كرة القدم السودانية وصناعة التهريج والفوضى- الهلالاب نموذجا(نموزجن)

[لنا جعفر]

العزيزة لنا كل سنة طيبة

العنوان افقد الموضوع حياديته واصبح اقرب للتشفي .

بجيك

كوني بخير

عابد صديقي الجميل
كل سنة وانت أجمل وأنقى ورمضانك مجاب الدعوة يازول يازين
ياعابد ابدا والله حصلت حصايل كتيرة على قول حبوبة عقب مباراة الهلال والمريخ الاخيرة
كلها تنبئ عن مسالك فوضوية وكارثية جدا
صحيح انا منتمية لنادي المريخ واشجعه بكرة واصيلا لكن انا من خلال سلوك مشجعي الهلال حااقدر ابرز كمية مانعانيه جراء التشنج ونموزجن دي أتت على سبيل المكايدة البريئة والمزاح
ولمن تتابع حاتشوف اني مابقدر افقد حيادي....تابع البوست وحايعجبك
لانه حاادعمو ليك بي مانشيتات صحف وعناوين بوستات جامحة جدا عشان ياتستمر تشجع الهلال رغم هذا التهريج يابقيت معانا نحن الجمهور الواعي والمهذب
بالجنبة كده ياعابد وكعربون حياد بقول ليك السوء شامل الجميييع
ومنتظرة جيتك شاهد الله
شكرا ع الطلة ياعابد

[لنا جعفر]

ياست البنات ياحبيبة ازيك
مشتاقيييييين والله
سعيت لي انه اضرب ليك تلفون لكن مخير الله على الخطوط
ولسه في البال في تصميم
اتوقعيني

تشجيع المريخاب راقى بالجد

انا عارفة الكلام ده لكن البقنع لي امير شعراني وعابد ديل شنو؟؟
قالو اسياد البلد !!! والبلد الهاملة دي لاتعرف اسيادها الكيزان ولا ناس اوكامبو ولا تعرف اسيادا المهرجلين ديل
ولابالضبط كده منو......بلد مطلوقة سااااااااي كده وماعندها وجيع؟؟؟ يبقو اسيادا الزرق ديل؟
حسا عليك الله ياعابد دي قايمة تكونو فوقها كان ماساي؟ تتختو مع الكيزان واوكامبو الفاشل ده؟؟؟

و حكمة كده اى هلالابى غيوووووووووور و متعصب و زول هيجه ساكت وكواريك ما نعرف الكورة قون و لا اوووووووت ... و عشان كده يوم الكورة بحرد الونسه و شوف الكورة و اخير لى انوم و هو نان فى نوم ... كواريك وزيطه و خروج للشارع ... لكن يا لنا الناس البتمرق الشارع دى ما بى قول ليها الترخيص وينو ...يمرقو و يهتفو ... و الله كان بقو جااادين يقلبو الحكومه ذاتو ... ههههههههه بحلم ... يعطلو الحركه فى الشوارع ... غايتو اليوم داك ما سكتو الاعند اقامة صلاة الفجر

يدوهم تراخيص ليه؟؟ ويطلبوهو منهم اصلا ليه؟ انا بس عايزة اقول انه في مصالح متبادلة بين شريحة بتاعين الاندية ديل والسلطة الفاسدة وبتتربط معاي انشاء الله وماعايزة زاتها مجهود كبير
بعدين لو هم اصلا فرحانين كده وبيحتفلو لي وش الصباح معناها كانو خايفين خوف الموت لانه الفرحة دي ماعادية نهائي يتربي كانو متوقعين شنو؟؟؟؟؟
انتظري وتابعي البوست وشوفي البلاوي السلوكية الحااعكسها هنا ده لي ناس عابد وطارق وسارة وبقية الشباب
موعودين بي رصد تاريخي ياناس

استاد الهلال الكسرو كراسى
بعمى و تعصب الجماهي

ده طبعا الفيرشن الانقاذي للمشجع الهلالابي يامنال
يكسرو ويقلعو ويعتدو على ملكيات الناس ويجوك مثقفين منبرين يدافعو ويقول ليك اسياد بلد وبطيخ

...وفى حته لازم تهبش يا لنا الصرف على كورة القدم ( هلال - مريخ ) و تهميش الرياضات الاخرى ... و غندرة ناس الكورة دى ليه ... صحى بشيلو دخل المبارة من دم محمد احمد المسكين و بى يقلبو فى السوق

ايوه جايينها يامنال والله في شكل سؤال
مودتي وعطرتي المكان يامنال
عكود ابى يديني ايميلك عليك الله اكتبيهو لي في الخاص

[عابد عقيد]

الرائعة جدا لنا
عجبني جدا تناولك للموضوع لأنها مشكلة اساسية في الرياضة عموما وعلي وجه الخصوص كرة القدم وتحديدا ناديي الهلال والمريخ ... لكن معترض علي العنوان لانك حددتي الهلال تحديدا ويا ريت تناولتي الهلال كاسلوب اداري رغم ده ذاتو لا يخلو من ابداء رأينا فيه .. بل عممتي الانتماء للهلال بقولة ( الهلالاب ) وده بمسنا بشكل مباشر نحن كجمهور الهلال البمثل جزء اصيل من عامة الشعب السوداني ..
وتهمتك لينا بالتهريج والفوضوية بتخلينا نقيف لمبة وندافع حتي لا نوصم بهذه التهم ... واذا كان هناك اي انفلات جماهيري حدث من الهلالاب فهذا يعتبر رد فعل يحدث في كل العالم زي ما حصل من جماهير المريخ في المبارايتين الاخيرات وهذا لا يعطينا الحق ان نصف جماهير المريخ كصانعي للتهريج والفوضي لانو لو قلنا كده الكلام بشمل مريخاب حلوين لابعد الحدود وتربطنا بيهم صداقة تخطت مسالة الانتماء الرياضي ... وانتي واحدة منهم وكل المريخاب بسودانيات ...
والهلال نفارقو نمشي وين قالوا من فارق الجماعة هلك و الهلال ناسو كتااااااااار ....
بس انتي اتلمي علينا وبعد بتشوفي الفرق ...

سلام ما يغشاك ضر

[لنا جعفر]

العزيزة لنا
الكتابة من وحي الهزيمة (او قولي كثرة الهزائم) جعلتك تخرجين كلام مرتب وجميل وكثير منه في محله
العناصر الاربعة التي ذكرتها هي التي تكون فكرة اللعبة
نتابع ونترك التعليق الى ما بعد نهاية كلامك عن عناصر اللعبة الاربعة

أحمد سلامات ويومك طيب انشاء الله
اولا اسعدتني بالطلة اللطيفة والوقورة
وسعيدة بمتابعتك
البوست ده حاانزل فيهو بعض الرصد لردات فعل جماهير الهلال بعد النظري الجاي
وبعدها لو اي زول عندو مشاهدات او تجارب على الرحب والسعة
بس الفكرة بالاساس مستهدفة المشجع وفساد الاندية
تحياتي ومودتي
ومنتظرة تعليقك

[لنا جعفر]

الرائعة جدا لنا
عجبني جدا تناولك للموضوع لأنها مشكلة اساسية في الرياضة عموما وعلي وجه الخصوص كرة القدم وتحديدا ناديي الهلال والمريخ ... لكن معترض علي العنوان لانك حددتي الهلال تحديدا ويا ريت تناولتي الهلال كاسلوب اداري رغم ده ذاتو لا يخلو من ابداء رأينا فيه .. بل عممتي الانتماء للهلال بقولة ( الهلالاب ) وده بمسنا بشكل مباشر نحن كجمهور الهلال البمثل جزء اصيل من عامة الشعب السوداني ..
وتهمتك لينا بالتهريج والفوضوية بتخلينا نقيف لمبة وندافع حتي لا نوصم بهذه التهم ... واذا كان هناك اي انفلات جماهيري حدث من الهلالاب فهذا يعتبر رد فعل يحدث في كل العالم زي ما حصل من جماهير المريخ في المبارايتين الاخيرات وهذا لا يعطينا الحق ان نصف جماهير المريخ كصانعي للتهريج والفوضي لانو لو قلنا كده الكلام بشمل مريخاب حلوين لابعد الحدود وتربطنا بيهم صداقة تخطت مسالة الانتماء الرياضي ... وانتي واحدة منهم وكل المريخاب بسودانيات ...
والهلال نفارقو نمشي وين قالوا من فارق الجماعة هلك و الهلال ناسو كتااااااااار ....
بس انتي اتلمي علينا وبعد بتشوفي الفرق ...

سلام ما يغشاك ضر

عابد مساك نعمة ونور
العنوان ياعابد فيه شئ من المزاح هذه ناحية لكن الناحية الأهم هي ان البوست يتحدث بالاساس عن الكرة السودانية بشكل عام جدا والهلالاب بسلوكهم الذي رصدته وسااورده هنا لاحقا اخذتهم كأنموذج ....يعني شريحة لاجراء معاينة على النسيج الوطني كله( .....ياخوانا البلد دي ليه مافيها حرية بحث علمي ؟ ) ومنطلقي للبوست كانت احداث صاحبت المباراة الاخيرة وأود جدا ان اتناولها في خاتمة البوست ودي عند ناس المباحث الله يجيرنا منهم اسمها الثابتة
حدث انفلات وتطاول واحداث عنف وشتائم في الاستاد وخارجه وفي الشوارع و المنابر الاليكترونية حملت ايضا جزء من ذلك العنف الكثير الذي يدعو للرثاء كما حملته شاشات التلفزة في شرائطها الخاصة بالشات والاعلانات ايضا
الذي اعلمه انا بيقين ياسيدي هو ان الكرة (مدورة) وانها المجنونة وان النصر والهزيمة وجهين لهذه المخاطرة اللذيذة.....والذي تجيزه الاخلاق القويمة والاعراف السمحة هو في حدود المكايدات العادية واظهار الفرح وحتى التجمهر
انا لست ضد ابداء الفرح والاحتفال بل وحتى غيظ الغرماء ولست في مقام من يحدد للناس كيف يحتفلون ويفرحون ...لكن ينبغي للجميع ان يعي ان حريتك تنتهي عندما تبداء حريات الاخرين
فماذنب زميلي مثلا ان يهاجم فقط على خلفية انتماؤه الرياضي وتهشم سيارته مثلا
او ذاك الذي تكالب عليه اسياد البلد! واوسعوه ضربا
او ذاك الشتّاااام الذي انبرى في مدخل حينا مثلا لاخي وصحبه
أنا استطيع ان ابرر بعض التشنج وليس العنف لرواد الاندية الاوروبية مثلا لان أممهم اولا حسمت خياراتها في الحياة وانتظمو نهضة انسانية وحضارية وأسسو لحياتهم ....واتساقا مع ذلك فأنهم أسسو الاندية باحترافية وعلمية وتنظيم مدهشين جدا
طيب فما بال قومنا؟؟؟؟؟؟؟؟ لاهم وضعو اسس بناء حضارية لبلدهم( حتى ناهيك عن المشاركة في اسس بناء تخص الانسانية كلها) ولاكرة القدم عندهم فن وتجارة بشكل محترف؟
ياعابد زبدة القول انه السلوك المنحرف في التشجيع مرفوض من اين مااتى وسأرفضه يوما وهنا ان أتى من مشجعي المريخ يوما او الميرغني كسلا وياسيدي حتى من نادي الخرطوم تلاتة هو مرفوض.....
بعدين والله ياعابد ان أتيتني بتسمية اطارد بها اولئك المارقين من الهلالاب لاستعملتها لكن احتياطيا سأقول من هنا ولي قدام الهلالاب نموزجن عدا عابد ولقمان أخوي
تانيا انت لاتقيف لمبة ولافانوس أقيف حقيقة ياعابد كعهدك ياخ
غايتو يعني كلام عابد فيهو وجاهة بس كمان تعالو صنفو لي سلوك بعض الهلالاب عقب انتهاء المباراة واللي حااوردو بالدليل
كان تنتظر ياعابد ياخ ...والله خايفة عليك من الاحراج
مودتي لك وشاكرة تعقيبك جدا وتوضيح نفسك وتجدني آسفة ان اصابك بعض رشاش الطائشين من الهلالاب النموزجن
لكن بعترف ليك انت شخصيا بانك زول جنتل ومامتشنج ولاعندك غيبوبة
كسير التلج ده بينفع معاك؟؟؟
الفطور عندنا تم من ساعة وانا بكتب ماواعية ياعابد حراااام عليك
مودتي الدائمة

[عابد عقيد]

الغالية بت الامير جعفر

شوفي كسير التلج الماخمج


يادووووووووب الفطور ؟؟ نحن خشينا في اليوم التاني يعني سحور وكده ....

بعد المويات .... منتظرين ..


كباية حلو مر :
ال3 فنجيطات الاولي دي كيف ؟

[طارق صديق كانديك]

المشاركة الأصلية كتبت بواسطة لنا جعفر

وطارق صاحبك ده راجعه لييييييهو زي ماوعدتو
بس يحدد لينا هو معانا ومع المنطق ولا مع الخيانة؟

العزيزة لنا جعفر

تحياتي ومودتي

لو كانت الخيانة تعنى أن أصطف خلف الموج الأزرق .. فانعم بها من خيانة ... !!

ثم ان اختزال أن المنطق معاكم براااااكم ... ثقافة مجروحة الشهادة بالتلاتة .. !!

وبعدين حد يشوف الهلال ويمشى يكابس في نجيمات هنا وهناك مبعثرة هكذا بعثرة ..

أنا حيث يتمدد فيني الأزرق يا أنيقة .. !!

حول الموضوع ..

حقيقي استمتعت جدا بتحليلك لعناصر الكورة بلا استثناء رغم انو دوافع البوست ( وحي الهزيمة ) لكنه جاء مرتقياً بكل تأكيد عن الإنحياز الأعمى الذي نشهده الآن في الساحة الكروية والسياسية وربما الثقافية أيضاً ... !!

الله يكضب الشينة يا ستي .. !!

أمنياتي وتحياتي ليك وللعزيزة سارة .. !!

[لنا جعفر]

المشاركة الأصلية كتبت بواسطة لنا جعفر

لدينا لماذا وينبغي ان نحاول الاجابة عليها
لنجيب عن لماذا ينبغي ان نتحدث عن طبيعة اللاعب وطبيعة الاداري وطبيعة المشجع وطبيعة السلطة.......
فلنبداء بالسلطة ثم الاداري ثم اللاعب ثم المشجع
السلطة تدير بزنس خاص بها وحدها كما هو معلوم وهذا البزنس باختصار يتمثل في استثمار السماء لنهب ريع الارض والعبد وقد كان
عندما صادرت السلطة السماء والارض والحريات بل والانسان كخاتمة مريعة لانفاذ مشيئاتها الشوهاء أسترعى انتباه دهاقنتها أربعة أنماط من البشر الذين تسومهم العذاب
المعارضين لها على أسس وطنية
المهمشين الذين يعون حقوقهم
الاحزاب السياسية الهرمة
بقية شعب الله المحتار
استهدفت الفئات المشار اليها اعلاه بسحل وتعذيب وتشريد الأولى وأشعال الحروب الاهلية بين مكّونات الفئة الثانية وتذويب الثالثة( بأدخالها في حكومة أسمتها وطنية وظللتها بقبة برلمان بئيس) وتغييب وعي الفئة الاخيرة
والفئة الاخيرة هي مايستهويني متابعة مايحدث لها لارتباطها بموضوعي هنا
شعب الله المحتار لكي تضمن غوائله ينبغي ان يغيب عن : ساحات الوعي و عن معرفة حقوقه
وعما يجري من وقائع ....
لذا فأن السلطة انتجت ادوات تغييب وعي كثيرة تأتي اندية الكرة كأعلى جهة لاداء تلك المهمة الرسالية وذلك عن طريق هدر الوقت وامتصاص الغضبات والاحبطات السياسية والاقتصادية وغيرها اضافة لكل ذلك فأن القطاع الرياضي بالاصل ينبغي ان يوجه لغيرما خدمة القضايا الوطنية بل ينبغي ان يخدم عصبيات وتشنج وتمييز وتشاحن واستهلاك زمن وطاقة ...
شعب الله المحتار يضم بطبيعة الحال بين فئاته اللاعبين والمتشنجين الذين شغلوا عن أدوارهم التي ترتبط بكينونتهم ومعاشهم
أذن السلطة قامت بأمر مزدوج اصلا وخطير وهو فصل الارتباط بين طبقة الاداريين وربطها بمصالحا وفلكها هي ......و من ثم المشاركة في صنع غيهب يستهلك وعي وزمن وطاقة المواطن العادي الذي بالاصل يشكل وعيه السياسي هاجس ضخم لقرقوش وصحبه
هذا الغيهب يتمثل في ايجاد ساحات تنافس لم يبذل اي شي في سبيلها وتركت لتنمو بلا خطط علمية او تلبية احتياجات ضرورية تركت لتنمو افقيا نحو السطحية وسوء الخلق وترك موروث الاخلاق السمحة أما التمدد العمودي فهذا مالم يبذل نحوه اي جهد يذكر والتمدد العمودي او الراسي هو محاولة خلق أندية كروية بمقاييس عالمية وعلمية والتمدد الافقي هو زيادة واستقطاب المشجعين داخليا طبعا وزيادة تجهيلهم واغراقهم بالشحن العاطفي انحيازا لهذا الفريق او ذاك وشحذ ادوات اخرى خبيثة لبث تلك الروح المتعفنة من التجاذب والمهاترات وتلك الادوات هي الصحافة الرياضية ومجتمعها المثير للسؤال
أذن اداة السلطة لاحداث تنافس كروي غير مؤسس بالاصل بين الاندية وشغل المواطن به كان هو جهابزة تجار ومرتزقة الكرة والمتاجرين بالبشر وبعض صحفيي القطاع الرياضي وبعض ساقطي الاخلاق وتم بالفعل صنع طبقة هي خليط كما قلنا من التجار والسمار والوجهاء والجهلة ومستحدثي النعمة وسميت هذه الشريحة اداريين ........

يتبع

نواصل من هنا وهذا تسهيلا للربط
أداريو الاندية ورؤسائها ينتخبون وفق اجراءات كما يدعون وفي احيان كثيرة وفق تحايل على الاجراءات وبطبيعة الحال لاتخفى أمور الفساد و الشلليات وتعدد القوائم الغير معلنة طبعا حتى في داخل النادي الواحد ومايسمى انتخابات بواقع الحال هو فقط تزيين لواجهات مختلفة تلاقت مصالحها نستطيع أن نعدد منها الأعلام المأجور والرأسمالية الباحثة عن البريق والجو البهيج (!) وبطبيعة الحال السلطة التي تختطف المنابر والساحات المختلفة والمثير للشفقة أن وزراء رياضة الانقاذ يلهثون مليا لاثبات أن هناك انتخابات وديمقراطية داخل الاندية والمحافل الرياضية , هكذا بلا اي وازع من حياء او رجولة وهذا السعي مردود بطبيعة الحال عليهم لان فاقد الشئ لايعطيه ببساطة شديدة ثم أنا لم نسمع يوما بدمقرطة جزئية وان كان هنالك ديمقراطية وتحشيد لها اما كان الاولى بالسلطة التي جاءت بليل الم يكن اولى بهم توفير هذه الديمقراطية في كافة صعد الحياة ...أولم يكن من الاجدى اصلا عدم الانقلاب على حكم ديمقراطي انفق عليه من اموال وتعب الشعب المغلوب على أمره.؟.........
نحن نؤمن انه ليس هنالك ديمقراطية بعرض قطاعات الشعب السوداني قاطبة سواء السياسية او الاقتصادية او حتى الرياضية أو الثقافية او الاجتماعية في زمن الانقاذ والانتكاس،
كل ماهنالك أن الانقاذ استعانت برأسمالية طفيلية وصحافة مرتزقة ووجهاء عشائر وبعض الناشطين كرويا والهواة التّبع والهتيفة والمرجفين ومدعي أسلمة الرياضة لتكوين أجسام رياضية بمقاسها اللا وطني
وبذا تكونت الجوقة الرياضية المسماة زورا وبهتانا وأفكا قطاع رياضي واندية كروية واتحادات كرة محلية وهلماجرا هذا ماحدث بالضبط في زمن الجور المستظل بالسماء حسب اجتهادنا المتواضع جدا ومشاهداتنا اليومية البسيطة التي نمسك فيها عن ذكر تفاصيل ليست سرية هي اصلا ويتداولها العامة ويغمزون ويلمزون بها في مجالسهم ...نمسك عن ذلك لطيب أصلنا ولافساح المجال للسجال العلمي والموضوعي ان كان هنالك سمّاعون للحق
نقول قولنا هذا مستصحبين قواعد واخلاق عمل عام ابجدية وبداهية تتمثل في أن العمل العام بعموميته ينطلق من أسس الموهبة متسقة مع العلم ومعرفة بأسس الاحتراف وادارة واقع يشارك فيه قرابة الاربعين مليون نسمة ....العمل العام( ياسادتي رؤساء (الانادي وعذرا للفظ المقصود)ومسئولي السلطة والثروة المنتهبة ) قاعدته الابدية وطنية ومعرفية ......فهل تدرون ماهي الوطنية والشراكة في الوطن والقرار وحق العيش المشترك؟؟؟؟؟؟؟؟
هذا مايتعلق بالفئتين السلطة ومسئولي الرياضة ورأيت ألا أفرق بينهم في المقام لانهم شركاء وأد الحريات وشركاء في الجرائم ضد الوطن وانسانه .
تبقى لنا اللاعب والمشجع ....


يتبع

[معتصم الطاهر]

لنا .. تحياتى

و ريد شديد ثلاثى الأبعاد ..

أسئلة ..
هل عملت فى ادارة نادى .. أى نادى ..؟
هل عملت فى ادارة نادى رياضى ؟

لقد عملت فى هذه المهام .. وانت بعيدة عن الواقع ..
بعيدة جدا ..

العمل الادارى فى الأندية هو :
أن تقطعى من لقمة أولادك ..لتطعميها اغيرهم " اولاد ناس "
أن تأخذى زمن أسرتك و تهديه لعشاق النادى
أن تربى أولاد غيرك ..
هى أن تتحملى أخطاء غيرك ..
أن تتركى عملك .. و تسافرى مع لاعبين و تساهرى لينوموا و تجوعى ليشبعوا .. و وتشدى شعرك لتهدأ أعصابهم ..

وكل ما تأخذينه هو لقطة جميلة أو هدف جميل يعتبر إضافة للانسانية بالتسبة للبعض أفضل من أى أغنية أو قصيدة أو امرأة ...

[لنا جعفر]

أسئلة ..
هل عملت فى ادارة نادى .. أى نادى ..؟
هل عملت فى ادارة نادى رياضى ؟

لقد عملت فى هذه المهام .. وانت بعيدة عن الواقع ..
بعيدة جدا

معتصم
حباب التحية
أجوبة؟؟؟؟
هل عملت يوما كرئيس لادارة بلد أي بلد؟؟؟
هل حكمت السودان يوما؟؟؟؟؟
لقد عمل عمر حسن احمد البشير (مثلا) في هذه المهام
وأنت بعيد عن الواقع في انتقادك له يوما!!!!!
-- ----------
رؤساء ادارات الاندية والنقابيين واعضاء الحكومات وحتى الممثلين والكتّاب
وكافة من يتصدى للعمل العام شخصيات عامة يجوز انتقادها واتهامها
وبصفتي مواطنا ومراقبا يحق لي ابداء رأيي
-----------
رأيك في العمل الاداري بالاندية أحترمه ولااؤمن به وتسندني دلائل وشواهد
ورأيك خطأ يحتمل الصواب ورأيي صواب يحتمل الخطأ
لكنه يظل رأيي المسئولة عنه قانونيا وأخلاقيا
ولايشترط أن أمر بتجربة أدارية لآدلي برأي ---------

و ريد شديد ثلاثى الأبعاد

قلت لي شنو؟؟؟؟
ياباش ده خطاب مسئول جدا

عذرا لتأخير الرد كنت بالخارج و سنواصل الحديث ليلا

[لنا جعفر]

معتصم كنت أود ترك مهمة الاستدلال لمرحلة لاحقة في البوست
لكن لابأس من أن نريك ان بعض السودانيين الذين لم يعملو بأندية كرة القدم
يحملون هذا الرأي ايضا
لست بعيدة يامعتصم ....لست بعيدة البته
انت من أخذتك الغربة قليلا ياسيدي
تسلم ياباش

الرأي لهشام هباني نشره في سودانيس في بوست خاص به

رغم انى مريخابي ولكن قد سرتنى جدا هزيمة المريخ من الهلال شماتة فيك شخصيا بروح( عجبنى للمارغوت)لانى ادرك بحسي ما ال اليه حال المريخ العظيم في ولايتك الفاسدة وانت اللص المتنفذ و المعين بامر من رئيس الجمهورية السفاح عمر البشير لاسباب سياسية وامنية بحتة لا علاقة لها البتة بهذه القلعة الحمراء وهو لاول مرة في التاريخ ان يعين رئيس نادي خاص بامر من رئيس دولة لا علاقة له بالنادي وهو امر لا علاقة له بدستور ولوائح المريخ العظيم...
وانك مهما كدست من اموال الحرام المنهوبة من شعبنا لتصنع بها (مريخا) لن تستطيع لانها في الاساس اموال غير مباركة منهوبة من دم هذا الشعب التعيس ولذلك لن يبارك الله هذا المريخ ابدا طالما دخله مال الحرام في معاشه وملبسه واسفاره ولذلك اعتقد ان هذه النتيجة الاخيرة والقاسية التي انتهت بهزيمة المريخ من الهلال فهي في اعتقادي الراسخ امر رباني بحت يثبت لكم ان الحرام يذهب من حيث اتى!
اترك المريخ وحاله لاهلــــــــــه و المريخ غير محتاج لاموال الحرام ولا للامنجية قتلة ونهابة الشعب لانه تاريخيا ناد محترم يمثل جماهير محترمة وقد قام على اكتاف رجال انقياء جاءوا من صلب هذا النادي العظيم وقد اتت بهم الجماهير ولم تات بهم قرارات رئاسية ولا جاه زائف ولا اموال منهوبة!

[رأفت ميلاد]

لنا جعفر صباحك فل
متابع معاك من قولة تيت .. مستمتع شديد بنهرة الرشاشات ديل ..
الحقيقة يا لنا عالم الكرة عالم منفصل تماماً .. وعصبية كرة القدم بكل إنفعالاتها لا تتعدى الحدث الى الحياة العامة إلا ليومان أو ثلاثة على الأكثر ..
ولكن ليس تحيزاً بل حقيقة كاملة المريخاب "كانوا" .. ولا أدرى الآن .. أكثر إتزاناً من الهلالاب .. ربما لأنه كان مجتمع وحى وليس "لحم راس"
فى المسالمة أذكر عندما يفوز المريخ تجد الناس فى الشارع حتى الفجر يغلب عليهم الفرح والحبور .. وعند الهزيمة تصير الطرقات مهجورة وكل "تحت بطانيته" ..
أما الهلالاب فى النصر .. مظاهرات ويحطمون الممتلكات ويوقفون السير "وبلبة" حتى الفجر .. وفى الهزيمة نفس المظاهرات نحو ناديهم يحطمونه "ويدقوا" المدرب ويتحرشون بالإدارة ..
أذكر فى فترة تشبه الوضع الحالى الى حد ما .. تأهل أيضاً الهلال والمريخ لتمثيل السودان .. كانت المباراة النهائية أربعة فرق فى "حفلة" واحدة .. المبارة الأولى بين الهلال وفريق ضيف على المركز الثالث والرابع .. والختامية بين المريخ وضيف على المركز الأول والثانى ..
إصطف المريخاب فى المباراة بمسؤلية تامة فى تشجيع الهلال بالهتاف والتصفيق الملتهب .. فإنبرى فيهم خطيب ينهيهم عن ذلك ويذكرهم بأن هؤلاء ليس لهم أمان .. تم ذجره وإسكاته وأمره بالتحلى بالوطنية .. وخرج الهلال منتصراً ..
فى المبارة الثانية إشتعل الهلال مشجعاً للفريق الضيف .. فقام نفس الخطيب صائحاً .. ما قلت ليكم ديل خونة .. وإمتدت الأزمة تشابك بالأيدى فى طرف المصطبتين .. وخرج المريخ مهزوما" .. وإحتفل الهلالاب حتى الصباح .. دى أمة يرفعوا ليها علم زى ما بتقول ساره ..

تعرفى يا لنا الكورة خلف الأكمة تجارة .. بيع وشراء .. وكل قذارة "البزنس" فى العالم كله .. ولكن موضة التسييس من صنع العالم الثالث .. بالأخص أفريقيا .. هى صرف نظر الجماهير عن هفوات الحكومات ..

ما لا أنساه ويحزننى حتى الآن .. نحن فى مقابر فاروق ندفن دكتور على فضل .. والجماهير تجرى حولنا وتهتف بالنصر متجهين للمطار فى إستقبال المريخ .. قادماً بكأس "سيكافا" .. هذا الكأس الذى يتنبر به المريخاب "المحمول جواً" .. وصمة عار فى جبيننا الى الأبد ..

تحياتى
وآسف على الوصلة النكد

[معتصم الطاهر]

المشاركة الأصلية كتبت بواسطة معتصم الطاهر

العمل الادارى فى الأندية هو :
أن تقطعى من لقمة أولادك ..لتطعميها اغيرهم " اولاد ناس "
أن تأخذى زمن أسرتك و تهديه لعشاق النادى
أن تربى أولاد غيرك ..
هى أن تتحملى أخطاء غيرك ..
أن تتركى عملك .. و تسافرى مع لاعبين و تساهرى لينوموا و تجوعى ليشبعوا .. و وتشدى شعرك لتهدأ أعصابهم ..

وكل ما تأخذينه هو لقطة جميلة أو هدف جميل يعتبر إضافة للانسانية بالتسبة للبعض أفضل من أى أغنية أو قصيدة أو امرأة ...

ما عارف يا لنا
الفوق دات كلو خليتيهو وجريتى للمقدمة بتاعتو
دى سياسة بسمارك المريخابية ..

ادارة الهلال نجحت بأموال صلاح ادريس و ليس بأموال الشعب ..ولا اموال المؤتمر الوطني .!!!

[عابد عقيد]

الهلال دائما ينحاز للقوة الديمقراطية

والمريخ ارض خصبة للديكتاتوريات - مايو - المؤتمر الوطني

لذلك انتصارنا علي المريخ هو انتصار القوة الديمقراطية علي المؤتمر الوطني .

عشان كده فرحتنا ليها مذاق خاص . وعقبال الانتخابات

[لنا جعفر]

لو كانت الخيانة تعنى أن أصطف خلف الموج الأزرق .. فانعم بها من خيانة ... !!

ثم ان اختزال أن المنطق معاكم براااااكم ... ثقافة مجروحة الشهادة بالتلاتة .. !!

وبعدين حد يشوف الهلال ويمشى يكابس في نجيمات هنا وهناك مبعثرة هكذا بعثرة ..
أنا حيث يتمدد فيني الأزرق يا أنيقة .. !!

طارق مساك محبة
الخيانة هي الخيانة لو كانت زرقا ولاسودا وطالما أعترفتا بيها فنحنا بناخدك بي اعترافك ده وبنعاين معاك لي قدام ......بعدين ده كلام عصبيات شديدة البتقول فيهو ده
وانت رجل قومي ياخ كما يبدو لي اها البتعمل فيهو ده ياطارق شعوبية شديدة

حقيقي استمتعت جدا بتحليلك لعناصر الكورة بلا استثناء رغم انو دوافع البوست ( وحي الهزيمة ) لكنه جاء مرتقياً بكل تأكيد عن الإنحياز الأعمى الذي نشهده الآن في الساحة الكروية والسياسية وربما الثقافية أيضاً ... !!

شكرا للاطراء وخليك خاتي في بالك اني انا رفدتا البوست ده بي رأي سلبي جدا لمواطن مريخابي في جمال الوالي قلتا ندي التوازن شوية دفعة كده وحاتكتشف اني في الموضوعية حا اكون لحد بعيد محايدة والعربون ده بيصدق كلامي

الله يكضب الشينة يا ستي .. !!

حايكضبها ياطارق
وجودك مفرح ياطارق
مودتي
لنا