نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 04-10-2021, 09:08 PM   #[1486]
ناصر يوسف
:: كــاتب نشــط::
الصورة الرمزية ناصر يوسف
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة

وبعد عييكن ماها هينة وما طويلة... أهو رجعتا ولقيت سودانيات وعيني باردة...
أقلامها سنينة، قولها سمح، كتابها محافظيين على الإسهامات وكمان تميزت بالوان زاهية..

حبيبنا الجميل دكتور بابكر مخير
تحية و احتراما و عميق الشوق

ستبقى سودانيات على الدوام تلكم ال ( غابة ) وريفة الظلال بل قل الحديقة يانعة الأزهار طال ما مثلك يعمرها على الدوام

محبتي التي تعلم



التوقيع:
ما بال أمتنا العبوس
قد ضل راعيها الجَلَوس .. الجُلوس
زي الأم ما ظلت تعوس
يدها تفتش عن ملاليم الفلوس
والمال يمشيها الهويني
بين جلباب المجوس من التيوس النجوس
ناصر يوسف غير متصل   رد مع اقتباس
قديم 12-10-2021, 05:38 AM   #[1487]
بابكر مخير
:: كــاتب نشــط::
الصورة الرمزية بابكر مخير
 
افتراضي

المعروف أنه مع إزدياد العمر؛ يتوسع أفق الرؤية عند الشخص، بعض الخصال منها ما هو أصلن جواهو بس ما لقى فرصة ينكشف وهنا دي نقول أنه أخرج كوامن دفينة ومنها أيضا مكتسبة مع التجارب البيكون خاضها والأمور الجديدةعليهو البيكون عايشها..
ودي الفترة الممكن تكون في ما بين الخمسينات والستينات من العمر.. ما قبل ذلك لساتهو ما بيكون النضوج إكتمل وما بعد ذلك بتكون عوامل التعرية (Erosion) قد أثرت على التمالك والتقيم عند الإنسان..
بتذكر الناظر محمد الأمين ترك (الأب أو كما يقول الخواجات "سينير")، كان بي صداقة مع الوالد وهو راجل تعامله كان فعلن حق زول كبير، لطيف، محب، كريم وهنا قصدي ما تقييم شخصه ومقارنتهو بي إبنه، لكن المقصود؛ ترك تقريبا دفعة الوالد "بفتكر أنهو كان أصغر" وأنا ياني بي عمري دآ فلا بدن أنهو وليد المرحوم الناظر ترك،،، دآ يكون برضك أصغر مني ويمكن بي فارق أكبر من دآك البين والدي ووالدهو.. يعني المفروض يكون في الحقبة العمرية بتاعت الضوج الفكري بي تميزاتها من قومية الي تحمل مسئولية والي أخرهو...
البرهان برضك بنطبق عليهو ما جآ عن نضوج "الناظر" ترك الحسي دآ... في الفترة دي ومع حجم المسئولية وكِبر حجمها المفروض أنهو الناتج يكون أعظم وأقيم...
طيب ما لهم، هم كدي..
تقول تلقى ليك مبرر.. تتوه...
إلا تِرك دآك الياهو عندهو أجندة مفروضة عليهو وطمعان ومستنى المكافأة، البرهان الكنت بحلم بأنه يكون زولن واعي وغنِّم من كنوز العمر ما يؤهله لكسب ثقتي (يعني زولي) أصدم بيهو؟؟ ضحالة في الفكر، حتى أنه كاد أن يتفوق على "الكباشي" سواء في مرحلة قريب من تِرك...

يا أخوانا . هل ممكن سودانا دآ يتصلح حاله وياهم ديل ناسهو.. ود الفكي دآك ياهو لساتهو صغير وبي جهلتهو؟؟ في عّمهُ سّاءر



التوقيع:
بابكر مخير غير متصل   رد مع اقتباس
قديم 13-10-2021, 11:35 AM   #[1488]
بابكر مخير
:: كــاتب نشــط::
الصورة الرمزية بابكر مخير
 
افتراضي

قلتها قبل كدي، إلا قولتها طوااااااااالي في إضنيآ...
قولة سيدي خليفة المهدي، لمن يانا السودانيين "زمان ولا حسي يانا ظاتنا" ناقين وشاكيين وداعيين عليهو.. في الصلاة بعد صلى بيهم وقف وخطب... وما معناهو؛ إتوا إلا ياهو الخليفة كىّ والخليفة كىّ.. نان إن قلتوا كدي. ما فيكم زولن يشيل حربتآ يبعجني بيها (يريحني منكوو)...
دحن الحالصل حسي في البلد دآ.. ما أخير أنهو الواحد يموت ويرتاح من جنس لخبطة وعدم مسئولية...
مكون شنهو ومكون شنهو وبيناتهم ناس بس باقية، المديدة حرقتني..
ناس نظرية المؤامرة روحهم والفتنة زادهم واللخبطة شأنهم..
أخر موضة؟؟
قالوا القائمة السوداء للمنوعيين من السفر فيها صلاح مناع.. طيب الزول دآ ما في كلام كتير تحت تحت عنهو وعادي ممكن يكون يتمنع لغاية ما يوضح أمرهو،،، مش قبل كدي إتحجز في مطار القاهرة الدولي ولا ويين ما عارف...
بتاع السيادي الشاب الوسيم محمد دآ أكان إتمنع بكون بي سبب، لأنهو قوله أشتر وبتاع لخبطة ذي ما ولعها بين العسكري والمدني ما ظنيت في بلد بتدورهو..
خالد دآ والله ليهم حق بعد فضحتهو بتاعت السفة، الزول دآ إستهلاك محلي ذي سفتهو بتاعت ود عماري دييك...
وحقهو القائمة السوداء برضك تتوسع شوية ويما في ناس مفروض تشملهم...



التوقيع:
بابكر مخير غير متصل   رد مع اقتباس
قديم 01-11-2021, 01:26 PM   #[1489]
عبدالحكيم
:: كــاتب نشــط::
 
افتراضي

وجاء في حديث أسامة بن شريك أنه قال: قالت الأعراب: يا رسول الله ألا نتداوى؟ فقال: ((نعم، يا عباد الله تداووا، فإنَّ الله لم يضع داءً إلا ووضع له شفاءً أو دواءً، إلا داءً واحدًا، فقالوا: يا رسول الله، وما هو؟ قال: الهـــرم)).

سلام دكتور ............................... وينك ...

أصبحت شيخًا أرى الشخصين أربعةً
والشخصَ شخصين لمّا شفّني الكِـــبَرُ
لا أسمع الصدر حتى أستـــــــدير له
وحـال بالسمـع دوني المنظرُ العــسِرُ
وكنت أمشي على الرجلـــين معتدلاً
فصرت أمشي على ما تُنبتُ الشــجر



التعديل الأخير تم بواسطة عبدالحكيم ; 01-11-2021 الساعة 02:47 PM.
عبدالحكيم غير متصل   رد مع اقتباس
قديم 08-11-2021, 04:12 PM   #[1490]
بابكر مخير
:: كــاتب نشــط::
الصورة الرمزية بابكر مخير
 
افتراضي

السفاهة في الكًبر شينة وطبعن تعريف السفاهة متفاوت ..
ممكن تكون سوء تصرف والأتيان بي حاجات ما مستحبة في المجتمع فيقولوا سفيه، الزول المخهو فاضي ويقوم يتكلم في مجتمع بي قولن أشتر، الناس بتسفهو.. وحتى السفاهة ظاتها درجات، في السفيه بأخلاقيات سيئة وفي سفيه بعجز إجتماعي وفي سفيه شكلا وسفيه مضمونا يعني سفاهتهو في لسانهو قول وبصورة عفوية ودي سفاهة عابرة: في سفاهة الصغر ودي نتاج عوامل فيزيولوجية يعني ياهو جاية مصاحبة لطور مراهقة، إلا الشينة وما بتلقي ليها عذر، ياها سفاهة الكُبر وحتى لا تنحصر السفاهة في مفهوم قلة الأدب وسوء التصرف المربوط بالأشكال الجنسية، ذكرنا فوق سفه الشخص الذي لا يعرف أن يتحدث وحين يتحدث يطربق ويقولو قول زولن بهيم، فيُسفه وهو الفعل الجآي منهو الإسم "سفيه"...
المهم في القصد أنهو الحالة الحسي في البلد وحاصلة دي، وتعامل عدد من السفراء ورئيسة دبلوماسيتهم مع البرهان بأنهو سافهينوا وبهذا يكون البرهان سفيه ولسوء حظه أنه في عمر يصنف بأنهو كِبر وهنا ينطبق عليه وصف؛ سفاهة الكُبر



التوقيع:
بابكر مخير غير متصل   رد مع اقتباس
قديم 17-11-2021, 01:51 AM   #[1491]
بابكر مخير
:: كــاتب نشــط::
الصورة الرمزية بابكر مخير
 
افتراضي

في حاجات ما كانت بتخطر على بال الزول. أحداث بفتكر أنها غير طبيعية وبناء عليه بيبتدي يأخد الأمر أنهو محتاج لعلاج...
يومي على الله لمن أصحى الصباح وأمشي أتغسل في حوض غسيل الوش وكل ما أرفع رأسي أحس بشئ يضربني فوق الجبهة وفي مقدمة الرأس.. آآآخ وبعدها أكمل المهمة الصباحية..
سألت الدكتور وطبعا عشان الكوفيد 19 ياهو المقابلة مختصرة علي التلفون.
سألني، يعني بعد الضربة دي بتشعر بي دوخة ولا في محلها في ورم ولا دم... ومن متين بتشعر بالضربة الفي رأسك دي... رديت عليهو أنهو الضربة البحس بيها هي بس لحظتها وما بشعر بأي آثار ولا حتى في المرآية ما بشوف حاجة تعني أني ضربتا رأسي..
قال ليا نشوف تلاتة يوم وبعدها ممكن نحتاج نعمل ليك رنيين مغنطيسي ونشوف في حاجة في الرأس ولا كدآ، لكني عايزك بعد ما تغسل وجهك، أرجع ليك خطوتين تلاتة قبل ترفع رأسك...
الدكتور دآ يا أمتنا أنهو شاطر ومقددها أو أنهو حصل ليهو أمري دآ وبناء الخبرة، زيادة على المعرفة..
المهم الصباح مشيت الحمام وغسلتي ووشي وقبل أرفع رأسي تذكرت تعليمات الدكتور ورجعتا كمان بدل خطوة إتنيين..
أهااا اليوم دآ ولا شعور بالخبطة ولا يحزنون وتاني يوم نفس العملية ونفس الراحة من الضربة واليوم التالت والدكتور ضرب ليا تلفون ورديت عليهو أني نفس التعليمات مارستها والخبطة الفي الراس ما عاد لها أثر أو وجود..
ضحك وذي ما قلت ليكم هو يا شاطر أو مجرب.. قال ليا المشكلة أنهو في بعض الشقق بيكون الدولاب المعروف بالإجزخانة مختوت فوق حوض غسيل الوجة وعلى مستوى منخفض، فلمن الزول يرفع رأسه بيتخبت فيهو..
إتذكرتا طوالي قصة الزول دآك القالوا بيراجع دكتور العيون بصورة شبه يومية ويحكي ليهو أنهو كل ما يشرب كباية الشاي الصباح بيشعر بحاجة بتطبزهو في عينو اليمين.. الدكتور إتحير وبدآ يشعر بأن هناك مشكلة في طريقة تناول الزول دآ للشاي، فقدم ليهو شاي متكامل الأركان ذي إنقلاب البرهان، براد وسكرية وملعقة وقال ليهو إتفضل أشرب شاي معاي...
الطلع شنهو يا سيدات والسادة.. أنهو صاحبنا بعد ما يسوط السكر في الكباية، بيخلي الملعقة في الكباية وعليه بتطعنهو في عينهو...
هذا هو حال عبد الفتاح البرهان..
هناك في ما في حاجة غلط حصلت لكنهو بيشعر بيها فلو روق المنقة أكيد بيعرف أنهو الغلط من تصرفاتهو هو والمكون العسكري، ناس كباشي والعطآ...
كدي برااااحة رجعها لي يوم 24 اكتوبر وأعد حياتك من هذه النقطة وهنا من جديد بتلقآ العلاج



التوقيع:
بابكر مخير غير متصل   رد مع اقتباس
قديم 29-11-2021, 04:25 AM   #[1492]
بابكر مخير
:: كــاتب نشــط::
الصورة الرمزية بابكر مخير
 
افتراضي

العمر والأحداث. الإتنين ديل ذي الشحمة والنار، تشم الشياط الهو أشد بأسا من ريحة البمبان ويبقا معشعش في المناخير ومتعلق في الشعيرات التي كل ما ذاد العمر زاد عددهن بشكل مطرد وكأنها تستعجل أخذ جائزة الفورملا ون من منافسيها الشعر الذي يطول ويغزر من الحاجب والذي ينتشر في حافة الأذنين. لا يلاحظ هذا إلا من تجاوز في العمر متاريس السبعين.
الإحتراق الحاصل بين العمر والأحداث فاق ريحة اللساتك البقت أيقونة للثورة وأدمنها عسكر المرتدين، ناكثي العهد فتلقاهم ينجذبوا ليها كما الذباب لقطعة حلاوة لكوم. رائحة شياط أقسى هوادة من كتاحة التاتشر وهي في أزقة إمدرمان مثيرة غبار أجعص جعيص يشعره كُتل من سفاية التراب الأحمر والذي يقدر بعض الجيلوجيين تميزه بإحتواءه لكم هائل من الحديد والذي تفاعل مع موية المطرة وأوكسجين الهواء تحت حرارة الشمس البتضرب الضب لتسيح مخهو.. القولة دي ممكن تنضاف للأوصاف التي تطلق على الحالة العايشنها حسي دي في السودان، من دفين العسكر التوم هجو وجبرين وأمثالهم.
بشيشكم علينا يا خلق وبقينا ما بنتحمل يا برهان وحمدوك....
وعلى قول دآك بتاع تونس..
هرمنااااااا



التوقيع:
بابكر مخير غير متصل   رد مع اقتباس
قديم 19-01-2022, 03:07 AM   #[1493]
بابكر مخير
:: كــاتب نشــط::
الصورة الرمزية بابكر مخير
 
افتراضي

في عالم الدعايات الفي التلفزيون..
أنهو يجيبوا ليك لقطات مثلً لي كديسة صغيرونية وحلوة، تنونو.. أها وتكون دي دعاية بتاعت زيت عربيات..
ما في رابط أبدن وظنيتهو هنا بيت القصيد، أنه دي حاجة تشغلك ولمن تشوف كديسة صغيرة بتتذكر زيت العربيات دآ أو لمن تشوف جالون بتاع زيت عربيات بتتذكر النوع دآ الدعايتهو كانت الكديسة...
قالوا؛ الراجل مريح ومقرش وعندهو. رسل ولدهو أوربا عشان يقرى، أها الولد بي قروش أبوهو البرسلا ليهو، هجآ ومجآ وكمل اللهو وعن البلد وأبوه صرف النظر وضرب السهو. لا جواب منهو لي أبوهو بيرسل ولا معلومة عن البيعمل فيهو راضي ليهو يوصل..
الأبو ضرب خماسيهو في سداسيهو وقال؛ يمشي يشوف ولدهو..
وحاتك لقاهو البنطلون جراب بندقية وناصل لمن مبين ال underware والوشم صفقة نبات القنب قدر الهقلة مرسومة في الكتف اليمين، ما طبعن الموضة أنهو يكون تي شيرت بي حمالات..
عاين لي الزول عشان يتوكد الخلقة. اولد قال لي أبوهو: Hi dady..
دي شنهو يا ولد العاملهو دآ.. قرايتك التلاتة سنين وينها..
قال ليهو.. ما إتا رسلتني وأنا لي حسي بجرب في الكليات ياتها البتنفع معاي. لكن فرح أمي. الحمد لله عرستا وجبتا ليا ولد..
أها حسي الموضوع الفوق دآ...ذي الداعاية ديك.
ما منهو قصد ... بس حبيت أذكركم بالبوست دآ



التوقيع:
بابكر مخير غير متصل   رد مع اقتباس
قديم 06-02-2022, 04:59 AM   #[1494]
بابكر مخير
:: كــاتب نشــط::
الصورة الرمزية بابكر مخير
 
افتراضي

يوم أمس كان له أن يمضى وكانه من الأيام عادية ومندرج ضمن أيام السبت ذات الطعم الخاص كعطلة نهاية الإسبوع والذي بقدرة قادر أضحى هكذا في كل دول العالم. حين كان زمان وفي زمنن ما غابر. يوم الخميس في كل الدول المسلمة هو بداية عطلة نهاية الإسبوع والجمعة هي العطلة الرسمية والتي برضك بقدرة سلطة بقت نص يوم عمل وتم تقنين عطلة الإسبوع على الطريقة الخواجية (سبت، أحد)..
ولكن كان يوم الأمس لي بطابع خاص جداً؟؟
كان بداية عطلة نهاية الاسبوع وكعادة كل الناس العاديين "المقصود العندهم شغل وأسبوع عمل ما عطالة" هو يوم الراحة فعندك ممكن تساهر ما يفرق مع إختلاف أنواع السهر وما تنشغل بي صحيان بدري والمشي للشغل فتنوم ملء جفونك (بتزيد من قوة الذاكرة). وعلى هذا المبداء قفلت صوت جرس التلفون ومشيت على السرير بعد سهرة ما كانت طويلة في النت ونمت، نوم ما متواصل فمعا العمر دآ؟؟ كضااااب البيقول ليك نام التمنية ساعات الموصوفة في كتب الطب..
صحيت على الساعة 12 وتلت ظهرا (صحيت دي المقصود بيها قمت من السرير بعد قضاء الساعات الموصوفة بأني راقد نايم) وطبعا أول شئ بتعمله وإتا في حالة جلوس في طرف السرير، أنك تشوف التلفون لتبدا تتعايش مع الكون الحوالينك وتشوف الحبان من أهل وصحبان كيفنهم.... لقيت كمين إتصال بالوسائط وبالتلفونات العادية من أبوظبي ولسة بفرك في عيوني، الشاشة تضوي أنهو في محادثة...
خير إن شاء الله جبرة (حمادة) في شنهو يا ربي؟؟؟
جاني صوتهو وخلفية صوت بكاء حآآآآر...
قال ليا: إتا يا زول تمام..
إستغربتا وأنا المفروض أسالهو لأنهو كان حاسي قبل كم إسبوع...
أنا كويس.. لييه..
جبرة: يا أخي أخوك يوسف تعبان شديد وقال أنك؟؟
متا
لا الحمد لله أنا حسب العوامل المعروف من إنعكاسات سالبة للكُبر، بعتبر نفسي FIT...
هنا كانت لمسة الحزن الساقم تملكتني.. ما عشان الخوف من الموت... أبدن فالبرهان بعث في النفس كم هائل من اليقين بعد كتلهو لهؤلاء الشباب اليافعيين، فما بالك ونحن أولائك الذين بلغوا من العمر عتية، كان الحزن أنك حتفقد الناس الجميلة الحوالينك وبرضك حزنان على البعض من الناس ديكا الفراقك ربما يحزنهم. وهذا إحساس تملكني وكان وقتي جداً. وبعد دقائق معدودات تغلب على هذا الحزن. الفرح الجامح حين بدآ التلفون يرن وإجيب عليه وقبل أن تنتهي المحادثة تكون الأخرى في الإنتظار وأخريات مستنيات دورهن..
كان الأحباء فرحين حين علموا بعدم صدقية المعلومة وأني ما متا ولا أني برد على التلفون لأني بقيت بعاتي، بعثت من بعد موت....
بعضهم تمنى لي العمر المديد وبعضهم مشكور على أنهو مدح فيني صفات يمكن هم شايفنها وأنا غايبة عني..
فرح بالجد أنهو هناك من سيدعي لك خيرا لأنك كنت عندهم إنسان وأتمنى أنهم سيكونوا الأغلبية التي تدعوا لك وتغطى على أولائك ممن سيدعوا عليك..
وهكذا مضى أمسي
يوم فيه عشت فرحن جامح وحزنن ساقم...



التوقيع:
بابكر مخير غير متصل   رد مع اقتباس
قديم 06-02-2022, 07:08 AM   #[1495]
عكــود
Administrator
الصورة الرمزية عكــود
 
افتراضي

اقتباس:
المشاركة الأصلية كتبت بواسطة بابكر مخير مشاهدة المشاركة
يوم أمس كان له أن يمضى وكانه من الأيام عادية ومندرج ضمن أيام السبت ذات الطعم الخاص كعطلة نهاية الإسبوع والذي بقدرة قادر أضحى هكذا في كل دول العالم. حين كان زمان وفي زمنن ما غابر. يوم الخميس في كل الدول المسلمة هو بداية عطلة نهاية الإسبوع والجمعة هي العطلة الرسمية والتي برضك بقدرة سلطة بقت نص يوم عمل وتم تقنين عطلة الإسبوع على الطريقة الخواجية (سبت، أحد)..
ولكن كان يوم الأمس لي بطابع خاص جداً؟؟
كان بداية عطلة نهاية الاسبوع وكعادة كل الناس العاديين "المقصود العندهم شغل وأسبوع عمل ما عطالة" هو يوم الراحة فعندك ممكن تساهر ما يفرق مع إختلاف أنواع السهر وما تنشغل بي صحيان بدري والمشي للشغل فتنوم ملء جفونك (بتزيد من قوة الذاكرة). وعلى هذا المبداء قفلت صوت جرس التلفون ومشيت على السرير بعد سهرة ما كانت طويلة في النت ونمت، نوم ما متواصل فمعا العمر دآ؟؟ كضااااب البيقول ليك نام التمنية ساعات الموصوفة في كتب الطب..
صحيت على الساعة 12 وتلت ظهرا (صحيت دي المقصود بيها قمت من السرير بعد قضاء الساعات الموصوفة بأني راقد نايم) وطبعا أول شئ بتعمله وإتا في حالة جلوس في طرف السرير، أنك تشوف التلفون لتبدا تتعايش مع الكون الحوالينك وتشوف الحبان من أهل وصحبان كيفنهم.... لقيت كمين إتصال بالوسائط وبالتلفونات العادية من أبوظبي ولسة بفرك في عيوني، الشاشة تضوي أنهو في محادثة...
خير إن شاء الله جبرة (حمادة) في شنهو يا ربي؟؟؟
جاني صوتهو وخلفية صوت بكاء حآآآآر...
قال ليا: إتا يا زول تمام..
إستغربتا وأنا المفروض أسالهو لأنهو كان حاسي قبل كم إسبوع...
أنا كويس.. لييه..
جبرة: يا أخي أخوك يوسف تعبان شديد وقال أنك؟؟
متا
لا الحمد لله أنا حسب العوامل المعروف من إنعكاسات سالبة للكُبر، بعتبر نفسي FIT...
هنا كانت لمسة الحزن الساقم تملكتني.. ما عشان الخوف من الموت... أبدن فالبرهان بعث في النفس كم هائل من اليقين بعد كتلهو لهؤلاء الشباب اليافعيين، فما بالك ونحن أولائك الذين بلغوا من العمر عتية، كان الحزن أنك حتفقد الناس الجميلة الحوالينك وبرضك حزنان على البعض من الناس ديكا الفراقك ربما يحزنهم. وهذا إحساس تملكني وكان وقتي جداً. وبعد دقائق معدودات تغلب على هذا الحزن. الفرح الجامح حين بدآ التلفون يرن وإجيب عليه وقبل أن تنتهي المحادثة تكون الأخرى في الإنتظار وأخريات مستنيات دورهن..
كان الأحباء فرحين حين علموا بعدم صدقية المعلومة وأني ما متا ولا أني برد على التلفون لأني بقيت بعاتي، بعثت من بعد موت....
بعضهم تمنى لي العمر المديد وبعضهم مشكور على أنهو مدح فيني صفات يمكن هم شايفنها وأنا غايبة عني..
فرح بالجد أنهو هناك من سيدعي لك خيرا لأنك كنت عندهم إنسان وأتمنى أنهم سيكونوا الأغلبية التي تدعوا لك وتغطى على أولائك ممن سيدعوا عليك..
وهكذا مضى أمسي
يوم فيه عشت فرحن جامح وحزنن ساقم...
الله يطول عمرك في طاعته ويمتعك بالصحة والعافية ومحبة خلقه فيك يا إنسان يا جميل.



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 07-02-2022, 12:45 AM   #[1497]
بابكر مخير
:: كــاتب نشــط::
الصورة الرمزية بابكر مخير
 
افتراضي

من الردين الفاتن في البوست دآ..
هناك درس أساسي لو الناس إنتبهت ليهو، ما ظنيتهو في زول بيسقط في إمتحان الحياة الفانية. بل بالعكس بيكون إجتهد في الواجب المنزلي للمرحلة الجاية حيث الحساب الأعظم...
أنا في عز نومي، لقيت أنهو العالم قيامتهو قايمة وأني متا.. بي السهولة والبساطة دي.. اليوم في شأن وباكر في ولا مكان..
هل الموضوع دآ واضح لي ناس متزاحميين في الدنيا دي وأنهو كل واحد، مش بس بعافر عشان يعيش وقدر الرزق البكفيهو..
لا!!
هو عايز كل شئ. الرزق بأيتها صورة من الصور وبأي طريقة من الطرق.. بالنهب والسلب، بالعنف والضرب، بالقوة والسطوة يعني أخنق فطس..
إتصور يا حميدتي ولا البرهان وكائن ما كان.
تبقآ عليك حكايتي بس ما معلومة مغلوط، تبقى حقيقتن وإتا في نومك ما تنحظ ذيي وتصحى عشان تكون الحكاية قصة وبي وشوشها الإتنين القبيح المحزن والجميل المفرح..
ما تقوم وتبقى عليك واحدة وبس واحدة.. أنك حقيقي متا..
وتبقى لبناة في خشوم الناس تلوكها، فيهم البتأفف من طعمها وتنضاق أمر من اللبان الضكر وفيهم البيمص حلاوتها ذي "الشكليت" ويتفها في الأرض وتخالط السفة المبذوقة في التراب والتي حتى الجداد يترفع عن إلتقاطها.. يعني إتصور الجداد البيوصوفوا بي رفقته شيتن قبيح (البباري الجداد بوديهو الكوشة)..
ممكن تلقى البعض والبيتمسكوا بي طباعنا ويذكروك بسيرة حسنة من باب أذكروا حسنا موتاكم أو من طبعنا "جلابة شكارين ترب"...
إنتهى....

____________
بمناسبة قرب رمضان وتصوموا وتفطروا على خير..
فمن الأشياء البتذكرها في طفولتي وكانت مخيفة ويمكن تركت فيني وفي الكتيرين ممن يتذكرها أثر نفسي..
هو النباه..
ففي أيام رمضان والقصد تنبيه الناس بأن وقت الإمساك قد أزف وأنهو صلاة الفجر على الأبواب (بين الإمساك والفجر، قدر خمسين أية حسب حديث عن النبي عليه الصلاة والسلام ولكن لم تحدد هذه الآيات وطولها) كان ينادي المعتدلون منهم "اصحي يا نايم وحد الدايم" أما التانيين ديك البيخوفوا الملائكة حتى فكان ندائهم "المووووووت،،، أطراء الموت يا نايم".



التوقيع:
بابكر مخير غير متصل   رد مع اقتباس
قديم 09-02-2022, 02:02 AM   #[1498]
بابكر مخير
:: كــاتب نشــط::
الصورة الرمزية بابكر مخير
 
افتراضي

صننننن، عزلة وصنة، عدم حركة وصنة، سكات وصنة..
لا عين بتنفتح،
لا إحساس بنحس
لا يدن بتتحرك
ولا رجلن بتترفع
أخر حاجة كانت محسوسة ومشيوفة
هي كانت قبل النومة دي..
البحصل كلهو مؤجل لي حين الصاخة وهي الحاجة الوحيدة البتنسمع في نومة الصنننننن..
نومنا العادي دآ؟ فيهو أحاسيسك بتكون علي الهبشة، صوت عالي بصحيك، نورن ضوآ في وشك بصحيك...
هناك لو الشمس نزلوها في وشيك ولا سماعة ساوند سيستم بي الف ومتين واط في أضانك ما بتنسمع...
نومنا العادي، فيهو بتحلم والحلم أنواع.. ما الدماغ صاحي ما ميت وهو البنشط ليك إعادة أحاداث حصلت أو ما حصلت ولكنها بتكون مرئية ذي حكايات الإفتراضيات بتاعت برامج الكمبيوتر..
دآك ما فيهو جنس دآ...
بعضهم ممكن بيكون رجع من نومة الصنننن دي..
لكن ما ظنيتهو بيتذكر التجربة. قهو ذي البيكون إنضرب بي مثيل الجاهز دآك بتاع فيلم Men in Black البيمسح الذاكرة...
تجربة خوضانا الواقعي، أكيييييييييد بيكون مختلف بالكامل من الإفتراضي والذي يبنى على حسابات البشر وما دايمن حسابات البشر صايبة يعني ذي قولي دآ هو إفتراضي من حالتة كانت معلومة مغلوطة خلتني أسرح كدي..
يعني لو جد ما ظنيتني كان بلقى فرصة أوصل البيحصل شنهو في النومة الصنننن دي



التوقيع:
بابكر مخير غير متصل   رد مع اقتباس
قديم 16-02-2022, 04:21 AM   #[1499]
بابكر مخير
:: كــاتب نشــط::
الصورة الرمزية بابكر مخير
 
افتراضي

مع الكُبر اللفحي بيكتر.
هو أصلهو الزول سمعهو بيبقى ما الياهو وإتا أصلن ذي ما قلنا قبال كدي القلب بيرهف،، أها تسمع قولة فلان وقبل ما تتوكد من الحاصل شنهو تنط وطوالي فكرك بيمشي سلبي. ما هو شنهو وعلى قول دكتور أبراهيم بدري (حينما يتغير معني الفرح والحزن ولا تنتظر ماليس اتي) والتفكير بنحصر في ما هو أتي. فبيبقى القول: حصل ليهو شنهو.. مع انه القصة لو صبرت ممكن تكون خبرية أنهو كسب اليانصيب ونغوش..
أول أمس لفحتا ليا كلام عن زولن عزيز إتوفى وطوالي يا مؤمن يا مصدق بالإحساس السلبي صدقتا وأطلقت العنان لي قلمي.. عزاء بي وصفهو وبما أني بيا دمن من الشمالية (رباطابي) مصدر من يعرفوا في غرب السودان بالجلابة. فمدحت وشكرتا قدر ما أسعفتني الذاكرة من معجم اللغة العرببية..
شوف يعني ومعا إنهو مفروض في حكاية الموت دي أتريس شوية بعد تجربتي الخاصة وموتي الخبرها إنتشر في أبوظبي.. وهناك بقآ الجلابة شكروا تربتي بالجد مع أني كنت معاهم لي اتناشر سنة وما سمعتا مجاملة ساكت إتمدحتا..
أها ذي ما قلتا لفحت الكلام وحزنتا وعزيت ولسة أنا في الفيسبوك، يدخل عليا أخ الزول اللفحتا أنهو إتوفى وقال ليا: يا أخي أخوي حي وعايش...
أها طوالي لحقت سحبت عزائي وفي الدسكتوب بتاع اللابتوب فتحتا ليا فايل جديد وحفظت فيهو الكتابة. ربنا يديم للجميع صحتهم لكن إمكن أحتاج للعزاء في يوم تاني..
ما يندرآ

سؤال جانبي؟؟
الأيقونة بتاعت اليوتيوب لإرفاق ملف مالها إختفت



التوقيع:
بابكر مخير غير متصل   رد مع اقتباس
قديم 18-02-2022, 01:10 AM   #[1500]
بابكر مخير
:: كــاتب نشــط::
الصورة الرمزية بابكر مخير
 
افتراضي

في الكُبر المتلازمات ما بيلزمن حدودهن
إن قولتا يانا خلاص عرفنا،،
كل شترة وشترة معانها عدم توفيق منهن..
كل مرة تجيك وحدة جديدة ما ذي سابقاتها ولا ها ذيهن..
مثلن يعني مثلن ذي دي....
تتلبس وتطقم وقدر السبيبات الفي الراس تلمهن
تعاين نظرة عابرة، إلا وترد؟ ترجع تعاين من تاني وتقول تتوكد، الشايفهو دآ جد ولا "عيوني كعبات".
اليليييييلة
دآ شنهو دآ...
البنطلون ما لهو مخطط تخطيطن أشتر ذي شترتي...
لا لا ما معقول!!
أتاريهو بنطلون البيجامة،، ال لو لا المريا،،
كان مرقت بيهو وضربت بيهو الحوامة..
كنت ببقى ضحكة
ما ظنيتهو أبقى ضحكة......
لأنهو كل البشوف المشية خطوة فوق التانية وتلقاها متكعبلة والوشيش كضومهو مترهلة..
بيسامح وممكن كمان يقول..
دآ؟
الزمن فرندقس والكُبر غلاب..
يكون الزول دآ في أيام صباهو..
لمن يمشي بخب التقول خيلن في مضمار السباق
وإن إتكلم بس أسدن زئر
حتى إن ضحك عواميد الكهرباء يتهزن ولا قطر عطبرة (دور حديدهو)...
ياهو دآ الحال...
أخويا سبب فتاحن البوست دآ...
الدبلوماسي الرقيق أبراهيم عبد المنعم ومن حكمهو التي أسعد بي لفحيها (قلناها اللفحي متلازمة من متلازمات الكُبر) وصف هذه الحالة الغير معروفة الوصف (الكُبر).. أنك شاعر بالكُبر أتى عليك، قرضك ونشفك لكن العقل لساتهو عايش ويوسوس ليك في أضانك ويضحك عليك ويقول.. ها يا زول قول الحمد لله إتا ماك حق زماااااااااان دآك ظاتهو ما في شيتن إتغير. لكن الحقيقة تتجلى في قول دكتور أبراهيم ود العم؟؟؟.
حينما يتغير معني الفرح والحزن ولا تنتظر "ماليس أتي" وهنا بيت القصيد وحقيقة أن العبارة الصادقة جدن.. فشنهو يعني هو الأتي؟؟
هل هو أو معقول؟؟
السنون تقوم من تاني بعد ما وقعن. أكيد لا ما هن ما سنون اللبن عشان يتعوضن. الركبة تنجبر ككيف والسوائل قطت والعضام إنبرن وبقن يحكن في بعض لمن تسمع صوتهن التقول تبشيرة الاستاذ في السبورة.
الشعر البدون حوجة لي حلاق بقى الراس زلط.
العيون دمعتن سايلة وقالوا دآ الجفاف بتاع الكُبر.
يعني شيتو أشتر تب الكُبر ما هو المعروف الجفاف معانهو عدم السوائل لكن في الثقيل القصة بتنعكس..
شترة للطيش



التوقيع:
بابكر مخير غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 09:32 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.