يا أخي الكُبر دآ حاجة ثقيلة بشكل

[بابكر مخير]

المشاركة الأصلية كتبت بواسطة عبدالله الشقليني

عصر ما بعد الحقيقة ...

الحقيقة يا الحبيب
وااااحدة وهي أننا نعيش في دنينا هذه بأجل مكتوب
نحب في عالمنا أشياء ونكره أخرى
نستمتع بلحظات ونحزن في أخرى
لكنها بأيامها ولياليها تذهب..
أما عن عصرها...
قال تعالى:
وَالْعَصْرِ ۝ إِنَّ الْإِنْسَانَ لَفِي خُسْرٍ ۝ إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ
وهنا تتجلى حقيقة البشر الذين عجزوا عن التقيد بكتابهم فلا يتواصو بالحق فدنيانا الكذب ديننها وحتى الصبر أمره معدوم فمن من الناس إن أصابته مصيبة لا يجزع..

[بابكر مخير]

شتات أفكار وقرفة مع الأيام دي الصعيبة وعصيبة.
القلم حرن والمزاج معكنن
ترقب وكل التمني
أخير نقيف شوية ونجي راجعين بي فرحة وبروح شباب الثورة المنتصر بإذن الله

[بابكر مخير]

وإسترسالن في التفرغ التام لدعم الحاصل في البلد ومن بعد..
حيث نشد على أيدي ناس الوجعة بالداخل ونرفع القبعات إجلالن وعرفانن...
__________
شفت الفيديهو وهو بيلحط السم الهاري وإتذكرتهو بيرقص وفكرت في الزول دآ..
ليييييييه جنهو رقيص يكون أنه لا شغل ولا مشغلة ولا تأكيدن لي قولة عادل إمام ويكون كان مناهو "يشتغل رقاصة"..
بس كمان قلت يكون دي من عدم الوالدآ عقدة وإن كان هل من مسبب لي عدمها.
يمكن وخطرت ليآ أنه فعلن يمكن...
عندك شتن داسيهو؟؟
ما ترد هوووي
ما اليهو إتا يا الهلفوت
أخيرا عرفتا وعرفوا كل الناس
وشفنا حقيقتك يوم وقعت ورقة التوت
وإنكشف العنتوت (من عَنَتُ)
النصيبك فيهو ذي نصيب الحوت
آهااااااا
أتاريهو رقيصك داسيبو المختوت..
العاقل لو في عقل؟؟
كان بيرحل يفوت ولا بالخجلة ساااااااااكت
يموت.....
_____________
ولا شنهو يا "كوكي".. جيلينا خاتي بالك

[بابكر مخير]

كل ما تكبر في العمر ومع ضعف النظر..
بس شوفك بيكون ثاقب...
دحن حسي بالله عليكم..
منهو غيرنا العواجيز ديل شايفين أننا شعب
ضحكت على هملتهو الشعوب..
بالله عليكم دي ما مهزلة وحقارة وهملة
ضعف ووهن وإستهتار بي ذاتنا وقيمنا ووأصلنا..
بس برضك بثقابة ةنظر العواجيز...
بفتكر دآ فيهو شيتن واااااااااااااااااااااااااااااااااااااااااحد لو تلاحظوهو.
الخوف والوجل ضارب قلبه وواضح في ذكره "أنه السنة الجاية لو؟؟؟؟"


[youtube]https://www.youtube.com/watch?v=PhBZpkMYa9E[/youtube]

[بابكر مخير]

قريت في الجارة (الراكوبة) أنه تسنين عمر البشير بيقول أنه بكره بيكون 75 سنة يعني أنه دفعة..
ؤزعلت من نفسي بالجد؛ معقول أني برضك بيقيت ذيهو..
بفلت قول ساااااااكت وما بحترم عقول الناس..
طبعن حكاية الكتياي دآ ما بتعرض ليها لأني ما حاكم لكن برضهو سؤال وجيه، هل كنت برضك بكون ذيهو؟؟
حكاية الكضب دي ما موضوع القول لكن هو زول عسكري ظنيتهو إترشح لي رئاسة الجمهورية بعد ما ملص الكاكي (بفتكر دساتير الدنيا كلها ما بتسمح لموظف حكومي مدني ولا عسكري يكون رئيس جمهورية ما هو السيسي ملص الكاكي لمن بقى رئيس) لكنك برضه البشير متمسك بالكاكي والكضبة الكبيرة أنه لبس أزرق الشرطة وبي دبابير مشير أول وفي الشرطة حتى هاشم محمد عثمان ما حصل مشير أول..
سيييييييييييييييييييبكم من دآ كلهو، سيب الجيش وسيب الشرطة كمان بقى مولانا وفقيه وفاااااااااااااااات متولي الشعراوي هناااااااك..
الزول دآ شرح ليهو آية كريمة بصورة كدآ غايتهو...
والله غضب الناس هين ما هو البشر تتحكم فيهم العواطف، لكن غضب الله "لا حول ولا قوة إلا به منه"..
"وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ"
http://quran.ksu.edu.sa/tafseer/taba...a2-aya179.html
بعدين ملاحظة..
الزول دآ بيدي في الشرطة قرين لايت في أنها تكتل..
وييييييييين يا أمم يا متحدة
إتصور مظاهرة فيها 100 نفر..
يعني القصد إبادة جماعية..

[بابكر مخير]

عجبت لمن البشير قال: شعب معلم وحزنت أنه فات شرف حضور حصص المعلم دآ.
في الرجالة
في النخوة
في الحب والإحترام وإلا كان ما وصلنا لي الحالة دي...
اليوم أول يوم في السنة الجديدة وشعبنا المعلم
جانا بالجديد
تأكيداً لسلمية المظاهرات جلسو القرفصاء وقالوا بالعربي الفصيح.
إحنا قاعدين أطول منكم يا البشير
وفي الواطة الباكر حتتمرمطة فيها إتا وزبانيتك
وإحنا جلوس زحفنا ما حيقيف لمن يشيلك ذي السيل
وإحنا قاعدين نتفرج فيك وإتا بكرآ تقيف في منصة الإعدام
قالوا ليهو بالعربي الفصيح
وإحنا بي قعدتنا دي رجفناك لكن أعرف أننا لمن نقيف على طولنا البيصل لييييييييييين السمآ..
إلا بتابانا
"نهج جديد من شعب معلم وهو الذي علم الشعوب كيف تكون الثورات وكيف تدار دون الإضرار"

[بابكر مخير]

تكون الشماتة واحدة من مصاحبات الكِبر؟
حسي وبتابع أخبار الثورة بفكر في شيتن وااااااااحد..
هاشم محمد عثمان القدمهو حار علي حكومة البشير (مما إتعين والي للخرطوم الإنقاص ما شمت عافية) عامل كيف وخرطومه ذي ما يستشف من قول بروفسير مالك حسين؛ بقت مستعمرة عسكرية ومناصفة محكومة مع صلاح قوش..
بالله عليكم ما تنسوني لمن تجيبوهو..
عايز أحضر وأشوفه..
قبل مدة كان نُشر خبر وفيهو كيييييييييف أنه رفض تملق زول ليهو أول ما مسك والي..
خلاص يا هاشم الشريف (على وزن عمر الشريف).
دحن حسي أنا الشماتة كاتلاني عديييييييييييييييييل عليهو وعليهم أجمعين

[بابكر مخير]

في مثل بيقول؛ الهياب تحت الثياب ودآ بالضبط البتأيدهو القولة الإنجليزية "first impression". قول زولن ماشيلهو إنتربيو. مش بيلبس من الملابس ما يحسن مظهرهو. أما البهدلة هي النقيض للهياب..
الكُبر ديدنته ومالك روحه ياها البهدلة..
تكون زمان شيك ومالو هدومك، مشيتك بي قدلة وصوتك يلعلع "إن تكلمت تسمِع وإن ضربت توجِع " أمرك "قائم" و"عاطئك" مقدر..
حسي مع الكُبر ملو هدومك وين ما البنطلون يتنصل التقول في زول بيجرهو لي تحت ما هو أصله المساكات ذبلن وإرتخن. الزول بيبقى ملطشة، قولك ينسمع طشاش وتسمع أطشآ، تقول تحصل القوم وتتساير معاه. لكن ما إتا بتمشي بشيييييييش تقول سلحفاة والناس حوالينك تنطط ذي الكنقاروهات. مع الكُبر في مصيبة أنك بتكابر وتبقى لايوق التقول ملاح ويكاب وملح التقول شافع. تشوف في الخلق ونااااااااااااادر تشوف عوجت رقبتك..
دآ طبعن المشية مع الركب بتبقى شكلها كوميدي..
دآ أنا بقول كدآ..
طيب حال السابقني عمر وهو مع العلم تسنين وصل خمسة وسبعين..
غايتهو أنا كفاي ما عارف إتا كيف
لكن باقي ليا؟؟
كفاك وإتوكل على قول الفرجوني

[بابكر مخير]

• اليوم والبارحة
• يعني بي العربي؛ زمان وحسي..
• في الثانوي ومن وادي سيدنا مرقنا في أكتوبر وكله بالطريقة المتيسرة. مشي بالكرعين، ياعم "ما بتاعت فضل ظهر"، مع بتاعين الخضار في الحمير. أنا كنت محظوظ وقريب من أمدرمان بعد أن أخذ من التعب لقيت ليا كراكة وركبتها وبقيت وصلت على ظهر كراكة.
• النميري والبشير على ظهر دبابة ووصولهم قعدهم سنين في الحكم...
• مقارنة بسيطة إستعارة لا والله تملكت كل إنتباهي كلمة رئيس الجمهوري "حتى ما فيش حد يزعل" لمن ذكر أنه إبن عامل وبديت أفكر في فلسفة الجينات وأنها قلب الوراثة..
• وقلتا فعلن الجينات والوارثة ما شرطن شرطن هما الرابط. مثلن ولد راجل بخيل تلقاهو بيبحتر القروش بحترآ وولد شيخن ورع وبركة لمن يروب الموية سكير وعربيد..
• سيبك من الوراثة بتاعت الجينات ونجي للوراثة الحياتية الفعلية وبرضك ما ليها قواعد ثابتة وأنا من أكثر المتضررين منها لأنها ما ورثتني التكتحة ما جدي يعقوب جراب الرأي كان أمير وجدي ود مخير كان أمير "خربها جدي بابكر الما كان أمير لكنه عمل ليهو صرح تعليمي يشاد به ويشار اليه بأنه الأحسن وما خلاهو ورثة كان نورث من وراها ودون وجع رأس لشقيقي البروف قاسم بدري ونبقى ذي ما كتيرين ورثو لكنه مشى كتب الصرح دآ بإسم الشعب (برضك كتر وبقت على قولهو: إسم كبير مسئولية واليد خوية)".
• بمناسبة الأيام دي وبمناسبة بين قوسين ونقلن عن خطاب رئيس الجمهورية "إبن العامل" الماورث مهنة أبوهو وجاء على ضهر دبابة قبل تلاتين سنة وحسي ملك وأمير ما كفتهو وحتى وزير وبقى رئيس رئيس الوزير..
• أشتم بأن أحفادنا سيعيدون تأريخ أكتوبر وتبقى دي الورثة الوحيدة الحقيقة حيعملوها (أحفاد علي كوباني شفاه الله وكابتن حضرة أعاده الله الي بلاده بسلام وصديقي وحبيبي أخي إبراهيم عبد المنعم والمرافيد من شرطة وجيش وجامعات ومستشفيات ومهندسين وكلهك على كلهم).
• يلا يا الأحفاد في جمعتكم دي
• منصورين

[بابكر مخير]

مع الكُبر بتستشعر المسئولية أكتر
هذه حقيقة
عبود رحمه الله
إستشعر بالخطر الداهم والموت الممكن يزيد في ثورة أكتوبر وآثر التنحي
ما بال هذا الزمن كوبارهو عديمين مسئولية..
الكرسي مهما طالع القعاد فيهو بيجي يوم القعدة ظاتها بتغلبك وتبقى راقد علي ضهرك لمن تجيك قرقرينة الفراش وتمووووووووووووووووووووووت يالإنشال منك ورق التوت، أخير لك حسي أمشي وفوت.
سيبها اليوم ويمكن يعني برضك يمكن ينقال عليك كبير

[بابكر مخير]

ذي ما قلنا القلب بيرهف والدمعة تسبق جرت النفس لمن تشوف ليك شيتن يوجع...
بنيات ينهانن ووليد تلاحقه عربية فيها ناس مدججة بالسلاح وأساتذة بدل يكونو في قاعات المحاضرات واقفين في الهجيرة عشان يسمعوا صوتهم ورفضهم للظلم وعمنا الحاجة مسكين نظرته مليانة حزن علي الحاصل والوليدات مساكين..
والله ما هو شيتن ينقبل تب...





http://sudanyat.net/vb/attachment.ph...1&d=1546895190

[بابكر مخير]

من أشد الكلمات قساوة الكان بيستعملوها كبارنا الزمان "سفيه".
ووقتها تعني القولة في الكلام تجمع في مضمونها الصعلوك وزير النساء، المخمور والشاذ جنسيا P أو N "سالب أم موجب وإتنينتهم عفن"، عديم النخوة، الوسخ بكل ما تحمل الكلمة من معاني، البليد، الغبي، المتعدي على الناس وأعراضهم يعني بإختصار السفيه دي تتقال لي شخص المجتمع ناااااااااااااااابذة بالمرة..
السفيه في كلامه كاذب، جارح ومتحدي
السفيه في إحترامه لي نفسهو صفر وللناس حقار..
يا أخوانا مع عمرنا الكبرنا فيهو دآ..
ما بتصور أنه زولن بيكبرني سناً يكون سفيه ولا الكلمة التانية المرادفة والحكمة أنه سلطة..
في كلمة تانية مرادفة لسفيه "فاتية" وما إجتمعت الصفتين وإلا على الأرض السلام وعلى قول بطريرك الكنيسة الأرثودكسية (أفتكر الأوكرانية) أنه علامات قدوم "المسيخ الدجال" ظهرت...

[بابكر مخير]

يا أخوانا لساتنا ما صحينا من خلعة تحريض البشير للشرطة في القصاص من حكم ظالم على شعب مغلوب وإلا كمان بيحرش في الديش أنهم يستلموا السلطة ويرعبوا الشعب "الفار" عشان يدخل أجحاره (وهو حقيقتن فار من عمايله) ودقي يا مزيكة ورجعي مناظر الفصل الأخير من فيلم "الجرزان" بالعامية السودانية "الفيران"..
أهلنا الغرابة بيقولوا:
وض أومي كنينة لمن خلااااااااااااااص يزعلوا وتحرقهم من جوووووووووووووا
ناس البحر بيقولوا ود ال.....

[بابكر مخير]

أعلن بملء كل زولن عجز وكِبر..
لكل أهل السودان الطيبين، لنسوانهو وبناتهو طفلاتهو. رجالهو وووليداتهو وأطفالهو كامل إعتذارنا بما تغترفة حفنة صابها الخرف والذهال وأعماها الجهل وقلة الإحترام ولعب بها شيطان السلطة..
والله يا أخوانا إحنا الكِبرنا ديل عدآ تلك المجموعة ممن أَفَنَها الله كلنا حب لكل واحدة وواحد منكم.
نعتز بيكم
ولا يمكن في يوم من الأيام ينطق لساننا بما يسؤكم
نحترمكم ونجلكم..
أقول قولي هذا وأستغفر المولى عز وجل وأرجوه أن يعيد لتلك القلة المارقة ثواب العقل....
(( ربنا لا تؤاخذنا بما فعل السفهاء منا ))
عاش السودان "أرض المليون ميل" حرن ابين
وعاشت جموعة محتجيه وعاش شبابة المنتفض ..

يلا لي قدام
البنعمله تمام
لا خزي ولا ملام

[بابكر مخير]

لم يقعدني الكِبر عن الكتابة. لكني اليوم إنهزمت بمرارة وعزف قلمي عن الكتابة.
فتلك الدماء التي سالت وتلك الحناجر التي تهتف منعت عني الرغبة في الإسترسال وألجمت قلمي سكاتا..
ولا بد من صنعاء وإن طال السفر.
فأنا عائد بإذن الله لا محالة بعد أن تستعيد بلادي روعتها التي شوهتها الإنقاذ..