عــــــــــــودة ... وحلم

[أسامة معاوية الطيب]

والشارع المبهوت يعاينلك
يحنضل بي سكاتو غناك
وينتاوق يعاين للخطى الماشات يطنش
يتكفى ويرجاك
تغسل طرحة الليل الممدد في مشاويرو المعاك
بقة صباح
تدعك هديمات السكات وتشرهن
فوق حبلك الممكون جراح
هدّامك الماسك دريبو على التمر
قاوا الجروف شان جاتو وحّدا
لاعيوش بي فوقا لا ريقان جرم لا اللوبي شابك لا الملاح
لكنو ما شال من طرف تمراتك الراكزات سوا
و طلحات عوين المدرسة
الواقفات مراح
و الشمس فوق توب النويوير المرق
ركَّت تقريه التواريخ و الخبارات
المدسدسة في تياب الحلي
والعمم القبيل شربانى والتريانى
من عرق النهار والليل وشايات الصباح
ركّت تناديلو الأمان الفرّ من شدرو وسكن آخر
زقاق في ذكرياتو اللسة ما لمّت
في باقيها اللى راح … باقيها راح
وكانت بتحلم من زمن تشطف ملاياتا وتقش الحوش
عشان باكر بعد باكر بيبقو وشى صفاح
وصفحة كتاب العالمين تشهد على ريدنا
الأراضي الفينا ممدودة وهواك
تشهد على انك رسول الغنوة لي هادى الخلوق
وانك براك
تشهد على زفة عصافيرك بنات
الفكرة والخاطر معاك
تشهد تقرّيلك بطان أبريل درس عزتنا
شان يكبر يغنّيلك
زنازينك تضيق توسع وهادى الدنيا
ما وقفت على ضيق لحظه واتباكت
وأمانيك القبيل راحت تشاقق شوك لقاك
تلقاك ……مسادير ضلت الواقع
ولا اتلايم هواها وراك ولا انضارت
تقيف تكتب على صدر الغمامة نشيد
ينقّط في الفيافي مطر
تشد في نصها الوديان خدار وخدار
تلف بالباقي حد الشوق مناديل القبيلة سفر
قناديل الكلام المات تولع في حشاك قمر
تنوّر في الليالي الحن تدودرلو الاماسى وتر
يهاتيبك
يا غنوتك في الريح مشوار على كف الأماني
يا رسمتك تبريح يا شوق على نبض المعاني
ضحتك غنوات تبكينى
وتشيل من خاطر الأحلام مناديل التهاني
وتكتبك في البال على كل الحيط موّال
سبابير القبيله تطول وما تشيل الحروف شبّال
وتكتبلك بنستناك على الأبواب وبيناتنا الغنا الهطاّل
وكمين من شهيد وقصيد ورجيان الخلاص الطال
وكمين من سؤال واقفات على باب الإجابة
سحابة تتقاطر مهابة وفال .. تناديلك
علي يا فضل
علي .. يا .. فضل
وعلي ود فضل آخرة مَهر هادي الصبابة
يقيف على حيلو ويجيك
مسنود على حبر النشيد
خاطر من الغيم البعيد مشدود على لحن الغناوى البّاقة ضو
ممدود على كل القلوب الفاتحة في الشارع
قهاوى
ولون من الشفق البغسّل دهشة الحلة المجرتق شوقا عيد
وملموم على حيل التراب
آخر سحاب شاهد على وكت الفجيعة ومستحى
ومتخبّى في وردة أماني المتعبين
مادد على خدرو النصيحة وريد وريد
وهادا السحاب نقّط على كل البيوت لون الأرض
يا لونّا يا هادى العلي
يا هادّينا في كل الشوارع لون نضال
مكتول على عشقك طفل ومجروح ورا شوقك
زمان الغنية والعرس الحلال
مارق من آخر رمش فيك
رشفة بنات العالمين ايوووووووى
وركزة شفعك في البال
وكاتبنك على دخلة نفسنا الجوف
مروق حس الغناوى بلاك محال ومحال
ويا حفيان على دروب القوافي وسكتن
ماسك شباطين الحضور و الضو وغايبات المنافي
مواويلك جرس فسحة مدارسنا
وشهيق الوردة في وش الغمامات التوافى
مناديلك تقطّع من وشى الأيام حواشي اللهفة
فوق قوز الغناوى الصايمة من رجعة غناك
لي بكره ما غنتلو مافي
شعاع في شعاع نلقط غيمك الولهان
عشان نكتب على جيد الخميلة
غنينا يا هادى الجميلة
غنى لا كتر انشداهك لا انتباهاتك قليلة
غنى ما حالت قوافيك بين عيونك ومستحيلا
غنى شايلنك ترابنا وصوت قماريها ونخيلا
عمرو لا الغنوات حتكمل لا حتقنع من شليلا
والعيون في القيف تحلّق تتكى وتنزل في نيلا
غنى شبّال البنيات البنقط بين كتيفات القبيلة
غنى مرسال العصافير الحكاية وضجة هدّ الصمت حيلا
وغنى يا هادى الجميلة
رحيق البكرة كان قطّر على ورد الأمل مسدار
يشيل باقي الندى النوّار
يلّون شهقة المريود
ومن مرقة دخول الروح تسافر دهشة العابرين
على سكة هواك ورود
وتتواعد مسامات الحضور في الضو
تجرّح ضلمة التاريخ تلوّح في الفيافي شهود
تجيك تحلم غنا وآمال
نلقّطلك قناديل المدينة سحاب نشتتلك ضفاير غنوتك مرسال
ونكتبلك على الموجات مداين عشقك الموّال
ولا كضّب في جيتك ريح ولا مطر الفرح هقّال
وتنصنت خطاك الفكرة تمرقبك نفس طالع من آخر بيت
نفس نازل على الحلاّل
كتاب البكرة يتمارى وسطور الحاضر الفى البال
تشد تركب قفا الأحلام ويتلايم حصاراً طال
وشن تسمع بلا الغنوات
وشن يرجع بلا المارق من الغيمات
و..شن يفلع قلاع الظلم غير حجّار نضال ما مات

[elle]

الفكرة والخاطر معاك



تحياتي للحرف الندي

[بدور التركي]

قرأتك من العودة للحلم
عدت
لقيتك
انسان. جميييييييييل

من وين بتجيبو الجمال دا كله؟؟

[أسامة معاوية الطيب]

المشاركة الأصلية كتبت بواسطة elle

الفكرة والخاطر معاك



تحياتي للحرف الندي

شكرا جدا على المرور (المقتضب )
كل سنة وانت طيبة ياستي

[أسامة معاوية الطيب]

المشاركة الأصلية كتبت بواسطة بدور التركي

قرأتك من العودة للحلم
عدت
لقيتك
انسان. جميييييييييل

من وين بتجيبو الجمال دا كله؟؟

شكرا جدا ليك
انت الجميلة ياسيدتي
الجمال دا ؟ الحالة باللوك القديم
ازيك وكل عام وانت بخير

[سمراء]

اسامة

يازول مجرتق من غنياوت الفرح
وياعشم نرجاهو ذى طلانا عيد
امسك بيدك سبحة العشم السرح
وردد ورد فرح البعيد
يانا راجينك زمن
تمرق تنور لينا عيد

وياعيد تعود واسامة زاخر ومليان فرح يارب
وكلمات انيقه وراقية تدخل الزول بى مهل
وتمرقك من وحشة الضيق والشناف

[بدور التركي]

المشاركة الأصلية كتبت بواسطة أسامة معاوية الطيب

شكرا جدا ليك
انت الجميلة ياسيدتي
الجمال دا ؟ الحالة باللوك القديم
ازيك وكل عام وانت بخير

الله يستر ما نغرق في الجمال
بعد اللوك الجديد

وانت طيب وجميل

[النور يوسف محمد]

المشاركة الأصلية كتبت بواسطة أسامة معاوية الطيب

والشارع المبهوت يعاينلك
يحنضل بي سكاتو غناك
وينتاوق يعاين للخطى الماشات يطنش
يتكفى ويرجاك
تغسل طرحة الليل الممدد في مشاويرو المعاك
بقة صباح
تدعك هديمات السكات وتشرهن
فوق حبلك الممكون جراح
.
..
...

وكانت بتحلم من زمن تشطف ملاياتا وتقش الحوش
عشان باكر بعد باكر بيبقو وشى صفاح
وصفحة كتاب العالمين تشهد على ريدنا
الأراضي الفينا ممدودة وهواك
تشهد على انك رسول الغنوة لي هادى الخلوق
وانك براك
تشهد على زفة عصافيرك بنات
الفكرة والخاطر معاك

بسم الله الرحمن الرحيم
أسامة ..
يا صادق الهمسات فى ليل الضجيج ..

وحيث يتمدد الخيال تسنده كلماتك ..
وأينما تحلق الفكرة تشدها مفرداتك الى البعيد ..
قوافل المبدعين وحكاوى الرائعين ومواسم النضال
كلها تبتسم , على مشارف النص وفى كبده وحينما استراح ...

وأتا أتلمس غناى هل يا ترى ضلّ الطريق ؟؟
لكنه أيها الراقى حتماً سيشهد .. أنك رسول الحرف فى هذا الفريق ..

القصيدة تتسع لكل الحلم والأسى .. وتورق فيها زهور الأمل وأشواك الغبن ..


أسامة .. هذا المنتدى يحتاجك يا صديق ....

[أسامة معاوية الطيب]

المشاركة الأصلية كتبت بواسطة سمراء

اسامة

يازول مجرتق من غنياوت الفرح
وياعشم نرجاهو ذى طلانا عيد
امسك بيدك سبحة العشم السرح
وردد ورد فرح البعيد
يانا راجينك زمن
تمرق تنور لينا عيد

وياعيد تعود واسامة زاخر ومليان فرح يارب
وكلمات انيقه وراقية تدخل الزول بى مهل
وتمرقك من وحشة الضيق والشناف

سمراء ازيك ... وكل سنة وانت في قمة سمارك وبهاك
تمرقي من وحشة الضيق والشناف ..... والنشاف
يارب
شكرا سيدتي على القراءة ... والكتابة ... والاحتمال

[أسامة معاوية الطيب]

المشاركة الأصلية كتبت بواسطة بدور التركي

الله يستر ما نغرق في الجمال
بعد اللوك الجديد

وانت طيب وجميل

الغرق في الجمال حياة كاملة ... فارهة ... وفادحة ... وخرافية
طيبة وجميلة دايما ياستي

[أسامة معاوية الطيب]

المشاركة الأصلية كتبت بواسطة النور يوسف محمد

بسم الله الرحمن الرحيم
أسامة ..
يا صادق الهمسات فى ليل الضجيج ..

وحيث يتمدد الخيال تسنده كلماتك ..
وأينما تحلق الفكرة تشدها مفرداتك الى البعيد ..
قوافل المبدعين وحكاوى الرائعين ومواسم النضال
كلها تبتسم , على مشارف النص وفى كبده وحينما استراح ...

وأتا أتلمس غناى هل يا ترى ضلّ الطريق ؟؟
لكنه أيها الراقى حتماً سيشهد .. أنك رسول الحرف فى هذا الفريق ..

القصيدة تتسع لكل الحلم والأسى .. وتورق فيها زهور الأمل وأشواك الغبن ..


أسامة .. هذا المنتدى يحتاجك يا صديق ....

أستاذي النور
زحمة من الكلمات ... ولكنها تتزاحم رأسى وتخشى القلم
ياخي والله ماعندي كلام

كل عام وأنت بألف خير
والمنتدى ... والأعضاء الكرام الكبار
كل سنة والسودان جميل وحالم ومعتدل
كتر خيرك ياخي
كتر خيرك

[عكــود]

وقد صعدت معاك التلّة . .
من قاع يباس الشارع،
إلى قمّة ربوة الأمل الأخضر . .
بمناديلا وشبابيلا.

تسلم يا أسامة ويسلم أملك.

[فيصل سعد]

عيدك سعيد يا اسامة
و كل ايامك محبة ..
شكرا لهذا الالق المتجلي
حنينا و انينا و ما بينهما ..

اطيب التحايا
يا صاحب ..

[مبر محمود]

المشاركة الأصلية كتبت بواسطة أسامة معاوية الطيب

مواويلك جرس فسحة مدارسنا

يا أسامة

[أسامة معاوية الطيب]

المشاركة الأصلية كتبت بواسطة عكــود

وقد صعدت معاك التلّة . .
من قاع يباس الشارع،
إلى قمّة ربوة الأمل الأخضر . .
بمناديلا وشبابيلا.

تسلم يا أسامة ويسلم أملك.

تسلم يا عكود ... تسلم ... والجايات على الطريق