في بيتنا وبين جدران غرفتي وبهكذا مناسبات ماكان العيد عندي يعدو عن صلاه اؤديها بالخلاء المجاور للمسيد
اكون فيها اخر الحاضرين واول المغادرين لساحتها هروبا قبل الانفضاض والفرص المتاحه للبعض في الاحتضان والاحتكاك
بدعوي التهاني والسلام .
لا ادري حتي مايقال علي سبيل التهنئه ولا مفردات المجامله في الرد عليها
ان هي الا بضع همهمات لا يفهم منها شيئا اتمتم بها ان فاجئني احدهم مهنئا قبل ان الوذ بغرفتي طيله تلك الايام المستباحه .
ولم يتوقف سيل الافواج المهنئه حتي غابت الشمس وانا مازلت بغرفه سعاد قد عيل صبري في انتظار انفضاضهم
مشتت الفكر والاحساس بالغربه والتوجس من الأت قد حسما امري في المغادره بذات الليله
ثم اطلت علي سعاد بعد دهر تعلن انفراج ازمتي قبيل اذان العشاء فتحت لي الباب ثم استأذنت دقائق لاداء الصلاه
بلا تصريح او استئذان اخذت حقيبتي نحو الباب الخارجي للسيدات فلمحتني سعاد وسارعت تنادي علي اخاها فلحق بي خارجا
يجبرني علي الرجوع ويحملني حملا صوب غرفته مباشره ... ما ان فك اساري حتي صحت به
_ عصام انا ما حقدر اكمل للصباح في بيتكم ده
_ ليه بس يا ستو .... عشان الناس والاهل دي فتره اعياد وبتنتهي
_ فتره اعياد وبتنتهي ...... اوكي
اها في الفتره دي يا حبيبي انا حاختفي وين من عيونهم وناسكم ديلا مابقدر عليهم ياخي نسوانهم ما فضل الا يقوم ليهن
شنبات ودقون ..... باقي لي لو غنمايه عندهم جابت عتود ساي بي خمسه كرعين بكتلو الاتنين
تقولوا لي البلوله قلب بت ....و بعد شويه ناسكم خلاس نسو وسموه البتول
_ فرصـــــــه فرصه عشان أسمعك والغي عقلي من تاني أبدا وحياتك كان طرت السما وجيت داقي الواطه
ما حاسمع منك حرف ... أنت وعدتني كان ما ارتحت تخليني والدايرا وبري أنا الزى ده ما بقدر عليه
حسي دي توديني موقف السوق الشعبي ... الشمس دي ما بتطلع علي إلا في بيت جدي
عصام أنا جادة معاك ما تقنب تعاين لي كده قوم غير هدومك دي وامرقني
لم يتمالك نفسه فانفجر ضاحكا في وجهي وصوت سعاد يأتينا من خارج الغرفه
_ نق نق نق نق ..... باقية لي الشغله دي ما هي مكتسبه الظاهر النقه دي طلعت جينة من جينات الإناث
أكملت جملتها وهي تقف أزائنا وقد عقدت ساعديها علي صدرها بينما عصام يحاول السيطرة علي ضحكاته
وبعينيه يسألني ألا اغضب وأنا أحاول عبثا التماسك وعقلي قد أنشغل بما قد تناهي إلي سمعها من حديثي فواصلت
رغم الارتباك الذي استبد بي
_ وحاتك يا اخوي بعد السمعتو ده قطع شك مره مره ماف كلام .... مالكم سكتو النبي واصلوا وصحوا لينا حاجه نعمات
تجي تسمع وبالمره كمان نجيب الجيران
وكانها راجعت نفسها لما رأت حالي وما انا عليه من ضيق فازاحت ماعلي قسماتها من مزاح ثم أكملت وهي تجلس قبالتنا
_ ماتقولي عروب وجايه أتطفل عليكم .. أنا كنت بحاول ألطف الجو شويه ما اكتر قبال صوتكم يصل الجيران
الظاهر كلام الحجة بدل ما يريحك قلق بيك اكتر ..
أولا بتول البتتخيليها شخصيه خياليه ... دي والده خطيبي حسام ودي ما حاله استثنائية
دي حاله من حالات موجودة وبأعداد ما قليله بس بحصل عليها تعتيم بدرجه كبيره عشان مجتمعنا ممكن يتقبل سعاد تبقي سعيد
وداد تبقي وليد و سلمي تبقي سليم بس لي يوم الساعة ماحيتقبل البلوله يبقي البتول ... إلا بالجلالة
علشان كده البلولات بيصححن أجناسهن في سكات بعيد عن القوالاتـــ
_ سعاد أنتي أول واحده عارفه أن حالتي مختلفة عن حاله بتول ..
_ ايوه وأنا صاحبه الاقتراح بأننا نشخص حالتك بشكل مغلوط ومخالف للحقيقة.. ونربط مابينك وبين بتول عشان
_ أظن انو المريتي بيهو بيكفي للرد علي سؤالك ...
جربتي كم مره تقنعي الناس بمشكلتك الحقيقية ورأي العلم فيها .....شيوخ ...دكاترة....وناس بيتكم ..
لسه ما اقتنعتي إنهم من الأساس مادايرين يسمعوا ولا حيسمعوا
ممكن تلقي فيهم ناس متعاطفين و خايفين عليكي بالجد زي استاذكم حيدر ...او امك ....او اخوانك ....
بس في النهايه تعاطفهم ده عامل زي الدبه الكتلت صاحبا
تفتكري والدتك متبلده الاحساس للدرجه الما بتلاحظ فيها حالتك من و أنتي صغيره ...
أكيد لا .... وأكيد شايفه وحاسة ومقتنعة بس هي زى البقية خايفين من المجتمع وكل همهم انك ما تكسري تابو الذكورة
المقدس.. لو جبتي ليهم ميه فتوي وفتوي بتأيد علاجك ..... ماحتشيلي من جواهم فهم شيال التقيله وتراث القبيله
لو حتتدمري نفسيا اتدمري حيسوقوكي لدكتور حيوان مابتخير عن دكتور أبوك ولا يسلسلوكي ويقولوا جان ..
بلعي مهدئات .... بلعي لآمن تدمني ... مامشكله النوم للزيك راحة ليهم برضو ....لحد مايحلا الحلال أو الله يشيل أمانته.
أنتي عارفه أن تجاهلهم ممكن يصل لدرجه أنهم يتقبلوا علي مضض انك تعيشي حياتك بالدس بشكل منحرف ...
بس ما حيقبلوا كونك تكسري مفاهيمهم أو تهزي أرضيتهم وتقولي آه بس في العلن
الغريبة انك دايما بتستخدمي مقوله الغبي هو البيشرح للحمير وينتظر فهم ...
_ ممكن يكون كلامك منطقي..... بس برضو ماجاوبتي علي سؤالي الهدف شنو ...
أهلي وكل البعرفوا مشكلتي عارفين تشخيصا -اضطراب في الهويه الجنسيه – حا أجي حسه وأقول ليهم معليش يا جماعه
كمان مسألة استغلال قصه بتول عشان خالتي نعمات تتقبل وجودي بيناتكم ده أسلوب ما تمام وغير أخلاقي
ولا ممكن اقبل إني أتخت في حته شينه بالشكل ده... حتي لو ما كان جدي ظهر في الصورة واضطربت ارجع بيتنا
وبعدين لو تسمحي لي أسألك بصراحة ..... أنتي حتستفيدي شنو ؟؟؟
أنا ممكن اصدق انك تتفهمي مشكلتي عشان ده مجال دراستك وشغلك .. بس كونك تقتنعي بالبيني وبين عصام للدرجة دي ما ظنيت
أكيد من جواكي بتتمني لو ما ظهرت في حياته من أصله وما بلومك عشان إحساسك ما بفرق عن إحساسي
بس معليش يا سعاد بغض النظر عن هدفك الغير مفهوم بالنسبة لي .... أنا ما محتاج للدرجة الحتخليني أتطفل بالكضب
علي حياه ناس أنا متأكد إنهم من جواهم بيتمنو لو اختفي من حياتهم .
_ أنا حريحك وأتكلم معاك بصراحة بس الجزء الأول بتاع تغيير التشخيص لسه ما انتهي ..حنرجع ليه بعدين
أما مسالة رأيي في علاقتك بي عصام فما حاكذب عليكي وأقول انو علاقتكم دي قدرت استوعبا في البداية
بس زي ما قلتي ما كانت مشكلتي انتي ..... المشكله كانت فيني انا وفي خوفي علي عصام
بحكم المهنه فاهمه مشكلتك شنو ومريت علي حالات مشابهه فممكن افهمك انتي بس هو لا......
قدر ما حاولت ما قدرت أفهم طبيعه احساسه تجاهك ولا هو متمسك بيك بالشكل الغريب ده ليه ..
حسب فهمي والبعرفو عنه ...عصام ماعندو مشكله تواصل وليهو تجاربه العاطفيه
والفرق البيناتكم في العمر كبير ماتشوفيه قرا معاك تقولي قريب من عمرك عصام ده اصغر مني بتلاته سنه
لو ماكانت الظروف المرينا بيها حسي كان يكون مخلص جامعه من زمن ....
وكمان قبال يعرفك كان خاشي في مشروع خطوبه جادي...
قاطعها عصام مستنكرا وقد عقد ما بين حاجبيه بطريقه مسرحيه
_ عليك الله يا سعاد ازبطي كلامك ...ماتجيبي لينا مشاكل من مافي نحنا ماناقصين
_ معليش ما بقصد خطوبه رسميه .... زي ماتقولي شبه اتفاق علي زوله اختارتا الحاجه وهو ما كان معترض
بس الكلام الجد اتأجل بي سبب حساسيته من مسأله التعليم وكده .وكنا منتظرين بس يخش الجامعه والموضوع يبقي رسمي ..
شنو الحصل وغيرو.... ده كان علامه استفهام كبيره ما عرفت احللا في الوقت داك
وبعد عرفت يمكن اتعاطفت معاك اي .... بس ما للدرجه البتخليني نفسيا اتقبل ارتباط اخوي الوحيد يكون بالشكل ده ...
بس قلت ما حاتدخل برأيي عشان شفت انو هو المفروض يصل براهو للاقتناع بانو العلاقه دي ما طبيعيه
وما ممكن تستمر زي ماهو قايل ... بس عصام كان كل مايوم بيزيد تمسك بيك اكتر ...واكتر
تعرفي الاكاديميات والممكن نتفهمو بي عقولنا شي ....والواقع والممكن نتقبله نفسيا واجتماعيا شي تاني خالص
بالذات لو اتصادمت معانا بشكل مباشر ساعتا بنلقي روحنا لغينا عقولنا واتعاملنا بالشي المتوارث والخوف من مخالفه المجتمع
اها ده كان احساسي تجاهك الاول وده كان السبب المباشر الخلاني اعتذر عن مواصله جلساتك معاي
وبي صراحه اكتر حاقول ليك اني في الفتره ديك عديت العلاقه دي مشكله جديده اتضافت لمشاكل أسرتنا ...
لحدي ما بدأت حاله عصام النفسيه تتدهور بعد الحصل يوم المحكمه ... قدر ما حاولنا نطلعه من الحاله الهو فيها ماقدرنا
اربعه شهور يمرق من الصباح ومايجي خاشي الا نص الليل ...لا عارفين بيمش وين ولا بيقعد مع منو
خوفي من الحاصل عليه نساني كل شي وكل همي بقي انو يلم فيكي
وبعد زيارتك لينا في رمضان قررت خلاص اضع حد فاصل للصراع الجواي وبديت اعيد تفكير في العلاقه البيناتكم
حتي لو كنت من جواي ما قادره استوعبا او رافضاها عشان ببساطه لقيت انو مافي منطق بيخليني اتعامي واعمل رايحه
المحير اني بعد ماوصلت للنقطه دي ماحسيت اني بتعرف عليك لاول مره وكاني ما شفتك قبال كده ولا تابعتك في جلسات
لقيتك ...بتشبهينا كانك بالاساس واحده من ناس بيتنا ... افكارك .... تلقائيتك.... اسلوبك في الكلام
ويوم ما قرر ياخد موقف جاد معاك ويجيبك البيت كنت من جواي جد مرحبه بالفكره
سكتت للحظات ترفع اليها وجهي بكفها قبل ان تكمل
_ ولو بيريحك اعتبريني لسه من جواي ما مرتاحه للعلاقه دي والمفروض عليك في الحاله دي تثبتي لي ولي كل الناس اننا غلط
وانو انتو الصاح ولا شنو ..
اها ولحدي ما تثبتو الكلام ده الواقع بيقول سواء رضينا او ما رضينا فعلاقتكم دي بتمس كل المحيطين بيكم وبيتأثروا بيها
والحته دي بترجعنا لمسأله التشخيص الانتي رافضاهو .....
_ ياريت تسمعيني وتديني فرصه اطرح عليك وجهه نظري في الاول وبعدين ادينا رأيك
وختي في حساباتك انها فرصه احتمال ما تتكرر مره تانيه .
اولا ..... وجودك في بيتنا حيخليني مرتاحه و مطمنه علي امي واخوي وانا مسافره وطبعا كونك دايره تمشي القضارف
معناتا انك حتجهجي اخوي ده وحيكون مشتت مابينك وبين الوالده
كمان وجودك في بيتنا حيديكم فرصه تراجعو جديه ارتباطكم وتشوفوا اذا كنتو فعلا مستعدين تكملوا مع بعض مشواركم
ولا مامستعدين ومافي شي ممكن يأكد ليكم الشي ده الا الاحتكاك مع بعض علي ارض الواقع بعيد عن الافتراضات والاوهام
ثانيا ... حسب متطلبات العلاج انتي محتاجه فتره تعايش عملي لدمج جندرك بهويتك الاجتماعيه والفتره دي مابتقل عن السنه
وسته شهور تحت متابعه مختص
المطلب ده لما وضعوه كان الهدف منه وضع الحاله في تجربه واقعيه عشان تتاكد من كونها جاهزه فعلا للخطوه الاخيره .
بس للاسف الشرط ده لما وضعوه لا راعوا اختلاف البيئات ولا الثقافات المختلفه ..البتتحرج من مسأله التعايش دي وبترفضا
لاسباب دينيه اومجتمعيه ... زي مجتمعنا هنا فبالتالي الشرط حيكون تعجيزي للحالات الماحتقدر تنفذو
وانتي محتاجه لمحيط اجتماعي جديد بالنسبه ليك وسط ناس لا بتعرفيهم لا بعرفوك عشان ما تقدري تحققي فيهو المطلب ده .
ووجودك هنا حيوفر ليكي البيئه المناسبه لانك تحققي شرط المعايشه العمليه ..
عشان في منطقتنا هنا لافي زول بيعرفك ولا زول شافك قبال كده ... وماتخافي ما حتكوني محتاجه لاي تغيير في شكلك
غير ما تشيلي شعيرات دقنك دي وتغيري لبسك عادي ماحيفضل غير تعريفك للاهل والجيران ونلاقي سبب منطقي يبرر
وجود بت غريبه في بيت مافيهو بنات بعد ما اسافر اما السبب التالت فخاص بالحاجه نعمات فمهما كانت متسامحه او طيبه فهي
في النهايه ام وفي عمرها ده ماحتتفهم ارتباطكم الا لو ربطناه بحدث مر عليها قبل كده وقدرت تستوعبو وتدرك كل ابعاده وتكون
متطمنه لمألاته ومادام انتو الاتنين متمسكين ببعض للدرجه دي وحسب الشايفاهو فعلاقتكم لا سطحيه ولا عابره ولا مبنيه علي عطف
او شفقه يبقي مافي أي داعي نقلق بالحاجه نعمات وندخلا في معمعه جنوسيه دماغ وجندريات ما حتفقه فيها شي ... ولا شنو !!
اها الاسباب الذكرتهم بتشكل اهدافنا من وجودك بيناتنا ومحاولتنا لايجاد حل جذري للمشكله ...
وطالما ان عالمنا ده بيشكل بالنسبه ليك بيئه جديده وافراده ماعندهم أي خلفيه مسبقه عنك فمن المنطقي
اننا نكون اتعلمنا من اخطائنا السابقه وما نعاود أصطحابها معانا ... واكيد انتي حسي أمنتي انو الطريق المستقيم في بلادنا
هو اطول الطرق واوعرها واضناها
ولو التشخيص الجديد تاعبك نفسيا للدرجه الحتخليكي ترفضي الفرصه الحتحل ليكي مشكلتك فممكن تنظري ليهو علي انه اللغه
الاتعلمتيها من تجاربك السابقه لمخاطبه الحمير والحد من تصرفاتهم الغبيه
في الاستراحه الفاصله اقتربت منه تتملكني رغبه مجنونه لا يخفف منها التصاقي به ولا يلجمها عموميه المكان وسطوع
الاضواء فمال علي اذني متسائلا أمازلتي ترغبين في متابعه العرض فاجبته ... بلا نافيه علي استحياء فاضاف
انا ايضا لم يعد يستهويني ما شغلك عني سالبا اهتمامك ...
خارج القاعه كان الطريق باضاءته الخافته يختلف تماما عما عهدته صباحا وظلال الاشجار علي جانبي الطريق تحجب شيئا من ملامحه
وتضفي ألقا مختلفا علي المباني القديمه المتراصه علي جانبه و الامان الذي استشعرته بقربه جعل كل ما الفته من قبل يختلف في نظري
وادراكي فامتدت كفي متسلله في خفيه وحذر لتتأبط ذراعه وانا اريح راسي بالكاد علي مرفقه فايقنت اني امتلكت الكون بقربه..
لا ادري ان كان لليل سحره الذي لايقاوم .. ام سطوه وجود حبيبي علي الزمان والمكان.
بدون تخطيط مسبق وجدنا ارجلنا تقودنا الي بقعتنا المفضله من شارع النيل ....
حتي مقعدنا الحجري كان هذه المره مختلفا تماما عما سبق ولاول مره يضمني به دون ان استحي من النظرالي عيناه
فيرتعش طرف شفتي في بله ...
بادرني مترنما
_ .. رفقا بمن يهوااااك ... بالله يا ا نت ..... لا زلت تأذيني وأقولك احسنت
_ .. يا الرقت في نظري .....هل تدري مين انت أذهلت أفكــــــاري وأسهرتني ونمتــــــــــــ
فراح بحماسه يكمل وكانه يستحثني للمواصله
_ ... بالله و بالله وبالله يا انت .... رفقا بمن يهواكـ ......... هههههه خلاص كفايه كده انا صوتي شين
_ ابسط شي ارتباط في العلن بدل حياه الوطاويط الانت عايشا معاي
_ سبحان الله بتشتكي من تدخل الناس في حياتك ومحاولاتهم تشكيلها حسب افهامهم وبعدين تجي تمارسي معاي نفس الاسلوب
_ الوضع مختلف يا عصام مافي مجال اصلا للمقارنه .
_ لا يا عسل الاسلوب واحد بس الدافع مختلف هم بتدخلهم في حياتك مدفوعين بخوفهم عليكي اما انتي فعين في الجنه وعين في النار
من جواك حابه تصدقي ريدتي ليك بس عقلك ما قادر يتقبل الفكره
_ .............................
_ ماعلينا خلينا نرجع للنقطه الاولي اها في نظرك مفتقد تاني شنو كمان
_ ارتباطك بأنثي طبيعيه
عقد ما بين حاجبيه بطريقه مسرحيه متسائلا
_ انثي ..... طبيعيه ...!!! هو انا مرتبط بفرانكشتاين
فلكزته في كتفه مغضبه
_عصام ماتهزر ...انا جاده
_ عليك الله ياتو جديه وانتي نظرتك للانوثه حاصراها في نهود متأرجحه وكفول مترنحه ...
ودايما اشباه كوثر عاملات ليك بعبع ....
_ والله دي ما نظرتي انا ... دي نظرتك انت وباقي الرجال عيونكم مابيملاها غير التراب
_ ده شنو الافتئات ده .... أبونا أدم ربنا ماخلق ليه غير انثي واحده تملا عليه حياته
وانا بالله عليك اعاين بره ليه وربنا انعم علي بانثي مختلفه عن أي انثي شفتها ولو حنتكلم عن منو الطبيعي فاكيد حتكوني انتي
اطلعي من عقدك دي وعايني حولك حتلقي .. مشدات .. كريمات .. جفون بتغير الوانا زي الحربويه
مشيه متكلفه .. قعده محسوبه .. ونبرات صوت مزبوطه علي مقياس فيراني .
تفتكري احساس الانوثه جواهن ممكن يشبه الجواكي
احساسك كان ممكن تتناسيه وتتخاذلي وتتماهي وكل الحولك كانوا حيدعموك بس انتي فضلتي تموتي ولا انك تخنقي الانثي الجواك .
في الوقت الفيهو بنات كتير من البتوصفيهن انهم طبيعيات أتمنو في مرحله من مراحل حياتهن لو كانوا رجال وغيرهن عشان ما
ينجحوا في الحياه فقدوا كتير من انوتهن وركبوا وشوش ذكوريه ماعرفن يواجهن مشاكلهن مع القيود والاختزال وبدل ما يحاولن
يغيروا نظره المجتمع ويحلحلن قيودهن كانت امنياتهن بتتسق مع نفس الفهم المجتمعي انو المستحق للنجاح والحريه فقط هم الرجال
اما انتي ورغم كل المشاكل الواجهتيها ما فكرتي يوم تستفيدي حتي من مميزات جنسك المجبوره عليه
_ عاجبك يعني شكلي الحسي وما مسبب ليك مشكله
_ شكلك الحالي وقناع الراجل الانتي لابساه انا مدين ليهم عشان مجال الحريه المتاح لينا بسببهم
لو ما كنتي بتعاني من مشكلتك دي وجمعتنا الصدف في يوم اكيد كنا حنمر علي بعض مرور الكرام
احتمال واحد فينا يعجب بالتاني وزي العاده كان الاعجاب حيتنسي بسرعه زي ما جا بسرعه
ولولا وضعك الماعاجبك ده ما كانت علاقتنا بتلقائيه ممكن تصل لعمق بالشكل ده ... نجضتيني يا وسواسه علي نار هاديه .
_ بس أي واحده غيري ممكن تجيب منك اطفال وتخـــ....
_ تاني موضوع الاولاد .... تاني يا ايليا .....
سمح اعمل ليك شنو بالضبط كده علشان تفهمي اني مابفكر فيهو.
_ سعاد فتحت معاي الموضوع ده اكتر من مره .... الظاهر دايره تختها لي واضحه زي الشمس من البدايه
_ وانتي تسمحي ليها تتدخل في مسأله زي دي ليه من اصلو ... مشـ
قاطعته
_ من حقها يا عصام انت اخوها الوحيد وخايفه عليك ... وبعدين مهما انكرت انت وادعيت ان الموضوع مامهم
ما حتقنعني بكلامك ده دي غريزه ما مسأله من السهل تتجاوزا
_ سمح وانتي جاوبتيها بي شنو
_ تفتكر يعني ممكن ارد بشنو .... زواجك من عدمه دي مسأله راجعه ليك لا بيدي اعترض عليها ولا اقول فيها راي
كل الحعملو وقتا اني انسحب من حياتك في سكات
_ يعني لو دي الصوره الانتي راسماها لحياتنا في المستقبل يبقي ما حنتقدم مع بعض خطوه واحده
الله يجازيكي يا سعاد ..... علشان كده شابكاني بطلت أبني قصور في الخيال ...
و الله والله والله العظيم تلاته انا ومن قبال ما اعرفك قناعاتي في المساله دي منتهيه ومحسومه وحاقولا ليك للمره الاخيره
الوحيده الكانت ممكن تغير قناعاتي دي هي انتي وبس وعشان اقفل ليك الباب ده نهائي مستعد من بكره اعمل عمليه قطع للوعاء
الناقل عشان ننتهي من الحته دي نهائي
انا كل الدايره منك تثقي في نفسك وفي البينا شويه وتدينا فرصه بدون شكوكك وافكارك السلبيه دي
ختي املك في الله واصبري معاي الفتره دي ...
عليك الله جنبي طاقاتك السلبيه دي شويه واعتبري معاناتنا الحسي ابتلا من الرحمنـــ
قاطعته في حده
_ ماشايف انو مصطلح ابتلا ده ما بيتوافق مع مسمي الرحمن
_ الابتلا منهج رباني الله بيختص بيه قله من خلقه لمحبته ورحمتــ
اسكته مقاطعه مره اخري
_ عصــــام .... علشان خاطري علشان خاطري اتجاوز الحته دي
_ طيب اهدي شويه ..... انتي قلبتي وشك كده مره واحده مالك
_ اسفه جد ماتزعل مني بس خلينا نتجاوز الحته دي ارجوك ونرجع لموضوعنا الاساسي
_ انتي عارفه اني ما ممكن ازعل منك ... بس ما فهمت الانقلاب الحصل سببه شنو
_ في حاجات بتخصك يا عصام ومامن حقي اناقشك في أي تفصيله فيها ... بس خلال كلامــ
قاطعني مكملا ردي علي لسانه
_أهـــــــــا بس من خلال كلامي البحشر فيه دعاء أو بحسن فيهو الظن بالله بقيت أثير أعصابك .... صاح كده
_ تقريبا .... لدرجه بقيت ما بقدر اتحمل اسمع او اجاريك
_ أنتي بتلومي الله علي حالك ولا خلاص فقدتي ايمانك بوجود إله من الأصل ...
_ سؤالك عويص ... والاجابه عليه حتفتح علينا باب نقاش مابيتسد
_ جاوبيني باختصار حتي لو كانت إجابتك مكونه من كلمه واحده بس
_ سؤالك ده ماحصل واجهت بيهو نفسي قبال كده .. عشان كده حيكون صعب اقدر أجاوبك عليه بنعم أو لا
يمكن لسه جواي إيمان ويمكن الجواي مجرد اعتقاد اتغرس زي باقي حاجات كتيره اتغرست في ادمغتنا لحد مابقت
من المسلمات ... بصراحه ماعارفه
اما حته اني بلوم الله علي حالي فاحتمال يكون فيها شي من الصحه بس ماهو لوم بقدر ماهو عتاب
_طيب كيف بتوجهي عتابك لجهه انتي شاكه في وجودها اصلا
_ أهــــــــا مش قلت ليك سؤالك ده حيقلب قعدتنا لنقاش ماحينتهي خلينا نتجاوز الحته دي عشان خاطري
_ عشان خاطري انتي تستحمليني شويه وتجاوبيني
_ حاضر يا سيدي ححاول ابسط ليك وجهه نظري قدر ما حاقدر
التجارب العشتها خلتني اقرر اتجاوز أي شي ليه علاقه بالدين وما اتقبل أي شي الا لو كان عقلاني
بس في شي واحد ما قدرت اتجاوزه وهو فكره وجود إله لانها بتحسسني بارتياح وامان نفسي
اكتر من فكره العدميه اوالطبيعه الام .... اما من الناحيه العقليه فحقول ليك انا ماعارفه بالجد
بس حتي بفرض وجوده الاكيد او الافتراضي جواي فاكيد هو إله بيختلف تماما عن الإله البتعرفوه انتو ...
_ مشكلتك اتصدمتي بالجماعات الوهابيه والـــــ ...
_ عاين يا ود الناس انا عارفه انت داير تصل لشنو وقدر ما حاشرح ليك ماحتفهم طبيعه الصراع الحاصل جواي
كل البقدر اقوله ليك قبال ما تحاول تنال عن طريقي حمر النعم راجع معتقداتك وجاوب لي عن سؤالي الما لقيت ليه اجابه لحد حسه
وكلمني عن مفهومك عن العداله الالهيه وكيف ممكن استوعب فكره اللعنه البتطاردني من خلال أي تصرف يبدر عني والهو في الاصل
ناتج عن اراده الهيه في خلقي ولحد ما تجاوبني اجابه فقهيه علميه بادله واثباتات من مرجعياتك السنيه بعيدا عن العواطف والكلام
الانشائي والمفروض انه يكون ...... بتمناك تحترم احساسي وتمشي معاي بـــ لكم دينكم ولي دين .
_ عايني يمكن ما اكون متبحر زيك واحتمال معلوماتي ما بالقدر البيخليني ادخل معاك في نقاش بالشكل ده
بس انا يقيني في رحمه الله وعدالته اكبر من الفهم الضيق الاتصدمتي بيهو بسبب مجموعه متخلفين .....
_ عصام يقينك البيخليك تعلي من سقف توقعاتك في رحمه الإله وعدالته انت بنيته عن طريق مفهوم ديني معين رسم ليك صفات الاله
وحدد ليك اسباب رضاه واسباب سخطه اللي بيشكل الالتزام بيهم درجه علاقتك بيه وانتظارك لرحماته او تخوفك من عقابه ....
صح ولا غلط
_ ماغلط اكيد
_ طالما انه اكيد صح وماغلط طيب كيف عايز تتجاوز القواعد الانت بتعتنقها وتبتدع ليك مفاهيم عن الإهك من خلال فهمك انت
واحساسك وألف باء فكر كهنوتي ... اتباع لا ابتداع ... والتفكير خطيه ....ومحاوله الفهم فتنه
علشان عقول الخلف اعجز من انها تفهم وتجتهد وتستوعب زي عقول السلف ...............
وبناء علي كل الفات نستنتج انك لو تابعت احساسك الفطري ده حتخرج لا محاله من دينك حسب فهمهم وماتقول لي انا مابؤمن
بالكهنوت في الاسلام ... وبتبع الحق الاحق ان يتبع وباقي الشعارات الرنانه دي عشان الحقيقه مختلفه تماما .............
بالمناسبه لفت نظري لحاجه كانت غايبه عني ....!!
_ الهي شنو دي ؟؟؟
_ في حاجز بيناتنا ماخطر لي قبال كده .... انت مسلم وانا ياداب بفتش عن طريق عقلاني يوصلني للرب
وده معناتو يا ابقي كتابيه يا اتحول لمنافقه ...
اه نسيت .... ممكن اعيش علي امل رجوع عصر الجواري من تاني و ابقي ملك يمينك ...
شفت كيف اللعنات البتسميها ناتجه عن فهم ضيق وقاصر بتطاردني في كل مكان ......
_ بس انـــ
_ عصــــــــام !!!!
_ ياعيون عصام
_ شكلك مستكتر علي أقضي معاك ساعه صفا ..... نزعت بجداره الاحساس الرومانسي الكان ماليني
_ انا بالجد اسف ماقصدت اضايقك ولا كنت متخيل انك واصلــــ
قاطعته
_ ولا يهمك انا اتعودت خلاص .... يلا نرجع البيت
عارفه انك زي غيرك ما حاتقتنع بكلامي وحترجع تفتحو تاني بدون أي منطق جديد
_ انا بعتذر مره تانيه واوعدك ما حفتح أي سيره تضايقك مني ..... دي اول طلعه لينا مع بعض ما تخربيها
وبعدين ماممكن كل ما حنختلف حتقومي تنسحبي مني وتركبي لي وش المحسيه ده ... ولا زهجتي مني خلاص
_ دايما بعاني معاك تصرفاتنا يا حبيبي ما محكومه بمنطق رياضي اذا كان ... بما ان ... اذن ...
مش احتمال حابه نرجع بسرعه عشان دايراك بجنون ...وكلي احتياج انام الليله في حضنك للصباح
المافضل فيهو غير تمانيه ساعات حيروح منهم تلاته لحد ما نصل البيت
فاطلق تنهيده ثم نظر بعيني
_ عارفه من عرفتك وأنا مناي اخدك في حضني وأنوم ما أقوم تاني او اشق صدري واختك جواه ماتمرقي منه ابدا
_ أمممممممممممم بفرض عقلك فات كده ولا كده فواجب علي التوضيح .... عصام انا دايره حضنك بس
فسكت وطال صمته مربتا بلطف علي كفي مبتسما قبل ان يدنيه من شفتيه فيطبع قبله حانيه عليه
... لا انكر نعم اريدك لكني لست بهيميا ولا هكذا اراك ..... أتعلمين
حينما نصطدم بنظرات السفهاء الموجهه الينا في اتهام لا احفل ولا اكترث بما يتهامسون به لامزين
لطهاره مابيننا ..... ومابيننا في امس الحوجه لرحمات السماء فلما أستنزل بدلا عنها غضب الجبار ولعناته .
