متوهني
وطن ممتد افراح
مجرتق بالعشم غنوات...
وساع خاطر بلم الكل
بحاكي الريلة في القدلات...
يتاوق بين عيونو النيل فياض
حجى وتأريخ تحكيهو الساقية في البلدات...
سبيل فوقو الكويز مختوت بحلي المشية والغشوات...
نسيم هباب مع العصرية وضل مرشوش
حنية حلاة القهوة الونسات...
بتوه تاني وراك مجنون بفتش
في عينيك ملمح فجأة صفاك يروح مني..
بلاقى جواك كلام مدسوس واحاول اترجم
صمتك الحائر يمكن يصيب ظني..
اقول وراك احزان وراك وجع اليتامى
وانين مجروح يرجع ثغرك الباسم يغالطني...
واتوه من تاني في جواك
اها ياكلمة رسيني..
تفاصيلك مدن اقطاع وقصور افرنجة
معظم تأريخها ماموثوق...
كلامك عذب رنان يجيك الصوت
كما الذكرى تجرجر في قفاها الشوق..
وافتش تاني عن مخرج ابارح
داخلك المرسوم متاهة وخوف..
اكابس في ضلام صمتك القى
درب الرجعة مامعروف...
يازول شبيه بوطن مكتوف ...
اداخلك كيف وبابك مكتوب
عليهو عزوف
|