فى قمة شعوري !!! النور يوسف

Camera .. ZOOM !!! معتصم الطاهر

حِينَ يُبْهِجُك الآخَرُون وَتُغْرِيكَ الكِتَابَة !!! عبد الله جعفر

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 28-06-2019, 08:44 AM   #[901]
بابكر مخير
:: كــاتب نشــط::
الصورة الرمزية بابكر مخير
 
افتراضي

في زمنا كان يكاد كل الكتب القصص وخاصة بتاعت أرسين لوبين تبتدي بي قولة؛
ذات صباح باكر أو في يوم ولو قصدت الإثارة والتشويق وعلى صوت الهفيف وكأنه لحن يعزف على قيثارة وفجاءة.... لو القصد إثارة في القصص العنيفة وإذا القصة رومانسية وعلى صوت الهفيف تسبقة رائحة عطرها المميز...
الحالة حسي إختلفت أولن تبادي ندر أن تلقى الكانوا في عمرنا ماسكين ليهم ورق يقروا منه "جريدة، قصة ويا زول تقرب تقول مُصحف" ما الياهو القراية قبل فترة بسيطة كان من شاشة الحاسوب لمن صغرة المساحة وبقت بالكتير خمسة بوصات وشوية سنتيات وما قصص أكترها قرايت شاتات وشمارات و"حمبكانات" خسارة ما كان في زمنا جنس دآ يا ما كان "جكسنا"...
بمناسبة قصة "المُصحف وأبيي أحمد والكتاب"
وديي البنية الشغالة معانا في الموندلا وككل الشباب الأثيوبي شهقانيين بي رئيس وزراهم الجديد، أها قالوا أنه أبوهو مات والبت التقول المات دآ أبوها.. قربت تقول ليا فارشة عليهو التلاتة أيام الجايات ومعناها ما حتجي وبيتنا "المندولا" الخربان أصله حيخرب زيادة.. قمت قلت ليها خلاص يعني حتصبي البايبل وكان سألت هو شنهو البايبل لمن شرحت قالت ليا تقصد "مُسحهف قودس" وأنا نوع دآك WHAT طلع أنهم بيقولوا ليهو الكتاب المقدس وكتاب بي لغتهم ياهو مصحف ويبقى أبيي أحمد يا ناس العسكري إحنا بي جلالة قدرنا وإيمانا وتأريخنا وحضارتنا هو زولن أعرق مننا وحتى أعظم الكتب عندنا مشتق من تأريخهم فلا حرج أن نعترف بأن الإنجيل أقدم من القرآن وهو لمن جمعهو في البايبل وإحنا القرآن جُمع في المصحف...
هو أنا مالي ومال أبيي مدخل نفسي في عداوة ما ليها معنى مع كبش الفاهم وتوحة النايم وهمبت الحايم ومجلس الدياشة الزايم وهلما جرآ
نرجع للقصد من زمنا والكتابة..
أننا كنا بنقراء ونكتب نجود لغتنا قول ونطق وكتباة..
حسي لا حول ولا قوة إلا بالله..
الخط بس التقول: نملة رميتها في محبرة وقلت ليها أمشي وأجري ودوري ولفلفي في الورقة دي..
القراية وكأنها إستهجاء والنطق الجيم ويييييييييييييييييين يا حليها بقت "زلمية" الجيم الكان رويانا بقت معطشة وطرشانة....



التوقيع:
بابكر مخير غير متصل   رد مع اقتباس
قديم 29-06-2019, 10:30 PM   #[902]
بابكر مخير
:: كــاتب نشــط::
الصورة الرمزية بابكر مخير
 
افتراضي

أكيد قديت أيتها زولن بيقرآ ليا في البوست بتاعي دآ عن حكاية أنه الزول لمن يكبر؟؟
بيبقى رجااااااافة...
حسي ومن قبيل وما بكضب لو قلتا من يوم قالوا أنه تلاتين يونيو (العزيز بتاع بآكر ما النكد دآك بتاع 1989)..
فيهو مليونية..
أتراجف
ما خايف أنه العدد ما حيكون فعلن مليونية ومباركة
لكني خايف الجزم ديل يعملوا تمثيلية ويتحايلوا بيها لسفك المزيد من الدماء
خوفي دآ
ما في شآن الموت لأنه الموت حق
لكن خوفي في أنه نفقد حبان وكأنه ما كفانا الفاتونا من أول ثورة ديسمبر المباركة...
ربنا يغطي
ويا كريم أمانة عليك تحفظهم من شرور الظآلمين وتحميهم من كيد الكايدين
اللهم ابعد عنا كيد الكائدين،
و حقد الحاقدين
ومكر الماكرين
و شر الحاسدين
وظلم الظالمين
اللهم إنا نجعلك فى نحورهم ونعوذ بك من شرورهم
اللهم يارب العالمين اسألك أن تحبس عنا أنظار الظلمة المريدين لنا السوء وأن تصرف عنا مايضمرون في قلوبهم من شر
اللهم حصنا واهالينا بحصنك الحصين وحبلك المتين ..... آمييييييييين يا رب العالمين



التوقيع:
بابكر مخير غير متصل   رد مع اقتباس
قديم 02-07-2019, 12:04 PM   #[903]
بابكر مخير
:: كــاتب نشــط::
الصورة الرمزية بابكر مخير
 
افتراضي

حليلها أيام كان الكبير قولته مسموعة
والتوب والزراق والعمة والملفحة علي الكتف مجدوعة
وحليها أيام لمن الجنيه بأكتر من دولارين
ولمن كوسة الكعبة من سلطان دارفور
ولمن الحمة بالأوقة ما الرطل اللعين
وأيام الجيش ضباطهو معرفوين
ولو عندك عرس وداير تدور حفلة دربك عديييل لي نقابة الفنانين
وحلاوة القعدة في فندق الشرق ولا فندق الواحة ولا حتى في الساحة قدام البيت
زمان كانت أمدر ولا بحري أو الخرطوم عموم متعة وجمال وطرب
وفرقة وليم أندريه للجاز صالة في مقرن النيلين
زمن دار الرياضة واللعيبة ناس منزول وبرعي والهادي صيام
وسينما كليزيوم والحلفاية وبرمبل في أمدرمان
حلاة التوست من بابكوستا وحلة كوارع منها ديك الفي الشعبية ماخدآ مكان
ما تنسى ورا الوطنية وحي السوق والقهاوي بي إسمها الرنان
ذي يوسف الفكي ود الآغا والعصاير من جورج مشرقي وأرونط ؟؟؟ "يوحنا الماشي كان عندهو كل المقاسات من الفتيل لي الخمسة لتر"
وكمان ديك بالعبار تروي للظميان وما ننسى القزازتها مزينة بي سفينة الصحراء
والأعياد والمولد وسوق الزلعة وليهب الجمر ورائحة الشواء
حليل دآ كله الكان زمنا
وما كتير علي الله يرجعها عشان أو بناتنا وأولادنا وحفيداتنا وأحفادنا
وأنه يعيشوا في السودان الهم دايرنهو والإحنا عشناهو



التوقيع:
بابكر مخير غير متصل   رد مع اقتباس
قديم 03-07-2019, 07:40 AM   #[904]
بابكر مخير
:: كــاتب نشــط::
الصورة الرمزية بابكر مخير
 
افتراضي

قلنا مع الكُبر
الزهايمر تضربك ولا الزمهرير القارس
والنسيان في بحرهو ديمة غاتس
والفططان ما بس! تفط سطر ولا صفحة دآ الكتاب بي طوله
والسهيان بيكون مرحلة قريبة من الهذيان
والقلب بعد زهلان يبقى طفشان، خايف مرتجف..
لكن في شئ وقلناهو...
القرآن
بالله عليك من بتاع الكتاب دآك و"جزء عمّ" لين بتاع رابعة ثانوي ومن ما بإجهداتك الخاصة حفظته مختوت في مكان آآمن في الدماغ ومحفوظ جووو القلب..
الحصل..
قريت تقارير الدعم السرييع عن موت بعض منسوبيه وكذلك بيانات المجلس العسكري عن "إستشهاد" بعض من أبنائنا أفراد القوات المسلحة الذين أودعناهم أمانة في رقاب قادتهم وعن رضائنا التام. أنه لو كتب لهم الشهادة أن تكون دفاعا عننا ولا يستعملوا كآدة لقمعنا.
وكما هي مهمة الدماغ رد الفعل فكان لزاما أن يثير غضبي لهذه الأقوال الجوفاء فأستنجد بالقلب ليفتح له بواطن المَكْنُونُ ويجد ما يناسب في نصوص الكتاب المبين
"القرآن الكريم"..
فأتاني ما يفيد بأنه لابد أن القدرة الإلآهية تدخلت لنصرة قوم أعزل في وجه قوة باطشة مدججة بالسلام...
وكان الفيل....
"أَلَمْ تَرَ كَيْفَ فَعَلَ رَبُّكَ بِأَصْحَابِ الْفِيلِ * أَلَمْ يَجْعَلْ كَيْدَهُمْ فِي تَضْلِيلٍ * وَأَرْسَلَ عَلَيْهِمْ طَيْرًا أَبَابِيلَ * تَرْمِيهِم بِحِجَارَةٍ مِّن سِجِّيلٍ * فَجَعَلَهُمْ كَعَصْفٍ مَّأْكُولٍ *"



التوقيع:
بابكر مخير غير متصل   رد مع اقتباس
قديم 04-07-2019, 07:48 AM   #[905]
بابكر مخير
:: كــاتب نشــط::
الصورة الرمزية بابكر مخير
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة
حليلها أيام
في البوست السابق قدر ما قلنا جميلها كمان حقنا نقول عن قبيحها..
كانت النزعة القبيلية
وكانت الفاظ مليانة عنصرية متشتتة في كل حارة وزقاق، شارع وحلة وقرية ومدينة وما ببالغ لو قلتا في البيوت بين ساكنيهو وجيرانهو في التلات جهات...
أمسك عندك
يقول ليك: يا أخي ليييه قايلني هندي.... والهند يا صحاب كان كتير من أساتذة جامعة الخرطوم منها.
أو قولة أنا ياماني وهم عديد كم القبائل العربية جات من عندهم يعني كأنه البسب هؤلاء سبا أصلهو.....
حلبي وأهل حلب إن كان جاءو لي السودان مع الغزو إلا أنهم أنعشوا إقتصادنا وأدخلوا عندنا أنواع أكل وثقافة وأدونا صبغة جميلة خُلطت مع إلتنا وجاء لونا الحلو المميز....
حبشي أو حبشية قوم النيجآشي وين إختار النبي محمد لأحبائه التوجه ليأمنوا من بنو جلدهم وديل كمان ناسن حبونا أكتر مما حبيناهم وكنت أسمع دوماً أنه في كل شارع في أديس أبابا تسمع صوت سيد خليفة يسطع وصوت وردي يُسمع وعبد العزيز المبارك. كان الفنان أحمد المصطفى قد إختار أن يصحب معه في الحفلات التي يقيمها دوما الراقصة "سلاسي" لتعطي الحفل رونق وبهجة وجمال......
ومن الصفات وأقبحها وأسواءها وأحقرها والتي كانت دايرآ من البعض بعفوية ومن الأخرين بعنصرية وضيعة.. قولة عبد
وهناك العنصرية التي كانت قوامها الأقاليم والقبائل..
غرابي، رطاني، جعلى حر، شايقي ويتغنى بها إمعانن في التحزب العنصرية.....
في نظري كان الأخف من صور التشرزم الذي كان غالب على سودان زمنا هي البيسموها أهل اليسار بالطائفية لأنها مجموعة من البشر من مشارب ومضارب مختلفة وقبايل متنوعة برضك تشوف نفسها علي التانيين لكن البيخفف فيها وعلي رأيي..
أنها داخلها خلقت نوع من التوالف بين المكونات المختلفة للمجموعات العنصرية..
تلقى الرباطابي وزول الشرق وجيوب في الغرب والشوايقة وكتيريين هم من الختمية وكذلك مجموعات منتشرة في ربوع السودان "الكان مليون ميل مربع" هي المكون "لطائفة" الأنصار......دآ كله من الكان زمنا "الما حليلهو"...


وأنا بطلب منهو صاحب القول والفعل وما هو كتير علي الله يجيبها أيام عشان بناتنا وأولادنا وحفيداتنا وأحفادنا
يعيشوا في السودان الهم دايرنهو ما دآك الإحنا عشناهو..
غايتهو أنا متفأل كل الخير للبلد ودآ ظهر ليا!؟
من الهتافات الكانت مسموعة والشعارات المرفوعة بتوري أنه جنس جديد إتولد هنانا...
من الحياة الكانت في أرض القيادة شئ جديد وجميل ومفرح...
الخطاب المتداول والفهم الكبير والجمال الصارخ والمحنة الشاملة والمحبة الساطعة..
سودان بخت اليادوبك إتولد عشان يعيش فيهو...




التوقيع:
بابكر مخير غير متصل   رد مع اقتباس
قديم 05-07-2019, 08:42 AM   #[906]
بابكر مخير
:: كــاتب نشــط::
الصورة الرمزية بابكر مخير
 
افتراضي

في أكتوبر والعمر 18 سنة وليد شباب والقلب حجر لكن بتذكر أني دموعي رترتت لمن الثورة نجحت وأعلونوا الأعمام: سر الختم رئيس وزراء والتجاني الماحي وعبد الحليم محمد ومبارك الفاضل شداد، لويجي أدوك وإبراهيم يوسف سليمان مجلس سيادة ((لاحظ ما فيهم عسكري ما لأيتها سبب غير أن عساكر زمان بيستشعروا الواقع وعاقلين.. وبيقولوا ما دام حكمنا الفترة الفاتت والشعب ما دايرنا يبق أخير ننضمضم))
جعرت شيتن يشهي الجنازة في رجب أبريل المباركة كنت خلاص أربعيناوي والقلب بدآ يرهف وبتذكر اللحظة دي بالذات لأني كنت مشيت السودان إجازة من عملي في أبوظبي وكنت في سيارة الوالدة وفي زيارة لأخي الحبيب عليه الرحمة سلمان بدري وقبل ما أنزل وفي الراديو سمعت خبر إزاحة البشير وعمك سوار الدهب ومن المجلس العسكري الوقت دآك بتذكر أخونا العزيز اللواء عثمان الأمين. تم هذا المجلس العسكري سنة لخبط فيها الدنيا ومشى بعد ما ساب لينا عقرب أسود حايم ومهد ليهو الطريق ليعيش بعد أن قاسم النميري الحكم وإبتعد معه قوانين سبتمر وهم الأخوان المسلمين وحتى مكنهم من أنه يدخل الإنتخابات ويفوز بكل مقاعد الخريجيين وكان الجزولي دفع رئيس وزراء والهو كان مش أضعف من سابقه النصبته ثورة أكتوبر لكنه كان مقلب عديييييييل....
العسكر وقتها إكتفوا بي سنة الحكم وأهم ديل العايش منهم مكان تقدير والأموات لهم التقدير أيضاً..
ما شهد السودان ذي العساكر الحسي ديل لياقة وتشبث بالحكم وعلى السوابق الذكرتها في الثورتين أكتوبر ورجب/ابريل فكان العسكر وقتها نزيهين وكانو سودانيين وعينهم ملانة ولاد ناس وأباء أناس برضك..
الحسي ديل هم قطع شك إمتداد لي تساؤل الطيب صالح "من أين جاء هؤلاء"....

اليوم وجات الأخبار بأنه تم الإتفاق ولو أقلهو أنه يضمن سلامة أولادنا من الإعتداءات لو مرقوا وظاهروا وأنه المسكوهم بيأتو حق ما تعرف أنهم حيفكوكهم وأنهو "كبش" ما حيعور نظرنا بي طلتهو وكضبهو وأنهو حميدتي ينفشخ في أم جاد الله ...
جواني الفرحة ما الياها البتتساوى في أنه إتحقق حلم بعد واحد وتلاتين سنة ((ما أيام اللجنة الأمنية أطول من سبعة شهور)) ما عارف هل سبب الأرواح الأزهقت ولا قرفة من لولوة العسكر.
مع أني ديمة بقول أنه مع الكُبر القلب بيرهف وإن ضبانة ماتت وعرفتا ما بس رترتت دموعي ولا نهيفي أبدن.. جعرييييييي عدييييييل..
هل جفت عيوني من البكاء بعد ما سكبت على شهداء الوطن؟؟
يا أخونا اليوم فرحة بس كمان نتذكر أنها صفارة بداية
اليوم فلنعلم الخونة كيف للأمة الواحدة أن تعيش في تناغم
كيف أن حق المواطنة متساوي
أنه الكفاءاة هي المقياس للشغل والترقي والأحقية في نيل لقب مواطن سوداني..
يا أهلي
فالنبعد عن الإقصاء فقد عانينا منه وما إحنا ثورنا ضدهم عشان نبقى ذيهم
شئ أخير...
بتذكر أنهو لا ثوار أكتوبر ولا ثوار رجب/أبريل أخد منهم وقت عشان يختاروا مجلس سيادة لأنه كان في هناك رموز..
هل عندمنا الرموز والشخصيات الوطنية المتراضى عليها...
أنا لساتني ولي أسبابي الموضوعية ضد حمدوك فهو ذييي كدي إرتضى بأنه يوم يستفيد من جواز سفر بلدن تاني في تسهيل أمور كسوداني ما كان قد توفق في الحصول عليها. وليد مادبو والله بينهو وبين الرزيقي الحسي لاصق أخير دآ، أقلها بيتكلم بي لغة أهله الهيآ سودانية زولكم دآ لا هو لسان شامي ولا خليجي ولا مصري وأكيييييييييد ما هو سوداني..
لا لا بالله عليكم..
أُستاذي دكتور حيدر أبراهيم علي وينهو رئيس وزراء بإمتياز

____________

كلمة أخيرة:
وإثبات للحق؟؟؟
الثورة ثورة كل سوداني
أطفال، الشباب والشيب
الإناث والذكور منهم
حقت العامل والمزارع والموظف والمهني والعسكري وست البيت قبلهم والعاطل الإنحرم من فرص العمل
الثورة نجاحها ما مجال مزيادة ولا إحتكار ولا خصخصة
خوفي تبقى ذي قصة قناة الجزيرة ولسة ثورة مصر ضد حسني ما نضجت لمعت الكيزان وورت أنهم هم صناع الثورة..
خوفي يطلع حزب في أنه هو المكون للمهنينين وأنه قواعدهو هي النجحت الثورة
خوفي نبدى في النظر للبلد أنها كيكة في شان نوزعها ولا أنها شجرة عشان نقطف ثمارها وتروح مننا من تاني وربك يلمها..
تلاتة سنين حرية ما فوضى
إنتاج وتفاني عمل
تلاتة سنيين ندي فيها الحكومة المختارة فرصة أنها تعمل شئ..
ما ننتظر بكرى الرغيف يملا الأفران ومحطات البترول تطرش بنزين في الشوارع وأنه حتكون فوضى لو ما عجبني شئ ألم ليا تلاتة أربعة معاي وأطلع موكب (معارض ولا مؤيد،،، كله لا)



التوقيع:
بابكر مخير غير متصل   رد مع اقتباس
قديم 05-07-2019, 09:01 AM   #[907]
بابكر مخير
:: كــاتب نشــط::
الصورة الرمزية بابكر مخير
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة

خوفي يطلع حزب
https://www.alrakoba.net/news-action-show-id-322906.htm
https://www.sudaress.com/sudaneseonline/28112
https://revsoc.me/publications/20732...A8%D8%B1-1964/



التوقيع:
بابكر مخير غير متصل   رد مع اقتباس
قديم 05-07-2019, 11:37 PM   #[908]
بابكر مخير
:: كــاتب نشــط::
الصورة الرمزية بابكر مخير
 
افتراضي

قلت ليكم الكُبر مصيبة..
في كتير من الأحيان تهترش دون ما تحسب حساب لي قولك
وبعض مرات ذي الزول بعد العملية الجراحية لمن يفك منه البنج تلقا عقله الباطني يطرش ليك كل شئ في قلبه بدون سنسرة ويقول كلام شين وقبيح وما مناسب أبدن...
..
الجاب الكلام دآ شنهو؟؟؟
أنا لمن قريت كلام صديق يوسف مع البي بي سي. أولن تبادي زعلتا بالجد وحنقت عليهو وكمان لمن قريت كلامهو في صفحة كنوز أمدرمان المفقودة إنصدمتا وخاصة في قولتهو: وقد بدأ رفضنا لقوانين العسكر منذ إنقلاب عام 1990 "هنا بس نقطة نظام!! إتو يا الشيوعين مستنين لغاية 90 يعني بعد كم شهر عشان تكونوا ضد الإنقاذ..... كنتو مغشوشين ذي ترباس في أنها ما صنيعة كيزان وحقتكم"
عجبي ...
لكن حسي لمن شفت صورة زولي دآ ومنها تبين ليا وكما هو باين. أنه لو ما دفعة قريب مننا..
لقيت ليهو العذر..
ما إحنا الجلآكين ديل سموح وعفو..
بس نصيحة ليهو ولي كل ممن هم قدرنا..
Please get a side



التوقيع:
بابكر مخير غير متصل   رد مع اقتباس
قديم 07-07-2019, 09:47 AM   #[909]
بابكر مخير
:: كــاتب نشــط::
الصورة الرمزية بابكر مخير
 
افتراضي

كنت في بلدي
وظيفة قدر حالي
جآ البشير وإترفدتا ولا شغل ولا مشغلة
كان ممكن أستمر في السودان
لكن إتقفلت فكانت الهجرة..
بلادي وإن جارت علي عزيزة…………..وأهلي وإن ضنوا علي كرام
لقيت لجوء في المملكة المتحدة لأسرتي ولي
إستقر بنا الحال ودرسوا وتزاوجوا وأنجبو....
فكانت علينا هجرة:
لمال مرغوب أو من حاكم مرهوب "ولكم مطلق الحرية في الإختيار"
المهم أنه قصدي..
قريت في حتة: بعض من ناس النظام السابق تقدموا لطلب لجوء في كندآ..
رأيكم شنهو أني ما معترض علي ذلك..
وهنا برضك هجرة لمال مرغوب أو من حاكم مرهوب وأنا بفتكر أنه السبب ربما لمال فالحاكم ما بانت نوايهو لسة فتسقط الرهبة من الحاكم ويبقى المال..
ليهم حق فهم عاشوا ونقول نعم في فساد وفر ليهم القرش وبقت حياتهم ميسورة وهذا سيجعل من حالهم شر فبعد القرشين تلاتا بتاعت الفساد سيسوء حالهم ويفقروا..
غايتهو لو كنت ضابط جوازات كندي وبي يدي بوافق ليهم..



التوقيع:
بابكر مخير غير متصل   رد مع اقتباس
قديم 08-07-2019, 09:20 AM   #[910]
بابكر مخير
:: كــاتب نشــط::
الصورة الرمزية بابكر مخير
 
افتراضي

في زمنا كان كلهو علي كلهو
فوق الطربيزة والبنية في الوش ما تحت الحزام..
المحجوب كان حزب أمة ولمن إختلف مع وليدهو الصادق قالها وما بي مراواة.
يوسف بدري وهو في كلية غردون لمن جاهم السيد عبد الرحمن وساطة بينهم وبين الإدارة، قالها عديييل: والله يا سيدي. كلامك دآ بيدخل بي جآي وبيمرق بي جآي.
نقد لمن كان في الجمعية التأسيسية في المعارضة كان بيقول ويعترض ويؤيد وكل ذلك علنا وحسبما حزبه هو شايفين.
حسي الدسدسة والكلام المغطى الليهو مليون تفسير..
قريت أنه في جريدة إسمها الهامش ومن إسمها فقدت مصداقيتها وهي تتدعي أنها حرة. أبدن هي عنصرية وإقصائية من جوووو النخاع...
بتروج لي كلام عن إختلاف جوآ الدعم وهي هنا القصد أنها تخدم أغراض المؤتمر الوطني المقبور بأن تشكك بي صورة غير مباشرة أنه الدعم عصآ واقفة وعصآ راقدة... "طبعن هو الشقين من الدعم سجم ورماد".. وبي كدآ يكون الشارع في حالة عدم إستقرار وتشكك في مصادقية الإتفاق الهو أنا شايف فيهو ميزة أساسية "حقن الدماء"..
حاجات ذي دي تتنافى وطبع شعب السودان الأصيل.. إحنا البنقول لي الأعور أعور في وشيهو وإحنا البنعرف الأعوج من مشيهو والخاين من ذكرهو وطاريهو...
يا ألأحفاد والبذورة والأخوات والإخوة...
ما تنشغلوا بي سفاسف الأمور وخلونا نباركها ونتوكل علي العزيز الوكيل، المُتوكل ونتعاون نلحق الباقي من بلدنا عشان نبنيهو راجع شامخ وكبير..
لا إقصاء ولا عداء



التوقيع:
بابكر مخير غير متصل   رد مع اقتباس
قديم 09-07-2019, 02:14 PM   #[911]
بابكر مخير
:: كــاتب نشــط::
الصورة الرمزية بابكر مخير
 
افتراضي

مع الكُبر
غالبية الحاجات الجسدية بتنشل وتتبلد
وغالبية الأحاسيس والمشاعر تتقد وتولع
الفرح الكان زمان من قبل ما تظهرو، بتفكر وتحسب وتجمع وتطرح عشان يكون حجمه قدر كيف..
الحزن الكنت تقدر حساباتهو هل يستحق الامور حتى رفعت حاجب فيهو ولا لا..
يا أخي الحب العذري والعشق الطاهر إن ما فيهو مصلحة فلتكن كيف ما كيف ما ظنيتهو يلقى منفذ للقلب... الفنان قال كيف: حب في الله ما للشهوات "..
مع تغير الزمان الهالك والعمر المندثر والجسم الإنهرى...
تتغير المعادلة؟؟؟
أمسك حسي..
قالوا الأمور ماشة كويسة..
قلبك يفر من الفرح..
طيب هي لساتها الأمور ماشة يعني ما وصلت ولا وقفت ولا نامت ولا حتى قعدت... الشفقة شنهو؟؟
ياهو الكُبر كايس الفرح حتى لو كان دون سبب..
الكباشي قال:
بس تقول تبكي وتتنخج وعشريقة وأم ظوئوتا ونهفي ذي الشافع الصغير. هي ما تصبر تتم القالهو شنهو.. برضك ياهو الكُبر لمن تكجن ما بتفكر
الحب بيبقى من طرف ما محتاج لي مبادلة،،،، إن شفتا زولة ولا زول ماشي ساكت تحب الحيوية والقدرة والعافية وتحب نعمة الله الوهبا ليهم وتحب نعمت الرزق الهم متنعمين بيهو وتحب ربك أكتر....
...
خليني أفرح وأفرح
كان كُبر ولا لآ..
ما هي ثورة إنتصرت وبكرآ الأحفاد والجنون بيقطوفو خيرها الشجرة المباركة دي...
السودان الوطن الواحد


أوعك من ديك بتاعت الإنتخابات الكانت ديمة مزورة وجابت بشة مرة تانية "ديك شعارالمؤتمر الوطني"



التوقيع:
بابكر مخير غير متصل   رد مع اقتباس
قديم 11-07-2019, 08:27 AM   #[912]
بابكر مخير
:: كــاتب نشــط::
الصورة الرمزية بابكر مخير
 
افتراضي

ظنيتهو دفعة ومتلي محروق حشاهو
ظنيتهو عايش بي غلط غيرهو وهو الجناهو
ظنيتهو ذي كدي شاف الشفتهو وقايل روحهو هو الموجوع ..
براهو
آآآآآآآآآآآآآآآآآآآآآآآآخ


[youtube]https://www.youtube.com/GJfGEdiUnNg[/youtube]



التوقيع:
بابكر مخير غير متصل   رد مع اقتباس
قديم 12-07-2019, 08:24 AM   #[913]
بابكر مخير
:: كــاتب نشــط::
الصورة الرمزية بابكر مخير
 
افتراضي

قبل زمنا كان العروسات دموية "المباطنة" التقول يعني أخويا البطل الضكر دآك الركز قدام شذاذ الأفاق وليدات الدعم يكون في دأخله كان فرحان وإتذكر عرسوات القبالنا "غايتهو والله ظنيتني لو كتا أنا كان صقعت من أول شحطآ ووقعت ميت... من هنا ليهو التحايا والأجلة والإحترام وكم هائل من المحبة..
في زمنا وزمنن ما بعيد كان العروسات ضرورة حجز الفنان والإذن من مجلس البلدية عشان الفسحة القدام البيت وناس بوليس الحركة "حسي شرطة المرور" عشان إذن قفل الشارع والمهم والذي يعطي حفلة العرس رونقها وإن غاب هذا العنصر بتبقى حفلة عرس "كشامشا" وبيئة..
الخواجة وهنا المحك...
عشان توري عظم الحفلة كتر منهم لو لقيت ليك إتنين بترفع من أسهمك ولو بقت أسرة زوج وزوجته دآ معناها أنك "برستيجيس"...
المهم في القصة
في صورة من فيديو أخباري عن "المزعومة" المحاولة الإنقلابية الأخيرة 12 يوليو 2019 وكم هن محاولات في فترة ما بعد فك الإعتصام لزوم التغطية ما هم ذي الشفع الصغار عشان عملتهو يجلوط بيها نفسهو أكتر.. في الفيديو إندهشت لأنهم بيتكلموا عن 12 نفر والكيزان كانوا قاموا بي إنقلابهم بي 120 نفر وأنه القصة كل ما ليها عدد البيعملوا إنقلابات منحسر فخوفي أنه المجلي قبل يذهب لمزبلة التأريخ يجينا بي تقليعة أنه ضبطت محاولة إنقلابية قامولد واحد عسكري بمشاركة نطفة وعلقة وجارب معاهم التحقيق...
بس أصلن أصل القصة بتاعت الموضوع وخواجات الأعراس..
عايز أعرف من أين جاء هذا... "طبعن الكتيرين ظنيتهم شافهو قبل كدآ وبيتكلموا عن دحلان... يا أخي الشبه عجيب ذي شبه بتاع الجريدة الإسمه الهندي وحمدوك"..
في الصورة ولو يا أخونا زول عندهو صداقة بناس "منبرشات" يسألهم يدونا أخرهو..





التوقيع:
بابكر مخير غير متصل   رد مع اقتباس
قديم 12-07-2019, 08:30 PM   #[914]
بابكر مخير
:: كــاتب نشــط::
الصورة الرمزية بابكر مخير
 
افتراضي

ياهو دآ الكُبر
كان شباب بيبشتنك
كان ثري برضك بتتبشتن
كان قادر بتتبشتن
كان قاهر برضهو ذي إخيانك
حتى لو كنت مجرم ولا حرامي ولا كتال كوتلا الكُبر بيجيب نخرتك في الواطة وبتتبشتن....
مثال ديل الحسي قايلين وقايلين ومنفوخين ومتوردة خدودهم..
بيضربهم الما بداوى ويوم يصيبهم الثقيل الصايبني حسي بيعرفوا أنها ما دايمة أم بناية قش





التوقيع:
بابكر مخير غير متصل   رد مع اقتباس
قديم 14-07-2019, 07:23 AM   #[915]
بابكر مخير
:: كــاتب نشــط::
الصورة الرمزية بابكر مخير
 
افتراضي

يااااااااااااااا الله
في العمر دآ وبعد الوجع دآ..
هجرة وغربة وتغرب
ضياع مستقبل في منتصف (الأربعين)
فلس وفقر وجوع وغبن
وبعد دآ
عطاء وجِّد وحب للوطن
مشاركة بكل شكل كان ممكن وكان قد كان
لمن تقول رأي مخالف إن على حق أو بغير هام..
توصف بقدر ما يحمل الوصف بين طياته من ظُلم وجُور
لا تشفع لك أنك أصبحت في عمر يجوز ويقبل حديثك الف تفسير
ولا ينظر لماضيك المشرف وجدك في رفع وطنك..
وتعمى العيون وتظلم الأفئدة ويتناسون ..
أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ..
ولكنهم هموا غير اولائك ممن يندم فهموا من إستهوا الجهل حتى أصبح ديدن حياتهم...
والعزاء الباقي أن هناك ولو عدد قليل يقول: ولله دَرُّهُ ...
لكن منهو البيهمو..
للحق؟؟
قحت والعسكر والمهنيين وشيوعيين وهمباتا وكلومبيا والسجم ديك أصلن ما بطراهم ناس الإنقاص.
غير مسئوليين ونظرتهم ضيقة وغير مسئولة وغير وطنية...
لو كان عندهم مسئولية ما كان فقدنا الشهداء وما كان لي حسي الظالمين أفشلهم الله وهلكهم مطلوقين وملخبطين.
كان لي حسي حكومتنا مدينة وديمقراطية وأريتنا يوم نلقاها نبقى عليها عشرة ونحافظ عليها..
الحردلو الله يرحمك ما عارف لو كنت عايش معانا لي حسي كنت قلتا شنهو أضخم من... ملعون أبوك بلد......



التوقيع:
بابكر مخير غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 06:14 PM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2025, vBulletin Solutions, Inc.