أها يا عكود عشان خاطرك... (أي بت شديدة بتحب ليها طُلبة «صبي بناي»)

طارق جبريل · 28-02-2008, 04:37 PM

يا الحبان ود عكود أصر وألح أنزل القصة دي هنا
طبعا القصة بدأت هناااااك..

(1)
كيتا كدي في اخو البت الغزالة الكسر صاحب ناذر داك
انا بحكيلكم قصة صحبي عوض الله يطراهو بالخير...
دحين يا الحبان ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
ونحن مقدمين للجامعة بعد ما امتحنا الشهادة..
عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو
قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...
عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
ونواصل....

عكــود · 28-02-2008, 04:51 PM

اقتباس:

عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس

يا الللللللللللللللله يا طارق . .
الله يجيبك يا عبد العظيم الطاهر بي هني.

يمين القنقروشة دي لي منّها زي 20 سنة كدي.

واصل الله لا يسيئك
والخدار لا تعطّشو شي.

الفاتح على التوم · 28-02-2008, 04:52 PM

الاخ طارق
شحتفتنا..... وين باقي الحكايه الاحلي من فول ناس ابو ساندرا المصلح

طارق جبريل · 28-02-2008, 05:37 PM

اقتباس:

المشاركة الأصلية كتبت بواسطة عكــود

يا الللللللللللللللله يا طارق . .
الله يجيبك يا عبد العظيم الطاهر بي هني.

يمين القنقروشة دي لي منّها زي 20 سنة كدي.

واصل الله لا يسيئك
والخدار لا تعطّشو شي.

ود عكود كيفنك
تعرف يا الحبيب نفسي ارجع البركل واطلعلي في منقايي
وآكلي طماطماي واشرب لي مويي من الجدول

طارق جبريل · 28-02-2008, 05:39 PM

اقتباس:

المشاركة الأصلية كتبت بواسطة الفاتح على التوم

الاخ طارق
شحتفتنا..... وين باقي الحكايه الاحلي من فول ناس ابو ساندرا المصلح

ود التوم كيفنك
لا تضيق شي بجيبلك كل الحكايات هني

معتصم الطاهر · 29-02-2008, 11:50 AM

اقتباس:

المشاركة الأصلية كتبت بواسطة طارق جبريل

يا الحبان ود عكود أصر وألح أنزل القصة دي هنا
طبعا القصة بدأت هناااااك..

(1)

ايدو خضراْء تحلف تقول الزول دة ساقية

.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة)

يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...

اما بنطلون الشغل بالله تقول ضربوا لغم كله مقدقد تقول غربال دراب..

وجينا منفوخين وكروشنا قدامنا زي الحنابيك

... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور...

وعوض وشوا مليان اسمنت وراسه مغبر عامل زي الدرابة...
....

جمال الوصف والتشبيه

راجنك

طارق جبريل · 29-02-2008, 04:14 PM

اقتباس:

المشاركة الأصلية كتبت بواسطة معتصم الطاهر

جمال الوصف والتشبيه

راجنك

معتصم الطاهر كيفنك
شكرا على الاطلالة
محبتي الاكيدة

طارق جبريل · 29-02-2008, 04:15 PM

(2)
اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...

عكــود · 01-03-2008, 09:47 AM

سلام يا طارق،

ياخي دي مقدرة عجيبة في فن الحكي والتشويق
وما صدفة إنّو البوست ده صادف عدد كبير من المداخلات والقرّاء في المنتديات الأخرى

اقتباس:

جمال الوصف والتشبيه

شوف معاك ديل يا باش:

اقتباس:

البت بدت تسأل فينا جنس اسئلتا تقول شغالة في جهاز الامن...

وعوض مبلم ومقهي تقول ماكلو أمانة...

ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي...

وعيني لي عوض مدلدل راسي في شناط الليل عنقريب مرخي كدة تقول حفرة دخان

لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...

خالد الحاج · 01-03-2008, 10:07 AM

اقتباس:

المشاركة الأصلية كتبت بواسطة عكــود

سلام يا طارق،

ياخي دي مقدرة عجيبة في فن الحكي والتشويق
وما صدفة إنّو البوست ده صادف عدد كبير من المداخلات والقرّاء في المنتديات الأخرى

شوف معاك ديل يا باش:

والله يا عكود أنا لا أمل مشاهدة الفلم ده
وكلمة فلم أنا قاصدة .. طارق بيمسكك المشهد في يدك من روعة الوصف.
الله يطري حميد بالخير كانت أم ضرع مخدرة أيامنا كمان
وثالثهما "الشيطان" عبد العظيم الطاهر

نهى أحمد · 01-03-2008, 12:23 PM

أنا جيت أسجل حضور ومتابعه.

الفاتح · 01-03-2008, 02:20 PM

إزيك يا طارق..
ده حكي طاعم ووصف أطعم..
وبنيه شكلها أطعم
بس ما ترمي لينا عوض من السقاله

طارق جبريل · 01-03-2008, 11:31 PM

اقتباس:

المشاركة الأصلية كتبت بواسطة عكــود

سلام يا طارق،

ياخي دي مقدرة عجيبة في فن الحكي والتشويق
وما صدفة إنّو البوست ده صادف عدد كبير من المداخلات والقرّاء في المنتديات الأخرى

شوف معاك ديل يا باش:

ود عكود كيفنك
وحاتك كن عندي حبوية اسمها نفيسي بت بغداد
حبوبتب انا وضمرة بغدادي الفي منبر البركل
يمين من شدة ماها وصافي انا كنت قايلها رباطابيي

طارق جبريل · 01-03-2008, 11:34 PM

اقتباس:

المشاركة الأصلية كتبت بواسطة خالد الحاج

والله يا عكود أنا لا أمل مشاهدة الفلم ده
وكلمة فلم أنا قاصدة .. طارق بيمسكك المشهد في يدك من روعة الوصف.
الله يطري حميد بالخير كانت أم ضرع مخدرة أيامنا كمان
وثالثهما "الشيطان" عبد العظيم الطاهر

الريس كيفنك
تسلم يال الحبيب

طارق جبريل · 01-03-2008, 11:40 PM

اقتباس:

المشاركة الأصلية كتبت بواسطة نهى أحمد

أنا جيت أسجل حضور ومتابعه.

بت احمد كيفنك
ان شاء الله يحضرولك الزين

28-02-2008, 04:37 PM	#[1]
طارق جبريل :: كــاتب نشــط::	أها يا عكود عشان خاطرك... (أي بت شديدة بتحب ليها طُلبة «صبي بناي») يا الحبان ود عكود أصر وألح أنزل القصة دي هنا طبعا القصة بدأت هناااااك.. (1) كيتا كدي في اخو البت الغزالة الكسر صاحب ناذر داك انا بحكيلكم قصة صحبي عوض الله يطراهو بالخير... دحين يا الحبان ونحن في الثانوي انا وصحبي عوض دا كنا شغالين طلب مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد غربل الرملة يا ولد... الخرصانة وصلت ولا لسا... بكرة حا نعمل البيم... المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة ونحن مقدمين للجامعة بعد ما امتحنا الشهادة.. عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة... المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب.. انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر.. المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول... عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟ انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة.. قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا.... ونواصل....
طارق جبريل :: كــاتب نشــط::

28-02-2008, 04:52 PM	#[3]
الفاتح على التوم :: كــاتب جديـــد ::	الاخ طارق شحتفتنا..... وين باقي الحكايه الاحلي من فول ناس ابو ساندرا المصلح
الفاتح على التوم :: كــاتب جديـــد ::	التوقيع: الفاتح

29-02-2008, 04:15 PM	#[8]
طارق جبريل :: كــاتب نشــط::	(2) اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا... تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني... المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل... المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...
طارق جبريل :: كــاتب نشــط::

01-03-2008, 12:23 PM	#[11]
نهى أحمد :: كــاتب نشــط::	أنا جيت أسجل حضور ومتابعه.
نهى أحمد :: كــاتب نشــط::

01-03-2008, 02:20 PM	#[12]
الفاتح :: كــاتب نشــط::	إزيك يا طارق.. ده حكي طاعم ووصف أطعم.. وبنيه شكلها أطعم بس ما ترمي لينا عوض من السقاله
الفاتح :: كــاتب نشــط::	التوقيع: There r 3 types of ppl in this world those who makes things happen, those who watch things happen, and those who wonder wt happened