[align=center]عينيك مدن
صلاح حاج سعيد
عينيك مدن
منسية في كتب التواريخ والزمن
عينيك وطن
مشدود علي وتر التباريح والشجن
ممدود علي حرف الكتابة
مكتول عنا ومكدود صبابة
وفيه حط النيل سكن
عينيك سفر مكتوب
اعيش في غربتو
وأعشق عذابو
وحرقتو و ليلو الطويل
واتخيلك ياحلوة
زي نسمة سحر
جيتي ومعاك حلمي المطول
منتظر وعدو الجميل
عشقك زمان جواى رحل
وإتناه في الأعماق أمل
ضمَّخ رؤاى إحساس نبيل
اذهل طيوف خاطري القبيل
جاشت ملامح روعتو
ضج السكون في وحشتو
والكان أمل في عيونى لاح
ذوب مدارات فرحة الوهج النضير
والمزدهر بالإرتياح
فجاة انحصر قبضة رياح
وسكت الكلام
ياحلوة في القول المباح
وغاب الصباح بعدك رحل
والكان أمل في غيم سماك
ايقنت إنو عدم بلاك
وإنك قدر
إنو البيحلم بى علاك
بختار ظروف أحلاها مر
عينيك لو تصدق معاى الامنية
عينيك لو اعرف ختام الاغنية
بدء الكلام والنتهي
والمستطاب والمشتهي
كل المباهج في المواويل والغنى
والعاشقين قلبى وأنا
هزتنا في عينيك تصاوير المنى
يا أمنيات من كم سنة
يا اغنيات كل الأماسى
المستحيلة وممكنة
يا المستحيل عينيك تهون
والمستحيل قلبك يخون
ما الغدر ماطبع الوفا
والصدق ماشرط إنتفي
وأنا حالى في بعدك كفى
وأنا حالى في بعدك كفاه
المغني والحب والشجن
والوحشة والشوق للوطن
والعمر قبلك ضاع سدىً
والعمر بعدك أيه يكون
لو يبقى بحساب الزمن[/align]
التعديل الأخير تم بواسطة فيصل سعد ; 28-12-2007 الساعة 07:59 AM.
|