جملة ظنونك
تفتكر بين ظنونك وبين يقيني ياتو سكة بتمشي
وبين قساوتك وبين حنيني اتنضم عقد الوشي
اتلفح ستر المودة والفضل ولا اي شي
شويه من ملح الوصال وشويه ذكري بتنغشي
وكتين يبتر الاشواق زمن بي كلمه سماحه بيرتشي
وتفتكر ..
انا زي مافي ظنونك ولا بس خاطر السماح مكسور معاك
واتقعدن لحظات ودادنا على الرصيف واتهود التفسير حداك
اتوشوش العازل فرح وكتين زحزح بالعتاب صخرة هواك
واتوهطن همسات اسف في حدود المستحيل
غنن معاي غنوة رحيل
وشال معاي وجعي القبيل
طمبرن نجمات سمر
هدهدن معاي ليلا طويل
قفلت خلاص سكة هواك
قصدت من بعدك رواح
زادي عذرا من صنيعي
واهة ومن صنع النواح
وفرحه من غير احتمال
ونظرة من وش الصباح
وكتين ليل انتظاراتك بطول
وتلفح الطيف الرياح
بستنى بيك عيدا فريد
وبسمة بي كل ارتياح
واتاريني مبحر في السراب
وفارد شراع الاندياح
يازول دثر الايام وجع
وحرم الصبر المباح
يازول الهب اللحظات سعير
وصالبني في عكس الرياح
تفتكر ممكن نعود وليل سعدنا
دقدق ابوابو الصباح
سامحني وارتحل
بس برضو افتكر
ليك في الخاطر سماح ..
|