نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > نــــــوافــــــــــــــذ > خاطرة

إضافة رد
 
أدوات الموضوع انواع عرض الموضوع
قديم 11-09-2011, 01:39 PM   #[1]
ود الحبوب
:: كــاتب نشــط::
الصورة الرمزية ود الحبوب
 
افتراضي إتورطته فيك عليشان بمجد فيك عزة الأوطان

وندهتك هتاف .. ومشيتك خطوة .. وحسيتك خفقة ..خفقة .. وأشعلتك في جوايا شمعة .. وحسيتك ضنى ورفيف إنســان ..بلاقح شهيق النجمة .. ويضوي للأوطان
وكتبتك نبضة نبضة وخفقه خفقة .. يا كرمــة الحبان

خفقة أولي
أيه اقول غير يا حلات الدنيا بيكا يا إنسان
جملته حياتي بالوصل الزائد والحنية
وإكتست أيامي معاك ورود وزهور
وكبرت أحلامي الوردية
وأتبدلت أيامي أفراح وأضحت أعياد فرايحية
مابين همسة شوق وبسيمة نورية
وأناديك يا أروع ريد من الله هدية
وأتوه معاك في رحلة أنسية
وأقول سمحة وخلاصية
وأناغم طرفها الوسنان
وأقول مياسة فاقت فريع البان
أخو زينة السمحات أنا
وبشوفِن في خاطري عيان وبيان
وتسلم الغندورة كرمة الحبان
اللي للروح ملاز وأمان
وأمجد صنعة الرحمان
وأقول ضواية أضوى من قمحة
وأقول بحرا بالعفاف مغمور
مابين زهور وزهور بيتوقد شعاع النور
هيبة وصدق نية
وخفرا بي الحيا والطهر مخفور
وما بطولوا المراكبية
يا وداعة وإلفة وفي الجمال آية
وفي الحسن روعة
هتف خاطري ناجاك لهفةعيونك يا مها
جمالك فاطنة السمحة حكاوي حبوبة في الحجى
وهتف جواي دخيلك ياقمرة جواي فنارك إحتفى
إنتي الوفاء وإنتي المحال المشتهى
كل البعاين في مداك .. أبداً ولا في الحج قط ما رآك
أتعبت عيني القسامة ومُرالسجال بين عين وعين
غض طرفو إستسمحك
كتبك سماح في الخافقين
ولازم رؤاك في كل حين
ولقاك ملاك مكتوب على خدُ الأسيل
المنعة والطبع الرزين، وجمال ورقة متلازمين
خلاصة سماح أنوارُ أصفى من اللجين
وأرتسمتك في الخيال مخبوزة من انوار ودين
محفل رزانة وكون من حلاة
وجبينك الضواي براري
شوف عينىّ أمامو الشمس ذواية منسدلة
وجاثية مبهورة تحت رجلينك القمرة
وأشتعل جواي بضي شمعة
كوثر فراديس الجمال والهيبة والروعة
وناجيتك بطيب خاطر وحنية
يا حبيبة قلبي يا أشجى من غنوات فرايحية
وافجعة الوله الشفيف لما تتفجر عواطف
ويبقى بحـرا ما لو قيف
قالت وين؟ وين وكيف
يا خفقة الزول الرهيف
لما يرحل وخفقو خطو
ملازمو خيالك ويعصى قطفو
ويتفصد النزق اللهيف
ويتفتق القلب الرهيف
حفقة ثانية :-
بريدك .. ويتمحق حرف الكلام
بين رجع الصدى والصدود
لا أستاذي يا غالي.. من جواي همت دمعة
وأتفصدت تاني مجامع الشجون لوعة
يا راح الروح والروح عليك في نزوح
وإدفقت غناوي البوح
وأستسلم الصادي العنيد وجموح
امام الرقة والروعة .. شقاف القلب إتقّصَف
وسال سواد العيون دمعة
جفف دميعاتك الحزاينية
وتوب وأرجع واخلص النية
يا منحور على وضم جريرة الريد الصرايحية
ما إنته بقيت بي الصد والحرمان موعود
فاض بيكا الشوق وللصبر معاكا حدود
قلت ليها الفيك دليك معدن وسامتك يا أم خدود
شوق الشوق العانق بعضو
وإتجذر في قفا الخاطر زهور وورود
إنداحت غيمة الوجا الحراق
وصبح في لجج الأسى موؤد
وكيف يا سمحة نطفى شروق قمر العشاء الداداي
ويتسهد وليد العين وتتمحق بحار الشوق
وفي مسامك بترمح رفة الزول الحنون وودود
ديمة راحل في خوابيكي وخيالك
رسم منقوش في عمق الخاطر
وين وكيف؟ الرهيف الغائب عن عيونا
ومتين يعود
قلت ليها يا الرضية
تسلم القمرة الحفية
القليب عندك هدية
ولسه فاكرك، كون من رحابة وطلة أسرانا وسخية
وأنا آهة حراقة منسية
وأنا رفة حِـن شاشاي سرمدية
وشجون بي الحسرة والأشواق جنية
وشتلة ريدة عطشانة
عند القيف أسيانة متكيه
وا غربة القلب النزق اللهيف
لما يرمح بحراً بشيل عوامو عندالقيف
وين وكيف؟ يا حورية
يا رقيقة مسالمة ومهولة رضية
وين وكيف؟ جوة في الأعماق مصفد
والقليب مكسور جريح
يا أهة مسقية بي رهق التباريح
ومشنقوة بين رفة القلب الحنون
ورقة الريد الصريح
وين وكيف بتهاتي بيا؟
ولا إية حاصل عليا
آه لو تمور وتدفق الدمعة العصية
عارفو قلبك حاسي بيا وحتى لو كان في الثريا
ياكي القليب الرؤوم وبيدفق إنسانية
ولو بي مرادي قلبي الرهيف أتكيوه وأنحروا
وما بهم إيه يحصل عليا
وكيف أنحروا وأنتي فيهو
وأعيش عمري اللي باقي في حزن وأسية
وإنتي ناري وإنتي نوري وأنتي عمري الباقي ليا
راقية وسمحة خفورة ونِقية
أقابلك كيف وأسالمك كيف
وين وكيف عيان وبيان ولا خفقة وطيف
وأمتع عواطفي بي الدهشة
وأبوس أيديكي يا الملكة
وأخفض طرفي في لمحة
وفي جواي اهتف وأقول سمحة
رهيبه ومهابة
حنينة هيابة ووقوره جذابه
وفي جوايا شاغلة كل مرفى
ولما تناغم وين وكيف
أهيم وأتلقاها بي لهفة
وأقول .. وين وكيف؟ شيشك قليبي رهيف
حنون وعفيف

خفقة ثالثة:-
وين وكيف؟ وا لهفتي وا لهفتك
والجرح العميق لابيندمل ولا بيترتق
القك حياك توبك عفافك وروضتك
وين وكيف؟ في مرافي الأسى
مستني الحظ يحالف لحظة رضاكي وأوبتك
رائعة وحفية ما أعذبك ما أروعك
خفقة ثالية:
خفيفة روح ومتل البانة منقمسة
تمس الروح تدوب فيها
تطول الآهة تشفيها
عقلك غلاك وميزانك
العفاف والرقة عنوانك
وعذرا يا ملاذ الروح غلبني أدوزن ألحانك
وأنا إنسانك ووهج أشجانك وأنا عنوانك
يا أحلى وأندى حروف في جوايا مخفية
وإنسانيتك والحنية
الجوه القلب شايلاني وفا وإخلاص وحنية
سودانية ميه المية
خفقة ليست بالأخيرة:
يا زينة بنات حواء ويا فخر للأوطان
أول مرة في التاريخ ألآقي ملاك ف شكل أنسان
وأتوه أتوه وأرجع أمجد الرحمان
كار أجدادنا ما مشريه من دكان
أشد أوتاري وأغنيلك
واقول مياسة فاقت البان
وأتدفق وأتدفق أحاكي بلابل الأغصان
يدُقّ قلبي ويفيض حني
وألاقيك في أحساسي نخلة باسقة الأغصان
ويزيد الحرف في الخفقان
وإلازمك في الخطي وأشيلك في الجبين عنوان
وأمجد فيك صدي الأوطان
وأقول سمحة وأناغم طرفك الوسنان
وأدق سدري وأقول للدنيا كل الدنيا
بحبك إنتي يا عظيمة الشان
حبيبت قلبي يا سودانية
ياعقل متفتح وقلب يفيض تحنان وإنساينة
الحبوب سبتمبر 2011 م



ود الحبوب غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 12:26 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.