
ولا حُجار سلّوم .. موائد
حالكم البصرخ وينادى
ياوطن عز الشدائد
*************
يا هُدى الناس الحيارى
يا ندى الفجر الببلِّل
نور عِوينات الفقارى
جايى ليك .. آه جايى ليك
جاى ليك يا نورة افة
آفة .. للسوس البنقـِّر

عود عِشيماً داخرو فيك
أصلى لمـّن أدور أجيك ..
بجيك ....
لا بتعجّزنى المسافة
ولا بقيف بيناتنا عارض
لا الظروف تمسك فى إيدى
ولا من الأيام .. مخافة
يا نفس فجر القصايد يا بلادى
ما ضِهِبْ فى بعدى عنـِّك
أصلى متغرِّب عشانك
راضى بى الجايينى .. منـِّك
ما شكيت شُح اليالى ..
وما بكيت نُحْ .. شِلتوا حالى
رغم إنو الحال بيفضح
إلاّ كٌتْ فى الحارة بصرُخ :
يا وطن عِز الشدايد

يا وطن عِز الشدايد
يا وطن عِز الشدايد

[عبد الجليل سليمان]

شوك الشوق
محمد الحسن حميد
*********
شوك الشوق لى الشوف آ خَىْ
ضارب قطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو