نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 26-04-2009, 08:26 AM   #[1]
آيات
:: كــاتب نشــط::
 
افتراضي أغاني البنات ...فوتو كوبي الواقع ...(توجد صور واضحة )


[align=center]أغاني البنات ...فوتو كوبي الواقع ...(توجد صور واضحة )[/align]

لمة بنات في برندة .. صوت يأتي من بعيد لي واحده بتسخن في الدلوكة .. فتيات يتاهمسن .. وواحدة منـزوية تحاكي أحلامها ..ومجموعة يتغامزن .. والعروس بي هناك مع أمها خالاتها يتشارون .. في بعض.... التفاصيل ..وإثنيتين في إنتظارهم لبعض حوائج السوق والترزي .. وفجأة .. أتم .تررم. أتم .. دو .. دو . ادق .. أدق .. دق .. دق . صوت الدلوكة يعلو .. وتقفز العروس مهرولة ... لتبدأ في الرقيص ... الملكة جات صفقولا ... ثوبها انحدر عن رأسها ..وتعلو الهتافات أملصيه التوب .. أملصيه التوب ... وأملصي توبك وأجدعي ... ووب ووب شالو التوب
ووب .. ووب شالو التوب ..لتكشف عن فستان يرسم لوحة زاهية قوامها جسدها المتناسق المصقول.. ...صدرها بارز للأمام .. ونهداها النافران . ترقص كما الأوزة . ذراعاها إلى جانبيها تحركهما في تناسق مع رأسها وصدرها ورجليها.. حين تضرب برجلها يهتز ويترجرج منقسما إلى شقين... شعر طويل متماوج ينثر العطر على أوجه الفتيات ..تنثني حتى يلامس شعرها الأرض ..يزداد بروز صدرها ..تصبح نصف دائرة .. لا بل شبه جزيرة ...، ثم تتسع الدائرة ... وتتماوج الزغاريد ... ويشتد التصفيق .. والجبة والجبة اجب اجب . أرب رب .. اها .. اها اهاهاها ، ويخرج الغناء سلساً ملحناً ...وهي تزهو وتختال ..مهرة جامحةً .... تصطادها العيون فتنفلت منهم كالسمكة
تعلو الزغاريد .. تهتز البرندة ...آييييييييييييييييييييو ي يويويويوي .. تصرخ . أخرى اجو اجو اجو ..الرالرالر ررررررررررروي ... أووو ااوووووووووو .. الولولولولول وي ... إرتجت النوافذ ..
حرف الااي أنا اموت وراه عشان زيي وانا مستواه .. واغيظ ناس ديل وأعيش معاه .لتحضن صدرها بيديها ..ومعاها حبة حنديكة وهي تضم أصابعها على كف راحتها وهي تلف وتدور في الوسط... . بنيه لابس توبو صلاة النبي فوقو .. بنية غاتي وشيهو ... بشيش بعاين ليه... شوف عروسنا حلاتا زي قطعة الشوكلاته والجمال الفيها دي ورثة من خلاتها والحلاوة الفيها دي ورثة من عماتها
تنتهي التعليمة ب ..ياعروسنا الحلوة .لورحلتي أوعي لاتنسينا . واوعي تلقي عريسك وكمان تنسينا .. ياعروسنا الحلوة..واودكعم افارقكم لا .. لا مابقدر اودع .. أودع اودع كيف أفارق افارق كيف


وتستشرى حمى الرقيص وسط الفتيات .. تتنوع الأغــاني ..وتبدأ( الخستكات) والزيادات وأغاني المزاج .. وكل واحدة بي وصفتها القاصداها لتنتشي عند ذكرها خفية .. وكمان معاها حبة مكاواه .. ومشاغلة .. وكل واحدة بتكمل من راسها ...

هنا لحظة ميلاد أغاني البنات التي تصور واقع كلٍ على حداه .. لتوثق للأحداث السياسية وحراك المجتمعات .. وتدخل كل منزل بلاإستذان .. وتخرج مافي خبايا النفوس وخواصر الأزقة ...وميادين الكورة .. والمهن وتحكي بالموضات ..(وتصفي الحسابات ..هاهاها )لتحرك القلوب .. خفيةً .. مهما ..كانت المناصب .. والأعمار وعلامات الوقار ...
القاعد في صالونو بيشرب في ليمونوا انا حبيت اشاغلو شاغلني بعيونو
القاعد في دكانه بياكل في لبانو انا حبيت اشاغلو شاغلني بلسانو
واقف في النجيلة..انا حبيت اشاغلو عمل الكورة حيلة
****
الشايل المجلة يقراها ويتسلى والقسمة عند الله
الشايل الجريدة بقراها ويعيدها والقسمة عند سيدها
يايمه يايابا شقاوة العزابا الجنبنا
***
عيان ومرضان شالوني بالنسيان الريدة باسلام
عيني انا عيني اموت انا الزول برية
عيانة راقدة سرير جاب لي قزازة عصير من حبو لي كتير نسى ساعتو والمنديل
عيانة شيلوني وفي سريرو ختوني
وبالكاكي غتوني



آيات غير متصل   رد مع اقتباس
قديم 26-04-2009, 08:36 AM   #[2]
Dr. Mohammed Hassan
:: كــاتب نشــط::
 
افتراضي

دخلت

وهيصت

وغنيت

وسرحت

وضحكت

ومرقت

وليك

شكرت



Dr. Mohammed Hassan غير متصل   رد مع اقتباس
قديم 26-04-2009, 08:38 AM   #[3]
آيات
:: كــاتب نشــط::
 
افتراضي


بله يابلة دق الرقم جلى
بله ود عشة السايق الركشة دق الرقم طشه
بله ود عايد دق الرقم زايد
بله الجموعي بكاني بي دموعي
بل ده الهندي دقه الرقم عندي
بله ده الحنان الساكن أمدرمان
بلة ودعشه دق الرقم خشه

***

طويل كده مجنني يايمة كان شوفتي
ده طولو زي البانة عيونو معذابنا
ده السكن الحي معانا والبقرأ علوم تقانة

***

القطر الشالك إنت
يتكسر حته حته
والقطر الشال معاوية يتكسر زاوية زاوية

***
قالوا القليب حرق شالوه ناس الغرب يالله
غرابة ضميرهم غرابة سوقهم ماشي تجار دهب ومواشي
اهلك شعروا بي ورفعوا علي قضية قضية ماهمية كفاية ريدتك لي يالله
دايرة اكتب رسالة للسفير التشادي وقسيم ريدي فلاتي
ياالله القليب حرق وشالوه ناس الغرب

***
يمة الزول براي بجيب الزول
مطره من الله تكسر الحلة
ونجكس بي بره
الفريق الوراني حرمان علي تاني والجكس شراني
جن تلاته بنات بي شارع الثورات قالوا لي حبيبك مات قلبي إشتغل مكنات
ودعمتي السجمان يطقشو لي نيسان يتلمن النسوان والجكس في الديوان

***
ابوي دقاني والمرقة خليتها بقابلو بالحيطة
ده كلو من ماما الكلمت بابا خلتني اتشابا لي بيت العزابة
ده كل من امي الشاورت عمي قاليها ماتدي خليها لي ولدي

***
تعال بالعندك تعال بيت ابوي بسندك
سيد الكارو تعال تعال بالشايلو تعال

***
صابون ريكو بموت عشانو الولد الإسمو زيكو
في المحطة بموت عشانو الولد الإسمو شطة
شطة بريدو نقش حرفي في إيدو
صابون ساده الناس مالم حساده
***
نزار بوبار بريدو السايق الدفار بريدو
نزار انا ماسألتو براهو وقف عجلتو بي نظرة واحدة بهدلتو
نزار جاب لي دبلة والدبلة ماقدري صنقر قعد جمبي ده الكسر سلوك قلبي

***
حسن حسون الريده ماجبرية احيَّ سبب لي ازى سبب لي ازيه انا حبك ده
الركبوا العربية الولد ده جا ماري بالعصرية الولد ده لو ماكلام شعبية مقتنعة بالشخصية
اللبسوه البوقي الولد ده والركبوه سزوكي قالي كمان بلسانه الولد ده بجي وبشاور ابوكي
***
ياخوي يامحمد ماعاوزة منك شي غير شنطتي وعفشي والباقي تنحشي بي
ياأمي يالوالدة ماتبقي لي عارضة زعلتي ود الناس بي كلامك الحار ده
ياأبوي يالوالد ماتبقي لي عارض احرجته ود الناس بي كلامك البارد



آيات غير متصل   رد مع اقتباس
قديم 26-04-2009, 08:42 AM   #[4]
آيات
:: كــاتب نشــط::
 
افتراضي

المنقة والقشطة ومن الليمون حته
جننتني إنت
بي زرايرك الستة
الجسيم حرير شقيان كتير شقيناتو انا
اعمل ايه ياعم مالسعادة قسم
***
صعب صعب ياعلي الحب صعب ياعلي
ماشي يتقدل ياعلي هيثم طمبل ياعلي
انا ماأبيت ياعلي خالد جولييت ياعلي
***
النيمة متواسية قصاد بيتهم الناصية صدقني ماناسية ظروف بيتنا جد قاسية
برانا بنعشق مستوانا
زرعت ليه الريدة النامية في حيضانا امدرمان سكونو
كوبر الزنزانة البحارب هوانا بنرشو بالجبخانة
***
حبيبي الامنقة والتفاح حبيبي عسل والناس مسخ
انا بهاجر ليك عشان ارتاح
حبيبي تعال تعال نتلم مادام الريد إختلط بالدم
انا ذنبي أيه شيلوني الهم
***
بلال علي الخلقو يقسمو علي
امو تقول ياساتر وابوه يقول ياساتر الولد الإسمو ياسر القام بي طريق الفاشر
امو تقول يالله اختو تقول يالله الولد إسمو عبد الله القام بي طريقة الحلة
***
الو .. معاك كلم إنت زول جافي مابتسلم الو كلم
بحاول فيك تمت الساعة إنت زول قاسي اصلو مابترحم



آيات غير متصل   رد مع اقتباس
قديم 26-04-2009, 09:01 AM   #[5]
آيات
:: كــاتب نشــط::
 
افتراضي

جياشه والجيش نقلو فتاشه
دي الغيرة والجيش نقلوا الذخيرة
كتيبة تلاتين ودوها والكرمك حرروها
عمر البشير جاني من نومي صحاني قالي دي الثورة مافيش إنقلاب تاني
***
ليالي ياليالي ليالي عودي تاني
ايام ماكنت جاهل مابعرف الهموم ياريتني لوعرفت السعادة مابتدوم
جا ني النسيم حمل لي جاب لي خبر اليم
ذكرني بي سعودي وايامنا الفي الدويم
***


ارجوك ياده تعفيني انا الفيني مكفيني
الحب قسمة وإرادة والكل داير السعادة سعادتي انا مع البريدو
بقت شقى ماسعادة
***

الليلة وين انا الفي العصر مرورو
ده حبيبي البدورو اخوض النار وازورو
ركبني بابورو وفسحني في بحورو
إنت بحرالسماحة ويجوا العشاق يزورو
***
قابلتو في السكة وكبيت معاه النقه من سته لي سته لي جوعته لا عطشته
***
خدره ناعمة صوت حنين البريدو من اهله بين
خدرة ناعمة وصوت منعنع والبريدو امو تقنع





آيات غير متصل   رد مع اقتباس
قديم 26-04-2009, 09:13 AM   #[6]
آيات
:: كــاتب نشــط::
 
افتراضي

اقتباس:
المشاركة الأصلية كتبت بواسطة Dr. Mohammed Hassan مشاهدة المشاركة
دخلت

وهيصت

وغنيت

وسرحت

وضحكت

ومرقت

وليك

شكرت

مرحب د. محمد


شايفاك ..
لكن ماقعدته كتير .. كنت عاوزاك تقيل معانا
المره الجايه تعال بي وساع
.. بس ياريت لو تغني لينا بي صوت عالي



آيات غير متصل   رد مع اقتباس
قديم 26-04-2009, 09:16 AM   #[7]
أبومناهل
:: كــاتب نشــط::
 
افتراضي

اقتباس:
المشاركة الأصلية كتبت بواسطة آيات مشاهدة المشاركة

[align=center]أغاني البنات ...فوتو كوبي الواقع ...(توجد صور واضحة )[/align]

لتكشف عن فستان يرسم لوحة زاهية قوامها جسدها المتناسق المصقول.. ...صدرها بارز للأمام .. ونهداها النافران . ترقص كما الأوزة . ذراعاها إلى جانبيها تحركهما في تناسق مع رأسها وصدرها ورجليها.. حين تضرب برجلها يهتز ويترجرج منقسما إلى شقين... شعر طويل متماوج ينثر العطر على أوجه الفتيات ..تنثني حتى يلامس شعرها الأرض ..يزداد بروز صدرها ..تصبح نصف دائرة .. لا بل شبه جزيرة ...، ثم تتسع الدائرة ... وتتماوج الزغاريد ... ويشتد التصفيق .. والجبة والجبة اجب اجب . أرب رب .. اها .. اها اهاهاها ، ويخرج الغناء سلساً ملحناً ...وهي تزهو وتختال ..مهرة جامحةً .... تصطادها العيون فتنفلت منهم كالسمكة
دي حتى لو صوروها ما ح تجي بالروعة دي

ده كسير تلج ليك وللعروسة . . تصوير بديع

ده من ناحية . . ومن ناحية تانية الشغل ده حضوره بيكون محصور على النساء

فقط . . كونك تجيببهو هنا وبالطريقة دي يعتبر ( حندكة ) ليس إلا



التوقيع: نِحْنَا المَا بْسَمُّـونَا العِرَيبْ وَين جِيتُو
نِحْنَـا البِنَرْكَبْ الدُّرْشِي البِجَابِدْ خَيتُو
نِحْنَا عَشِيرْنَا مَا بنُخُونُو ونَخَرِبْ بَيتُو
نِحْنَـا عَدُونَا بِنَعَصْرُو وَنَطَلِّـعْ زَيْتُو
أبومناهل غير متصل   رد مع اقتباس
قديم 26-04-2009, 09:34 AM   #[8]
wadosman
:: كــاتب نشــط::
 
افتراضي

[align=center]جرّينا بمبرنا و اتحكرنا
و هاك يا سمع..

بس نقّيط ما فينا...الجيب فاضى وكدا..


شغل سمح يا اياات...[/align]



wadosman غير متصل   رد مع اقتباس
قديم 26-04-2009, 09:44 AM   #[9]
آيات
:: كــاتب نشــط::
 
افتراضي

اقتباس:
المشاركة الأصلية كتبت بواسطة أبومناهل مشاهدة المشاركة
دي حتى لو صوروها ما ح تجي بالروعة دي

ده كسير تلج ليك وللعروسة . . تصوير بديع

ده من ناحية . . ومن ناحية تانية الشغل ده حضوره بيكون محصور على النساء

فقط . . كونك تجيببهو هنا وبالطريقة دي يعتبر ( حندكة ) ليس إلا
هاهاهاها

والله غايتو .. ..ناس الحسنه مابتنفع فيها ...ماكتر خيري الوريتكم بحصل شنو بي جوه ..
مش أحسن المتاوقة ورا البيبان

كتر خيرك أبومناهل
تعال راجع التعليمه كل يوم



آيات غير متصل   رد مع اقتباس
قديم 26-04-2009, 09:52 AM   #[10]
معتصم الطاهر
:: كــاتب نشــط::
الصورة الرمزية معتصم الطاهر
 
افتراضي

طبعا كلمات غناك دا يطرشنا ..

بنجيب ليك غنا عروستنا .

وبصراحة .. الكلام دا ما بععكس الواقع ..
دا كلام الغنايات ابتاعات التعليمة وديل أبدا ما الواقع بتاعنا
دا واقع آخر دون ...



التوقيع:
أنــــا صف الحبايب فيك ..
و كـــــــــــل العاشقين خلفي
معتصم الطاهر غير متصل   رد مع اقتباس
قديم 26-04-2009, 09:56 AM   #[11]
آيات
:: كــاتب نشــط::
 
افتراضي

اقتباس:
المشاركة الأصلية كتبت بواسطة wadosman مشاهدة المشاركة
[align=center]جرّينا بمبرنا و اتحكرنا
و هاك يا سمع..

بس نقّيط ما فينا...الجيب فاضى وكدا..


شغل سمح يا اياات...[/align]
كتر خيرك ود عثمان
كفانا الجيه ... والهشة والبشه
تعال بالعندك تعال
(اطربني بالصوت الجهور.. ياشادي من كل البحور
)



التعديل الأخير تم بواسطة آيات ; 26-04-2009 الساعة 12:17 PM.
آيات غير متصل   رد مع اقتباس
قديم 26-04-2009, 10:16 AM   #[12]
آيات
:: كــاتب نشــط::
 
افتراضي

اقتباس:
المشاركة الأصلية كتبت بواسطة معتصم الطاهر مشاهدة المشاركة
طبعا كلمات غناك دا يطرشنا ..

بنجيب ليك غنا عروستنا .

وبصراحة .. الكلام دا ما بععكس الواقع ..
دا كلام الغنايات ابتاعات التعليمة وديل أبدا ما الواقع بتاعنا
دا واقع آخر دون ...
أهلاً معتصم ومرحب بيك
ههاه .. طبعاً ده ماغناي براي .. انا وصاحباتي المعايا .. وإذا طرشت إنت نسبة لعوامل كالمكان والزماااان
فلكل منطقه وزمان غناه ..(كدي ورينا غنا عروساتكم)
اما الغناء الوارد هنا ده ..(توجد نماذج بسيطة لاتعد للتعليمة ).. والباقي غنا بنااات
يعني مافي واحدة رقصوها بي عمر البشير جاني .. ولا عروس رقصوها .بي العصر مرورو .ولا ب (أرجوك ياده تعفيني ..لأنها دي بالذات اغنية بنات وأولاد(ممكن تعود للنماذج مره أخرى).فالغناء هنا متنوع ..وأكيد بعض من الأغاني دي أنا (ماحضرته زمنها ولاهي حضرتني)
مرحب بيك مرة أخرى



آيات غير متصل   رد مع اقتباس
قديم 26-04-2009, 10:23 AM   #[13]
آيات
:: كــاتب نشــط::
 
افتراضي

يايمة زوري لي شيخك ود كوكو البلح البلوكو
والجكس البكوسو
يايمة زوري لي شيخك الخمجان
يجبيو لي طيران من جدة للسودان
يايمة زوري لي زيارة السبت الاخدر الشرط الوقف النبض
يايمة زوري لي زيارة الأحد يجينا ود راحات يوقف العربات
يايمة زوري لي زيارة الإثنين يجينا نور العين ويفرحوا القلبين
يايمة زوري لي زيارة التلات الاخدر اب وجنات الخلى قلبي شتات
يايمة زوري لي زيارة الربوع الاخدر المربوع الضوه ليلي شموع

يايمة زوري لي زيارة الخميس الاخدر الدسيس الخلى قلبي هريس الحالق كارلويس الجايي من باريس
يايمة زوري لي زيارة الجمعة الاخدر اب لمعة ولامة مجتمعة
انحنا مقتنعين لو كان في اوضة طين
يااخوانا غنيت وبكيت معاي الطير.. يايمه انا جنيت وبكيت معاي الطير .. انحنا مجتمعين لوكان في أوضة طين



آيات غير متصل   رد مع اقتباس
قديم 26-04-2009, 01:12 PM   #[14]
عبد الجليل سليمان
:: كــاتب نشــط::
الصورة الرمزية عبد الجليل سليمان
 
افتراضي

اقتباس:
المشاركة الأصلية كتبت بواسطة معتصم الطاهر مشاهدة المشاركة
طبعا كلمات غناك دا يطرشنا ..

بنجيب ليك غنا عروستنا .

وبصراحة .. الكلام دا ما بععكس الواقع ..
دا كلام الغنايات ابتاعات التعليمة وديل أبدا ما الواقع بتاعنا
دا واقع آخر دون ...
عارف يا باش ....
ليس هذه النماذج خيالا .. هذا هو جزء من الواقع الذي يمكن التغني به.. حكيه.. وإيراد تفاصيله .. وماذا كنت ستفعل ( يا باش) فيما لو أوردن البنات كل الواقع ... هذه أغنياتهن .. من واقعهن المزري .. ويمكنني في قدم المرات إيراد وجهات نظر علماء إجتماع بهذا الخصوص وعمل مقاربات دقيقو وعلمية، فقط إردت التويه .. على أن هذا هو الواقع .. ولا ينبغي التحايل عليه أو الإيهام بأن دا كلام ساكت.
ولك العذر يا باش حتى تقبل الواقع كما هو ماثل للرشق والعيون



عبد الجليل سليمان غير متصل   رد مع اقتباس
قديم 26-04-2009, 01:48 PM   #[15]
elle
:: كــاتب نشــط::
الصورة الرمزية elle
 
افتراضي

تحياتي وقد كنت افتقدك في بوستات الأخ ود عثمان وفي المنتدى عموما.


أحلام البنات تعدت الشباب الى كبار السن "الحناسين...الما وناسين"وفي إشارة للأغنية فهي تقول جننتني يا إنتَ...بي سنونك الستة ده للأمانة يعني.


ولدينا حواء شديدة القوة تغني (رجالة كده عرستو بالقوة) ونماذج كثيرة أشكرك على المجهود ...وأتابع.



elle غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 09:05 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.