لله دركم أيها الجميلين الشرفاء، وأسأل الله العلي القدير أن أكون قدر هذا التشريف وهـذا القبول الذي أعتز به كسوداني مسكون بالوطن وأهله وخرائد طينه الذكية العابقة بالعطاء والنماء،
وبحبيبات رمله بل أحجية رمله العزيزة على كل سوداني غيور، ونيله الصبور ندي العطاء.
لكم كل الود وعميق المحبة يا كل الجمال والمنعة
وبهديكم العيدية دي ضروري توصلوها لي أمـي الحنون وكل زول جميل بحب الوطن وأهله وحوائه الجميلة.
وكتِبتِك يا أُمي
وكتبتك جوه حواسي اشواق وحنين
وهيبة شفيفة حفها الياسمين
تمتاز بي خفراً رائع وحصافة ودين
وكتبتك
كتبتك في الجبين تعويذة فرح
مجرتق بي العديل والزين
وسجلتك في الضمير
خاتم بضم حرفين
أحمر عين الموسم بي شقى التايهين
وكتبتك بي خيال إنسان عشق ذاتك
وغنيتك بي خيال فنان
رآك في الخيال عيان وبيان
وقال يا ريت لو ينفجر تنور الغضب بركان
وناديتك وناجيتك وغنيتك
أحلى نشيد وبشروا الحبان
وعزفتك ..على وتر قلبي الشفيف
وصهلت جوه في أعماقي .. خيل العقيد وجملة الفرسان
مع زغرودة مهيرة وكرنفال فرح طربان
وإرتسمتك في الصدر نيشان
ونبض يرف في صفحة الخاطر
وملاك طاهر بيرفل في جوف أنسان
وحن دفاق وغيم ماطر بيدفق أمل بين جِنون وجِنان
وناغمتك يُمـة الحبيبة يا بِـري
أقيفي حدايا ضُميني .. تاتيني .. مشيني
وأديني من عزمك البخليني اقيف دغري
خلى النار تصابحنى وتماسيني
وتمسح كل دمعة حزن متِل شامة الكآبة المنحوته في خاطري
بتتألم متين يكون النيل بأمان
متين النخل يعانق بعضو ويسلم السودان
عوضيني طعم الفرح الجافاني زمان وزمان
يا أمي يا مهيرة أديني من إرثك تعويذة ثبات ورهان
أسقيني من دنك أكسير الوصال الكان
تعالي أقيفي حِداي يا كرمة الحبان
تعالي يا حلم الملايين وعشم باكر
وأنا يوم إجرتق سمح ترابك بي غزير دمي
بفيض نيلك وبِهِـل فجـرِك ويطيب خاطري
خيارك زينة بهاكي الما بعقدو الني
وعديلتك يتباشروا فيها أبان مسوحا مي
أبقى صحيح ولدك وتبقي العِزيزة أمي
واريني في حضنك أمان
يا حلم عمري وعشم باكر
عشان أتلاش في حلمي
عشان أدفى بي ترابك وأقول
تحي وتعيش أمي
تحي وتعيش أمي
يا أُمي
ابدا لكم /الحبوب
