قشة كبريت،،،، ،

*قشة كبريته*🔥
*دي يا حرقت،،، يا طبخت،،،*
حليل زمن الكبريته ،،، بدوها باقي،،، في الزمن الباقي في عقولنا،،،
لعبنا،،، بي قشة الكبريت،،، في رمضان،،،، لو حريف بتعبي مدفعك من البارود ألفي راس قشة الكبريته،،، و لو حريف خلاص،،، و مكمل الحرفنه،،، بتعبيهو في سلك العجله،،، محل الصاموله،، دي تقنيات حقت ناس حضروها،،، بننتظر قبل المدفع كل زول يجهز مدفعه لضربه مع بداية آذان المغرب،،، دي فائده لي قشة الكبريته عند الشفع،،،
و مرات الجن بقوم علينا،، نمشي نولع الكوشه ،،، وهاك يا دخاخين،،،
من المراسيل،،،،
أهم حاجه،،
امشي ياولد جيب علبة بينسون و كبريته و شيل الباقي،،،،
نحن بنركز على الباقي،،،، وبس،،،
المعادله،،، علبة سجائر بينسون،،، زايد كبريته،،، بتديك مزاج اس٢،،،
اكتر زول اخترع،،،، فهم تاني لي الكبريته،،، الفنان الطروب *عبدالعزيز محمد داؤود* ،،
بطربك لحدي ما تتكيف ،، لا بي اوركسترا، ولا بي عود،،،
بس بي حنجرته و كبريته،،، بمسك بيها الزمن،،،،
كان لقينا طريقه عاينه جوه الكبريته دي ،،،، قطع شك،، بنلقي كل عود بنطط براهو،،، منطربين و مبسوطين،،، ينقزوا سااااااي،،،،
هسه مزاجنا معكر ،،،، امتحانات،،، ابتلاءت ،،،،، بتدور الصبر و طولة البال،،،، تشوف واحد عامل فنان،، لا قادر يغني،، لا قادر يمسك زمنه،، همه في العداد،،، بس،،،
مصيبه و وقعت علينا،،،
زمن الزمن سمح الناس كان بتمشي الأعراس عشان الفنان،،، هسه بمشوا مجامله ساي،،، و حدهم العقد و كان خلاص يباركوا للعرسان،، ويزوغوا ،،،،
هسه الكوش ماليه علينا البلد،،،،
زمان الكوشه،،، شدت ماسمحه،،، بقولوا كوشة العرس،،،،
و زمان كل كوشه عندها محل واحد،،،،
هسه محل ماتقبل،،، تلقى كوشه،،، في إهمال، في عدم اهتمام،،، ممكن تعرف الحي ولا الحله من كوشتها،،،
و كوشه لي كوشه بتفرق،،،
زمان،، الكوش دي بتعمل ليها مراجعه،،،،
في ناس بتجي تفتش،،، بتلقى ليها حاجه،،، اي حاجه،،،، ممكن تنفع معاها،،،
بعد يمشوا،،،، بتجي الكلاب،،، تهوهو ،،،،، و تنبح و تفتش،،،، بعد يمشوا الكلاب،،، بتجي الكدايس،،، تجنوجوا و تبحت،،،
شفتوا النظام ده كيف،،، احترام،،، و تقدير،، حتى في الكوش،،،
هسه الكوش ناشفه نشاف الشرموط في الحبل،،،
كان خلاص الناس نضفت البيوت،، ياهو كوم التراب،،، وحبة أكياس فاضيه،،
حليل باقي الاكل،،، و الهتش و الكرور،،،،
كان الكوش نشفت،،، معناتها البيوت فضت ،،،، والناس اتضايقت شديد،،،،
زمان قش الكبريت في علبه محكر،،،، هسه خلق الله كلها،،،، داسه ليها قش،،،، والبضحك بقى بالألوان،،، ابيض،،،، و مرخص،،، و كده،،،،

*خلوها الكوش،،،*
البلد دي قاعده على قشة كبريته 🧨 🔥💣🔥
*قشه واحده بس،،،، بقققق تولع،،،،*
الله يستر،،،
نحن نشحد الله الكريم،،،
قش الكبريت نولع بيهو الفحم و نسبك بيهو الحلل،،،،،

*وقشه ماتعتر لينا،،،،*

*د. علي الشيخ*
*الحنين*
*امدرمان*
*١٠ يونيو ٢٠٢١*

[imported_ناصر يوسف]

د. علي الشيخ

تحية و احتراما

نسأل الله السلامة لنا و للوطن الجريح

[بابكر مخير]

وإحنا صغار (ما برضك كنا في هذه المرحلة الجميلة زمااااااااااااان)
بنعرف الكبريت أبو مفتاح
دارت الأيام ومشيت قريت في تشكوسلوفاكيا ومع أنهم ما عندهم كناتين لا يمنين ولا أولاد ملاح..
لكني إلتقيت بذآك الصندوق الذي كان كتير من المرات الوالد يرسلني عشان أجيبوه لكن مع صندوق سجاير (روثمان)