نحن و نساء الغرب

[تاج السر الملك]

مزاراعي، لوترابي ، اسايلابي
نحن و نساء الغرب


هيمن النموذج السينمائي للمرأة الغربية على عقولنا ردحا من الزمن، ترسخت خلاله فينا مفاهيم و تأويلات تقاربت في مجملها، بين ذكرسوداني بالغ و آخر، و تطابقت في كثير من الأحيان، سعدنا في شقوتنا الجنسية ابان عهود الصبا الباكر بروايات ( البرتو مورافيا) و تخاريف ( كولن ويلسون) الجنسية الفلسفية الساقطة، خلعنا عن ( صوفيا لورين) ملابسها قانعين برضاها واثقين من ليبراليتها اللا محدودة، و تمحور فهمنا للحواء و ما ينبغي ان تكون عليه حول صورة ( بريجيت باردو) و ( جولي كريستي) لا مجال للأنكار، التهبت أخيلتنا يالضجة و الزعيق ، حتي اتت الى خمود. عشقنا المرأة الغربية في كل اطوارها و أدوارها، في السينما و الروايات و منافسات السباحة و التنس و عروض الأزياء، و تحول كتالوج ( البوردا) و ذلك سابق لكتالوج ( فيكتوريا سيكريت)، الى مرفأ تجد فيه المتعة البصرية كفايتها، أو يزيد قليلا. عشقناها و تمنيناها المرأة الغربية، وأستمتعنا بقصص العائدين من اوربا، لا القصص التي تصف برج ( ايفل)، و لاالتي تزدهي بمجد ( اللوفر)، و لكن قصص النساء، تحلقنا بشغف نرهف السمع حتي لا تفوتنا ادق التفاصيل فيها، واربنا في حذر باب الديوان ... شنو يا عصام شنو ...ابدا تاني من الأول، قالت ليك الرجل السوداني مالو؟؟
و عصام متوج ملكا قائما علي خدمة احلامنا.....السوداني معروف يا زول.... تلك سويعات في هجيرة النهار، تعجز الحرة عن انتزاع رطوبتها و عذوبتها عن افئدتنا، نسجل فيها انتصاراتنا الذكورية على الأوروبي المحتل الغاصب الديوث دون مشقة
..
اول ما قلت ليها ايام فروم سودان، اتكيفت...مصطفى سعيد مش؟؟؟
... جدعت ليك المرتبة في الواطة، و انا عامل سنة خفييييفة، قامت طوالي قالت لى، ما عندك شريط ظريف كده لى كابلي تشغلو؟؟ !!!!
لا ياخي ، الخواجية رهيبة...كابلي الواحد ده، بتاعنا ده..... ما تكون اتعاورت و شغلت ليها الجنزير في النجومي..!!!
تحدينا ( جيمس بوند)، فانتزعنا حسناواته من بين يديه، و اشتركنا في هذا الجهد المقدس، بسطاء و مستنيرين على حد سواء،.تمنينا و صالهن و توسلنا بسهولتهن و دعتهن و صفقنا لتحررهن، وبذلنا العزم في ارضائهن، حتي لا نتسبب في تشويه سمعة الرجل الأسود التي وضع لبناتها اسلافنا من غانا و نيجيريا و ساحل العاج، بتجرد و نكران ذات غير مسبوقين.
ثم أتت عهود، انتشرنا فيها في جنبات الأرض وا ركانها العشر كالفراش المبثوث، عهود وقع فيها العسكر في عشق الحقائب الرئاسية و الوزارية، فتركنا لهم الجمل و آباره، أختار بعضنا جيرة حفيدات ( انا كارنينا)، في روسيا و شرق اوروبا، و سكن البعض قريبا من ايزابيلات اسبانيا و ( اني جيراردوهات) فرنسا، و كلوديا كارديناليات و بنات عمها في ايطاليا، ثم سقطت اروبا الغربية بمجملها في قبضة ( البني كجة)، فتنوعت قصص الغزوات، و ظهرت التفانين الجديدة، فمعظم القادمين الجدد، ليسوا كسابقيهم من طلاب الدراسات العليا محدودي اللأقامة، فهؤلاء سيقيمون هنا الى ان يحصلوا على الجنسية و الى ان يرث الله الأرض و ما عليها، و عبر البعض ( البحر المحيط) كما تسميه جدتي، مجاورين لبنات العم سام و العم جو و العم غونزاليس.
و قد قدر لي في بداية عهدي الهجري، السكتى مع ثلاثة من فطاحلة المزارعين، و الذين اسهبوا و اطنبوا في الشرح وأجزلوا النصح و التوصيات فيما يخص التحديات النسوية الأمريكية، فالنساء في امريكا حسب التقويم المزارعي، ينقسمن الى ثلاثة انواع، البيضاء، و الأسبانيش ( هيسبانيك)، و السوداء. و تحت نوع البيضاء، تجيئ القوقازيات الشقراوات عيون كديس ( العيون زرقاء غالبا)، و اولاء لا قبل لك بالحصول عليهن، الا في حال ادمانهن ( الكراك كوكايين) و يطلق عليهن اسم ( جنكي) في هذه الحالة التي لا يرجيى من وراءها برء و لا نفع ، أو حين يبلغن الثمانين، او يشهرن اسلامهن، او في افضل الأحوال ان يكن من ساكنات المنازل المتحركة (موبايل هوم)، و يطلق على هذا النوع اسم ( وايت تراش) أو الزبالة البيضاء و اولاء يتبارين و الفضيحة طيلة العام. و تحت تصنيف المرأة البيضاء، تجيء ( البرونيت)، ذوات الشعر الأسود في المرتبة الثانية، متحدرات من اصول ايطالية و يهودية و بعض غجريات و شرق اوسطيات الجذور و قليلات مختلطات من حفيدات ( بوكاهاناس) الهندية الحمراء، يعمرن المراقص و الكافتيريات، محجوزات منذ الميلاد لشباب المافيا المثابر، و اصحاب محلات البيتزا، و أغلفة المجلات الأغرائية، و يتوجب عليك ان وددت وصالهن، ان تكون ابيض البشرة و اسمك توني و اسم جدك توني، و ان شئت ان تكون عربيا، فلا اقل من ان تكون لبنانيا، و تندرج تحت لواء البيضاء، مهاجرات اوروبا الغربية و الشرقية، مجراب و رومان و بلغار، مالطا و يالطا، و كلهن عاصيات القيد الا من ابتلى الله بقبح و عيب واضح فاضح في (الشاسيه). ثم تجيء النساء السود في تصنيف لا ينطوي على كثير من التفاصيل، افريكان اميريكان، كاريبيان اميريكان، و افريكان افريكان ، يتربع على قمة الأخير شباب اديس الباسل ( احذر الخلط بين اريتريا و اثيوبيا)، اما الأفريكان اميريكان و الكاريبيان اميريكان، فلا يعترفن بغير الرجل الأسود الأسود، الذي لم يخالطه دم دهمشي و لا بسابيري و لا بطحاني، شين و دشن و حديسو خشن، (Rough neck)، وتقع غالبية السمراوات فى قطاع مهمشي الأمبراطورية العظيمة ، عريضات مناكب، قويات شكيمة، سريعات اللجوء الى بذل اللعنات و اللكمات، لا يتوانين عن استخدام القبضة أن قصرت في حق اطعامهن، و كلهن في حال المنعة و الأحزان و اللياقة البدنية (مايك تايسون). أما الأسبانيات او بالأصح ( الهسبانيات)، فدونك و بلوغهن اللغة، واتقان السالسا، و الأعتراف بنبي الله عيسى المسيح مخلصا، و شافيا للعلل ما ظهرمنها و مابطن.
تختلف الأمريكيات في سلوكهن العام، و مذاقهن جملة و تفصيلا، الا انهن يلتقين في قاسم حب الطعام كمشترك أعظم، مثلما يشترك كل عازفي الكمنجة في السودان في ظاهرة تبادل الأبتسامات اثناء العزف دون سبب واضح !!!
و قد حفلت سنوات الهجرة الأولى للسودانيين في امريكا، بلقاءات متعددة متفرقة، بين وفودنا الذكورية الشهيرة، و النساء الأمريكيات في جبهات عديدة، بدأ بكاونترات دكاكين اليمانية ، و حتي قاعات المحاضرات في الجامعات العريقة و غير العريقة، و قد اشتهر جميع ممثلينا بسوء و ضعف في جهة الأدارة العاطفية، فنساء امريكا لا يحفلن كثيرا بالعاطفة اكثر من احتفالهن بعوائدها المادية، و ليس ادل على ذلك من فيلم ( قصة حب) و الذى انتجته هوليوود في السبعينات، فأثار الأعجاب في المجتمع الأمريكي ناقص الرومانسية ، و لم يثر اى دهشة في السودان، فقصة مثل هذه تحدث في الديم بمعدل عشرين مرة كل خمسة دقائق.
و قد اتيحت لنا فرصة لقاء ( ميهاميد) و صديقته ( جاكي)، اثناء بحثنا و استقرائنا و تقصينا، الفيناه و قد انعقدت سحائب النصر على وجهه، فاحتشد كل كلامه بمفردة جاكي، جاكي فعلت، جاكي تركت، قالت جعانة، جاكي ضحكتني امبارح و قالت جعانة، جاكي جابت لى قميص جديد و قالت جعانة، مشينا اتريضنا انا و جاكي و قالت جعانة، نادتني امبارح من الحمام، قلت ليها دايرة البشكير، قالت لى جعانة. ظل ينادي عليها بسبب و بدون سبب، بالصوت العالي، مثيرا للغيرة و الأعجاب بين مجالسيه...جاكي...هوني...وير ار يو...هسة تقول ليك جعانة.!!!
و بالرغم من ان ( جاكي) لم تكن حسب توقعاتنا مقاربة لمواصفات الرشاقة التي روجتها المجلات و الأفلام عن المرأة الغربية و كيف انها تتحول الى ( بايونيك وومان) في بعض الأحيان، الا انها من فئة ما يعرف ب ( فاككات الحيرة) تفكيكا تاما وحتى آخر مسمار، غير ان وجودها الفعلي في الشقة كان حدثا خارقا في حد ذاته، خاصة اذا علمت ان اخاها ( تايرون) كتال كتلا، و ان امها و ابيها يهاتفون ( ميهاميد) كل يوم لا للأطمئنان ولا لأظهار الغضب والقاء اللعنات عليها، عليها و لكن لسؤاله ( طابخين شنو الليلة)؟؟ ، ثم و هي تداعب (ابدول) و( بيكاري ) الذين كانا يضمران خبثا يختبيء خلف الأيتسامات و الضحكات الصديقة المتوترة، و لسان حالهما يقول، ( اصلا هي ما مرتو)، و نحن في النهاية شعب يحب لنفسه ما يحبه و ما يمتلكه اخيه، و تصورت لو ان أسم ( جاكي) كان ( محاسن) مثلا، اذن لأمتلأت ثلاثة قطارات من المتمة و شندي و الشقالوة، و لوريين من تمبول برجال لا يفرقون بين الناقة و البعير، و اربعة عربات بضاعه عكاكيز للفتك ب ( ميهاميد).
وسرحت انا بعد زيارتي تلك، هائما ابحث عن ( جاكي) تخصني وحدي دون جدوى، و تذكرت كل خطاباتي الغرامية التي بعثتها الى بنيات بلادي ، فلم تصلني من ردودهن الا تقطيبة و ( حدرة)،و نحن في موقف البصات، ننتظر في صبر بص الدروشاب، فيهل علينا بص الفكي هاشم ، و قول بعضهن ( انت ما عندك اخوات يا ابو السرة)، وغير اولئك من تربص بى اخوانهن من عينة ( الجقر) و ( دراج) و ( عثمان منفلة) و ( قدوم الكونسول)، قبالة ( بحر سماحة)، فأنقذتني سيقان الريح من الثأر، و حتي في اعظم حالات انتصاري بالحصول على لمسة من ( طرف الطرحة) ، فقد سمعت جملة ( هسة انت استفدت شنو)، مرارا و تكرار حتي تمنيت الموت.
لم يجد اسلوب ( الرفرفة) في هذه البلاد شيئا، فلن تظن بك النساء غيرالخبل و العبط والجنون أن فعلت، و اذا اطلت التحديق و ( الغرودة) حسبوك سفاح نساء او مهووس اغتصاب، فسارعن الى الهواتف يطلبن حماية الشرطي، و اذا تابي عليك ( البيك اب لاين) من النوع الأمريكي الأصلي، الذي ما يحتاج، فلجأت الى ذخائر ( الحنك السوداني) ديل عيونك ولا واحة ، ضحكن في غنج و قلن لك ( انتريستينق). و من المحاذيرتعلمنا عدم مغازلة القاصر ، فهي تقصر العمر و الأقامة، عليك بالألتزام بقول وردي عن ( اسماعيل حسن)، (كبرتي و ليك تسعطاشر سنة)، الم تر كيف يعشق اهل الحبشة هذه الأغنية؟؟
و تواصلت احلامي في الحصول على صفة ( مديت) و تكاثفت مثل النباتات البرية، و ( مديت) رتبة للذي اكرمه القدر ب ( ديت)، الكلمة التي كان ( عبدو) يصر على تغييرها ب (رانديفووو)، فلم تحضر و لا احدة من اللواتي وعدنه باللقاء و تركنه في وحشة الهدسون يتلقى عصف الهواء البارد ، اما لعدم علمهن بمعني الكلمة و هذا غير جائز، او انها تعني شيئا آخر لهن، لا يشمل الأنفراد في ركن مظلم قصي في ( ماكدونالدس) أو المقعد الخلفي في ( الكابريس كلاسيك) موديل 88.
و بلغ اليأس عند بعض أفراد قبائل المزارعين مبلغا الجأهم الى ( تدييت) نساء في عمر ( حبوبتي حليمة بت الشيخ)، يزيد أو ينقص قليلا، و لجأ البعض الى اقتناص لحظات قصيرات سعيدات مع بعض نساء دول مجاورات للسودان، حتي يتطرق الحديث الى موضوع ( انتا انداك الشريت المهمد الوردي ولا سيد الكاليفا)، ثم لم يلبثن ان تزوج معظمهن من رجال من دويلاتهم العريقة، و فتحوا معا بقالات لبيع البخور و الأنجيرا، فانسدت الطرق الى مخادعهن، و انفتحت امام شهية المهاجرين طاقات ( الزغني)، و الدكوة و بعض اغراض حلال، و أغضي آخرين الطرف عن مخازي السمنة، فأخذوا النساء و اشتروا معهن ( عفريتة) للأحتياط .

أستمرت فكرة خطأ العيش بين الرجل و المرأة دون عقد نكاح، حسب اسلوب حياتنا و عقيدتنا في بلادنا، في الحفاظ على موقعها الثابت، حتي وفي اكثر العقول تحررا وتقدمية، فالفكرة مستحيلة التنفيذ ، رغما عن اتصالنا المستمر بوقائع العالم من حولنا، فما من سوداني يقدر على تصور اخته او ابنته، تعايش رجلا غريبا و تعاشره دون زواج، الليلة بايتة معانا و لا مع البوى فريند يا الهام؟؟، ولأن الأمر لم يكن جزءا من نسيج سلوكنا الأجتماعي، فقد ابتدع اسلافنا كلمة ( مصاحب) للرجل الذي يقيم علاقة مع أمراة في السر دون زواج، و قد قدر لهذه الكلمة ان تقابل المعني في اللغة الأجنبية و التي تسمي الرجل ب (البوي فريند)، تقابلها في المعني و لا تساويها في الوقع و الأثر، وفئة ( المصاحبين) في السودان، جمعية سرية غامضة، مثلهم مثل مقاتلي جيش جبهة تحرير السلفادور، يبدأون زحفهم ( المغاربي)، نحو منزل ( الصاحبة) الكائن في موقع ( مزقول)، يعبرون في خط زحفهم، قضبان السكك الحديدية، و ميادين المدارس الأهلية، و الخيران التي تعج ( بالربابيط) و سلح الكلاب، و يرجوبة امطار السنة القبل الماضية، أدغال و اشجار و سبعه بحور، و قيل أن ملاقاة اسد يهوذا وارد في هذه الرحلة. و للمصاحبة في السودان اسباب وجود، اعظمها شوق النساء الفقيرات الوافدات المنفردات المنفلتات، في المدينة الكبيرة، الى الأمن و الحماية، وقد حدثني صديق ذهب لزيارة بيت من تلك البيوت في عهد قريب، حيث فوجيء بصورة اخيه خريج الكلية الحربية الدفعه ( كم كده)، معلقة في جدار غرفة المرأة، فلم يدر ماذا يفغل، و لكنه ادرك دون شك أن السيد الوالد كان عضوا في جيش تحرير السلفادورالسري، وانه شاء ان يشرك ( صاحبته) فرحته بتخريج ابنه البكرفي مصنع الرجال، فأسر الى نفسه ( بركة الما بقى عضو مجلس قيادة ثورة).
وبرغم الرفض الأجتماعي البائن لهذه الممارسة، الا أن ( المصاحب) و لسبب ما، يجد حظه من التقريظ و الأعجاب و الأطناب وبعض حسد و غيرة، حتي تكتشف ( عاشي) مؤامرته، فتخبطه بحديدة الفندك على ام راسه، فيشمت فيه الشامتون في صيوان العزاء بعد دفنه.
ثم تسببت اختلافات السلوك الأجتماعي في متاعب أخرى، شهدنا منها محنة صديق، هتف به القاضي و نحن جلوس في مبني المقاطعة نشهد مراسيم زواجه، مشجعا له
(Now you may kiss the bride)
ارتبك العريس فرد على القاضي
(قلت شنو؟؟ انت الله ماليك، ابوسا ليك كيف قدام البشرية دي كلها؟؟
و كانت العروس الأمريكية قد أغمضت عينيها سلفا، و مددت شفتيها في الفراغ، فاكتفي مجبرا بتقبيل خدها، فصفق الأمريكيون وحدهم، و امتنع بني كجة عن التصويت.
مضت السنين و تعاقبت الأزمنة، وازداد عدد الأسر السودانية، و سميت بعض مناح في فيرجينيا و نورث كارولينا بالكلاكلات، و عقدت الزيجات السودانية- السودانية الناجحة، و رددت الصالات الأنيقة الباذخة صدى (انثم) ( العديل و الزين)، تجرتق من تجرتق، و تحنن بحنة التاج الممتازة من شاء، و من شاء بالنشادر، و اصطفت الأمريكيات الشقراوات، والسمراوات و الهسبانيات، مضيفات للعرسان و ضيوف العرسان، كدحن و شقين بين الموائد حتى آخر الليل، محتملات لصياحنا الكيدي خلف المغني:

(القلل صبرنا و ازانا
البهدل عمرنا وازانا
شفت عيوني في سيقانا
ما شفتوها.... يا خلاااااايا)

قبضن البقشيش في نهاية السهرة مضين في صمت ، و لم ينتبه الى رحيلهن احد.

الملك 2009

[عصمت العالم]

العزيز تاج..
لك الحب والمحبه والموده..
وكلها امنيات صبايا ..ترف بندى الصباح المشرق على وحهك..
وتعسلك بى بلل الندى الرعاش...
اليس ذلك مفرحا...؟؟
وفيه توقع خيال التمنى..
يا صديقى..

كوبى .اند بيست.. الان فى مجال الانتاج السينمائى او التلفزيونى فى محاور القصه والسيناريو والتاليف والنسخ والتعريب..فى قطعاات بلاد عربيه فيها صبغة الطلاء بفهم ومفاهيم ورؤى.وازمنه.وتعلعل..
اليك مثال..
المسلسلات التلفزيونيه التركيه .وهى علمانيه..نصرخ نساء مكه وتصيح وهن يطالبن بحق مشروع مناهض ومكتسب..من ذلك التعلم..وافراز تركيا ليس من الان منذ البيت العالى والامبراطوريه العثمانيه..
ولعلك تذكر شكاوى جدودنا حينما عجزوا عن دفع الجبايه..فى التركيه السابقه التى حكمت السودان
كانت الة التعديب...قط جائع لفتره يوضع فى سروال الرجل وبريط ..ترى ماذا ياكل..!!
وحشية بليغ ومتعديه.. او وضع الشطه فى الملاين..للرجل...!!
هذه واحده...
نمط وثقافة وتربية المجتمع الغربى لا دخل لنا بها...لكن النساء.والرجال يستقطبونها ويتبعونها..موضه..وفهم,,وسلوك..
لعلك تابع تحدى منتجى ادوات التجميل..ومثالا الروج..
لا تستطيع امراه واحده عربيه ان تتخلص من ذلك الداء..
مصتوع من دهن الخنزير او من حوافره..!! هذا لا يهم يل المظهر..

جتى نقود العرب فى البنوك الامريكيه.زوالعائديذهب لتسليح اسرائيل.لان العرب يرفضونه بحكم انه ربا...!!
اذن نحن العرب نمول اسراءيل ونستاء اسرائيل بنقود بترول العرب..!!
شفت الموضع..
وهل شفت مدينة دبى البهرجه..!!
كلها اشياء غربية تنطق يها المدينه..!!
وهل تحسست كيف يعامل باسبورت صاحبة الجلاله ملكة بيطانيا فى الخلج..لكل رعاياها.الذين منحوا هذا الباسبورت..افارقه سودانيون.اعجام.او حليجيون..!!

هنا سر اللعبه..!!
وترياق ذلك السم...!!
يا صديقى,..
سيب نساء الغرب..فى حالهم وترحالهم...!!
وتعال للبورصه...!
هذا الداء الذى جعل الخليجيون يبعيون انفسهم ,,وزوجاتهم وبناتهم..وخيولهم.واشيائهم...!!
ترى ماذا يكسبون..!!؟؟

العزيز ود الملك..
واقع الان يختلف عن كل مجريات الزمن القديم الجميل...
ارنست همنجواى ان كان حاضرا اليوم ..كانت ستكون له رؤى اكبر من فكرة العجوز والبحر..
ةفرامك سيناترا..كان قد غنى شيئا مختلفا...!!
والاخوه الاعداء..!!
وشرب الشاى تحت ضوء القمر...!!
وجايكوفسكى...!!
ولوليتا...!!
حتى اغلى من لؤلؤة بضه صيدت من شطىء البحرين...!!
وبرجيت باردو..!! وذلك السكس الخشن..المستحب..!!
وحتى الطيب صالح ومصطفى سعيد..والان اصبحت ارض الله واسعه.. والهجره سعر يلد...!!
وما تتطيقه مثلا بريطانيا فى الكفاله الاجتماعيه..تعجز عنه الدول الاسلاميه مجتمعه..!!
وبيت مال المسلمين..الذى افلسته الايدولوجيات..والتقوقع العربى المنحط..
لندع نساء الغرب فى غيهن..!
ونستكفى..
بنساء العرب فى محنتهن...!!
اقول قولى هذا واستغفر الله لى ولكم...!!

[قيقراوي]

المشاركة الأصلية كتبت بواسطة تاج السر الملك

وقد حدثني صديق ذهب لزيارة بيت من تلك البيوت في عهد قريب، حيث فوجيء بصورة اخيه خريج الكلية الحربية الدفعه ( كم كده)، معلقة في جدار غرفة المرأة، فلم يدر ماذا يفغل، و لكنه ادرك دون شك أن السيد الوالد كان عضوا في جيش تحرير السلفادورالسري، وانه شاء ان يشرك ( صاحبته) فرحته بتخريج ابنه البكرفي مصنع الرجال، فأسر الى نفسه ( بركة الما بقى عضو مجلس قيادة ثورة).
وبرغم الرفض الأجتماعي البائن لهذه الممارسة، الا أن ( المصاحب) و لسبب ما، يجد حظه من التقريظ و الأعجاب و الأطناب وبعض حسد و غيرة، حتي تكتشف ( عاشي) مؤامرته، فتخبطه بحديدة الفندك على ام راسه، فيشمت فيه الشامتون في صيوان العزاء بعد دفنه.

الملك 2009

سلام يا ملك

و الله نحنا " هنا آلان " او شرق الاحمر دا مع " المواطنين " * ديل احبطتنا خالص او زي ما بقول صاحبي غسان " اهبطنا " . . . يعني الشغلة سنما سنما ساي ؟

كتابة طاعمة يا ملك

عن المقتبس المخزي انو الكورس في حسد الصحبة في الغالب هو نفسو جوقة الشامتين . . . و مال " سرية الشي دا جات من وين " . . . كلو سري . . . و سرية و دا سراً لينا

وطني حبيبي وطني الغالي . . .
و عاش كفاح الجمعيات السرية لتحرير السلفادور
و دام حسد " المواطنين " للـ " المواطنين " في معكوس النص كفاية لشر الشماتة
------------------
* في النكتة :
اتنين سعودين بسمعوا في الاخبار : وفاة 5 مواطنين في سقط لقط الامريكية اثر الكارثة الطبيعية المعنية . . . .
واحد اتلفت للتاني و قال ليهو في شماتة : يستاهلوا هدول " المواطنين "هم ايش وداهم هناك ؟

[طارق صديق كانديك]

لا يمكنك وأنت تجول ببصرك هنا .. إلا أن تبتسم تارةً .. وتخفي بحسرةٍ لذيذة بعض ملامسة الحروف لمواقف مرت عليك واستقرت هناك في العميق .. تاراتٍ أخرى .. وأنت تمارس التجوال المريح هنا .. استوصي بظلك خيراً .. اذ ربما رغب هو في المكوث قليلاً حينما رغبت انت في الفرار .. مما ألفيته مسكوباً هنا كشهقة عشق .. !!

شكراً يا ملك ..

بالله قلت لي يعني .. الجكس ( الهسبانيات ) .. دونهم بيد وبيد ... !! والله خسارة ياخ .. !!

أصدق تحياي ومودتي

[تاج السر الملك]

أخي عصمت
كما قلت فهذا هو سر اللعبة، و انا اؤمن تماما بوجود الخلطة الجيوسياجتماعية.. دي اخترعتها هسسسسسسسع..لكن المرأة الغربية دي حاجة تانية في مخيلة الرجل القادم من وراء البحار، في زى فهم مختلف لحقائق الأشياء، فنحن عشنا تحت وهم تحررها الذي يجعلها ( تقابض) في الشوارع، و مفاجأة كونها امرأة جادة طموحة ، اشكرك أخي على المداخلة المتميزة


القيقراوي ايها الصديق العزيز
شرق الأحمر ده قصتو برااااهو، ما بنقدر نحكي قصصو الجابوها لينا الشباب الذي كان يسوق الليموزينات قررقرقرقر خليهم في طاش ما طاش لمن يلقو الليمو في القراش...






كانديك ايها اللأريب

اللغة ، عليك بالغة و تقوية الركب لرقص السالسا و الميرينقي و غير قليل من الكاليبسو، بعدين نتفاهم، لكن بالجنبة كده في ( اوبينينق)
كبار سن لكن الغرض بينقضي.

تحياتي لكم جميعا


الملك

[فتحي مسعد حنفي]

المشاركة الأصلية كتبت بواسطة تاج السر الملك

أخي عصمت
كما قلت فهذا هو سر اللعبة، و انا اؤمن تماما بوجود الخلطة الجيوسياجتماعية.. دي اخترعتها هسسسسسسسع..لكن المرأة الغربية دي حاجة تانية في مخيلة الرجل القادم من وراء البحار، في زى فهم مختلف لحقائق الأشياء، فنحن عشنا تحت وهم تحررها الذي يجعلها ( تقابض) في الشوارع، و مفاجأة كونها امرأة جادة طموحة ، اشكرك أخي على المداخلة المتميزة


القيقراوي ايها الصديق العزيز
شرق الأحمر ده قصتو برااااهو، ما بنقدر نحكي قصصو الجابوها لينا الشباب الذي كان يسوق الليموزينات قررقرقرقر خليهم في طاش ما طاش لمن يلقو الليمو في القراش...
تحياتي لكم جميعا
الملك

كيفك يا ملك باين عليك انتهيت من الجغرافيا ودخلت في علم الانثربولوجي المهم اسلوبك الممتع حتي لو كتبت في أدب المدايح..
بس ياملك العيب فيكم انتو الرجال ما في الأجناس الانت قلتها.وأنا شخصيا مشيت عندكم واتعاملت مع جميع الأعراق بالصورة الانت قاصدا وكانوا كلهم ظراف

[خالد الحاج]

سلام يا تاج...
أضحك الله نهارك يا صاحب...
نحن والله أحسن حالا منكم ...
عندنا والحمد لله "البروص" يدلعونه هنا ب (Red Light Distrect)
هي 50 يرو ولك أن تختار بين شقراوات أوروبا الشرقية "سبعتاشر سنة " والجنوب الأوروبي بالشعر الأسود والعيون السود ..أو تكون طفس وتقع الكاريبين وغرب أفريقيا ...
علي أن "تتحسس" واخد بال حضرتك ؟
بعض إخواننا من الجنس الثالث برعوا فيما يسمونه (بلاستك سيرجري) و-الصدر مدفع-
والغنج الذي تحسدهم عليه بت مجزوب... "التحسس مهم خالص خالص " خاصة وأن للأمستال واخواتها تأثير مضر علي الرأس والتمييز... وفي ناس "ما قع يفرزوا شي "
جرب بعض أخوتنا من الصومال فكرة الزواج "وهؤلاء بهم بداوة وجلافة "
انتهي بهم الأمر في "تخرية الكلب" -من خراء- أي والله
وأهم المشاوير مشوار الصباح فكلابهن لا يتبولون إلا في أماكن محددة .. والمشي رياضة لو لا الثلوج و "الجو الرطب" ....

قرايتك متعة يا صاحب...

[تاج السر الملك]

يا فتحي مسعد
البركة في شوفتك
لكن اتعاملت مع أعراق دي عندها معني بعييييييييييييييد، فاهمنك، قال أعراق قال أعراق هي هي هي هي..و كانو كلهم ظراف!!
الفيك اتعرفت .
تحياتي الحارة



جيناك يا خالد
انت البوديك البروصات شنو، مش قالو ( متضامن)؟؟
اللخبتة شنو، بعدين 50 يرو ما بطالة، تعادل كم دي؟؟؟ طرادة؟؟
و الطاشرات دي انشاء الله ما تنفعكم.
شكري الجزيل على المداخلة الصريحة ههههه
الملك

[Osman Hamad]

العزيز الملك
أقراء لك بإهتمام، فلك منى التحية والحب.

النص أدناه كتبته هنا فى سودانيات قبل عام او اتنين (لا اعلم جيداً)، فلان جلبته هنا، لعلنى اكون وفقت فى وجه الشبه،(طبعاً لايمكن ان اقارن قلمك الرائع بشخبطاتى المتواضعة هذة).
إذا حبيت يمكن ان تبحث عنه وعن مواضع أخرى تحت إسم شخصى البسيط (Osman Hamad) لتقراء او ليطمئن قلبك للمصدر.

لك الود من كل غجٍ عميق
عثمان حمد عثمان حمد

الى النص

[align=center]مابيــن جاكــوليـــــــــــن و ونســـــة الجلاكيــــــــن[/align]
فى صباحٍ رائع كروعة جاكولين، إحتضتنتى بكل إللفة وإتطمئنان، وكأنها تعرفنى منذ نعومة مخالبى بأدغال إفريقا، ثم سحبتنى من يدى برعاية كاملة الدسم إلى المقهى الجامعى، الذى يقع فى بدروم إحدى مبانى الجامعة، و يُسمى هذا المقهى بالمربوع السابع عشر، يا إللاهى !! لماذا يسمونه كهذا !!، فهذا الإسم يذكرنى دائماً بمغامرات الشياطين الطلتاشر والزعيم رقـم صفـــر.
أعلنت جاكولين عن دعوتها لىّ لتناول القهوة معها، وشرحها لى بعض المسائل فى إحدى البحوث العلمية.
كان كل شئ فى جاكولين جميلٌ ومرتب وكأن ترتيب الكون بداء من عند ملابسها وشعرها الاشقر داكن الشُقرة.
جلستُ على كرسى وثير وكنت امتع عيناى بجمال جاكولين وقوامها الحلو وهى بين الجية والذهاب لإحضار القهوة وعلبة السجائر والمنفطة، وكانت من الحين لحين ترمينى بإبتسامة أشبة بشروق الشمس من قلب النيل، أنستنى كل صباحتى البائسة بست النفر بائعة (الزلابية - اللقيمات)، التى كانت تضع تجارتها فى كل صباح امام دارنا، فإبتسمت فى سرى كثيراً وسبحت الله الذى أسرى بعبده جواً من ست النفر إلى جاكولين.
إتخذت جاكولين من المقعد المقابل لى مكاناً لها و بدأت فى إخراج بعض الاوراق من حقيبتها، حينها جاء زميلنا ماركو حاملاً قهوة بين يديه وسجارة فى شفتيه، رمى التحية علينا كما رمى جسده على مقعدٍ يسار جاكولين بصورة كافية توضح سَهرهُ ليلة امس فى الحفل الجامعى، ثم بداء يتجاذب معنا أطراف الحديث، حينها بداءت أطراف فخذيى جاكولين تُقاتل إسكرتيها القصير من أجل الحرية، فكانت جاكولين تتابع حديث ماركو بنفس الإهتمام الذى أتابع به أنا معركة فخذيها مع إسكرتيها القصير، فبحركة لا إرادية بداءت جاكولين فى هز وتحريك فخذيها مُعلنة الفتح المبين، فحينها صرخت أنا بأعلى سرى، هـ الأن كفى الله فخذيى جاكولين شر القتال، فتمنيت حينها لوفعل بنا حُكامنا العرب والافارقة كما فعلت جاكولين بفخذيها من أجل الحرية.
يسألنى ماركو سؤالٍ ما وانا غارق فى تصفح فخذيى جاكولين، فحقاً كانا كتابٌ رائع، تساعدنى جاكولين دون علمها فى قرأته صفحة صفحة بتحريكهما الدائم وإتساع مدار الرؤية إلى أن تبين لىّ اللحم الأبيض من الخيطِ الأسود، فبـيانئذن سرت فى جسدى حمى خمرية لذيذة اللذع.
حينها يستبدل ماركو سؤاله لى بسجارة بعد أن يئس من إجابة له منى، وكانه كان يعلم حوجتى لسجارته فى تلك الحمى أشد من حوجتى لسؤاله الذى لا اعرفه حتى يومنا هذا، تناولت السجارة من ماركو دون أشكره، ففخذيى جاكولين أنسيانى كل أنواع الشكر إلا لله خالق الجمال.
نهضت جاكولين من مقعدها بصورة سريعة مصحوبة بشهقة وكأنها تعلن نسيانها لأمرِ فى غاية الأهمية، فأخذت الملعقة وإتجهت صوب قهوتى التى كانت أمامى، ثم إعتذرت لى لانها لم تحرك الحليب مع القهوة.
إنكبت جاكولين على قهوتى، فأعلن صدرها أمام عيناى عن حربٍ أخرى جديدة، ذكرتنى بحروبنا فى إفريقيا الغبشاء، التى ما أن إنخمدت فى مكانٍ ما، وإلا إشتعلت فى مكانٍ أخر.
بدأت أتابع المعركة الجديدة المثيرة، فنهدين جاكولين كانا فى قمة الروعة والشجاعة و يستحقان المتابعة، بدأت جاكولين تحدثنى بأننا سنبداء الشرح بعد قليل، فكنت اُجيبها بسرى، الأن لا شئ يحتاج للشرح فكل معانى الجمال فيك وأضحة الطلاسم.
بدأت جاكولين فى تحريك القهوة و عيناى معلقةٌ على صدرها، فكانت مع كل دورة للملعقة داخل القهوة، تدور بى الذكريات الاف الكيلومترات صوب أدغال أفريقا، إلى أن جائنى صوت حاج ابوعاقلة من أعلى التل بطرف حلتنا، وأنا مع صديقى أبودومة أسفل التل نرعى الأغنام ونسترق السمع.

والله يا الطاهر أخوى، صفحتى البجاى دى، توجع فينى جنس وجع، الليل كلو تنتح وتسوى فى التح التح التح مِتل طاحونة ناس حاج عوض، لمن النوم طار من عويناتى.
هكذا كان حاج ابوعاقلة يشكى اللآمه للطاهر، فتدخل حاج ابوزيد لافحاً الرد عليه: خلى بالك ياحاج ابوعاقلة يكون عندك إلتهاب فى قناة فالوب، حينها نظر حاج ابوعاقلة لحاج ابوزيد مغتاظاً مرحاً ورد عليه بشئٍ من المناكفة الجميلة: إنت دحين يا ابوزيد أسى السعلك منو !!! أنا سألت حكيمنا الطاهر دا، قرأها فى بلاد برة مع الخواجات، إنت فوق كم!!!، يا ولادة الدفِس البلا نفِس، ما تارك ذى وجاى يا حاج ابوزيد بلا عَلام، وللا مو ياهوى كدى يا اُستاذ الضو؟، أنت و الطاهر وحدكم الفينا الضقتو طعم العَلام، الطاهر قراء الدكترة وإنت قريت الفلفسة، سؤالئذن أخرج اُستاذ الضو من جيب جلبابة علبة سجاير بينسون كُتب عليها صنع خصيصاً للسودان فسحب منها سجارة وقدم ايضاً للطاهر اُخرى، بداء أستاذ الضو فى الإجابة على حاج ابوعاقلة: آى ياحاج ابوعاقلة ، لكن ......، فقبل أن يكمل قاطعه حاج ابوعاقلة مواصلاً حديثه: لا ما لكن وللاحاجة، إحنا حقنا فوق روقاب ابواتنا، عدوها كلها مُساسكة حريم وشراب مريسة وطلعونا فى الأخرة بلا عَلام.
يواصل اُستاذ الضو حديثه ضحكاً لحاج ابوزيد: لكن ياحاج ابوزيد، إنت القال ليك مرض حاج ابوعاقلة دا إلتهاب فى قناة فالوب منو؟؟ والكلمة دى دحين ذاتها جبتها من وين؟؟ وحفظتها كيفين ؟؟ وعارفها وللا سكات؟؟ غايتو ياحاج ابوزيد عليك جنس مِحن!!!!، يرد حاج أبوزيد قائلاً: والله الكلمة دى سمعتها من بناتى، قالن بت حاجة علوية عندها شيتن مِتل شكية ابوعاقلة دى، وقالن ودوها لى عند الحكيم وقالهن عندها إلتهاب فى قناة فالوب، وأنا دحين ختيت بالى بالحيل للكلمة دى، لأنى قلت إمكن دا مرض سرطان جديد دخلنا فوق الحلة، حينها يجحظ حاج ابوعاقلة عيناه ويهاجم حاج ابوزيد قائلاً: إتسلطنا على النبى!!! كاتلنى مالك ياحاج ابوزيد !!!!
يتدخل هنا الطاهر ضاحكاً ومُهدئاً لحاج أبوعاقلة قائلاً له: ماتخاف ياحاج ابوعاقلة،إنت براك عارف حاج ابوزيد دا من زمنو الصغير قالوا بلفح الكلام، دا ماهو سرطان وللاحاجة، بعدين ياحاج ابوزيد قناة فالوب دى اللِت الحريم وبس !!! يعنى تابعة للرحم والولادة، حينها يضرب حاج ابوعاقلة مُناكفاً حاج ابوزيد بحقة الصعوط على رأسه قائلاً له: يلفحك اللفيح ياحاج ابوزيد أخوى، كان جايب لى مرض الحريم!!!! شكيتك على الله!!!
هنا يسال حاج ابوعاقلة دكتور الطاهر بمرحه المعروف مبتسماً و مغيراً مجرى الحديث: لكن إنت دحين يا الطاهر أخوى بمناسبة الحريم دى، كدى النسعلك مسعول من الخير، حريم النصارى القريت معاهن ديل، شِيتن مِتل شِيت حريمنا ديل !!؟؟
اُستاذ الضو ضاحكاً: والله ياحاج ابوعاقلة عليك جنس مِحن !!
حاج أبوعاقلة: لا والله، لكن عِلا من زمان كان نفسى أضوق حق حريم النصارى ديل، يبقى لى الغُلف ديل نجيضات وحريفات بالحيل وبعرفن للرجال كويس وخصوصاً للفحل المِتلى انا دا.
حاج ابوزيد مناكفاً أبوعاقلة كالعادة: دحين مِتل دا الكان مُخليك زمان مُبارى سعيدة الحلبية يا ابوعاقلة أخوى!!!؟
حينها يستعدل حاج ابوعاقلة جلسته ويشهق كمية كبيرة من الهواء يحتزنها بين رئتيه، وكأن الحكومة قررت إدخال الهواء ضمن قائمة المواد التموينية، وحين تذكر ابوعاقلة أيامه مع سعيدة الحلبية، أخرج ما إختزنه بين رئتيه من هواء بشدة وكأن الحكومة تراجعت عن قرارها، قائلاً لصديقه حاج ابوزيد: إييييييييك، دا ما كان زمناً تانى، تانى مابجى راجع!!!! ياحليل زمن سعيدة الحلبية، بالله الولية مابتشبع!! هدت حيلى وكسرت رُكبى، الله يطراها بالخير والله ماقصرت معاى تب، وحاتك ياحاج ابوزيد للعرقى والعشاء كانت تجهزهم لىّ.
حاج ابوزيد: كل شئ كان بحقو يا ابوعاقلة أخوى وللا مايهو كدا!!، عِلا الطاهر الحكيم دا من زمان كان زولاً محترم ومهذب وماهو زول فارغة حتى لمن كان براهو فى بلاد الخواجات .
ابوعاقلة مستنكراً حديث حاج ابوزيد: صحِى دحين الكلام دا يالطاهر أخوى!!!! مالك !! ماك مطهر!!؟؟.
فقبل ان يدافع الطاهر عن نفسه، تسلقنا انا وابودومة إلى اعلى التل من الجانب الأخر بحيث لايرانا أحد، لان إسماعيل موظف الإدارة إقترب الى جلسة ناس حاج ابوعاقلة من حيث كنا نجلس أنا وابودومة.
فقبل أن يصل إسماعيل، يلوح إليه اُستاذ الضو من بعيد يحيه: مرحب مرحب إسماعيل.
حاج ابوزيد: بِــس الجنى المسعول فى الكهرباء والموية دا أصلى ما درتو، قالوا كافر بالله والرسول.
حاج ابوعاقلة: صِح بالحيل، سامع الجنيات قالوا مُلحد.
الطاهر: براحة ياجماعة، مافى داعى للكلام دا، الزول دا قرب مننا.
إسماعيل يحيى الجميع: عساكم بخير ياجماعة، بالمناسبة ياستاذ الضو، الليلة مابتجى الإجتماع؟، لانو عاوزين نناقش امور جمع التبرعات للجمعية الخيرية وبعض الامور الخاصة باللجنة الجديدة.
اُستاذ الضو: إن شاء الله بجى عليكم.
إسماعيل: سمعت ياستاذ الضو بالمذابح الاخيرة دى!!؟؟، ياخى العالم كله بقى خراب وحروب نيران.
يقاطعه حاج ابوزيد: قدر الله
إسماعيل معترضاً على رأى حاج ابوزيد: باقى نحنا طوالى فى قصة قدر الله دى!!! لوكان الكلام دا صاح وفعلاً فى قدرة إللاهية ذى ما الناس بتقول، طيب وووين إسم السلام دا!!؟؟ مايجى نازل ويحكم البلاد دى!!؟؟
يخالفه الطاهر الرأى: إستغفر ربك يازول!! النضمى الما فى محله دا مافى ليه داعى!!
إسماعيل يحرك رأسة يمنةً ويساراً مستغرباً فى حديث الطاهر: إنت حالتك الفاهم يادكتور!!!، على العموم أنا اسى مستعجل شوية، عشان ماشى أحضر بعض الاوراق للإجتماع، خلاص لبعدين ياستاذ الضو!.
ابوزيد متحولقاً: أعوذ بالله من الأفندى دا، والله صِح دا كافر عديل وبى وش الدرب.
حاج أبوعاقلة: غايتو نضميهو دا يبقى لى كُتر عديل كدى، ويخربنى كان فهمته منو شئ، لكن دا ما المهم عندى، المهم عندى يا الطاهر اخوى، خلنى مع نسوان النصارى ديل، دحين يالطاهر اخوى صحى شِيتهن دا أفطح؟؟، والله أنا كان الله ودانى هناك، كان أسوى البدع والعجب العُجاب، وكان مامصدقنى كوسو درب سعيدة الحلبية وين وأسألوها من أسد الليل، هيع.
أبوزيد ضاحكاً: إنت الليلة مالو نضميك دا يبقى لىّ كُتر كُتر يا ابوعاقلة اخوى!!؟؟ دحين الولية عندها أيام الإجازة وللاشنو!!؟؟ بعدين ماقلنا ليك الطاهر ماهو زول فارغة.
الطاهر ضاحكاً مُعلقاً: ابوعاقلة دا من زمان أصلو كدى، بريد مِتل الحكى دا، والله، الله يخليك يابوعاقلة عمرك مابتتغير، لسة ياك ابوعاقلة الزمان، زول المرح والنكتة.
ابوزيد يبداء مرة اُخرى فى شغبه اللذيذ مع ابوعاقلة: لكن يا ابوعاقلة اخوى يبقى لى إنتَ ذاتك كِملتَ تب!!؟؟
ابوعاقلة مُدافعاً عن فحولته: أفو أفو، أنا بكمل!!! أنا ازرق زراق المابنضاق، قايلنى مِتلك آآلعِيفة!!؟
حاج ابوزيد: أفو أنا....
يقاطعه حاج ابوعاقلة حاجراً رأيه: أسكت أسكت، أفو شنو البتقولها إنت كمان، إنت قايل زولتك الزمان تنكوشة الزرقاء ماكان بتحكى لى بخيابتك، فضحتنا الله يفضحك!!
يواصل حاج أبوعاقلة حديثه للطاهر: عِلا يالطاهر أخوى، حق حريم النصارى ديل كان كان لقيت لى فرِد لحسة بى لسانى دا والله ما كان باباها!!!
ينفجر الجميع ضاحكاً ويعلق حاج ابوزيد: دا شنو يااا العفِن !!
حاج ابوعاقلة: والله مانى عفِن، عِلا من باب العِلم بالشئ وللا الجهل به ياخوى ابوزيد، وبالتالى عشان نعرف فرقو شنو من حق حريمنا ديل.
حاج ابوزيد: إنت دحين كان ماك عفِن، حق حريمنا ديل ضقتو بخشمك دا وللا كلام ساكت!!؟
ابوعاقلة: والله الحق يتقال يا ابوزيد اخوى، لسة ماضقتو بخشمى دا، عِلا اقولكم كلام، أنا والله حق حريمنا ديل كان ما الخُمرة والدلكة ديل، كان يبقى لى طعمو مِتل حجر البطارية.

الله أكبر الله أكبر الله أكبر الله أكبر، أذن الأذان

اُستاذ الضو: الله يجازى مِحنك يابوعاقلة، الليلة قطعتَ مصارينا بالضحك، ياللاكم ياجماعة الصلاة، وخلو النضمى الكُتر دا، باقى أذان المغرب أذن.

وحين هَمَ الجميع بالإنصراف إلى الصلاة، بداء ابودومة بالتدحرج من أعلى التل، ثم لحقته انا متدحرجاً شيئاً فشيئ إلى أن إستطدمت اُذنى بصوت جاكولين وهى تغلق الكتاب مُعلنة لىّ إنتهاء الشرح.

حينها أغلقتُ أنا جاكولين فى عقلى وقلبى وضميرى مابين اُمنيات حاج ابوعاقلة ومابين أدب وتهذيب الطاهر فى بلاد الفِرنج.

عثمان حمد عثمان حمد

[فيصل سعد]

سلام يا تاج السر يا ملك يا ود الملك و ليك وحشة يعلم الله..
شكرا لهذا النص الممتع الشيق .. و كتر لينا من زي دا

[فتحي مسعد حنفي]

[QUOTE=تاج السر الملك;128539]يا فتحي مسعد
البركة في شوفتك
لكن اتعاملت مع أعراق دي عندها معني بعييييييييييييييد، فاهمنك، قال أعراق قال أعراق هي هي هي هي..و كانو كلهم ظراف!!
الفيك اتعرفت .
تحياتي الحارة



ياخي ما تبطل سوء الظن وأنا الفاهم قصدك والأعراق دي حسب تقسيمتك انت وما لينا في الجنس التالت..لكن يمكن عشان أخوك لونو غيرما من بني كجة..

[تاج السر الملك]

اخي عثمان حماد
اعجبني نصك، و أشكرك على ايراده كمشاركة و اتمني ان اقرأ لك المزيد



فتحي مسعد
الكلام على اللون يا حلبي ههههه
قلت لى ظرااااف!!! ركوب الجن؟؟؟


فيصل ود سعد
يا حليلك و يا حليل زمن الطير الخداري
لك وحشة يا رجل.


الملك

[الأغبش]

تاج الإبداع ... نص مترع حيوية ورويااااااااااااااااااااان رغم الشلهته وشحتفة الروح الباينة ..


قلت لي موقف الحلفايا ؟؟وأنا أقول الزول ده شايفو ويييييييييين

[تاج السر الملك]

الأغبش
مرحب بيك
الحلفاية الجابك ليها شنو يا زول؟؟
تحياتي

[عادل عسوم]

التاج ...ياملك
أراك (مُجيدا) في تمييز أنواع ال(التمور)
قرأتك ب(شغف) ثم عمدت الى (أوراق) لي كنت قد سطّرت فيها العديد المرادفات ل(ميهاميد وجاكي)...أعدك بعودة و(افاضة)...
تسلم