ارشيف : ضيف على مائدة سودانيات ...! - 22 -1

[حجة امنة]

لا يا أبو أماني ياخ

ما تزعلني منك gap

البوست دا من أحب البوستات المرت علي في النت دا كلو، ما سودانيات بس

واصل بالله

يلا على بركة الله gap

[عكــود]

سلام يا زين،

لا تُحبط يا أصيل فتطفئ شمعتك.
للناس أسبابها.

واصل ترشيحاتك وسيستمر البوست بإذن الله.

[أبو أماني]

اقتباس:
المشاركة الأصلية كتبت بواسطة عكــود
سلام يا زين،

لا تُحبط يا أصيل فتطفئ شمعتك.
للناس أسبابها.

واصل ترشيحاتك وسيستمر البوست بإذن الله.

عكود .. يا أخي إنتا والله واحة وريفة الواحد يستفئ ظلها كل ما إشتد الهجير .. الله يخليك لينا يا ..أب شنب .. الشايقي الجنب وعشانك بكاتل الريح وعشانك قليبي جريح..يا..سمح..ياااااا زين .. لك تقديري .. وكلامك أوامر ..تشششاااووو!
* بس عذرا كدي نديها صنة .. وامخمخ ليكم بمزااااد الضيف الجاي ..

اقتباس:
المشاركة الأصلية كتبت بواسطة حجة امنة
لا يا أبو أماني ياخ

ما تزعلني منك gap

البوست دا من أحب البوستات المرت علي في النت دا كلو، ما سودانيات بس

واصل بالله

يلا على بركة الله gap

[justify]

والله يا ست الكل كانت القشة والبعير..وفشلت فشلا ذريعا في إستقطاب..شخصين من أحب الناس للقلوب جميعا وليس قلبي وحده .. هما توم آند جيري .. سوري قصدي إسامة وأسعد أو جوز اللوز.. (بهذر يا جماعة)!! تقوموا كمان تدوني سخة كااااربة.. أصلكم اليومين ديل بقيتوا على الهبشة ..!! حقيقي كانت أمنية ..أن يزينا مائدتي وهذا البوست فهما ملاحة المائدة عند الأكل وفاكهتها عند التحلية .. الإحباط جاء مكملا لعدة إحباطات تعيها مثلي .تشل وتشمل كل من كان سوداني هذه الأيام !!.. عموما تفدى لكي الرقاب يا حجة لكي معزتي يلا .. تشششاااوووgap[/justify]
بالجمبة كده :
التقريظ أعلاه يملأني زهوا .. وقد إنتفخت أوداجي حتى كادت تنفجر آآآآه لو شفتي المنظر على الطبيعة .. تفحطي كيلو!!! ..

[أبو أماني]

[justify]درجنا في كل مرة ومنذ سنين على ترشيح ضيف من قدامى الزملاء .. ولكن هذه المرة أطل على سماء سودانيات .. بل دار في فلكها كوكبا .. متوهجا.. يعج باطنه بالنفائس والمطايب .. شخص حديث العهد بسودانيات ومازال في مهد التعارف ولكنه مذ خطواته الأولى .. كان له القدح المعلى في حب الناس وأنا أولهم.. هذا الشخص له عدة أصدقاء حميمين هنا ..وعلى راسهم الرائع أبدا مبر .. الذي يحدفنا دوما بالورود والدرر .. وحتى العبد لله إتعكلت فيه وقال ليو بصراحة تامة عند التحية إنو عيكليتة بدرجة (مشير) .. (بس ما برقص)!! والظاهر عليو ما صدقني .. عشان كده .. اوريه العكلتة الأمها بت عم أبوها .. واقدم لكم بدون سابق إذن أو معرفة وثيقة .. الحبيب :-

الأستاذ / ثروت سوار الدهب

عكود الرسول عليك جييهو لي ووهطو في الكرسي .. وأعدكم بمساجلات ظريفة ظرف حجة أمنة ..كيتن في وهاد وكل حسان سودانيات .. يلا تششااااووو
[/justify]

[أبو أماني]

مرت شهور وإنقطعت الأسباب بيننا .. ولكل ظروفه .. بس مقبلين على عيد .. عساه سعيد رغم التحفظات البوردرابية ... أتمنى لكم كل الخير والسعادة .. وقد حرك أشجاني فاصل (تشات) جمعني بالأديب الأريب الأستاذ الدكتور الرائع أبو مازن أحمد زين وقد بلغني بوصول عزيز خطاب وفتحي مسعد السودان وإنه يوم الخميس الجاي تجمع البوردراب كلهم من أسرة سودانيات ولنا لقاء عبر اللقاء المباشر والأثير إنشاء الله .. لكم حبا صادقا من القلب .. وتحية خاصة للشاب الظريف الذي طنشنا بكل سهولة ويسر وعدم إهتمام لا نحسد عليه ..العزيز: -

الأستاذ / ثروت سوار الدهب

تشششااااووو

[الرشيد اسماعيل محمود]

سلام يا أبو أماني،،
ياخي البوست دا توثيقي بامتياز، وانا عن نفسي قاعد استفيد من تجارب وحكاوي الآخرين القاعدة تتم استضافتهم هنا. ما دام ثروت طنّشك، أنا برشِّح ليك بعد العيد، صاحبنا أمير الأمين.
بالله ما تقول أيّ حاجة، أدفرو برسالة في الخاص، وخليهو يجيك بمعنويات ما بعد رمضان.


ويلا تشااااو

[أبو أماني]

اقتباس:
المشاركة الأصلية كتبت بواسطة الرشيد اسماعيل محمود
سلام يا أبو أماني،،
ياخي البوست دا توثيقي بامتياز، وانا عن نفسي قاعد استفيد من تجارب وحكاوي الآخرين القاعدة تتم استضافتهم هنا. ما دام ثروت طنّشك، أنا برشِّح ليك بعد العيد، صاحبنا أمير الأمين.
بالله ما تقول أيّ حاجة، أدفرو برسالة في الخاص، وخليهو يجيك بمعنويات ما بعد رمضان.


ويلا تشااااو


الحبيب الرشيد عذرا .. فقد زهجت من محاحاة الضيوف وزوغانهم وفضلت أتفرغ لمشاكلي كل الشهور الفاتت دي والسنة دلوقتي تلفظ أنفاسها الأخيرة .. بوسترك كان بتاريخ 2/8/2013 ودلوقت السنة باقي عليها إسبوع وشوية .. المهم لك العتبى .. حتى ترضى .. أن ما زال العرض قائم .. فهي دعوة صريحة للحبيب أمير ليحل ضيفا خفيف الظل على المائدة .. ولكم كل الحب .. يلا .. تششششااااوووو

[زول الله]

ياسلام ابوالاماني السندسية
شوفتك هنا ترد الروح وتجبر خاطر المجروح يعلم الله
ياخي بتخلينا نحس بالزمن الجميل اللحقناه وبالأجمل الفاتنا
ماتستسلم للإحباطات ياحبيبنا
عشان ماتبقى علينا إثنين إنت وبلدنا المهتريء وبنحبو
خليك زي جروفنا الأبت تطاطي للنيل وكلما يكسر عليها تفضل تناضل لحدما ينحسر هو

معاك نقدم الدعوة الماخمج لـ الأمير ود اللمين عشان مغروضين فيهو جد جد
وعايزنو يجي هنا دا عشان نرشو ليك لمن يعرف حاجة زاتو
أهي فرصة وجاتنا لحد عندنا غايتو إلا يعمل رايح







اقول قولي هذا واستغفر الله لي....................

[ناصر يوسف]

مو أمير الامين ده ،،،

خلوه علي أنا ده ياخ ،،،

إن ما بان وظهر في باقي السنه دي ،،، أصلي حأكون معاه بمشيئة الله بداية يناير القدامنا ده ،،، أجيبو ليكم فوووووووووو

ومن هسي دي أنا حاجز لي سُعال أو طلب ياخ

بالله عليك يا امير الامين تكلمنا عن تلكم المدينة التاريخ

رفاعه ،، رفاعة العِلم ،، رفاعه الإنسان ،، رفاعه البكان ( جغرافياً )
وخثوووووووثاً خُثوثاً كدي تحكي لينا عن فريق العُوَرَه ياخ

[أمير الأمين]

إنتو جادين ؟
الكرسى دا جلس عليهو كتاب وشعراء واشباه انبياء
يا اح نحن ناس كواليس ومشاهدات ورصد تقاطعات بس !
المهم عشان خاطر الحبيب ابو امانى اللى ريط وجوده فى المنتدى
بحواراته الشيقة فى الكرسى وعشان ضرورة وجوده هو...هنا
نتوكل على بركة الله ونقول اللهم اجعل الاسئلة على شاكلة
"كتابك المقضل...ووجبتك المفضلة ....الخ"

[حجة امنة]

قال كاتبك المفضل و وجبتك المفضله و قال إيه قال الخ gap

ماف ليك.. تنسلخ زيك و زي الشعراء و أشباه الانبياء و النبلاء دي زيادة من عندي

[زول الله]

المشاركة الأصلية كتبت بواسطة ناصر يوسف

بالله عليك يا امير الامين تكلمنا عن تلكم المدينة التاريخ

رفاعه ،، رفاعة العِلم ،، رفاعه الإنسان ،، رفاعه البكان ( جغرافياً )
وخثوووووووثاً خُثوثاً كدي تحكي لينا عن فريق العُوَرَه ياخ

مرحبمبك وحبابك عشرة بلا كشرة في هذا الكرسي الدافيء - عشان السقط وكدا

اولن بالتبادي لايق لينا ويكة ناصر الفوق دي بإسهاب - لاحظ بإسهاااب دي

وثم نجيك بي باقي البهارات








اقول قولي هذا واستغفر الله لي.................

[أمير الأمين]

المشاركة الأصلية كتبت بواسطة زول الله

ياسلام ابوالاماني السندسية
شوفتك هنا ترد الروح وتجبر خاطر المجروح يعلم الله
ياخي بتخلينا نحس بالزمن الجميل اللحقناه وبالأجمل الفاتنا
ماتستسلم للإحباطات ياحبيبنا
عشان ماتبقى علينا إثنين إنت وبلدنا المهتريء وبنحبو
خليك زي جروفنا الأبت تطاطي للنيل وكلما يكسر عليها تفضل تناضل لحدما ينحسر هو

معاك نقدم الدعوة الماخمج لـ الأمير ود اللمين عشان مغروضين فيهو جد جد
وعايزنو يجي هنا دا عشان نرشو ليك لمن يعرف حاجة زاتو
أهي فرصة وجاتنا لحد عندنا غايتو إلا يعمل رايح







اقول قولي هذا واستغفر الله لي....................

حباب ود الشيخ
نحن ناس محبة وشورة وود مع اهلنا المتصوفة
وقلنا دخلت ود الشيخ هنا تكون حجاب وضرا من الاسئلة
التعسفية نجى نلقاك "قانص" لينا...
غايتو الله فىّ.. و"شوت" ساكت اكان غلبتنا الاجابة بى حاى
بنتمها ليك فى الموبايل.. بس خليها فى سرك وانتو ناس اسرار

[AMAL]

سلام ابواماني
وحباب البرينس

ادينا بطاقتك قولة خير وفتحة خشم

[أمير الأمين]

المشاركة الأصلية كتبت بواسطة ناصر يوسف

مو أمير الامين ده ،،،

خلوه علي أنا ده ياخ ،،،

إن ما بان وظهر في باقي السنه دي ،،، أصلي حأكون معاه بمشيئة الله بداية يناير القدامنا ده ،،، أجيبو ليكم فوووووووووو

ومن هسي دي أنا حاجز لي سُعال أو طلب ياخ

بالله عليك يا امير الامين تكلمنا عن تلكم المدينة التاريخ

رفاعه ،، رفاعة العِلم ،، رفاعه الإنسان ،، رفاعه البكان ( جغرافياً )
وخثوووووووثاً خُثوثاً كدي تحكي لينا عن فريق العُوَرَه ياخ

اووه حبيبنا ناصر
عارفة رفاعة دى مدينة طهور.. تحيط بيها حدقات الفة وتحنان
بتتفتح "سحارتها" لاصحاب القلوب الكبيرة بس ..(سؤالك قطعا من هناك)
بتعطى من غير جزاء .. انسانها بسيط متواضع للحد المدهش داك..
رغم حصول اغلبهم على شهادات عالية..تغيب روح هذه الشهادات فى ملماتنا
وفى افراحنا..هل هى شكل من الالفة ؟ قد تكون ...!!
"فريق العورا" مجموعة من بعض الشخصيات تصنف كل شخص انفعالى او زهجى
او شديد الغضب "بالعوير"..عملوا جمعية باشتراك (اى والله )..
بتضم اى شخص يقوم بفعل "عوير" حسب التصنيف الفوق داك.. ويحاولو يخفو من حدة سلوكه...الحاد ..
قطعا لو زارو المنتدى ممكن يسجلو كم عضو معاهم