صَحِّي الطيور واسقيها نار
أوقف لصوصك يا بلد
شتت كريمات الطريق
ارمي النجيمات للأمام
ارويها زيد
قُر وانعقد
شر وانخَمد
صُرة كلام ما فيها جد
مِسك القيام
قامت قيامتك
لو في سكتنا بتقيف
بليد أنت أم أنت البليد
في سكة هدير امواجنا
في البحر المخيف
قم يا وليد
أقدح شرارك
خلي العجاج فوق للسما
دق النحاس
صحي الطيور اسقيها نار
ما تنوِما
أفرد اياديك
مِدها
وامرق كنوز العزة
كل الضراعات شدها
فَزِّع مواكب الثورة
أجدع في البعيد
فوت حدها
سودانا أغلى من الدهب
سودان حِمانا وعزنا
فقع النشيد
سودان قلوبنا الما رَمَش
سودانا سودان أب رَقَش
الراية فوق ما تردها
منو البترس زغاريد أم ترس
وشنو أقوى من صهوة حصان
بطران عليق شدَّ ورفس
ناس تصيد الهم نهار
والهم عزيز ساعة الدغش
قوم إنتبه
من يومنا دا
مافي عسكري يتحكم
ويحكم في بلدنا
وكمان نهائي
يلزها
أو يعصر جناها
وبالخازوق يكتلو
ويستهتر بموتو
يقد عيونو
يمرقها
أو يغتصب في أطفالنا البراءة
يخجها
ديمقراطية حرة
هواها بالالحان سماوي
وعزها
سلم عدالة جميل وعالي وندها
دولة مواطنة يا بلد
عهداً قطعناهو
نفديهو نحنا
نحميهو نحنا
تلبسنا أنوار مشرقة
ونرسم رموشك في الخلود
وبكل ألوان الوجود
والليلة قلناها العهود
الصادقة ماهي ام قدود
كواية دايماً مُبْرِقة
والامضاء اشهدوا يا خلوق
كل أطياف الشباب
كل الجروف
وحتى أشجار البلد
دست تعابير الفرح
الليلة يوم الضو سرح
أنسج مواكب العز جلد
لون البسيمات انزرق
بالشطة مكحولة العيون
بالوعد رامشات الجفون
داك حبنا شايفنو
كيفن يتسرق
روحي وحشاي
من تاني ماهو البنحرق
ارمي الفي ايدك يا جنا
وامسك من الإتنين سنا
أنت المِرِق
وقولها هنا
نحنا ثابتين
نحنا صامدين
نحن ساعة الجد مرافعين
ما فينا عيب واقفين قنا
ما فينا عيب أسمع هنا
ما فينا عيب واقفين قنا
ما فينا عيب أسمع هنا
واقفين قنا
واقفين قنا
واقفين قنااااااااااااو
عب
|