يا أخي الكُبر دآ حاجة ثقيلة بشكل

[ناصر يوسف]

المشاركة الأصلية كتبت بواسطة بابكر مخير

الهدوم!!
المقصود الملابس مما جميعه، الظاهر والمخفي والمستخبي ...
بالله عليك زماااااااااااااااان لمن كنا فينا رقشة وصغار،
تلبس بي تشهي بنطلون أخضر وكوردوي، قميص مقلم ومخطط بالأحمر والبنفسجي ولياقته بيضاء، شبط شكل شبشب وجزمة على شكل صندل وبوت من جلد الأصلة.
يعني الواحد ذي نضارات السينما المخصصة لأفلام الأبعاد الثلاثية.
الوآن وشكل الشروق اوالغروب على ضفاف النيل الأزرق (أبو تلفزيون السودان ظآته)..
بقت القصة بي لآآآآآآآآآآآآآآآآآآآآآآ إرادة
تمشي تقول تشتري ليك بنطلون، تقيف قدآم تشكيلة آخر تقليعات وآلوان وزخارف..
لآ إرادين، وجهتك محددة!؟
اللون "الرمآآآآآآآآآآآآآآآآآآآآآدي"..
تشتريه أول بي إعجاب،، تاني مرة عفويا ما بقآ اللون المفضل، تالت مرة قسبية ما أصله بقآ اللون البيمشي معآك..
والله العظيم عندي أربعة بناطلين من مآركس أند سبنسر.. أخرهم إشتريه أمس وكلللللللها، نفس اللون وإتنين نفس الشكل..
بالله دي حالة دي..
الجلابية بقت ما عملية،
شي البغلة تسف، شي الهواء يهب من قدام يكشف حالك، شي تقعد أو دون وتلقى بقعة مجهولة المصدر...
يا ربي أنا قعدت وين وفي شنهو ومتين..
قال كيف "يني" لمن بيستفرغ بعد السكرة فوق كلبن جآ جاري تحته..
سأل متحير، السمك في الجندول والللحمة دي في الريفيرآ...
طيب يا ربي الكلب دآ كان أكلته متين ووين؟؟؟؟

هههههههههههههههههه

الله يديك العافية ويخلي ليك اللون الرمادي ياخ

ههههههههههه

ليك الأشواق

[بابكر مخير]

المشاركة الأصلية كتبت بواسطة ناصر يوسف

ليك الأشواق

الشوق، الفرح، الحب وكل ما يتعلق بالعاطفة والإحاسيس!!!
مكمنه القلب...
آهااااااااااااااا قدر ما الزول يكبر ويعجز ويجلكن. الحكمة حاجة وااااااااااااااااحدة تبقى كما هي وتستمر حتى آخر لحظة...
عْجِز قدر ما تقدر بس برضك بتشتاق
برضك تتفقد ناس وترتاح لي شوفتهم، تفرح بي لقآهم..
تتمنى يكونو ديمة معاك وجمبك وبي قربك
ناس تحبها (لله ما للشهوات) وناس تانية تحبها برضك..
الكل يشيخ ويهرم
بس الحكمة القلب لآ..
القلب دآك المضخة بتاعت الدم
دآ خله سآكت، يشيخ وينخ
وطلمبات وأنابيب ومكنة وزن وضبط ذي حرارية بري الكهربائية..
لكن القلب مكمن العاطفة
أبدن أبدن
برضك مشتاق ليك يا أبو الجميلات

[بابكر مخير]

ما تقول ليا المرآية بتفضح أمرك لمن تكبر وتعجز،، ما هو في حاجة إسمها تكضب على روحك.
البوريك بالجد كِبرتا...
تلاقي زولن دفعتك ولا أصغر منك بسنين مريحة كدآ...
في دفعتك بتشوف البشتنة، الكرمشة وتقل الحركة..
برضك ما بتشوف روحك لكن بتشوف الناس بتشوفك كيف؟!؟
ياهو بتشوفك ذي ما إنت شايف دفعتك ...
دي نعديها!! ونجي لي الأصغر منك
زمان بالله كان كيفنهو، الشعر مسبسب، الحلقوم مليان، بيغني ويطرب ويفرح الناس بي شوفته...
حسي الشعر هبوي والحلقوم إتجلفط والصوت إن أصلن طلع وإتسمع إلا صرصرت باب الطلح لمن حديدة يصدي،، سيييييييييك سيك...
ها ما قلت ليكم،،،
أمس ما إتسيكتآ.. طبعا حجت المهزوم،، زميلي ما قفلها يمكن كان تردع اللاعبين ضدنا وترهبهم...
بجي لي لقائي مع دفعتي الهبط معناوياتي وللأصغر الخلاني حزنان ليهو علي الرآجيهو

[بابكر مخير]

مبروك عليكم مرور التلت وربنا يبارك ليكم في العشر الأوآخر..
بالمناسبة السنة الجآية برضهو رآجيكم وإن الله حيانا نعديهو معاكم.....
رمضان كريم ووإطلالة العيد قربت عسآكم من عايدينه...

[عكــود]

مبروك عليك الشهر حبيبو،

عساك من عواده.

بعد العيد جاييكم أبوظبي منقول نهائي للمكتب الرئيسي، إن شاء الله.

[بابكر مخير]

المشاركة الأصلية كتبت بواسطة عكــود

مبروك عليك الشهر حبيبو،

عساك من عواده.

بعد العيد جاييكم أبوظبي منقول نهائي للمكتب الرئيسي، إن شاء الله.

عيدييييييييييييييييييييييييييييييييييييية حللللللللللللللللللللللللللللللللوة
وفرحة كبيرة

[بابكر مخير]

عليِّ العادة الما كانت عادة زمان،، صحيت الصباح هو في الحقيقة وبي لغة صآح..
لمن الجآ الصباح وأنا ذي "الجدادة الرآكضة فوق (بيضها)" ما بحرك سآكن وهذا طبعا لست بمحض إرادتي ولا نزولاً على "شهواتي" لكن لعامل واااااااااااااااااااااااااااااحد وأساسي
الكُبر
جآني الصباح والسجن والسجان باقيييين، الكرعين مكلبشات، شئ رطوبة وشئ عرق نسآ وشيتن تاني صعب..
العضلة الفي الرجل مكرضمة تقول كورة شراب،، قالوا ناس الكورة بيقولوا لي الحالة المتل دي، تمزق عضلي،،،
هو عضل شنهو الفضل فيها،،،
بالله عليك جنس جلآفيط... تمد يدك أفقياً تشوف الكآن زمان إسمه عضل،،، مدلدل ذي ناسن فاتن الستين وبدل التفاح مكرضم بقت الحالة في الصرة إتلملم...
الله من دآ الغلط...
أخير نرجع لي قومت من السرير البقت إلا بي ونش وهو الونش ما عايز ليهو شيتن يتربط بيهو.. قول يا زول "كراكة" ولا شيول عشان يخم الخردة..
غايتهو الما ضاقهو حيضوقهو ويومها دآك آكيييييييييييييييييييييد ما حيلالهو..
ما هو حآآآآآآآآآآآآآآآر...
ملعون أبو دآ عمر

[بابكر مخير]

بتشوف للإمور من عين واعية ما هو عندك فرصة تقارن بين الماضي والحاضر
بتفكر بصورة متزنة؛ الكُبر مرادفهو البطئ وبيرافقه التقلة في كله على كله، الكلام، الحركة (وهلما جرا)
بتتحرك برآآآآآآآآحة (فيها فايدة وبرضها عكس كدآ)
ما بتسمع كل حاجة وعشان كدآ في كتير من الأوقات بتفوت... (هم بيكونو "الطرش" فاكرين سبب تاني )
"بتستمتع آكثر"
لمن تأكل وإتا طبعا ضروس فيها وما فيها وسنون غالبا ما تكون طقم،، شنهو البتعملوا؟؟؟
للأكل تقعد تلوك فيهو وإتحلل في خشمك فتقوم شنهووووووووووووو،، تتذوق كل مكونات الالطعام وهنا المتعة أقصاها...
كدي عيني في عينكم وبالجد كدآ...
حكاية "بتستمتع آكثر" دي ما سرحت بيكم...
بس برضه الفي بالكم؟!؟!
مع الكُبر الواحد بيستمتع آكتر

[بابكر مخير]

بالله قدر ما الشباب حلو،، عنفوان وطاقة
قدر ما الكُبر بي ثقالته دي؟
آحلى
شوف معآي...
وإتا كبير تتفشخر ما همو بيقولوا: الكبير، كبير
وتحاول تشوفها كييييييييييف،، ما تعرف...
وهو الحاصل كله بيصغر، سيبك منهو!!! جسمك بعد كنت تلبس بنطلون الوسط 36 بقيت 32 ويعني لو عندك نفاخ 34... من جوآ المقاس بدل 93 قصر وبقآ 72،،
المصريين لمن تمشي تفصل بنطلون عندهم سؤال ظريف،،، تركن من فين يا بيه؟؟؟
ما هو مع الكُبر في صُغر وبالعكس هن بيكبرن وما بينطبق عليهن كلمات الأغنية "كبرن وسمحن" بالعكس هن "إتسجمن"...
لا بلجد الكُبر غير الكنا قلنها فيهو شيتن زين؟؟
بتبقى حنين، تحب الناس وتحب الخير
تريد تعمل لي كل زول شيتن سمح
تتمنى لو الدنيا ما فيها زعل ولا ضغاين
تريد الناس بيناتها متحابة
وتتمنى لو كل الناس ذي أبو رحيق، طيب وذي عكود، مسامح ومتل بدور التركي عايشة الحب وعاشقة الجمال..

وذيي كدي..
ما ليهو فيها أم بنايت قش. إلا عنقريب يرقد فيهو ويسرح في جمال الخلق الحلوة وزيرن فااااااااااااااااااااااضي ما ينغرف منهو شيتن لا سمح لا شين ولحافن يغطي الرجلين سترة وإحترام وركوب (حصان ولا حمار ولا ناقة ولا .... وخليها على كدآ) يشيلك يحوم بيك في الروض وسط الأزاهر والورود وبين فصوص البرتكآن
آآآآآآآآآآآآآآآآه من دآ المكان...


حلو، حلو يا كُبر،،،،
ما هو تصريح مرور بين كميرات المراقبة وعصي على مقص الرقيب...
كوكي قلتا ممكن نسرح
مش كدآ

[imported_Hassan Farah]

رمضان كريم يا ود عمتى
حكيك دا كله مفهوم بس ما قلتلينا السنون كيف

[بابكر مخير]

المشاركة الأصلية كتبت بواسطة Hassan Farah

رمضان كريم يا ود عمتى
حكيك دا كله مفهوم بس ما قلتلينا السنون كيف

كان بيحكوا يقولوا في آديس؟!
بين كل بآر وبآر، بآر
السنون كانن متراصات كدي،
لا ومضرب مثل أحسن وأكرم وإحنا في رمضان..
قال ليك ذي المصلين، الكتف في الكتف وصباع الرجل "الكُرآع" الصغير من المصلي ملاصق للصباع الصغير من رجل المصلي الواقف جمبه "وقفة خشية ووقار" واللصيقي دآ قالوا عشان ما يدهو فرصة للشيطان يقيف،،، حتى لو راد ان يتوب مااااااااااااااااا عندهو سكة..
المهم يابا دآ كان حالهن، سمحاااااااااات وبيض، صحيحات وملامستهن حرير، ليهن بريق ونضيفااااااااااااات..
تعرف يا ود خالي بلالي،، ليه سموهن سنون اللبن؟؟؟
بيقولوا عشان قايمات من لبن الأم مع أنه في أطفال أصلن ما طعموا لبن بشري، بدو وإتربو على حليب الأطفال،،، يبقآ التسمية ما ذات صلة مؤكدة...
لكن المؤكد أنه السنون ديل إن لمسن مصدر الحليب العند الإناث،،،
لا ضرر ولا ضرار منهم، لا بيجرحن لا بخربشن... (قال كيف، إرضاع الموظف المعاك في المكتب،، ما هو كان في فتوى كدآ )
السنون يابا الباقيات فيهن مترمات ومن السجيار بقن بنيات
إلا كبارهن "الضروس" ديك حدث وأحكي وأتونس قدر تدور...
في حاجة إسمها "الكراون" ودآ مقرقر وفي الجذور وديل وحاتك ماسكات في الهوى ساكت وبقن في المقابر. هو أصله كل ما تمشي طبيب أسنان يقتل ليك جذور...
هو على آيتها حالة،،
السوائل مفيدة للجسم وسهلة الهضم وميزتها الأكبر..
ما محتاج لي سنون ولا ضروس...
وبقن سنون لبن سااااااااااااااااااكت،،
بس فاقدات ال.............
خليها على كدآ

[imported_Hassan Farah]

المشاركة الأصلية كتبت بواسطة بابكر مخير

كان بيحكوا يقولوا في آديس؟!
بين كل بآر وبآر، بآر
السنون كانن متراصات كدي،
لا ومضرب مثل أحسن وأكرم وإحنا في رمضان..
قال ليك ذي المصلين، الكتف في الكتف وصباع الرجل "الكُرآع" الصغير من المصلي ملاصق للصباع الصغير من رجل المصلي الواقف جمبه "وقفة خشية ووقار" واللصيقي دآ قالوا عشان ما يدهو فرصة للشيطان يقيف،،، حتى لو راد ان يتوب مااااااااااااااااا عندهو سكة..
المهم يابا دآ كان حالهن، سمحاااااااااات وبيض، صحيحات وملامستهن حرير، ليهن بريق ونضيفااااااااااااات..
تعرف يا ود خالي بلالي،، ليه سموهن سنون اللبن؟؟؟
بيقولوا عشان قايمات من لبن الأم مع أنه في أطفال أصلن ما طعموا لبن بشري، بدو وإتربو على حليب الأطفال،،، يبقآ التسمية ما ذات صلة مؤكدة...
لكن المؤكد أنه السنون ديل إن لمسن مصدر الحليب العند الإناث،،،
لا ضرر ولا ضرار منهم، لا بيجرحن لا بخربشن... (قال كيف، إرضاع الموظف المعاك في المكتب،، ما هو كان في فتوى كدآ )
السنون يابا الباقيات فيهن مترمات ومن السجيار بقن بنيات
إلا كبارهن "الضروس" ديك حدث وأحكي وأتونس قدر تدور...
في حاجة إسمها "الكراون" ودآ مقرقر وفي الجذور وديل وحاتك ماسكات في الهوى ساكت وبقن في المقابر. هو أصله كل ما تمشي طبيب أسنان يقتل ليك جذور...
هو على آيتها حالة،،
السوائل مفيدة للجسم وسهلة الهضم وميزتها الأكبر..
ما محتاج لي سنون ولا ضروس...
وبقن سنون لبن سااااااااااااااااااكت،،
بس فاقدات ال.............
خليها على كدآ

----------------------------------------------------------
ههههههههه....شكيتك على سيدى الحسن يا ودعمتى...
هسع وصفك دا لى نفسك وللا فينى انا....اصلكم ما تستروا ليكم زول يا رباطاب لا ود خال لا ودعم....اها انا ود القليعة بى سببى من صغير مقابل التمر شئ دفيق شئ مغمول شئ معصود وحتى اليابس كترت منو انتوا ولادة الخرطوم سببكم شنو

[عكــود]

سلام حبيبو بابكير،

شايفك ماخد راحتك ع الآخر .

متابعة ومراقبة.

[بابكر مخير]

الزعل
بالله عليك مع الكُبر عيار الزعل بيزيد ذي ما تمن الدهب كل يوم يزيد....
تقوم تغيب من ناس الكشتينة، تقول "تستا" حيسألوا ولا بيطنشهو..
إسبوع إتنين وعييييييييييييييييييييييك حتى تلفون بالغلط ما شئ..
في آخر ترجع تجرجر ذيول الإنكساف وتتسيك ليهم عن قصد..
عشان ترضيهم ويفقدوك عشان يسيكوك من جديد....
غبتا من سودانيات شهر وشوية...
لا عكود، لا أبو رحيق..
حليلكن يا بنيتي بدور وهموسة ومرمر..
هو حتى فتحي مسعد كان يمكن سأل...
آها إتوا يرضوكم كيف عشان تسالوا لو غبنا ولا نموت بي غبنا؟؟

زعلة كُبر
باكر تتلاشى

[بابكر مخير]

بالله عليكم قضيت ليا إجازة من آخر يوم في رمضان ينعاد علي الإنقاص ومن لف لفه بالساحق والماحق والبلآ المتلاحق...
إجارزة نمت فيها بمعدل تلات أرباع اليوم "الأربع وعشرين ساعة" نووووووووووووم والربع الباقي في التفكير (أمشوا أقروها تكفير، عشان تلحقونا التوج)...
فكرت في أمور كتييييييييييييييييرة...
ليه إحنا السودانيين عندنا الشتارة في اللبس وقلة الأوتيكيت مع أنه حسب ما بِنعرِف ونعرف أنفسنا أننا آرقى من الأفارقة ..
لييييييه الأعراب كلهم ذي حالتنا بعروفوا وبيعرفوا أنفسهم أنهم الآرقى...
آهااااااااا لقيت أنه الأفارقة واقعيين وغير مربوطين بمركب نقصنا دآ.. تلقاهم مع الموضة آكثر تجاوب ومع الأوتيكيت حسب المفهوم الحضاري آكثر تقبل وتعامل..
لقيت أنه أننا إحنا عايشين في وهما كبيييييييييييييرة..
ما إحنا لساتنا بنقول أننا أحسن ناس وشلنا الكآس...
كورة قلنا علمنا أهل الخليج،، شوف جنس عموري بتاع العين دآ ما بس تقول "ميسي" شوف الأثيوبيات الواحدة تجي من مرتفعات تانا ملفلفة ومخبخبة وبعد شهر إتنين الجينس التقول ولدوها بيهو..
حالنا وحال أهلنا العرب...
مننا فلان ومننا فرتكان بس المشكلة دآ كله كان زمااااااااااااااااااااااااااااااااااااااان
حسي فاتت علينا..