اقتباس:
المشاركة الأصلية كتبت بواسطة عبدالماجد موسى
[align=center]خاطرك يا هَوَى[/align]
[align=right]أدينى خاطرك يا هَوَى
واسمعنى ... لما الليل ترن أوتارو
تلـْهـِب أحاسـيس الفراق
تتدلى زى غـيماً تقيل
يمسح صباحات المُـنى
أدينى خاطرك
لما الدروب تحتار ... تقيف
ترسم سراباً من دخان
يشرق عيون الحب
ويجدع فى الخيال
بذرة شكوك مُتـْمَحِّـنه
وسرحانه فى الصيف والشتا
أدينى خاطرك يا هَوَى
لما تتخانق شفاه الموج كمان
تبعدنى عن مرسى اللقا
وتسحب جناح العيد بعيد
ترمينى فى بُـعد السفر
الكنت ناسيو ... كم سنه
أدينى خاطرك يا جميل
خلى الكليمات تنبهل
وتَرْجَعْ خطيواتى الحنينه
الكان تلامس كل نغمه
تزيد جمالا
تلحنا
أدينى خاطرك يا هَوَى
وسكّن قليبى الصاحى بالسنوات يرفْ
محتار فى أمرو
وفى التفاتو
وفى الطريقه الممكنه
يرقص
ويغرد زى زمان
يشرب من النجمات هناهو
ومشتهاهو
وغمضه تتمايل ترفرف ... بين مشاعرو
طريه
ناعمه
يمد جناحو ويحضـنا
أدينى خاطرك يا حبيب
شَـبّـالْ حنان
يروى أنفاس حبنا
ويعدل غصن قصـتـنا داك
الإتـّــنـَى
أدينى خاطرك يا هَوَى
أدينى خاطرك يا حبيب
أدينى خاطرك يا جميل
وارحمنى مره وخُتْ ...
حرارة الشوق هـِنا[/align]
|
العزيز الأخ/ عبدالماجد موسي
لك سلام من الله يمتعك بالصحة والعافية والله ما عارف اقول ليك شنو اول حاجة اليوم الصباح فتحته الموقع لقيت الدرر المتناثر من شخصك الكريم طبعتها وكتبته اسمك فيها ورسلتها لخطيبتي بالكامل والجماعة المعاي هنا نصفهم حفظه ربنا يديك العافية ويدوم المحبة بينا والوصل ونتشرف بمعرفتك اكثر واكثر
اخوك
نزار حسن علي
دوحة الجميع
دولة قطر