Inside Africa !!! elmhasi

أَلَمْ يَأْنِ أن تَضَعَ الْحَرْبُ أَوْزَارَهَا في السودان ؟ !!! عبد الحكيـــم

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 15-05-2021, 09:11 PM   #[1441]
بابكر مخير
:: كــاتب نشــط::
الصورة الرمزية بابكر مخير
 
افتراضي

إجزخانة أمدرمان
من بواكير الإجزخانات في أمدرمان..
في شارع السوق، الكورنر الجنوبي للمسجد العتيق بأمدرمان وتقابلها قهوة ود الأغآ جنوبا وغربها نادي الخريجين وهي شرقها مجموعة من المحلاات التجارية حسن صالح خضر حيث كانت تباع عجلات الرآلي ومحل نضارات العم مهدي أبراهيم.
تأسست في العام ما بين 40-1938 (ما متذكر التأريخ تمام).
هي أول صيدلية يكون مالكها صيدلي سوداني كامل الدسم وهو وشقيق روحه بروفسير يوسف بدري أول صيادلة سودانيين.
الصيدليات في أمدرمان كانت صيدلية لطفي وكن المسئول الأول فيها العم لطفي وأكاد لا أبالغ لو قلت أني أذكرهو بنظارته الغامقة وقميص محشي ورجل متكامل الهندام وكان في الخرطوم صيدلية قرنفلي وصاحبها العم قرنفلي والذي عملت في واحد من مجموعات شركات الأدوية تحت ملكيته (ميدجونسون وهي تابعة لي بريستول مايرز وكان الصيدلي المسئول فيها أخي الأكبر دكتور صلاح إبراهيم وزاملة فيها شقيق الروح عثمان الشيخ الرجل الجميل الوسيم ونجم من نجوم جبل الأوليا) وكانت هناك مخازن أدورية مرهج وهي لم تكن بصورة الصيدليات التقليدية ولكنها تشابه مجموعات "Boots" في المملكة المتحدة.
كان لصيدلية أمدرمان منفذان أحدهم وهو الرئيسي فاتح في شارع السوق والتاني شارع نادي الخريجين (أفتكر هو شارع الأطباء وكان من أشهر العيادات للدكتور أحمد "النسيان" وهو طبيب أطفال مشهور وهناك برضك بتذكر يحي بابكر عندهو عيادة لاحقا في نفس الشارع)..
صممت الإجزخانة على نفس طراز الصيدليات في العالم. أرفف فيها العقاقير ("قصة مكررة" في 77 قدمت مقترح للشرطة بفتح إجزخانة تعاونية اسوة بتلك بتاعت السكة حديد في عطبرة ولم تجد قبول ولمن طلبت نسخ المشروع الكنتا قدمته، قال سعادة الفريق إسماعيل عطية: يعني يا مخير ما ممكن تكتب غيرهو ما هو ذي دكان اليماني وحسي بفتكر أنه سعادتهو كما من شاف مستقبل الحتبقا عليه في وكتنا الحاضر). غير الرفوف هناك معمل وهو شبهته بي المطبخ في مطعم المندولآ لندن من حيث أنه الدينمو الفاعل وفيه يتم تحضير أغلب الأدوية (أتذكر بوفسير أحمد عبد المجيد مرة زارنا في مندولآ لندن وكنت وكتها بطبخ وبعد إنتهيت عشان أمشي معاهو نتونس. قال ليا: باله ذي مستر أحمد عبد العزيز يعقوب في غرفة العمليات، يكمل العملية ويخلي المريض لمساعدهو عشان يقفل الجراح وإتا حسي خلاص ملصتا البالطو وسبت لمساعد الطباخ إكمال المهمة)..
أذكر أن المدخل الرئيسي ناحية شارع السوق كان تحت فرندة واسعة ممكن تخت فيها طربيزة بعدد من الكرآسي وكتير من الأوكات تعمر بأصدقاء الوالد يعني ذي نظام قعدة قهوة ود الأغآ في الفرندة الغربية للقهوة وكان من الشخصيات أكثرهم طرفة ومسجل في موثوقات أمدرمان بأنه من أعظم ظرفاء أمدرمان العم أحمد والذي إشترى الإجزانة لاحقا حين تفرغ الوالد للعمل في وزارة الصحة كبير الصيادلة ومن بعدها حسب طلب صديقه السيد إسماعيل الأزهري أن يبدء مع بروفسير دآرس في إنشاء كلية للصيدلة بجامعة الخرطوم..
أتذكر في من أتذكر العم العبادي والد الأشقاء بشير ومصطفى وغيرهم والسيد إسماعيل الأزهري الذي كان إن مرض أو مرض له شخص يأتي للوالد ليحضر له دواء.
أول من عمل في الإجزخانة العم مبارك شعروني وأخر (عفوا وله المحبة في شصة وإن كان أن خانتني الذاكرة ولكن شكله لا زال أمام أعيوني)..
تبع إجزخانة أمدرمان. إفتتاح مخازن أدوية كوستي وكان المسئول التام عنها شقيق الوالد العم العزيز عيسى الطاهر مخير ومن بعد ذلك مخازن أدوية سنار وكان المسئول التام هناك مبارك شعروني..
إن جادت عليا الذاكرة ببعض أخر عن إجزخانة أمدرمان، بلحقهو....



التوقيع:
بابكر مخير غير متصل   رد مع اقتباس
قديم 16-05-2021, 08:48 AM   #[1442]
بابكر مخير
:: كــاتب نشــط::
الصورة الرمزية بابكر مخير
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة

أول من عمل في الإجزخانة العم مبارك شعروني وأخر (عفوا وله المحبة في شصة وإن كان أن خانتني الذاكرة ولكن شكله لا زال أمام أعيوني)..
إتذكرت الإسم الأول لكن للأسف فقط (سليمان)..
له العتبى حتى يرضى



التوقيع:
بابكر مخير غير متصل   رد مع اقتباس
قديم 21-05-2021, 05:44 AM   #[1443]
بابكر مخير
:: كــاتب نشــط::
الصورة الرمزية بابكر مخير
 
افتراضي

لكل منتج فترة الصلاحية..
تأريخ الإنتاج وتأريخ الإنتهاء.. ذي يعني القوسين البيحيطوا بين الكتابة (واحد مع البداية والتاني يعلن عن الإنتهاء)
وكل منتج بيتكون من عناصر (مش بتاعت الكمياء. لا أشمل) ونفس الحال ينطبق على الإنسان..
السنون، الركب، القدرة والمقدرة.
يعني حتى الروح هي بين قوسين تأريخ الولادة وتأريخ الوفاة..
مكنة العربية بتديك إنزار تقبل ما تنتهي فترة صلاحيتها، تطلع دخنة، ترترت في المشي، تكسر ركب، البطارية ديمة ضعيفة..
حتى الردمية بعد فترة من الزمن تبقآ دقداق وشارع الظلط برضك فترتهو محدودة تلقاهو بقآ كلهو حفر..
الموية دي في أنهر تلقاها جفت ذي الدموع مع الكُبر تجف وتبقى ياهو لي "الأرتيفيشيال تيرز" عشان العيون ما تتقرح وتنزف وتغمض بالمرة وحتى الأطراف إن ما وقفت من العطاء ياها البتضمر والباطن بيبقى جايط ذي نوع البروستاتا تبقى منفلتة وتقفل مجاري.
الشهية برضها ليها expiry date تنعدم حتى من أهم الإحتياجات ناس أكل ومأكلة، الأضان طبلتها تبقى مهرية ذي الفي سماعات الساوند سيستم ديك الشكلها ذي المن حاجة كدآ تشبه الورق معمولة..
ياهو دآ البيعملهو الكُبر في الإنسان لمن فترة الصلاحية تكون بقت



التوقيع:
بابكر مخير غير متصل   رد مع اقتباس
قديم 23-05-2021, 01:52 AM   #[1444]
بابكر مخير
:: كــاتب نشــط::
الصورة الرمزية بابكر مخير
 
افتراضي

السعادة في الكُبر هي شيتن دفين حلاتهو لمن يجي ويكبر ويحصل. عكس الذاكرة التي مع الكبر تضعف وتوهن الي أن تتلاشى وهذا يؤكد حدوثه العلم. فالعقل الذي هو كالمخزن للأحداث البتحصل والأسماء البتذكر والمشاهد التي تمر تبدا ذي البتعتعت وتنفد فعاليتها وبرضك البحصل للمخ والمخيخ أنهو تأريخ صلاحيتهم يقرب لحينه..
الذاكرة هي تراكم للجميل والقبيح وهي سجل فيهو الأبيض والأسود. شئ وأشياء حلو إجترارها وتانية مؤلمة ومحزنة وتعيسة.
أما السعادة فهي مع الكُبر تقوى وتبقى شيتن يملآ الفارق الكانت مالياهو الذاكرة وهو أنهو الكمياء البتدور في كل أعضاء الجسم البتأدي لذبولها وقرب إنتهاء صلاحيتها تؤثر إيجابا على العقل فتذهِب وتمحو بقدرة ما كل قبيح ومحزن من جيوب العقل العديدة وتبقي فقط الجميل المفرح..
السعادة كما يعرفها البعض منقول من "جراحة الروبوت" بأنها:
(السعادة من المفاهيم التي ترتبط بالرضا والراحة؛ حيث تجد النفس البشرية الهدوء وراحة البال التي يلجأ إليها الناس من مثيرات العالم الخارجي الصاخبة والمليئة بالحروب والصراعات، فالسعادة هي مفهوم من غير الممكن رؤيته ولمسه، بل يظهر على الفرد الذي يعيش داخل محيطها، ومن الممكن تعريف وشرح مفهوم السعادة لغةً على أنّها بموقع الاسم الذي يُعبّر عن الفرح والابتهاج وكل ما يُدخل ويزرع الفرح والسرور على النفس البشرية)..
يبقى ما من السعادة أنك تعيش بدون وجع دماغ بتاع زمان كان (المترسبات التي تحفظها الذاكرة)..
إتصور لمن تكبر تبقى ليك مكانة فيها الناس منهم البحترمك لي سنك ومنها البعطف عليك لي كُبرك ومنها البتحملك لي عمرك ومنهم الما بيتعدى عليك لوهن جسدك..
تسعد بما كنت وأعطيت وفعلت حال أنك كنت بتعمل السمح ومع الذاكر البتتمحي كمان بتسعد بأنك زولن تاني وما بتتذكر مساؤك..
بتسعد بي شوف الدنيا كشئ جديد ما همها وغمها ذهب مع ريح الذكرى المر وتسعد بأن تشوف حوالينك ناس. هم منك وهمهم عليك وخيرهم ليك..
تسعد بأنك تعيش الجنة في دنياك بحلاوة الملايكة الحواليك من جنآ وذريتهم. تسعد بأنك أثريت البشرية بزيادة تعداد وأنهو بي وراك أنواع من الجينات.
تسعد بأنك عشتا وبأنك قربتا من العيشة في مكانة تانية، تسعد بأنك حتركب السفين للحاق بناسن حلويين وناسن كريمين..
ياهآي دي السعادة الما بتتلقي إلا مع الكُبر



التوقيع:
بابكر مخير غير متصل   رد مع اقتباس
قديم 25-05-2021, 01:46 PM   #[1445]
بابكر مخير
:: كــاتب نشــط::
الصورة الرمزية بابكر مخير
 
افتراضي

الليقنة واحدة من متلازمات الكُبر..
تمسك تلت وتعجن بلا إنقطاع لي درجة تبقى ممجوج
تبقى ذي القرادة لاصق وأنت غير مرغوب فيك
تكون وهمان أنك شئ في الوكت التكون فيهو بقيت عدم
ذي قول هنا مثلن..
تكتب وكأنك لو ما كتبتا خلاص. ما في شيتن تاني بينقري
تواظب علي الحكاية وتراهو ما في زولن مهببو ليك
يعني حسي وذي ما قلتا..
هنا
من دغش الرحمن لين أخر الليل وبعض مرات الليل بالصباح والنهار لاحقات بعض وإتا قاعد في الكرسي مع قعاداتك العضامن بقن بارزات وقدامك اللابتوب ونور شاشتهو خلاااااااااص ويتختف الباقي من الستة (مقاس النظر التش 6 على 6) ويدينك من حد الكتف يترجفن وينعكس مباشرتن على الأصابعين الخرجن من طوعك.. عاااااادي بدل الميم نون وبدل الياء باء والغين والفاء يتداخلوا في رباط ولا زيجة المسيحيين حتى الموت يفرق..
ولااااااااااا حياة لمن تنادي..
أفتكر الواحد ليقنة كبرهو يوجها توجه تاني ما هو هنا
بقت غير ذات معنى
جلد الناس تخن وبقت القرادة ما معبرة



التوقيع:
بابكر مخير غير متصل   رد مع اقتباس
قديم 25-05-2021, 03:57 PM   #[1446]
عكــود
Administrator
الصورة الرمزية عكــود
 
افتراضي

شيشك يا قمندان!
البوست ده قراءه أكتر من 155 ألف وأكيد ناس كتار متابعنو، أعضاء وغير أعضاء، وأنا منهم.

دحين يا حبيب، واصل عشانا وعشاهم ولا يصيبك الإحباط .
صحيح في تقصير مننا، بس العشم في الكبير .. كبير.



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 26-05-2021, 04:57 PM   #[1447]
بابكر مخير
:: كــاتب نشــط::
الصورة الرمزية بابكر مخير
 
افتراضي

قبل حداشر سنة
سودانيات كانت عجيبة
تفرح تلقاهم كلهم لي فرحك طايرين فرح
تدبرس وتلقاهم ليك عون، يشيلوك بي محنة ويحضنوك بي حنان لمن تفك.
هاكم مثال..

http://sudanyat.org/vb/showthread.php?t=10234



التوقيع:
بابكر مخير غير متصل   رد مع اقتباس
قديم 26-05-2021, 06:05 PM   #[1448]
عكــود
Administrator
الصورة الرمزية عكــود
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة
قبل حداشر سنة
سودانيات كانت عجيبة
تفرح تلقاهم كلهم لي فرحك طايرين فرح
تدبرس وتلقاهم ليك عون، يشيلوك بي محنة ويحضنوك بي حنان لمن تفك.
هاكم مثال..

http://sudanyat.org/vb/showthread.php?t=10234
يا سلااااام يا بكور !

البوست القديم طوّف بي في سماوات الجمال



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 28-05-2021, 06:19 PM   #[1449]
بابكر مخير
:: كــاتب نشــط::
الصورة الرمزية بابكر مخير
 
افتراضي

زمان ومكان وذكريات
طفل شافع في حي الأمراء والبيت فاتح على شارع الأربعين.. الشارع ممهد وزلط، فيهو حركة عربات ودراجات نارية وهوائية.. للذي فاتهو فالدراجات النارية هي الموترسيكل وبتذكر أيام الطفولة الأولى، كربيت وهو من أصول إغريقية على ما أعتقد وعندهو محل في زقاق صغير لصيانة عربات "ميكانيي" جنوب شرق إجزخانة أمدرمان وشرق قهوة ود الآغا وهذا الزقاق يعبر من جنوبا سينما أمدرمان الوطنية وممتد قدام محل كربيت يقطع (حاليا) شارع الأطباء وفي ناصيتهو نادي الخريجين حتى يصل مفترق شوارع منها البيمشي للشنقيطي ومنها غربا نحو التمارة وشرقا للشجرة ليين بيت المال وهنا معلم من معالم أمدرمان في زمنا وهي المحطةة الوسطى بتاعت أمدرمان والتي توازها المحطة الوسطى بالخرطوم وبحري كان مركزها قدام سينما الوطنية بحري. كان وكنا إحنا بنسميهو عم كربيت قوي البنية وبعض الأساطير تتكلم على أنهو لمن غير لستك العربية ما بيحتاج لي رافعة لأنهو بيد واحدة بيرفع العربية وبالتانين يفك الصواميل موتورهو دآ لمن يدورهو يفوت صوتهو علوا صوت زئير أسد جنينة الحيوانات بعد المغرب وقبل العشاء.. سكان الخرطوم شرق والخرطوم عموم والخرطوم غرب وتلاتة يسمعهوا كل يوم وظنتهو دآ بيكون إمتن قبل ما يدوهو يأكل ويكون جعان أو بعد ما أكل وشبع . كان كل سوق أمدرمان الصباحية يعرف أنهو كربيت جاء والمساء لمن يسمع الصوت أنهو خلاص مشآ.
الموترسيكل التاني الذي طاريتهو ساكت لي يوم الليلة تصم إضنيا هو حق الخال الحبيب عبد الله ود العم وهو في شبابه وكان يستلذ دوما أنهو يجي بيت جدي العم حيث كان يكن أولا الي أن إنتقل الشباب لي بيت العزابة "بيت جدي العم والذي كان مقابل لي سكن شخصيتين معروفين في الوسط السياسي والإجتماعي من ناحية "بيت الزعيم" وفي الوسط الطبي العم دكتور سليمان بسيوني وهو طبعن من يهود السودان". قولنا
يستلذ لمن يجي البيت والمقابل لبيت جدي الخضر أنهو يكون الوقت وكت الغدآ والجميع في تربيزتي الغدآ. الأولى للجد خضر وممن حضر من الذكور والتانية مع الحاجة زينب ميرغني وبناتها والصغار.
خلاص إستنوا عبد المامون أهو جآ.. وكأنهو عبد الله يقصد بي حكتهو دي. أنا جيت إستنوني بالغدآ...
قلنا ودراجات هوائية وهنا أكيد من معالم سوق أمدرمان محلات العم محمد صالح خضر وعجلات الرآلي وتنافسها عجلات الفيليبس.. ولي حادثة شهيرة في أني يوم كنت راكب عجلة أخي قاسم بدري وهنا القول الحق في أني صدمتا الترماج فالترماج خط سيرهو محدد في القطبان لا يحيد عنهم لا يمنا ولا يسارا فأكيد من الخطاء نقول أنهو زول صدمهو الترماج لأن الخطاء من الطرف التاني ما الترماج والمثل بيقول: خاتي البلآ ولا الوقع فيهو...



التوقيع:
بابكر مخير غير متصل   رد مع اقتباس
قديم 30-05-2021, 05:20 PM   #[1450]
عبدالحكيم
:: كــاتب نشــط::
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة
الليقنة واحدة من متلازمات الكُبر..
تمسك تلت وتعجن بلا إنقطاع لي درجة تبقى ممجوج
تبقى ذي القرادة لاصق وأنت غير مرغوب فيك
تكون وهمان أنك شئ في الوكت التكون فيهو بقيت عدم
ذي قول هنا مثلن..
تكتب وكأنك لو ما كتبتا خلاص. ما في شيتن تاني بينقري
تواظب علي الحكاية وتراهو ما في زولن مهببو ليك
يعني حسي وذي ما قلتا..
هنا
من دغش الرحمن لين أخر الليل وبعض مرات الليل بالصباح والنهار لاحقات بعض وإتا قاعد في الكرسي مع قعاداتك العضامن بقن بارزات وقدامك اللابتوب ونور شاشتهو خلاااااااااص ويتختف الباقي من الستة (مقاس النظر التش 6 على 6) ويدينك من حد الكتف يترجفن وينعكس مباشرتن على الأصابعين الخرجن من طوعك.. عاااااادي بدل الميم نون وبدل الياء باء والغين والفاء يتداخلوا في رباط ولا زيجة المسيحيين حتى الموت يفرق..
ولااااااااااا حياة لمن تنادي..
أفتكر الواحد ليقنة كبرهو يوجها توجه تاني ما هو هنا
بقت غير ذات معنى
جلد الناس تخن وبقت القرادة ما معبرة
د. بابكر مخير .... تحايا عطرات وتجلة ..

نحن عايشين نتابعك وموضوعك وهذا الثقيل .. ففيه استراحات نستريح عندها ..
ونمضي وتمضي ... اللحظات من اياماتنا واعمارنا لتصبح من الماضي ..
فلا يدب اليأس في نفسك ولا تجعل الدبرسة تمنعك من الحكي الجميل...
فامض ... ولملم شتاتاتك من الماضي ليستنير بها متابعيك ... ومشاهديك ..

وهنا تأمل الكلمات واللحن من ... شتات الماضي : والرائع جدا عثمان حسين ..

كحافز لك د. بابكر مخير ....


https://www.youtube.com/watch?v=hfpXaJsreF0



عبدالحكيم غير متصل   رد مع اقتباس
قديم 31-05-2021, 04:39 AM   #[1451]
بابكر مخير
:: كــاتب نشــط::
الصورة الرمزية بابكر مخير
 
افتراضي

يا حكومة سلام (الرجل الحكيم عبد الحكيم)
من الأقوال: يكبر وتكبر مصايبهو..
هذه المصايب ذات نوعيين. واحد منها طبيعي وهو أن فترة الطفولة تلك التي يكون فيها الإنسان ذي الكسة بالموية؛ لا تغلط عليك ولا توسخ إيديك..
بتذكر زمان وإحنا أطفال نتشوق للذهاب للحوش (بيت جدي بابكر والذي ورثه الخال يوسف وبدوره سمح للمكتبة المركزية أن تستعملهو لي نشاطاتها وللأسف أنهو لا هي قدرة تستمر ولا قدرت تحافظ على المبنى لتردهو لصاحبه بالشكل الإستلمتهو بيهو) كانت الهفة لي قطفة خالتي هدي وهي متنوعة رغم أساسها الواحد وهو كسرة بخيتة البتشبه عِمة الكرب ناصعة البياض، ناعمة الملمس وشفافة ذي ورق (الرزلة أو الزيقزاق). كانت القطفة (الكسرة بالموية) إما بالبصل والطماطم، ملح ورشة كمون وفوقها عطنة زيت سمسم تشتم رأئحته من على بعد مترات وتشوفهو ذي سريان موية النيل الأزرق نازل من الهضبة الأثيوبية وكانت الخالة هدى دايمن تختهو لينا في صحن لو تخت فيهو طفل وليد يتوهدو براحة أكتر من داخل أحشاء أمهو. نأكل لمن نتخم وكانت هذه الميزة أنهو صخب الشفع ينقطع ويدي فرصة للسيدات في أن يتونثن في جو هادئ. كانت الفكرة أنهو الكمية تكون كبيرة لأنهو ودي يمكن كل من يستمتع بصحن الفول عند أبو العباس والعشرة العظام يعرف أنهو الملحق ديمة ما بيكون ذي الطلب الأصلي ودآ كان الهدف في أنهو ما نحتاج نطلب وصلة الما حتكون ذي الصحن الأول "كانت ذكية. بديهي ما هي بت الشيخ بابكر بدري". القطفة النوع التاني تقدم مع أول وصولنا للحوش في العصرية كدي يعني. وكانت ياها الكسرة السمحة ظاااااتها بس معطونة في موية ومرشوش عليها سكر بمقياس أبدن ما بزيد ولا ينقص التقول "هِّدية" (كما كانن ينادنها أخياتها الكُبار) صيدلانية ذي أخوها يوسف، الطعم لي حسي في لساني لكن دي مشكلتها أنها بالسكر ودي معناها طاقة فشوف بقآ كمية كانوا الأحفاد والجري والنطيط الي أن يهبتوا بي ديك بتاعت الزيت البشبه النيل الأزرق.
كانت دي فترة الطفولة قبل النشوء للمراحل العمرية القادمة وهنا تبتدي تظهر المصايب وأولها القراية ويقال: القراية أم دق.. دي كان ياهو المفهوم الأكثر إنتشارا في وسط الذكور منا.. قرآن حفظ وتسميع ودق، حساب وجداول ضرب وضرب ودق، إملاء وأخطاء إملائية ودق، حفظ الشعر وعدمهو ومعناها دق، الإسبيلينغ ومعاني الكلمات الإنجليزية وعدم معرفتها ياهو الدق (بتذكر كان عندنا مدرس لغة إنجليزي يا زول لابس ليك الشورت والجزمة السوداء اللامعة وشراب أبيض "التقول مفتش قيط" ونضارة سوداء حتى في الفصل "واحد من الأشقياء مننا عرف السبب وأنهو العيون بيكونن حمر" يومتها حكمة معاها وظنيتهو الليل كلهو كان بيدبر في مكيدة عشان يجلد بيها الفصل كلهو وتفتق ذهنه وحسب يمكن الفي رأسهو أنهو يسألنا "A" - يعني ديك البتتقال a boy, a man- معناها شنهو.. ظنيتهو لو جابوا برناد شو ولا حتى سيبويه ما حيقدرواز وكان أن فاز بمقصده. الفصل كلهو إتجلد وبقت الحصة دق ودق)
وختامها مسك فمع الكُبر حقنا دآ؟؟
المصايب الغير طبيعية فلا عد لها ولا تعداد ويمكنك أن حدث كما تشاء وأذكر كل ما يمكن أن يخطر على ذهن بشر من شرور أو من صنايع الجان



التوقيع:
بابكر مخير غير متصل   رد مع اقتباس
قديم 31-05-2021, 05:46 PM   #[1452]
عبدالحكيم
:: كــاتب نشــط::
 
افتراضي

مساء الخير / د. بابكر

النفس وحديثها ...

د. كثيرا ما اتحدث مع نفسي ...
تحدثني ربما طبيعي ...
ولكن أحدثها ... كثيرا ما يضحكني واحيانا يبكيني ...
...لأشياء تحدث يوميا صباحا وما اكثرها ومساءا ...
ومنها مثلا وكل صباح تتكرر وانت خارج للعمل وانت لحالك عزابي يعني بعد ان جهزت من حاجات كيت وكيت فتحت باب البيت (الشقة ) وخرجت وقفلت متوجه وصلت العربية ( السيارة) .. شغلتها أو قبل تشغيلها ها نسيت .. محفظة ...
تلفون ..
وجابت لها كمامة كذلك ..
وو..حاجيات وترجع تاني افتح اقفل .. المشهد ده يتكرر كل يوم ما السبب ؟ ياهو الكبر ... يا لطيف تلطف ... ويكون حديثي لنفسي ..يعني لازم تعملها كل يوم يا ... ( وصف ما ..)
الله يكون في عونك ..
وهكذا ...
فهل يحدث أن تحدث نفسك كما لو كانت شخص آخر ... ؟

ربما نشاركك بها ... ثم نتوقف حتى لا نخرب عليك الموضوع وهذا الثقيل .. وكلها بسببه ....


في الحديث ... قال اللهُ عَزَّ وجَلَّ -وقَولُه الحَقُّ-: إذا هَمَّ عبدي بحَسَنةٍ فاكتُبوها له حَسَنةً، فإنْ عَمِلَها، فاكتُبوها له بعَشرِ أمثالِها، وإذا هَمَّ بسَيِّئةٍ فلا تَكتُبوها، فإنْ عَمِلَها فاكتُبوها بمِثلِها، فإنْ تَرَكَها -ورُبَّما قال: فإنْ لم يَعمَلْ بها- فاكتُبوها له حَسَنةً، ثمَّ قَرأ: {مَنْ جَاءَ بِالْحَسَنَةِ فَلَهُ عَشْرُ أَمْثَالِهَا} [الأنعام: 160].

عندما تحدث النفس العبد يهم بالحسة أو بالسيئة ....

فيحصل يا يعمل ويا لا يعمل .. حسنة أو سيئة فيجازى بما عمل كما في الحديث عن رب العزة ..

وأنت تحدث لك أمور منها الحسن ومنها السيئ .. ما انت بشر ...فيا تصمت وتندمس ويا يكون عندك رد فعل حسب العملة بفتح العين ( وليس ضمها ) ... ورد الفعل ده ... تصرف تعمله ...
تصرف يفرح وتؤجر عليه وآخر يهوي بك الى ... والعياذ بالله ..
واحيانا يكون رد كما لو كانت هذه النفس بشر امامك ــ ماهي نفس ــ
فتكافئها بيا ايتها المطمئنة ..
ارجعي راضية مرضية ..

أو تلومها لماذا فعلتي كذا وترجع . فلا تعودي يا ايتها اللوامة ..

أو تزجرها بتعنيف لدرجة وصفها يا ... الفعلتي وتركتي .. يا الأمارة بالسوء ... يا ...

قصة عمر بن الخطاب مع جابر ..
عن جابر بن عبدالله رضي الله عنه أنه قال: رأى عمر بن الخطاب لحمًا معلقًا في يديّ فقال: ماهذا يا جابر؟ قلت اشتهيت لحمًا فاشتريته، فقال عمر: أو كلما اشتهيت اشتريت ياجابر، أما تخاف هذه الآية ( أَذْهَبْتُمْ طَيِّبَاتِكُمْ فِي حَيَاتِكُمُ الدُّنْيَا) سورة الأحقاف آية (20) .

فيا دكتورالشاهد :ــ

انه قبل يومين وانا خارج من العمل مررت على مطعم وقلت خد لك فيليه السمك .. على الأقل جاهز وتغير شويه من حاجاتك القاعد تعملها دي ... وده حديث نفسي ..

فجأة ما كان مني إلا أن رديت عليها يا ايتها نفسي أمال الفي التلاجة المعمول ده مين ال حياكلوا ؟
أمشي بلا فيليه بلا ... واوعي تاني تشتهي حاجة وفي غيرها ..
وضغطت بنزين وزودت السرعة وهاك يا تلاجة .. فضحكت ..

https://www.youtube.com/watch?v=kdaCSAtN9ck



عبدالحكيم غير متصل   رد مع اقتباس
قديم 03-06-2021, 03:05 AM   #[1453]
بابكر مخير
:: كــاتب نشــط::
الصورة الرمزية بابكر مخير
 
افتراضي

اقتباس:
المشاركة الأصلية كتبت بواسطة عبدالحكيم مشاهدة المشاركة

انه قبل يومين وانا خارج من العمل مررت على مطعم وقلت خد لك فيليه السمك .. على الأقل جاهز وتغير شويه من حاجاتك القاعد تعملها دي ... وده حديث نفسي ..
فجأة ما كان مني إلا أن رديت عليها يا ايتها نفسي أمال الفي التلاجة المعمول ده مين ال حياكلوا ؟
أمشي بلا فيليه بلا ... واوعي تاني تشتهي حاجة وفي غيرها ..
وضغطت بنزين وزودت السرعة وهاك يا تلاجة .. فضحكت ..
حاكم الحكمة، الحبيب عبد الحكيم
والشقة بعد ما ضوها وحياتها وروحها
شدن الرحال عائديين، سالمين ومعافيين الي بلد الضباب ليبعثوا فيها من نورهن وحيويتهن.
مدون وجيجآ
أبني والهو أخويا في حسبة القرب وحبيبن تب(مع أنهو مريخابي)، لصقتا فيهو لصقتن شديدة ما بس لصق "صمغ" لكنها حقت لحمتن شحماااانة، من لذتها بتنبلع، ما تنمدغ ياهو هو ظاتهو "محمد الطيب مالك".
معايا ومعاهو. إن طلعتا وإن نزلتا. أمس وكانهو قراء الكلام.. ومن حوش السمك جاب ليهو ميكس قريل ودآك يا نص كيلو قشرة البياض الفرايد اللاهو أصفر تقول تشبهو بالعسجد ولا برتقالي تقول لون الغروب والشمس واقعة تشوفها من كوبري أمدرمان وإتا تعاين تقول تشوف بيت المال.
لهطتا وإحساسي أنهو دآ السمك تاني ما بيكون ظاتهو الباكلهو؟؟ إلا ياهو دآك المعرروفين بيهو ناس بلدن ذي ما كانا زمان بيتقال لينا "بلد الخرتيت" هم كمان ينقال ليهم بلد الفيش أند تشيبس.. باقي الباقيات ليا أيام وأقول لي هنا... بآي بآي



التوقيع:
بابكر مخير غير متصل   رد مع اقتباس
قديم 03-06-2021, 09:56 PM   #[1454]
بابكر مخير
:: كــاتب نشــط::
الصورة الرمزية بابكر مخير
 
افتراضي

زنقة كلب في طاحونة وقفلت بابكر بسبب الكرونا..
عايز أسافر، أرجع أشوف وليداتي وأحفادي..
أحاضنينهم وأطايبهم وأشبع روحي منهم..
قالوا.. الكرونة سادة الطريق
عاملة ضيق
للقادر والما بطيق..
طيب الصرفة..
عشان تسافر إلا تعمل طوافة (لأنه سفر مباشر من هنا ما متوفر فتزور بلاد وتسيب بلاد)
في كم بلد... وإلا في الهوتيل بالغسب تتم الضيافة.. (هناك في لندن تقعد على حسابك بي مبلغ وقدرهو وتدفع حق الفحص بتاع الكرونة وبرضهو على حسابك)
لكن ما في الفنادق مكلفة إلا لي زولن صاحب صرافة.. (كم مية جني إسترليني كدآ)
الرووووووووووووووووووووووب
كيف الخلاص


[youtube]https://www.youtube.com/watch?v=wyieY3dyb8k[/youtube]



التوقيع:
بابكر مخير غير متصل   رد مع اقتباس
قديم 06-06-2021, 03:33 AM   #[1455]
بابكر مخير
:: كــاتب نشــط::
الصورة الرمزية بابكر مخير
 
افتراضي

صفات متشابها بس في الأخير طبزوها؛
صحن السلطة والسودان.
إتنينتهم صفاتهم متلونات ومتنوعات..
في صحن السلطة تلقى الجرجير أخضر غامق والخس بلونه الأخضر الفاتح والعجور برضك ذيهو والخيار ضهرو دآكن الخضار وباطنهو حليبي بي لمسة خضارن هادئ والبصل الأخضر والأبيض وحتى الأحمر الهندي اللو قشرهو في مدني عينك تدمع في أمدر وكأنهو النيل بيجي شايلهو مع الطمي وتلقى الطمام مرة لونهو أحمر دامي ومرة تلقاهو بصفرتن غالب عليها البرتقالي وهو أنواع منها لحم البقر ودي كبيرة ومليانة لحم ومنها زمان أول ما إبتدى تهجين الطماطم البيسموهو الروثمان ومنها الشيري الهو صغنوني في زمن زمان كانت بتعرف بالندورة يعني لمن يرسلوك زنك الخضار ما في حاجة إسمها طماطم. ياها بس البندورة ومفروشة في الواطة على شوال خيش ومرشوشة بي موية لزوم الترطيب من هجير النهار. في السلطة دخلت محسنات كما تطور وتفرنج مكونها ومن المحسنات رشة شمار وليمون من الأصفر الكبير الحجم وفي ليمون البرازيلي البدون بذرة أو الليمون الهندي الصغير الكلهو بذور لكن نكهتو تتميز على التانيين وكمان رشة خل التفاح لأنه نكهتو حنينة ما ذي دآك بتاع البصل وكمان في الصحن دآ حتت من الجذر وناس بتديهو بنجر ومن المستجدات لصحن السلطة إضافة بعض من الفواكه والغالب هو التفاح يا دآ الفرنسي جامع لوني الأحمر والأصفر متمازجات بلمسة ريشة فنان أو التفاح الأخضر. التفاح اللبناني حلو شديد في طعمه ذي كلام أهل بلدهو وعشان كدآ ما بيحفز إضافتهو. التشكيلة دي مكملة لي بعضها في المذاق والمزاج.
أها السودان دآك ما يهو برضك فيهو الأخضر وفيهو الأحمر والأبيض والأسمر والكحلي وكمان خاتف اللونيين (بعضهن لون اليد لون والوش لون) وفيهم الشكلهو ذي الأوربي وفيهم الأصهو شامي وأفريقي المقاطع والملامح وفيهم الرطاني وفيهم الكلامهو أمدرماني وعربي جوبا وقول هدندوة ولهجة فولاني..
ياهو ذي صفات السلطة لكن بس؟؟
التوليفة تب مافي



التوقيع:
بابكر مخير غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 03:42 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.