نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 14-06-2015, 09:20 PM   #[1]
محمد عبد الرحمن
:: كــاتب نشــط::
 
افتراضي جوّاب

إذن ، كيف تمضي الظهيرةُ
دون أن يجلسَ رجل’’ ما
في مكانٍ ما
يتفقّدُ سمكةً في نهر غربته
وما تبقّى من سيئاتْ

أصدقائي الأعزاء كيف حالكم في هذه المدة الطويلة التي لم نراكم فيها، نُعلمكم أننا بخير و جميع الأهل كذلك و لا ينقصنا غير رؤياكم. ذهبتم في غربتكم و تركتمونا نحن هنا أيضا غرباء، الحال كما هو السيد الرئيس يصلح ركبتيه و يعود ليُفسد ما تبقى مما يدعى زعما وطن. شارع النيل لم يعد بذات الطعم و المذاق هو أيضا إستوحش هذي الأقدام التي تطأه لصبية وصبايا يافعين أو كما قال مظفر النواب:
"المشرب غص بجيل لا تعرفه.. بلد لا تعرفه

لـُغـَةُ.. ثرثرة.. وأمور لا تـَعرِفـُهــا"
أظننا نرتكب ذات حماقة اجيال سبقتنا إذ نستصغر و نتفه من ياتون بعدنا و نستعير منهم ذات اللازمة ( و الله نحنا كنا زمان . . . . )، (انتو بتعرفو شنو . . . .) و تدور ذات النوستالجيا المشروخة. مما بقى على حاله الجو القائظ ويشاركه إستعارا السوق و يزيد بقدر من اللهب.
الأشياء الكبيرة و الصغيرة منها التي كانت تسرب إلينا بعض الفرح لم تعد تفعل؛ وجبة الفول أو الأقاشي التي كنا نلتهمها و نحن نضحك لم تعد تفعل. هدف جميل في شباك الخصم نشاهده من على مدرج شاخور لم يعد يفعل، حتى فرحتنا البارحة بفوز برشلونة خفتت مع صافرة التركي معلنة نهاية المباراة. الحبيبات لم يعدن يحرضن على الضحك بالكاد صرن يرسمن شبح إبتسامة. أظن العمر سرقنا و نحن نصر على التشبث بأحبال سنين خلت.
أوان أوبتكم ستجدون البشر كما هم شيئا شيئا يُفرغون من إنسانيتهم و يُجردون، ستجدون ذات الوجوه الكالحة الكادحة منذ صياح الديكة حتى عودة الطير إلى أعشاشه، مع ذلك يزدادون كدحا و فقرا لتتكدس خزائن البعض القليل و تتكور كروشهم.
دعكم عنا، المهم كيف حالكم؟ أتمنى أن يصلكم مكتوبي و أنتم في أتم العافية و راحة البال.



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 15-06-2015, 06:29 AM   #[2]
عبد المنعم حضيري
:: كــاتب نشــط::
الصورة الرمزية عبد المنعم حضيري
 
افتراضي

الأخ محمد عبد الرحمن

لك التحايا الطيبات

نفيدكم أن مكتوبكم وصلنا وعلمنا بما فيه وعليه نشكركم لأنكم أوضحتم وأبنتم الصورة التي كانت تداعب خيالنا ونحن نلتحف أراضي المهاجر ونعاني قسوة هجيرها المعنوي المجفف للأرواح والأجساد .... تبينا الخيط الأبيض من الخيط الأسود بعد رسالتكم الكريمة .... وعرفنا ولكم الشكر أيضاً في ذلك بأنه قد وجب علينا إستعذاب جلادنا هرباً من مصير بدا واضحاً وجلياً في طيات سطوركم لنا ولا نملك إلا أن نقول .... حسبنا الله ونعم الوكيل ...مع رجاءنا أن تبلغ عنا التحايا والأشواق لشارع النيل ومراتع الصبا ولشئ كان إسمه وطن.

تحياتي .... وشكراً لساعي البريد.



التوقيع: إذا فتحت ابواب خير فأقبلوا

موائد أهل الله خير الموائد
عبد المنعم حضيري غير متصل   رد مع اقتباس
قديم 15-06-2015, 08:49 AM   #[3]
هيثم علي الشفيع
:: كــاتب نشــط::
الصورة الرمزية هيثم علي الشفيع
 
افتراضي

و


(جانا جوابك مفتوح شارع)

والمهم -عندي- أنه كان "جوّاب" بتشديد الواو
ولم يكن خطاباً
ولا E-mail

جوّاب عدييييييييييييييييييييييييييييييل

النوع ال...تتفرج في الطابع بتاعو مسااااااااافة
وتتلذذ ب(محاولة فتحه دون تمزيق الظرف)

و







ياخ محتاج أقراهو أكتر من مرة عشان أرجع ليك




ممكن؟؟؟؟؟؟؟؟؟؟؟؟؟؟؟؟؟؟؟



التوقيع: ضُلَعاً ممنوعة من الفرحة..
من حقّها تبكي بحرية.


(حمــــيّـد)
هيثم علي الشفيع غير متصل   رد مع اقتباس
قديم 15-06-2015, 06:58 PM   #[4]
عكــود
Administrator
الصورة الرمزية عكــود
 
افتراضي

السلام يا محمد وعطشانين حروفك،

عندما يكتب محمد، يكتب بصدق موجع ويناولك ما سقط من الثقوب دون أن ينفض ما علق بها من تراب.
حينها يكتب محمد مثل هذا:
اقتباس:
أوان أوبتكم ستجدون البشر كما هم شيئا شيئا يُفرغون من إنسانيتهم و يُجردون، ستجدون ذات الوجوه الكالحة الكادحة منذ صياح الديكة حتى عودة الطير إلى أعشاشه، مع ذلك يزدادون كدحا و فقرا لتتكدس خزائن البعض القليل و تتكور كروشهم.
وهل تبقَى من إنسانيتهم شيئاً، أم سالت من كأسها آخر قطرة وجفَفت الريح ما علق بها؟

عودتك للكتابة مفرحة بحق يا صديقي.



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 15-06-2015, 07:01 PM   #[5]
عكــود
Administrator
الصورة الرمزية عكــود
 
افتراضي

لم تبارح الذاكرة مداخلة لك في بوست ما، كتبت فيها عن محطة القطار في نيالا وعن البنات الفرحات المفرحات.

الكتابة بقلم "الكوبيا" لا تنمحي!



التعديل الأخير تم بواسطة عكــود ; 15-06-2015 الساعة 07:13 PM. سبب آخر: تعديل خطأ طباعي
التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 16-06-2015, 07:53 AM   #[6]
حافظ حسين
:: كــاتب نشــط::
الصورة الرمزية حافظ حسين
 
افتراضي

بفحم المحبة المحروق من جريد النخيل... استلفت صباع و كتبت علي حيطتك
حضرت و لم أجد نفسي
سلام يا صديقي في العالمين
لا شئ جديد يذكر و لا قديم به نفتخر
الحال كالعادة الي ما هو أسوأ
بالأمس زرت الأطلال .....
كلتوم شالت تؤامها و رحلت الي المجهول
عارف أن عازة ماتت و شبعت موت ابنائها التسعة لم يزالوا يحتالون علي الحياة
عبدالعزيز الكبير صار مراهقاً شرساً و مستقبله مضمون في عصابات النيقر
فاطنة خلت المدرسة و شغالة في البيوت و بتعرف كيف شغل البيوت مع الخلق السوداني القويم و خاصة ان فاطنة تبرعم صدرها و لها سواقين سمحات شديد؟
الصغار لم يزالوا صغار .... خديجة مواصلة في المدرسة الي أجل غير مسمي
يما تبيع العرقي المغشوش داك
عم عبدالعزيز يدخن سجاير الونر و يكح
و كلهم في انتظار رضا ساسة دولة جنوب السودان حتي يهاجروا الي جحيم آخر...
محمد ود عشة تاني جاء الأول لكن ما في فايدة .... وصل سنة رابعة و عشة تتكشم ساي انو ولدها دا حيبقي حاجة عظيمة ..... لم تزل هذه المرأة التعيسة تشكر صعاليك النخيل.... وديت لمحمد اللبس و الكراسات و لحد ما طلعت خليت أمه بتدعي لي دعوات تافه جدا
عينة دعوات انا عارفها لا بتحقق لا حاجة لكن خليها تدعي هو الدعاء بقروش؟
قاعد يا صديقي امشي دارفور بشكل ثابت و دارفور دي كلامها براها لكن ما عندي أي أخلاق اكتب عنها في القريب العاجل أو الآجل
ايوة كلمت مشيت الصومال و تصدق مقديشو ما أكعب شديد من الخرطوم فيها اسلاميين منافقين يغتصبون النساء و يحلمون بدخول الجنة ....
و برضو مشيت افريقيا الوسطي قبل فترة و تفاهتهم مناسبة و لحد ما تشبهنا
و مفروض في رمضان دا أمشي سوريا عشان اشوف عمايل داعش و اليانكي
لكن صدقني فترت ... فترت يا صاحبي
و الله ما قادر
و مستني الله في الكريبة لاني بحوذتي أمانة له
أيوة قبل يومين كان يوم مولدي يا ابن أمي و لو لقيت مزاج ح أجي اكتبه هنا
مش دا بوست حر و اي زول يكتب فيه ما يشاء؟

قبل ما أتخارج تذكر دوماً انك صديقي



التوقيع: أرجوحة الحياة لا تحمل راكبها إلى أبعد من طرفيها: المأساة والمسخرة

مريد البرغوثي
حافظ حسين غير متصل   رد مع اقتباس
قديم 16-06-2015, 08:06 AM   #[7]
حافظ حسين
:: كــاتب نشــط::
الصورة الرمزية حافظ حسين
 
افتراضي

في يوم مولدي أهدوني قوارير دماء و قنينة لدموعي
و اليوم ينقضي عام آخر و أنا في سراط الفجيعة مهرولاً نحو نهايتي المحتومة ..... أو كما قالت الصديقة و أبنة الأم حدو ....( الدنيا ما خلت لينا يوم نحتفل فيه .....) و حقيقي لم يتبق يوم للإحتفاء بشئ....
يوم مولدي دوماً ما أحتفيه بطريقة تخصني وحدي دون شريك بالمعني الحرفي لهذه الجملة... بالطبع لم أجهز تورتا و كما لم أشتري شموع و ليس لي من الأصدقاء من وصل بهم الرقي و المدنية للإحتفاء معي بمثل هكذا يوم تعيس ..... بالتأكيد لم أتعود على أي نوع من الإحتفاء و كل ما افعله الإختلاء بذاتي مع جاموسة هولندية لها خوار و بطريقة اقرب الى جلد الذات أعدد انكسارات كمين سنة (و الاعمار بيد الله و الدكتاتور الرحيم) ..... إستعداداً لليلة أمس منذ ظهر كبير رتبت و ديرت حالى ..... غازلت التلفون و حجزت المعلوم .... و في النوتة الزرقاء بدأت أكتب علي الصعيد المهني ماذا حققت؟ الصعيد الاجتماعي, الاقتصادي و الاهم الذاتي و الذاتي ذاتي براي.... كتبت العناوين الكبيرة و لكل عنوان تركت صفحتين علني اسودها ما بعد الثانية عشرة أمسية الثالث عشر المشئوم , و هذا الرقم ثلاثة عشر في رواية دينية موغلة في القدم أنه اليوم الذي يجب أن تقوم فيه الساعة و فلسفة الفيسلوف ابو ضفيرة الذي قطع دراستة في فرنسا عائداً الى السودان لان رأي في المنام أنه قاتل نميري, عليى العموم نميري وصل ارزل العمر و عمر الموت و بكل هيبة مات رغم دماء الالف الأبرياء على عنقه , فقط ابو ضفيرة قطع دراسته لهذا الحلم النبيل و لا شئ أكثر ..... أبو ضفيرة كل فلسفته قائمة على الرقم المشئوم ثلاثة عشر .... إني اتساءل لماذا لم يكن ابي غياباً, مصاب بالملاريا, له مشاجرة عظيمة مع أمي, أصابته بروستاتا انشاء الله مؤقتة, لماذا لم تمت جدتي في ذاك اليوم, لماذا لم تحدث أي كارثة تافهة يوم 3- سبتمبر؟
و لكن المقدر يقاوم حبوب منع الحمل و كل تفاهات الفرنجة و بكل يفاخر بي الأمم ..... تجهيزاتي لتلكم الليله كما أسلفت جاموسة, شريط أوجاع منقوش علي نوتة زرقاء , وهتفت قائلاً: الآن هيت لك يا ليلة الشؤم, هيت لك بالوحدة و رنين الكوؤس و طقطقة الحروف . و لكنه القدر و المقدر و الزارعو الله يقوم في رأسك و رأس ابو أهلك.... و عوضاً عن قارورة السم الهاري المقدر ... البنادق أهدتني قوارير دماء شباب في عمر الورد و حد علمي أنها جديرة بالإحتفاء و تليق بي أنا كأبن كلب بالميلاد....
لم أفعل شئ... حينما زفت أمال الزين عبر صفحتها في الزفت بوك نبأ إستشهاد ثلاثة من ابناء الجريف و الرابع قادم و لم تمر سوي لحظات حتي لحق بهم .... كل ما فعلته اتصلت علي صاحب الموبايل بار و أعتذرت و للأبد أعتزلت الحليب, بالضبة و المفتاح سمكرت علي باب حيطتي كما فعلت نصيرة ذات محل ,,,,, القيت النوتة الزرقاء أرضاً و شقي الذي عثر عليها ففيها مؤونة سنة وجع كاملة.....
اليوم عيد ميلادي و المجد و الخلود لشهدائنا الذين لم تزل دمائهم حارة ....
أوعدك يا حاكمي المبجل في العام القادم سوف احتفي بعيد ميلادي إذا لم تقتل فرد برئي ....
المجد و الخلود لكم و لنا الخيبة و تحميل اللامسئول المسئولية كاملة عن دمائكم....
و عندما يسألني ربي ذات قبر كتيم فردي ( يا الله أني لم أعش أي عمر و إنما من بطن أمي خرجت عدل على المقابر)
حافظ – خرطوم الموت سمبلة
13-6-2015



التوقيع: أرجوحة الحياة لا تحمل راكبها إلى أبعد من طرفيها: المأساة والمسخرة

مريد البرغوثي
حافظ حسين غير متصل   رد مع اقتباس
قديم 16-06-2015, 08:06 AM   #[8]
محمد عبد الرحمن
:: كــاتب نشــط::
 
افتراضي

اقتباس:
المشاركة الأصلية كتبت بواسطة عبد المنعم حضيري مشاهدة المشاركة
الأخ محمد عبد الرحمن

لك التحايا الطيبات

نفيدكم أن مكتوبكم وصلنا وعلمنا بما فيه وعليه نشكركم لأنكم أوضحتم وأبنتم الصورة التي كانت تداعب خيالنا ونحن نلتحف أراضي المهاجر ونعاني قسوة هجيرها المعنوي المجفف للأرواح والأجساد .... تبينا الخيط الأبيض من الخيط الأسود بعد رسالتكم الكريمة .... وعرفنا ولكم الشكر أيضاً في ذلك بأنه قد وجب علينا إستعذاب جلادنا هرباً من مصير بدا واضحاً وجلياً في طيات سطوركم لنا ولا نملك إلا أن نقول .... حسبنا الله ونعم الوكيل ...مع رجاءنا أن تبلغ عنا التحايا والأشواق لشارع النيل ومراتع الصبا ولشئ كان إسمه وطن.

تحياتي .... وشكراً لساعي البريد.

أستاذ حضيري
بعد السلام الأمر يبدو سيان غربة البعد و غربة القرب و أن كان لنا بعض عزاء أنا مازلنا نعفر اقدامنا بتراب هذي البلاد و نتنسم ريحها
مراتع الصبا و شارع النيل يردون عليك السلام

يجدك كما تتمنى و أكثر



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 16-06-2015, 08:18 AM   #[9]
محمد عبد الرحمن
:: كــاتب نشــط::
 
افتراضي

اقتباس:
المشاركة الأصلية كتبت بواسطة هيثم علي الشفيع مشاهدة المشاركة



ياخ محتاج أقراهو أكتر من مرة عشان أرجع ليك




ممكن؟؟؟؟؟؟؟؟؟؟؟؟؟؟؟؟؟؟؟

هيثم يا صديق
لي ما ممكن
راجي رجعتك بس ما تكون راجع بي لوري انتا عارف براك وحل القيزان و الكسير في القهاوي و الأدهى يلاقيك خور سايل.

كيف حالك في هذه المدة الطويلة التي لم تنطرب في أذناي بضحكتك المجلجلة

في إنتظارك



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 16-06-2015, 08:20 AM   #[10]
ناصر يوسف
:: كــاتب نشــط::
الصورة الرمزية ناصر يوسف
 
افتراضي

بن عمي الجميل

محمد ود عمي عبد الرحمن
السلام عليكم ورحمة الله تعالي وبركاته

لقد وصلني جوابك علي بريد البرق
ووجدني ضالاً ،، أي والله ،،، وجدني ضالاً عن الجادة القويمة
ضالاً عن نفسي وعن الطريق وحتي عن السراط المستقيم

علا تراهو شهر الخير والبركة جاي علينا بعد يوم ولا يومين كدي ماني خابرو
أهو منتظرين فقهاء السجم والرماد ديل اليورونا متين نخم الرماد ياخ

أهاااااااااا

وأنا يعلم الله ما ناقصني شئ سوي عدم رؤياكم الغالية

إنتَ إتعالجتَ من السُكَّري يا ود عمي ؟؟؟ لأني شايفك خليت تدخين البنسون اللايت

عموماً يا ود عمي ترانا بقينا ضيوف فوق بلدنا دي والرئيس بقدرة قادر جاء راجع من جنوب إفريقيا مادي لينا لسانو وبقول لينا

وي وييييييييييي جيتكم راجع أها إتحزموا

دحين نتحزم أكتر من كدي كيفن ياخ ..

الوجع رااااااااااقد يا ود عمي ،،، والغول ،،، غول السوق كَشَّر لينا سنيناتو المسوسات وبقي يبيع لينا البلح المسوس والبليلة المسوسة بسعر عالي شديد ياخ وعلي عيييييييييييييينك يا تاجر

جنبنا هني في الريف الشمالي يا ود عمي وفي دوووووووولة المشروع الإسلامي ،،،

في ناس سيدنا النبي عليه أفضل الصلاة والسلام ،،،
يعلم الله ما بعرفو إسمو
والصلاة دي ماهم خابرنها بصلوها كيف
وإن علي القرآن كتاب الله ده ماهم حافظنو تب

ياخي تقول ليهم أقرأوا لي سورة الإخلاص

يقولوا ليك مانا خابرنها

يا أهلنا سورة قُل هو الله أحد،،،
وتبداها ليهم ,,,

يتموها ليك كدي والله

قل هو الله احمد الذي يلد ويولد ويكن له كَفَّا لَحَد

ووتقوم الفيديوهات دي تتوزع علي الواتساب

وتقوم قيامة الناس
الإذاعات
الجرايد
الفضائيات

وعييييييييييك

يقوموا يغلطوا الزول الصور الفيديوهات دي وفكاها علي الواتساب

ويجي الفقيييييييييييه عبد الحي يوسف يقول


هذا نفاق وهذا تزوير ،،، وهذه الفيديوهات دي مفبركه

وما فضل ليه شئ غير يقول ده فعل بني إسرائيل

والله في دي دز عبد الحي يوسف ده كضاب جِنِس كِضِب يا ود عمي ،،، أسكت خليه ساي ياخ

الناس الما قاعدين لا يصلوا ولا بعرفوا النبي ولا حافظين القرآن ،،، ديل

سودانيين مننا وفينا ،، وحَرَّم قاعدييييييييييين وفي ولاية الخرطوم ولاية السجم والرماد دي

تعرف يا بن عمي ،،، الفيديوهات دي سوت للمنطقة الفيها الناس دي شنو ؟؟؟

أوووووووول هام جابتلهم 800 مليون جنيه بالقديم من زول واااااااحد

ياخي والله قبال أربعة أيام جات مَرَه سعودية بعيالها ،،، شافت الفيديوهات دي وحرقتها فوق حنانها

جات وزعت عليهم كيس الصايم

ده غير التبرعات الجات كابه شووووووووووو ،،، شئ آبار وشئ أسابيع دعوية

ياخي والله جوابك ده جاني فوق وكِت كنت محتاجلك فوقو والله


أها ،،، سلم لي علي المعاك نفر نفر
وسلم لي علي روحك دي ياخ ،،، أبقي عليها عشرة ولا أقول ليك ،،، أبقي عليها 20 ولا 50 والجوكر باااااااااااااايظ ياخ

فتك بعافية يا ود عمي

سلام



التوقيع:
ما بال أمتنا العبوس
قد ضل راعيها الجَلَوس .. الجُلوس
زي الأم ما ظلت تعوس
يدها تفتش عن ملاليم الفلوس
والمال يمشيها الهويني
بين جلباب المجوس من التيوس النجوس
ناصر يوسف غير متصل   رد مع اقتباس
قديم 16-06-2015, 02:56 PM   #[11]
النور يوسف محمد
:: كــاتب نشــط::
الصورة الرمزية النور يوسف محمد
 
افتراضي

اقتباس:
المشاركة الأصلية كتبت بواسطة محمد عبد الرحمن مشاهدة المشاركة
[CENTER]

الأشياء الكبيرة و الصغيرة منها التي كانت تسرب إلينا بعض الفرح لم تعد تفعل ؛
وجبة الفول أو الأقاشي التي كنا نلتهمها و نحن نضحك لم تعد تفعل .
هدف جميل في شباك الخصم نشاهده من على مدرج شاخور لم يعد يفعل ،
حتى فرحتنا البارحة بفوز برشلونة خفتت مع صافرة التركي معلنة نهاية المباراة. الحبيبات لم يعدن يحرضن على الضحك بالكاد صرن يرسمن شبح إبتسامة .

أظن العمر سرقنا و نحن نصر على التشبث بأحبال سنين خلت.
بسم الله الرحمن الرحيم

هكذا كتاباتك ،
دوماً تفضح تماسكنا الهش ،

لم يسرقنا العمر يا صاحب ، ولم تهزمنا الليالى والسنون ،
ومازال النيل يعانق الضفاف ويكتب على أوراقها روايته الأبدية ،

هم فعلو ذلك ،
أضافوا اللون القاتم الى لوحة الحياة ،
سرقوا من الأطفال تراتيل النشيد ،
ومازالو ( يسرقون الكحل من عين القصيدة ) ،


شكراً ،
وصل خطابك ،
نعم ، وجدنا فى راحة ، لكنها ليست بذى بال !!!!!!!!



النور يوسف محمد غير متصل   رد مع اقتباس
قديم 17-06-2015, 07:16 AM   #[12]
محمد عبد الرحمن
:: كــاتب نشــط::
 
افتراضي

يا عمدة سعيد بي شوفتك و الله

اقتباس:
وهل تبقَى من إنسانيتهم شيئاً، أم سالت من كأسها آخر قطرة وجفَفت الريح ما علق بها؟
سؤال صعب جدا يا عمدة، لكن مهما بلغ الضنك و شظف العيش يظل هذا المطحون محتفظا بقدر أوفر من إنسانيته لا تتوافر للجلاد، و لرُب عريشة مهلهلة تضج حياة و ضحك صافي اكثر من قصر مشيد تسكنه الوحشة و القلق

أما ما يخص الكتابة بالكوبيا فالبعض يحرضك على الكتابة و يغويك عليها، أظنك اول المحرضين

شكرا يا عكود



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 17-06-2015, 07:55 AM   #[13]
محمد عبد الرحمن
:: كــاتب نشــط::
 
افتراضي

اقتباس:
مش دا بوست حر و اي زول يكتب فيه ما يشاء؟
حافظ يا صديق
اكتب كيفما تشاء، أينما تشاء، وقتما تشاء
سطورك موجعة فيما يخص شعب جمهورية النخيل الديموقراطية سابقا، مياه كثيرة جرت تحت الجسر، أعجبني جدا أن محمد ود عائشة مازال متشبثا و مثابرا و إن كنت أشاركك عدم التفاؤل وأخاف على أمه من الفاجعة لكن دعهم يأملون و يحلمون كما الدعوات ليست بقروش، الأحلام كذلك.

بجيك راجع



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 17-06-2015, 09:53 AM   #[14]
محمد عبد الرحمن
:: كــاتب نشــط::
 
افتراضي

اقتباس:
المشاركة الأصلية كتبت بواسطة ناصر يوسف مشاهدة المشاركة


تعرف يا بن عمي ،،، الفيديوهات دي سوت للمنطقة الفيها الناس دي شنو ؟؟؟

أوووووووول هام جابتلهم 800 مليون جنيه بالقديم من زول واااااااحد

ياخي والله قبال أربعة أيام جات مَرَه سعودية بعيالها ،،، شافت الفيديوهات دي وحرقتها فوق حنانها

جات وزعت عليهم كيس الصايم

ده غير التبرعات الجات كابه شووووووووووو ،،، شئ آبار وشئ أسابيع دعوية

ياخي والله جوابك ده جاني فوق وكِت كنت محتاجلك فوقو والله


أها ،،، سلم لي علي المعاك نفر نفر
وسلم لي علي روحك دي ياخ ،،، أبقي عليها عشرة ولا أقول ليك ،،، أبقي عليها 20 ولا 50 والجوكر باااااااااااااايظ ياخ

فتك بعافية يا ود عمي

سلام

ناصر الجميل الماهو ضال
السعودييين ديل كلمهم كلنا ما حافظين الحمدو اليجو يرقعونا
اها دي دولة المشروع الحضاري نخم و نصر ساي بس
شابككنا تأصيل المعرفة و تأصيل الدين و تأصيل الفن وتأصيل الرياضة تأصيل تأصيل تأصيل، أها كلنا بقينا أصليين (ما شايف الشباب بقولو وين يا أصلي)
التأصل ده شكلو اصلا هو منهجة للجهل
غايتو
كيفك وانت في أصقاع شرق النيل و كيف رحيق و أخواتها و أمها
سلام



التعديل الأخير تم بواسطة محمد عبد الرحمن ; 17-06-2015 الساعة 09:55 AM. سبب آخر: اضافة شحدة السعوديين
التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
قديم 17-06-2015, 10:07 AM   #[15]
محمد عبد الرحمن
:: كــاتب نشــط::
 
افتراضي

اقتباس:
المشاركة الأصلية كتبت بواسطة النور يوسف محمد مشاهدة المشاركة
بسم الله الرحمن الرحيم


لم يسرقنا العمر يا صاحب ، ولم تهزمنا الليالى والسنون ،
ومازال النيل يعانق الضفاف ويكتب على أوراقها روايته الأبدية ،

هم فعلو ذلك ،
أضافوا اللون القاتم الى لوحة الحياة ،
سرقوا من الأطفال تراتيل النشيد ،
ومازالو ( يسرقون الكحل من عين القصيدة ) ،


شكراً ،
وصل خطابك ،
نعم ، وجدنا فى راحة ، لكنها ليست بذى بال !!!!!!!!

نورنا اليوسف
سلامٌ عليك
جميل جدا حين يوجد من يذكرنا أن نرفع رؤوسنا فثمة فسحة أمل، دوما هناك أمل
طِب مقاما.



التوقيع:
لماذا ايها الوطن الكسيح سيجتني بالريح
لماذا ايها الرب الرحيم وحدي ولي وطن جحيم

(الصادق الرضي)
محمد عبد الرحمن غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 09:14 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.