صورة معبرة للبني
المصدر
http://www.sudaneseonline.com/cgi-bi...msg=1247504463
تحياتي ام التيمان
اجرت صحيفة دنيا الحوادث اليومية الصادرة فى الخرطوم امس الاول حوار صحفى باللغة الدارجية عن محكمتها بمحكمة النظام العام طالعوا نص الحوار الذى نشر اليوم وبالصور وقالت لبنى في ثنايا الحوار
المتهم الكاتل رقبة لما يسألو يقول انا بري لكن انا طلعت كروت الدعوة عشان الناس تجي تحضر المحكمة ويسمعو الحصل من الاتهام ما يسمعو مني وانا اصلا ماعندي قضية دفاع وقضية دفاعي هي قضية الاتهام نفسها يعني انا طبعت 500 كرت دعوة زي كروت العرس واليوم ماشة المطبعة عشان استلم 5 الف كرت ثانية لانو انا دايرة الناس تسمع الاتهام وشهوده فقط الاتهام الموجه لي في يومية التحري هو المادة 152 من قانون النظام العام سيئ السمعة من القانون الجنائي لسنة 1991 (المحترم) ويقول نص المادة ( من يأتي في مكان عام سلوكاً او فعلاً مخلاً بالاداب او يتزي بزي فاضح مخل بالاداب العامة بسبب مضايقة الشعور العام يعاقب بالجلد لايتجاوز (40) او بالغرامة او بالعقوبتين معاً المادة هذه فيها الزول بتزي بزي فاضح ومامكتوب فيها ماهي معايير الزي الفاضح يعني زي لبس الجامعة مثلاً (جامعة الخرطوم) عندها شروط انو البت ما تلبس بنطلون انا بكون عارفة اني لو مشيت ببنطلون ولو معاه بلوزة تحت الركبة ما بدخلوني دا القانون كان يكتبا ويقول الزي الفاضح ده معناه البنطلون عشان الزول يعمل حسابو ويكتبو ان مواصفات الزي الفاضح كذا وكذا يعاقب بالجلد بما لايتجاوز الـ(40) جلدة يعني يقر ليك انو عقوبة الزي ممكن تكون الجلد ده نص القانون الناس لما اقول ليهم كدا يستغربو غرامة وجلد انا ما عارفة الناس البعملو جرائم حرب يعاقبوهم بي شنو نمرة اتنين يعد الفعل مخلاً بالاداب العامة اذا كان كذلك في معيار الدين او عرف البلد ودي عبارات فضفاضة وما محددة لانو في نفس الوكت بهدومي انا مشيت بيها دول عربية كثيرة في دول عربية مسلمة يحسبوني من المحجبات وانا ما عندي انفصام في الشخصية وماعندي ازدواجية وما بلبس في داخل السودان لبس وخارج السودان لبس في كثير من البنات بيعملةا كده انا جوا السودان وخارج السودان دي هدومي حتى بنات حماس بيلبسو بنطلون جينز ملصق وخاتين ليهم طرحة ويعتبرو روحهم محجبات مافي معيار اما اذا حسبنا العرف نقول معليش في عرف السودان سنة 60 لبس البنطلون على لصيق كان موضة ارجع للصور الابيض باسود شفون حاجة تالتة اذا كان زي ده فاضح بالمناسبة البنات الذين تم جلدهم والقبضوهم معاي لا انا لابسة زيهم ولا انا اكبر منهم طرحة فيهم اللابسة بنطلون اضيق مني فيهم اللابسة بلوزة ..
بعضي اصبعي وبقول الناس ديل ليه ما قبضوني انا واقول الحمدلله الذي لايحمد على مكروه سواه والحمد لله الفرصة جاتني لحدي عندي وشفت بي عيني مش سمعت بي اضاني واحب اقول ليك انو الناس ما بتصدق انو البت دي اجلدت في هدوم الها لو صدقوها بعد داك بتقيمو عليها سجن ده اذا ماكان ابوها انصدم زي محصل لواحدة اذا كان خطيبا خلاها زي ما حصل لواحةد ده اذا ما كانت واحد فقدت الامل وانتحرت.
حتى الان انا لم اقل لك الحصل كذا وكذا وانا كنت بصلي في جامع وقبضوني انا دايراك تسمع الاتهام انا المحل القبضوني فيه بالبنطلون ده فيهو ما لايقل عن 300 شخص عزلوا البنات اللابسات بناطلين تحديداً وكان بالمحل رجال ونساء اسر واطفال كل قطاعات المجتمع وهو محل مفتوح توزيعي للدعوة لحضور المحكمة لي ثلاثة اهداف اولها انو كنت لما اسمع انو البنت لوقبضوها ناس النظام العام كنت بعض اصبعي (احييي) لما اسمع انو بت ودوها النظام العام بي هدوم.
دعوة لحضور المحكمة
اطول مني والله على ما اقول شهيد في واخدة لابسة بلوزة طول بلوزة الضابطة الفي القسم وياريت لو في الحملة القى القسم وياريت لو في الحملة بيجو نساء كانت كلها رجال وفوق ده اقرا المادة في القانون (الافعال الفاضحة) لنفترض انو ناس الحلة سمعو انو فلانة بنت علان قبضوها ناس النظام العام وجلدوها في اعمال فاضحة دي تفسيره شنو اصلها ما عندها تفسيرين لذلك انا طبعت كروت وزعتها للاصدقاء وللانترنت وللفضائيات عشان الناس تجي تشوف الافعال الفاضحة البنجلد فيها البنات وللاسف بعدما النظام العام يجلد البنت والجلدة بتروح لكن المجتمع بيجلد طول حياتا هل تصدق انو البنت انجلدت في بنطلون الافظع ان تظل وصمة العام تلاحقها وتلاحق اسرتها ومافي زول بيصدق انها انجلدت لانها لابسة بنطلون لو انا بعد انجلدت وجيت حلفت المصحف صفحة صفحة برضو مافي زول بيصدقني لذلك انا طبعت كروت الدعوة للناس عشان يجو يشوفو بعينهم ومامني من الاتهام منو البصدق انا كنت دايره القانون يحدد اللبس الفاضح ده شنو بعدين البشرع القوانيين هم الاغلبية خلاص اوكي بس يسموه اللبس الفاضح ويحدوه هو شنو لكن ما ممكن انت تخلي السلطة لعساكر هم زي قطاعات الشعب السوداني كلهم فيهم الخير والشر نديهم مادة في القانون زي دي يفسروها على هواهم انا برفض تماماً حملات النظام العام لان الزي الانا لابساهو قبل ما يكون في حاجة اسمها النظام العام كان بيلبسو الضابطات وبيشكو بالقاش ودي مؤسسات نظامية انا كلامي كلو الان لاعن شخص كفرد ووجت اتصالات وتضامن مع الزملاء واغلبهم رجحوها لاستهداف شخص انا بستبعدها ده تعاملهم مع قمار الناس الاستهداف هو من ادوات الكيد السياسي وانا ما برجح الاستهداف الشخصي لانو معاي عشرة بنات انجلدو وانا طالبت بمحامي.
مثل هذا الزي الذي البسه كانت تلبس مثله منتسبات القوات النظامية في الشرطة والجيش والسجون كلنا نتذكر ان الضابطات والسسترات قبل ما يسمى بالنظام العام كن يرتدين القميص والبنطلون والقاش انا الان لا البس قاش كما اضيق طرحه كما ان البنطلون تلبسه مضيفات سودانير هل هو حلالاً لهن لانها شركة حكومية ام ماذا؟؟؟؟! كما ان اكبر مول تسويقي وكلنا يعلم ان اصحابه اسلاميين ترتدي عاملاته البنطلون وافضل بلوزتي لانها غير مفتوحة من الجنبتين.
الاستهداف: لا ارجح الاستهداف من البداية اقصد بداية القبض وسير الاجراءات الاستهداف يمكن ان استهدف بعد توزيعي لكروت الدعوة وليس قبل ذلك.
الهدف من كروت الدعوة
ان يكون الناس شهوداً ويسمعوا باذنهم ويروا باعينهم من الاتهام لا مني ويحكموا بانفسهم هل هناك جريمة ام لا
ـ ثانياً لارد الاعتبار لمئات بل آلاف الفتيات اللائي جلدن في النظام العام سبب اللبس ثم تابع المجتمع جلدهن باللسان لان لا احد يصدق انها جلدت بسبب اللبس
ثالثاً حتى لايصاب الآباء بسكته قلبية كما حدث لواحدة من البشرة من زميلات القضية اذا سمع ان بنته في النظام العام لانه من الممكن ان تكون في ملابس هي في تقدير البضع خاصة.
رابعاً: وهذا هو الاهم لتسليط الضوء على هذا القانون وهذه المادة التي لايمكن ان تكون مستمدة من الشريعة الاسلامية الا ان تكون من شريعة الغابة.
رسالة للمجتمع المرأة السودانية محترمة والملابس ما مقياس للأخلاق
ـ الهدف من الدعوة :
1/ والله لا اريد تبرئة نفسي وانا مقدمة كروت الدعوة دي عشان الناس تمشي تسمع الاتهام حيقول شنو ودي قضية دفاعي انا صاح كنت في مكان عام وصاح لابسة اللبسة دي وينا الجريمة والغريب انا كروت الدعوة الطبعتها دي شلتها ماخليت وزارة بما فيها وزارة العدل ووزعتها وانا لابسة نفس اللبسة القبضوني بيها وقصدت ادخل الوزارات بنفس اللبس العدل والخاجرية والقصر الجمهوري بابوابه الثلاثة لامن موظف استقبال رفض دخولي لذلك انا بسال شنو اللبس البيسبب مضايقة للشعور العام يعني ديل ماعندهم شعور عام انا ما بتهم العساكر تحديداً ولكن هم من شرائح المجتمع السوداني فيهم الصالح والسيئ عشان كده انت بتقدم الدعاوي دي لمحاكم عادلة اتجازية.
البنات العشرة (الانجلدوا) واحد منهم (تبولت) لان منهم بنات صغار ماعندهم تجارب وتبولت من الرعب ولما يسالوها بتقول (زي فاضح) لان ماعندهم محامي ولاخبرة والواحدة دائرة تتخارج بدون فضائح فيهم قاصرات وفيهم مسيحيات انا ما فوق القانون وما بتضارى وراء حصانة انا ما عندي مشكلة انجلد ولكن (ليشهد عذابي طائفة من المؤمنين) وغيرهم عشان يشوفوا انا (انجلدت) في شنو وشعان يعرف الناس (بناتن)انجلدوا في شنو..!!
http://www.sudaneseonline.com/cgi-bi...msg=1247504463