يا أخي الكُبر دآ حاجة ثقيلة بشكل

[بابكر عباس]

تعرف يا بكور،
أنا بالرغم من أني زول عكاس ومكاجر وبنقد أي زول نقد حاد، إلا انو في ناس كدا ما برضى فيهم خالص
الأستاذ محمود
الصادق المهدي
م إبراهيم نقد
وحسن موسى

[بابكر مخير]

المشاركة الأصلية كتبت بواسطة بابكر عباس

تعرف يا بكور،
أنا بالرغم من أني زول عكاس ومكاجر وبنقد أي زول نقد حاد، إلا انو في ناس كدا ما برضى فيهم خالص
الأستاذ محمود
الصادق المهدي
م إبراهيم نقد
وحسن موسى

بابكير
لمن قريت إسمك في المداخلة وقبل ما أقرآ أيتها شئ في ما كتبت وإني الأن أضم صوتي اليك..
قلتا يا حظي كمان الشباب الصغار ناس 40 وشويييييييييييية دخلو هنان عشان يصيبو بعض المعرفة عن ثقالة الكُبر ويحضروا نفسهم للمستقبل القاتم، الظالم..
والله تعرف ما في شئ ممكن تشبهو بيهو الكبر ثقالة وعدم فايدة ووهم إلا ياهو حميضتي ومجلس الدياشة...
شوف أمسك مثل؛
تتمسك بي شيتن ما ليك فيهو قدرة واخد بالك "ولا ننادي عكود يوقعها ليك"..
هم الحكم وناس أنا التحكم وأمسك من مسكان دركسون العربية ليييييييين "نضم الإبرة"
تلاوي ليك في زولن كبير وعظيم شأن وإتا ترآ لو حمر ليك ركبك بتسيب وإلا بتتقوى بي قولة أنك كبير.. أها الثقلة ديل ما هم حسي بيلاوو في شعب أصغرهو عمر أضخم وأعظم من رئيس مجلسهم ونايبهو ومتقويين بي مرتزقتهم الشايلين بنادق في الوكت يومتها أربعة منهم سلاح وعصي وسيطان يعني شغل عصابة راجلن واااااااااااااااحد ضكر ركز ليهم لمن عصيهم إتكسرت وهب هجم علي واحد فيهم إلا عار متل الجريو لمن تهره....
شوف شيتن تاني... النضمي دآ حق الله والرسول البيديهو للشافع عشان بعدي يتفاصح بيهو لمن تكبر إلا يختو ليك مكرفون عشان تتسمع وحتى بالمكرفون النفس ما بساعدك يقرب ينقطع... يومتها هو إسمهو منهو؟؟ (يا أخي هو الثقيل دآك الإسمه تب ما بنحفظ ليا. ما قصدي العسكري الإسمهو الأول ذي إسم رئيس مصر) الزول دآ بيتكلم وذي المزنوق إلا داير يهرول لي " محلهو وشبهو" لأنهو بطنهو مايصاهو ويتلفت هو الرايحآ ليهو حاجة ودي أكيد لأنهو كرامتهو راحة ورجولتهو راحت وهو ظاتهو رآح ودي ذي عين الشمس نص النهار لا دايرة إثبات ولا "برهان" والتاني دآك الرايحآ ليهو لا قادر علي نضمي أهل دار صباح ولا قادر يفاصح بي كلام أهلآ يدغمس في القول ويلفلف ويكضب..
مش ياهو الكلام ليهم صعب ذي ما إحنا ديل "الجلاكين""
حسبي أنت الله خير معين
يا فراج، فرج علي أهل السودان وأزيح منهم هذا الكابوس القميئ
وأنصرهم علي حميدتي ودياشة المزعوم بأنه مجلس عسكري والعسكر منهم براء
وأرحم كل من أرتق الي مقامك وأشفي كل مصاب وأدخل الفرحة في قلوب كل الأطفال والشباب والشيب، إناث وذكور من أهل السودان..
آآآآآآآآآآآآآآآآآآآميييييييييييييييييييين

[بابكر مخير]

حقيقتن لله
الدنيا دي بقت مسيخة جنس مساخة
غايتهو الحمد لله أنه أيامنا فيها معدودات
ويا خد سيد الأمانة أمانتهو..
نتخارج ونخليها لي ناس حميدتي وشوقي ومن لف لفهم وكل زولن مزعج لا يهمه قدر الناس ولا مكانتها
ويلا بلا لمة

[بابكر مخير]

الإعتزاز بالنفس مع الكُبر بيكبر ودي ممكن تصنف نوع من الأمراض وكما ذكر في بوست هنانا أنهو "إعتلال نفسي"...
الأعتزاز بالنفس هو شئ جميل لما يكون موجه لي قيم وأفعال عظيمة.. قول مثلن زول معتز بي نفسهو لإنتمائه لي بلد ولي أمة ولأسرة وبيعمل ديمة لإظهار هذا الإعتزاز..
أها في إعتزاز بالنفس مبالغ فيهو ويغوى الزول ويدفعه للغرور...
تاني هام الخط الرفيع البين الإعتزاز والتكبُر فبعضهم نفسهو تكون عزيزة عليهو لي درجة أنه ما شايف زولن تاني متلهو ودآ برضك مصنف إعتلال نفسي وديمة بيكون ضارب فاقدي القيم البشرية العامة وبمعنى تاني مركب نقص..
وهنا المشكلة البتكمن في التقدم في العمر
معها كلهو شيء غير مهم بيكبر كان المرض كان الإعتلال الجسدي والفكري والنفسي وحاجات كتيرة تنعدم منها الشوف والسمع
"بس ولا بشهد لا زول ولاحاجة وخلوها علي كدآ"

[بابكر مخير]

ياخي ما عارف لييه الناس بتنسى ولا بتتناسا أنه الموت حق والحياة باطل...
قولي دآ ما نتاج دبرسة كُبر وطبعن دي قلنا أنها أقوى المتلازمات ورفيقات وصفات الكُبر ولا قول زولن فاقد الأمل desperate ولا لأنهو الحياة وكل ما ليها من الأصعب (ما هي تجاوزت ما ساهل وصعب وصعب بالجد الي أخر الصعوبات)..
إتصور التلفزيون موت والأخبار موت والميديا موت والنوسة كلها عن الموت في الشارع عربية الإسعاف تونون يا ماشة تجيب ميت يا شايلا ميت.
ما حاسد والله لكن بستغرب لي التفكيرهو في القرش وإغتناهو وزيادته وهمو التملك ووالزيادة في ما رزقه الله..
الزهاد في الدنيا هم الصلاح
ياهو شيتن يستر بيهو جسمهو وشيتن ياكله يسد الرمق وشيتن ينوم فيهو وشيتن يطراهو بيهو الناس لمن يمشي..
شوف حسي بشة تلاتين سنة ما متذكر فيها الموت ما هو الزول دآ ما ليهو جنا يقول يورثهو ويلم في القروش. أمس الأخبار أنه عندهو في سكنهو "طبعن هو ما سكنهو هو مقر ضيافة مؤقت لكل شاغل المنصب ولي فترة وفي الأصل ملك شعب السودان" كم مية مليون يرو ولا دولار ما متذكر...
كبش أمس يحمر في وشينا ويرفع في حاجب وينزل في التاني ويكضب ماهو متذكر الموت وسؤال منكر ونيكر (ديل قول ليهو يا كبش ما ذي الصحفيين المساكين وإن كانوا على حسن الظن ولكن ترصد بهم متوقع فأنت لا تؤتمن علي شئ ووليداتنا الثوار خير دليل. ديل يا إتا هم الحيلوكوك لوكاة وما بتقدر تخوفهم بأنك تعتقلهم لأنهم هم المعتقلنك بأمر لا تطوله ولا يطوله أي من البشر فهو أمر من الأمر والناهي والقادر والعادل "الموت يا ظالم")...
إذن يا ناس
كان ثوار وكان جايرين علي بلد الثوار
يا أحرار يا أبطال..
أعدولُ بين أنفسكم
وعلي القولة يا مراكبي عدينا (لي بر السلام)
إتذكروا أنه هو السودان القاعد مر الالقرون وإحنا وإتو ماشييييييييين منها..
وموتو علي دينكم ووطنكم

[imported_عبدالله الشقليني]

حبيبنا دكتور بابكر مخير
تحياتي ،
ما كنت عارف يا ريت يا ريتني كنت عارف.
*


[rams]https://www.youtube.com/watch?v=fvTsbwNFYz8[/rams]

[بابكر مخير]

المشاركة الأصلية كتبت بواسطة عبدالله الشقليني

حبيبنا دكتور بابكر مخير
تحياتي ،
ما كنت عارف يا ريت يا ريتني كنت عارف.
*


[rams]https://www.youtube.com/watch?v=fvTsbwNFYz8[/rams]

إختيار جميل من رجل جميل
لغناء جميل وفنان جميل
من الأصوات التي فعلن تطرب
شكرا ليك يابا
شئ جميل في زمن قبيح

[بابكر مخير]

كل زول عندهو شوفة في الجماَل وما شرطن توافق أغلبية البشر..
وكل زول عندهو شوفة للعروس البدورها وذي ما كل عروس عندها شوفة لعريسها البتدورو وفي الحالة دي الناس الحوالين العريس والعروس ديل بيكون عندهم أراء متباينة مع الإتنين وفيما بينهم..
العريس بعضهم عايزها بييييضاء وشعرها أسود طويل ومكتنزة الجسد "خلونا علي كدآ" وبعضهم بت أسرة مقرشة وبعضهم تكون مفرفشة "رفيقة" متفهمة وبعضهم تكون ملفلفة ولا خيمتن زحيحا يقوم التراب كتاحة..
بس في حاجة..
أها إتا تقول قول ورغباتك إتحققت لكن لي قدام شن الحال بيكون..
خلينا من حكاية الإتنين يجلكنو ودآ أمرن حتمي لكن المشكلة تكون ويييييييين..
المشكلة لما اللون الأبيض الشمس تحرقه والشعر الأسود ينملي شيب والشحم واللحم يبقى جلافيطوالأهل المقرشين العريس دخل عليهم بالساحق والماحق والبلاء المتلاحق لأنه نهبم وسرقهم وبرطع بي حقهم لمن فلسهم وحتا الفريقة ست الفرفشة والفهم والنقاش والإختلاف هم الكُبر كسر مقاديفها وطفى النور الفيها وبقى عليها بعد ما شاب دخلهو الكتاب وتبدآ من جزء عم لين تختمهو بي قول البنا الما بنآ إلا الخراب وين حلو وليداتهو وأفكارهو وكفارهو..
أها يا أهل العروسة البلد المليانة خير ويا أمدر المفرفشة ويا الخرطوم المنورة ويا الجزيرة الرويانة وغنيانة ويا أهلي ناس ميلاد وأخويا القمص ويا بيت البرعي والميرغني وأبكساوي يا "ملوكآ أخويا" ويا أستاذنا المرحوم الصادق عبد الله وحسن الترابي...
جآكم عريسن طامع
بنيتكم أحموها ولموها وغطوها
ما تبيعوها بي قرشن أحمر ينقط دم
ولا بي خوفتن بعدها الندم...
وصيتي ليكم..
دآ الزول دآ..
خلوهو إلا يحوس ويلوص، يلف ويدور وإتو تم وعصيدة فيها السم
لمن يعرف أنهو ديل ما ناسن ما بيدو بنيتهم بالساهل..
وخلوها طوااااااااااااااالي
سلمية
سليمة بس
سلمية مية المية

[بابكر مخير]

لجيشك عليك واجب كما لنفسك عليه لك حق...

أنا بفتكر (يمكن بحسن نية أو بسذاجة). أننا نحن الشعب حين يتسلط علينا دكتاتور أو تحكمنا شرذمة وتنال من حقوقنا المشروعة نلجا للجيش وما بيخذلنا وهو ما حصل في المرتين السابقتين..
جيشنا كان قبل هجمة الكيزان وفي التلاتين سنة ديل صابهو ما صاب كل مكونات الأمة..
طيب هل سألنا نفسنا عن هل جيشنا دآ الديمة بنوصفه بأنه "جيش واحد، شعب واحد" وبنلقاهو عند الحوجة... إمكن هو اليوم داير مننا نقيف معاهو نناصره ونعاضدهو..
أنا بفتكر أنه علينا واجب قومي ووطني وهو؛
إعلان كافة أهل السودان وخاصة الأحرار والثوار منهم الوقوف بحزم مع قواتنا المسلحة، جيشنا الباسل..
أنا بفتكر أننا ندي جيشنا فسحة لتجميع قواه بأننا نشغل أعدائه الهم أعداء الوطن بعصيان مدني متكامل الحلقات. نلهي به أعداء الله والوطن. ونترك الفرصة لجيشنا اللأبي تنظيم صفوفه في قياداته ووحداته في العاصمة والأقاليم ليهب منتصرا لشعبه وشرفه الذي كآد أن يهدر...

[بابكر مخير]

يا أخونا بالجد أتاريهو الكُبر بباريهو الكُبر في فهم الحياة واكتييييييير من الأمور..
في واحدة من الجارات الحبيبات قريت لقائين صحفيين واحد لي "شاب" زولن قريب من عمري في منصب قيادي وواحد لي شباب نضارة ووسامة وثورة وحرارة نفس.
إتنينتهم سألهم تقريبا نفس الأسئلة عن الحالصل في البلد لكنهم كانوا في جريديتين مختلفتين. زولي التقريبن دفعة تميز بهدوء النفس والشاب الحروف بس التقول تنط ليك لكمة في وشيك.
الكبير كان متفائل والشاب متشائم..
"يا أخوانا والله السودان دآ بلد العجايب (بس ما زارهو جليفر) يعني معرووووووف في الدنيا دي كلها وكل النظريات النفسية والإجتماعية بتشوف أنه الشباب هو في ذاتهو بيعتبر مصدر للتفاؤل والشيب هو عنوان الدبرسة والتشائم"
كان حديث الشاب خالد (ما الجزائري) في نبرته قرييييييب من الشاب (ود حمدان) ... إتنينتهم مع إختلاف باين بين مواقعهم (واحد مع الخير والتاني زول شر) إتنينتهم بدلقو العدائيات البتقفل طريق التلاقي غايتهو يا قوى الحرية ويا المجلس العسكري إلا تتواعدو تتلاقو بعيد من ديل... قطع شك ما في الحتة المذكورة في غنية "توبة توبة" لأنه شارع النيل ذكراه حزينة وما محل لي ولادة فرحة..
قريت برضك تحليل جميل لي زولن أكيد دفعة لو ما بيكبرنا بالعشرة وفيهو الغريبة لقيت شبه وتوافق مع طرح أخي وشقيقي (نسب الدم هو صلة الدم) الحبيب أبو خليل...
الكُبر قدر ما هو ثقيل!
لكنهو نعمة فكر ورأي

[بابكر مخير]

قالوا: الما عندهو كبير يشوف ليهو كبير...
هل هذا القول كان زمان بس
لأنهو لو لي حسي نافذ
يبقى يا ثورا شوفو كبيركم

[بابكر مخير]

قلناها قبل كدآ...
مع الكُبر بيرهف القلب وقلنا برضك البيحصل أنه عكس الشباب قدر ما القلب زمان بيكون تقيييل وكل شئ يمشى دون وجل وفزع.. ذي حسي الشباب الثوار ديل منهم الشايل كفنهو وماشي ومنهم الما أكل كم يوم وما شاعر بالجوع ومنهم البعاين لي الشايل الدوشكا ويبتسم في وشيهو وعارض ليهو غصن زيتون وكرعينهم بتكون ذي الريشة في المناورات يسابق التاتشر ويسبقها وفي نواصي البيوت تلقاهو ذي البرق من الناحية دي للناحية التانية يلف والمتاريس دي يفططها التقول القطري الأصله كيني "سيف سعيد شاهين"...
حسي مع الكُبر
قلنا القلب بيخف ويبقى أرهف من ورقة الريزلآ البلف بيها سجارتي "والله صافي تباكو ما ذي الكلومبي" وكبيييييييير أن عطس زول ساكت جمبك تنط تقول فجرو قنبلة هيروشيما قدامهو وذيييييييييد علي دآ كلهو بيبقى الزول همييييييييم لدرجة مزعج.. يا ولد ما تمشي في الواطة تكون في حفرة تقع تكسر حوضك "دي طبعن من مخاوف الذينا أنها تبقى عليهو"... ولو سمعت قالوا شنهو تبقى كل ليلك ونهارك تفكر فيهو....
دحن يا بنياتي ووليداتي وأخواني (أخواتي ديك ربهن يحفظهن ما هن عايشين الباقي عليا لكن أخواني ديل ياهم ناس المجلس العسكري بس إلا يتليقوا وهم ناسيين أنها كم يوم ويلا منكر ونكير يبقوا هم بس الأعضاء في جلساتك وإجتماعاتك)..
بالله عليكم يا ديل..
حلوها وإتوفقوا وخلونا شوييييييية وباقي أيامنا دي نلقى لينا شمة نفس وغمدة عين في نومة هنية قبل النومة ديك..

ة

[بابكر مخير]

مع الكِبر أخطر ما يمكن أن يفتك بالزول هو الإحباط ودآ لينا بدخلك في دبرسة وقناعة من الدنيا وبيتأكد ليك أنها أدتك ضهرها ولو بقيت عندك العزيمة.
أخير بيدك وما بيد عمْر cut your life short.
هل في شئ بيربط عمْر وعُمر أنا بفتكر أكيد أيوة ما هم الإتنين بتكون الأمور القبيح بيدهم. لكن عُمر أشد بطشاً من عمْر لأنه فكآ فينا بلوة إسمها حميدتي..
يا أخونا والله الواحد محبط لي أقصى درجات الإحباط
بالله يعني ناس ما تعرف هل هم سكارآ ولا حيارآ ولا طول الوكت هم مصقوعين ولا هم هبل وأغبياء بإمتياز ولا بس كضابين وموهومين أنهو شعب السودان مغفلين وبيصدقوا الهراء والضلال ولا تربيتهم فرضت عليهم أن يكونوا كدآ..
يا أخي كباشي دآ إما أنه مضروب في روحه مقلب عالمي وأنه هو خلاااااااااص بقى ياهو هو.. ولا أنه ما الياهو ورمي في عيونهو لمن يتكلم مع أنه بيقول كلام كبيييييير بتاع ناسن هم البيكسرو العين ما همن العينهم مكسورة لا ودآ هين المشكلة في البلوة الخلاها عُمر يا زول دآ لو قريتو سيرة هتلر بتلقوها مكررة يعني أنا بالجد مستغرب زول شبه أمي من وين ليهو عرف بسيرة هتلر عشان يتقمص شخصيتهو..
ذي ما هتلر خلق حزب العمال القومي الاشتراكي الألماني (وقصة نازي دي جآية من مختصر Nationalsozial) وعلي نفس الوتيرة دآ بيعمل في حزب "نازي" عمادهو الإدارة الأهلية وفضلات التلاتين سنة من كيزان ومؤلفة قلوبهم وضعاف النفوس...
أنصحوني بالله لأنهو الإحباط هداني وخايفهو يهدني لإرتكاب الإثم الأكبر في حق نفسي

[بابكر مخير]

شوف بالله مع الإحباط بتاع المجلس العشكري وكباشي

الكُبر متعته في ذي الأحفاد ديل البخففو وجع القلب
تخليك تتمسك بالدنيا (أكيد ما طامع ذي ما قالت ليا حبوبتهم السيدة الجليلة "وتحضر أولادهم" )

[بابكر مخير]

يا زول أصلن بيقولوا أنه كلام خرف.. ففرغ وإستفرغ وأطرش علي دين كيفك....
السودانيين من شهر ديسمبر لييين يوم الليلة وممكن لي أيام وسنين قادمات شعب معلم وكونه معلم فهناك معلم العلم الفلكي والذرة وفي معلم الشيشة والمخمخة وفي معلم القيم العظيمة والأخلاق وفي المعلمة (ذي بمبا وما يقال بمبا كشر)..
عمل ثورتين وبشتنوها الأيدلوجيين المتطلعين دوما الصعود فوق ضهور الثوار ولنيل الحكم عن طريق النهب والسلب...
كان الإستقلال وكان أن مصر وبريطاني بضغوط هجو سابو البلد ولكن إستخبارتهم بقيت وعملت لتنفيذ سياستهم فكانت نوفمبر وكان السد العالي شلاتين وحلفا الغرقانة وحلايب. وكانت أكتوبر ومع وبرغم ضعف مجلسها الإنتقالي إلا أنها بوقفة شعبها الصلبة وصلت لإنتخابات وكانت حكومة مدنية منتخبة ديمقراطيا ولكن الأيدلوجيين رغم قلة عددهم في المكون السياسي السوداني وبتحالف بين ناصريين وقوميين عرب وشيوعيين قاموا بإنقلاب وإنتفض الشعب في رجب/ابريل وكان مجلس إنتقالي عسكري وضع لبنة لتسهيل شرذمة من شذاذ آفاق أن يسيطروا على مقاليد الحكم وكان تلاتين نوفمبر والذي كان يوم شئوم متنافس عليه من العديد من الأيدلوجيين بجانب الكيزان الذين فازو بالكيكة ويشهد على ذلك الخيانة الكبرى حين عزف الشيوعيين والبعثيين والناصريين وحتى جزء من الإتحاديين عن الإلتزام بميثاق الدفاع عن الديمقراطية وكان الكل يمني نفسه بأن البيان العسكر المرتقب صدوره هو لأبناء جلدتهم. وبهت المتربصين دوما إستلام كرسي الحكم (دوما عن طريق الإنقلابات فالصندوق يا شوقهم) فكان كيزاني جسم علي الصدور تلاتين بالتمام والكمال (ما هو لسة نجراكيك الإنقاذ حاكمين أكيييد لين يوم 30 "هو شنهو التلاتين الشابكا فينا دي" 30 + 30+ 13 دآ عمري )....
حسي العايز أقوله!!!
ذي ما من الكلمات المتداولة (تصعيد وتصعيد مقابل) أنا بشوف أنه دآ تصرف صبياني
أكان ناس حميدتي وكباشي وحتى الزول الكبير في السن عبد الفتاح ظاتهو ولا أكان المجموعات المكونة لي قحت..
سبعة شهور ويتناقروا ويلفتو إنتباهة الناس من المهم للجانبي ويخلوا المايسوا يشتري وبقى بس سوق شراية ذمم بدايتن من القيادات ليييين عمد أصغرالقرى ...
كفاية بالله عليكم وكلنة أخيرة..
يا حميدتي ما عندك مواعيين حكام ويا كباشي ماك من رجال السلطة ويا قحت take it easy ووصولوها لي بر الأمان