من ذاكرة المدمرق !!! النور يوسف محمد

اوبريتـــات سودانيـــة (اوبريت) !!! عبد الحكيم

هَكَذَا يَمْضِي الغفاريون نَحْوَ الله: في رحيل مظفر النواب !!! عبد الله جعفر

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 15-02-2022, 08:05 AM   #[1]
Hassan Farah
:: كــاتب نشــط::
الصورة الرمزية Hassan Farah
 
افتراضي الساقية الماشاف الساقي يشوفه في وصف كدكي الله يملاهو عافي ويديهو طول العمر والله هذا الهرم يستحق منن

الساقية الماشاف الساقي يشوفه في وصف كدكي الله يملاهو عافي ويديهو طول العمر والله هذا الهرم يستحق مننا ان نكرمه تكريماََ لائق
حطب الساقي للشاعر محمد جيب الله كدكي فاتوا جدودنا خلو تراث وكانوا أهل عقل وطايوق وكت يتلموكانوا نفير خلوقا نان طبوق وطبوق يربطو الساقي فوق القيف
وعليك ياالله زينه تسوق يجيبو اتنين (دقتي) معاهااتنين ظكور دي مروق وتمانيه شعب يمين وشمال في المرق الدقتي عروق وتلقى مرق ضكر جنفاوي بالشعب الستوت مكروق وفي مرقا ضكر بي جاي بالجيهي اليمين مدقوق وبرضو معاه نفس الحسبه
سته من الشعب ملصوق ويترص فوقن (الكوديق) فلقا كلهن كروق
عشان راحة البقر في اللفه كان اتنين والا ارقوق ويجن عودين يمين وشمال يقولو عليهن(البدقوق) فوقن فوق يكوترو(الديو) مكدن بي (استمر )مزروق ويقومو يوقفو(المشق) ده فيه (الحلقه)زي الطوق وفيه (تكم)مريح في القعده للاروتي لما يسوق ويكرب (ارصه)في (الاسناق) مع (القرمدي)(والخناق)
فوق فقر البقر من فوق و(لمشق) ده ليه رويس تحته كمان يختو (كديس) عويد افطح وهيط منحوت ممسح زيت ومصدر صوت يزيد حنيه كل عشيه يعجب حسه كل شروق وفي(توريق)وكت يتلوى بي (كاليقه )بره وجوه... فوق (كميات)عشق معشوق.. تقع(بت ام حليقه)نبيح.. تعاكس (الحلقه)في التسبيح وبالحيل (سندقيقه)نصيح
وبي قبل (القوتي)هناك يدرجو (العطفه)بي (الوينه) في (التوريق)شديد معشوق وليها اربع قرون واقفات ومن نفس العدد (فاشوق)
وبي تحته (الفقر)داك عاد بي (اشيقراتو)مو مطلوق و(ترنتريقاته )اربعه بي حرابه سنان وبره وجوه في زانتين وديل سموهن( الكران) وفي شي اسمه(الالس)فاتلنو
حبلا قوي مو شاشوق وتشوف طابتين بعد طابتين وديل سموهن(اللقلوق) وكل (قادوس) على الطابتين تحتو نعال مكتف زين نعالا زي وقايي دلوق. وبي جاي (للقوتي)وجاي (اركاقات)طوالا فوق. فيها (الاستكاك)رابطنو ده الشايل الحمل مطبوق وكل( قادوس)يشيل يغرف
على(السبلوقه)يمشي يلف و(القلابه)تبدا ختف
تكب في (الدروه) لجدول واللور هناك يسرف علي البنضوره والبرسيم والكداد مع السبروق للجار كلو منو يضوق شيتا مابيروح مسروق من زرعوه للدناع وللعشمان وكل مخلوق والتربال يمد حق الله مادام الله ليه حقوق والعجب ان خلف كرعيه قرض البصله لو مريوق تجيه تريمه من البيت. رشوشه ولارغيف السوق
اليوم كلو تعصر قلبو يرتاح تلقى دمو يروق وفي الليل اب ضلاما ضال يجيك يكورك التربال قشقه آخرابه تعال... النبي نوح من الدبيان كدي آأروتي ارح لافوق ونسمع حسو من تعب النهار الفيه كان مخنوق.... ويعصر ويجري قاصد البيت.. وطابق حتى للواسوق. ويتمد فوق عنيقريبا نساجة ايدو مو ممحوق
ويجيب له ودك يطقطق فيه بالنارفوق كعب كرعيه شان المويه باكر ماتزيده شقوق
إعداد وطباعه صالح محجوب مقاشي 7/2/2021



Hassan Farah غير متصل   رد مع اقتباس
قديم 15-02-2022, 10:19 PM   #[3]
elmhasi
:: كــاتب نشــط::
 
افتراضي

كلام في كلام ..
سلام د.حسن ..
وشكرا للنقل الجميل ...
غايتو :
حيجوك ناس ’’الترجمة يا عمك‘‘ ..
والنصحية انا قدرت ما حاولت اترجم المسميات دي حتي بالوصف لقيت ترجمتها صعبة ...



التوقيع:
اقتباس:
متعتي في الحياة أن أقول الحقيقة
جورج برنارد شو
elmhasi غير متصل   رد مع اقتباس
قديم 17-02-2022, 07:59 PM   #[4]
Hassan Farah
:: كــاتب نشــط::
الصورة الرمزية Hassan Farah
 
افتراضي

يا مرحبا بالاخ محسى
والله فى طفولتى كنت احفظ كل مكونات الساقية بحكم وجودها على بعد امتار من البيت لكن بعد انتقالى للمدينة للقراية نسيت كل شئ خصوصا بعد اختفاء الساقية واستبدالها بالطرمبات
دعنا نقوم بتوجيه الدعوة للاخ عكود للمساعدة فى الترجمة فهو رجل ذوباع فى التراث الشعبى



التعديل الأخير تم بواسطة عكــود ; 21-02-2022 الساعة 05:28 PM.
Hassan Farah غير متصل   رد مع اقتباس
قديم 19-02-2022, 10:40 PM   #[5]
بابكر مخير
:: كــاتب نشــط::
الصورة الرمزية بابكر مخير
 
افتراضي

ود خالي بلالي..
تشوف قول اهلنا الزمان.
فيهو حكم، ودراية ومعرفة
إلا في شيء ظنيتهم فاتت عليهم بعض الحقائق. فمثلن؛
نعم! كل الحسيات من ملموسة وعواطف والرأي الفكر مربوطة بالعقل.. "خالاتك زمان كانن بيقولن (بابكر سيد الفكر) وطبعن مقصود بابكر أبوهن"
أها زمان كان بيقولوا؛ طايقوهو ملان ودآ للزول الفاهم ولا ما عندهو طايوق ودآ للزول الخاوي الوفاض. لكن في الحقيقة قولة ربط العقل بالطايوق ما صحيحة لو قصد بيها (المخ) لأنهو بنلقآ الطايوق في تجويف العظام وكذلك الطايوق دآك البيطلعهو من الخروف ويعوسوا بيهو..
بس ممكن ندي ناس زمان صحوحية التشبيه إن قصد الشبه في مادة الطايوق اللايوقة ديك مع مكونات المخ..



التوقيع:
بابكر مخير غير متصل   رد مع اقتباس
قديم 21-02-2022, 11:44 AM   #[6]
Hassan Farah
:: كــاتب نشــط::
الصورة الرمزية Hassan Farah
 
افتراضي

ودعمتى مدينة سلام
طايوق قد تعنى المخ باللغات النوبية دعنا نسمع رأى اخينا المحسى



Hassan Farah غير متصل   رد مع اقتباس
قديم 21-02-2022, 02:35 PM   #[7]
عكــود
Administrator
الصورة الرمزية عكــود
 
افتراضي

سلام دكتور حسن / المحسي،

أنقل لكم مداخلة قيمة عن الساقية وأجزاءها، كتبها أخونا الموسوعة حسن العليش في قروب وتساب:

سلام ي بروف مساوي يااب نورا ضاوي. اسق شيخنا ود الطيب.. ياضمرة ويااهل حي السوق والهبجي.. الخليفة الكبير المرحوم خلف الله احمد الخليفة وعبدالحي الكوع هم من مساوي من آل شيخنا ودالطيب.. واصبحوا من اهل القرير
انا من البارح داير اخالتك و اخت قنزبي معاك واعصبك.. لكن شقيش مااتلفت وتبنت لي شئ بقالي مو كسيقا طالقو ضهر.. واخيرا اهتديت لي موضوع شاركت به في قروب رابطة خريجي مروي الثانوية عندما اسسه المرحوم مامان في بدايته.. وكنت اتحدث فيه عن الساقية.. فاسمح لي ان يكون قنزبي معك مادام الحديث عن الساقي.. ثم اضيف ماقاله الشاعر عبدالرؤوف ود صديق عن الساقي
@@@@@@@
الحلقة الاخيرة

هندسة الساقي:

اها دي هني دايري علي فللة وصلاح وحسين وبالمناسبة انا جدي كان بصيرا في نجر السواقي وتوضيبها

ذكرته خالة - (علي فللة) بت الباقيري في ارجوزتها التي كانت تهدهد بها ابنها الوحيد محمد الحسن الملقب ب التقدي.. وبت الباقيري هي زينب بت الحاج الباقيري والدة المحامي الشهير عبدالله نوري وخالة السفير (عثمان السمحوني) سفير السودان بلندن وهي نفسها التي قال فيها الشاعر احمد ودعينه (احمد وداليمن) قصيدته المشهورة التي تغنى بها الفنان بلا... الله الله
تعالي اشكيلك آبت شيخنا ودتوم من جنا الوز المباري اماتو للعوم
..... وفي هدهدتها لابنها الوحيد التقدي حيث ذكرت جدي عباس وكان اسطى سواقي:

التقدِي آ التِقدِي

التِقدِي آ جِنِس نوري الفسِيل الحقو مابيدي

التقدي ويطرد الناس من السِعدِي

يبقى تِقي مِتِل عيسِي

ومتِل عثمان في الكنيسِي

ومُو اكآل للفطيسي

يبقى مِتِل ولاد الحاج

مِتِل ناس سِيد حبيب محجاج

متل ناس ودعلي النساج

متِل ود اليمن نجام

متِل عباس يداير النام

والنام هي الدوائر المقوسة او الاقواس التي تربط بالجلد مع بعضها لتكون دائرة الحلقة او بت ام حليقة

اذن الحلقة تتكون من النامات وعددها اربع قطع داخل الفراغ اربع ترنتريقات كالتي في العطفة والتوريق هذه الابع ترنتريقات تكون فتحة مستطيلة يدخل فيها مِشِق الساقي ..هذا المِشِق به فتحة في الوسط يدخل فيها عود التُكم الذي يجلس عليه الاروتي او الصبي الذي يسوق البقر

رأس المِشِق من اعلى يدخل في الديو الذي يجلس على عود من اليمين يسمى الجَبتِي الضكر ومن الناحية الاخري يربط فيه حبل يسمى الجبتِي الانتايي وذلك ليساعد في تحريك الديو امام وخلف حسب الوزنة المطلوبة للحلقة ايضا الديو به اخرام دائرية متعددة غير خافسة يدخل فيها رأس المِشِق وايضا تعددت لتحريك المِشِق يمين ويسار حسب الوزنة المطلوبة

المِشِق من الناحية السفلية به خرم دائري صغير ومن تحته قطعة مربعة من السنط تسمى (الكُكُر) بها نتوء او بروز (مبري) كقلم الرصاص هذه القطعة تجلس على الكديس ثم تُدخل في فتحة المِشِق بحيث يكون حُر الحركة في الدوران وهذه تقابل الكديس في باب السنط او الحراز ولو تذكرو اسفل مِشِق الباب يضعوا حجر مقعر يدور عليه الباب

الحلقة ليس بها أي مسمار للتثبيت وانما تثبت بالقِد اي (سيور جلد البقر )

تحت الحلقة الكديس والتَوَرِي والقُور الذي يجلس ايضا على الكديس ويوضع عليه رأس التوريق من الناحية البرانية والذي يدخل في فتحة بت أم حليقة وهو مصدر صوت بت ام حليقة

الحلقة بها 33 سندقيقاً (او تِرِس) بما فيها العميَّان والعميان هو فتحة في الحلقة ليس بها سندقيقة ويوضع عليها خابور او وتد في شكل راسي او عمودي

بت ام حليقة بها 24 سندقيقة (او تِرِس ) بما فيها العميَّان (تم شرحه)

كلما تدور الحلقة الكبيرة 8لفات تلف بت ام حليقة (11 لفة) والفرق بينهما بالحساب 3

الاسطوات كانوا يعبروا عن الفرق بين الحلقة الكبيرة وبت ام حليقة ب تلات تلاتات أي العدد (9) وهو الفرق بين 33- 24 سندقيقة = 9

فهذا الفرق الثابت يعبرون عنه بقولهم اذا ضربت 11 (عدد لفات بت ام حليقة)× 24(عدد السندقيق)= يكون الناتج 264

واذا ضربت 8 (عدد لفات الحلقة) × 33 (عدد السندقيق ) يكون الناتج ايضا264

يقولون مجموع حمل الساقي او مركز ثقلها الكامل مقسوم بنسبة 3/5 الى 2/5 بين الحلقة وبت ام حليقة ويقولون حمل التور الجواني 3/5 والبراني 2/5

ودي الحتة الانا ما فاهمها ..من اين اتوا بالمقام5

نعم الواحد صحيح 2/5 +3/5 ولكن من اين لهم بالخمسة فهل النسبة والتناسب بين ال 24 وال33 هي نسبة 2 الى 3 ؟؟؟ فليفيدنا المهندسون وان وجدنا مهندسا ميكانيكيا يى الزين.

لكم الود والتحايا
هذا هو الموضوع برمته وقد كتبته تقريبا منذ ٧ سنوات
@@@@
وهنا 👇ماقاله الشاعر عبدالرؤوف ود صديق عن الساقية

. الصمد عبد الغني الفي فارغة مااتلام

اليربط الساقي فوق القته قِدَّام

 صارفِي الاهوية مابيغشاها نسام

الجِبِد رصاه مُو دايِّرلُو كَمْكام

والجخس يِتْكنْدَك من الموية مُو هام

الصمد بي سرعة حالاً وقف اُم  نام

والسديس بي سرعة دَوَرْبُو العِقِد حام

والخلوق تِتْجارا سدُو الموية قدام

النصلي علي محمد كلنا اسلام

ويقول ود صديق في اخرى :

الصمد عبد الغني المِن قام مَمَرَن

المروق مَدَّاها لاقادَن لا انصَرَّن

الشِعب مازَرَّعَن من طِين ما اتْعَرَن

وهيط الإستكاك مُو العَالي دَرَّن

الكوالِيق ثبَتِن ما قامَن فَرَّن

والجِبِد رصاهُ زي السيخ مقَرَّن

واللَسْ بالخِيت شِبر القِط ماجَرَّن

والقواديس غير إشيقيرات دفعة مَرَّن

في السماء ما صَنْقَعن للموية خَرَّن

ياصمد لاتنهر الدروات إنزَرَن



 

عبد الرؤوف  محمد صالح ود صديق:

من ابرز شعراء مساوي وهو يعتبر من رواد الكلمة الخضراء وفحلا من فحول الشعر لايشق له غبار ويعتبر مدرسة شعريه متفردة الا ان شعره لم يجد الزيوع الكافي, كتب وتبحر في مجال الوصف وله باع طويل في مجال الغزل وله قصائد عدة وابداعات في هذا المجال

دخل في مساجلات شعريه مع الشاعر ابراهيم الراوي حيث امتاز شعره في هذا المجال بعفة اللسان والابتعاد عن الهجاء المقذع

ابدع في مجال الوصف كقصيدته

الزول اليسوق الساقي فالح

اولا يكسب اجر ويلقالو صالح

يخت ارقوقو فوق التور القارح

يخلي المويه زي السيل السارح

مش حديد بيزيتو واسبيرو سايح



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 21-02-2022, 04:37 PM   #[8]
Hassan Farah
:: كــاتب نشــط::
الصورة الرمزية Hassan Farah
 
افتراضي

يا سلام باشمهندس عكود جيت فى الوقت المناسب وبوصولك ومجهودك وشرحك اكتسب البوست اهمية تتطلب حفظه
الف شكرا لك



Hassan Farah غير متصل   رد مع اقتباس
قديم 21-02-2022, 05:18 PM   #[9]
عكــود
Administrator
الصورة الرمزية عكــود
 
افتراضي

اقتباس:
المشاركة الأصلية كتبت بواسطة Hassan Farah مشاهدة المشاركة
يا سلام باشمهندس عكود جيت فى الوقت المناسب وبوصولك ومجهودك وشرحك اكتسب البوست اهمية تتطلب حفظه
الف شكرا لك
سلام يا الحسا،
أخونا حسن العليش من أبناء مساوي، موسوعة تراث وأنساب بصورة مدهشة للغاية، ما شاء الله عليه.
علاوة على معرفته العميقة بتراث المنطقة، معرفة لا تتأتى لأبناء جيله والأجيال التي سبقته، علاوة على ذلك فهو يعرف بنفس القدر، أنساب كل أهل منطقة مركز مروي تقريباً، شرق النيل وغربه، بالإضافة إلى سرعة بديهته وخفة ظله وبراعته في الحكي والرواية.

مداخلته تستحق الحفظ فعلاً، وعن نفسي محتفظ بها في تلفوني.

تحياتي وأبقى طيب.



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 04:53 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2022, vBulletin Solutions, Inc.