حكاوي ود جبريل !!

[أمين محمد سليمان]

هنا نستجمع أعمال طارق جبريل ...هذا الأصلع الباذخ !!

[طارق جبريل]

المشاركة الأصلية كتبت بواسطة أمين محمد سليمان

هنا نستجمع أعمال طارق جبريل ...هذا الأصلع الباذخ !!

غايتو يا بروف تحت مسؤوليتك كل ما سيكتب هنا

[طارق جبريل]

يا شباب حا احاول انزل اي حاجة تجي في راسي
في شي كنت بديته في الفيسبوك وحاجات مخزنة في قاع الصلعة

[طارق جبريل]

حسن المثقفاتي وعبده الميكانيكي..
اصحاب فِرَد للطيش..
لكن ما بيتلاقوا الا يوم الخميس بالليل..
حسن موظف في وزارة الثقافة وعضو في حزب يساري..
يوميا بيرجع الحلة معاهو كمية جرايد وكتب..
بيقعد قدام البيت يقرأ أو يمشي للمنتديات والايام الثقافية..
عبده حياته كلها في المنطقة الصناعية.. حتى مفرداته ذاتها من نفس البيئة
حتى لو شاف ليه بت سمحة وشغالة «شل، أجيب، موبيل، توتال» بيقول ليها:
أحي أنا يا الرفارف..
أها يوم الخميس قريب المغربية عبدة بيجي لي حسن ويناديه:
يا مثقفاتي ارحكا ياخ.. «سليلة» الليلة بتقفل بدري وما بنلقى لينا «موية مقطرة»
وكدة «كربريترنا» بينفس يا ابو الثقافة وبيكون خميسنا «مبوش» ياخ..
عبدة بيرد عليه: ياخي انت جاهل ومحاولة انه الزول يرفع من قيمة الانسان جواك كلها فشلت
- يا مثقفاتي خلينا من الحنك العاضي دة ياخ «السِنَة» دي زي الاسبير الاصلي
بيلفحوها سريع سريع بعدين «حفصة» الليلة حا تكتل فراملنا ياخ..
- أرحكا ياخ.. انت ميؤس منك على مستوى رفع الوعي
- يا مثقفاتي أن عايز ارفع موية دماغي المقطرة ياخ عشان اعيش الجو
أول ما يصلوا عند «سليلة» في العشش عندهم ركن كدة براهم
و«سليلة» بتكون فارزة ليهم عيشتهم براهم و«أم فتفت مع الشطوط والأقاشي»
مسمياهم: بتاع الحيكومة وبتاع «أبيض ضميرك» وبتخلي حفصة تكون معاهم
وهي مقابلة باقي الزباين في الاوضة والراكوبة التانية..
أها أول ما «يتصلحوا» عبدة الميكانيكي بيقعد يديها بكية كدة:
حفصها يا حناني ياخ و«يغمزها» في نصها ويقول ليها: أحي أنا من دينمو النيسان دة..
- يا مغفل ياخي اتعامل مع حفصة دي ككيان.. كبني آدم.. أرقى بي مستواك شوية
- يا مثقفاتي بتذكرني بي حنان حبي الابدي زي مكنة البوكسي 78 ياخ
جاء ختفها مني واحد مثقف زيك ووداها السعودية... احييييي انا يا قلبي
ويقعد يبكي ويحضن حفصة.. بعد يتم جوعيرتو..
ولمن يسمع أحمد احساس بيغني في الراكوبة: على النجيلة جلسنا بيقول لي حسن:
كنت بوديها حديقة القرشي..
هههههههههههه
- انت يا عبده ما حصلت اطلعت علي كتب وقراية يعني..
- مطالعة قصدك
- ايوة
- يعني المطالعة دي بتخلي الزول مثقف
- ايوة بتوسع مداركك
- طيب انت قايم بينا ومثقفاتي واسبير ياباني اصلي اتاريني انا زيك واحد
- كيف
- ياخي انا قاري خمسة كتب «مُطالعة» في الابتدائي.. بالله هو ناس: طه القرشي
ديلاك ياهم الثقافة يا فَردة..
في صحتك يا زميل الثقافة..
ههههههههههههههههههههههههههههههههههههههههه

[أمين محمد سليمان]

المشاركة الأصلية كتبت بواسطة طارق جبريل

غايتو يا بروف تحت مسؤوليتك كل ما سيكتب هنا

أنا مسؤل من كلامي يا طارق ...
مسؤل من انك أصلع ...و مسؤل من انك باذخ ...و مسؤل من إنو مافي زول حاليا بكتب حكاوي يومية بلغة عالية زي لغلتك !!
اكتب ياخي ... ربما يرفع بك الله قليلا من قبحنا المنثور في هذا المكان !!

[طارق جبريل]

الاندومي..

حمودي: بابا انا جعان
- والله يا ولدي انا ذاتي مهوي كدي ارحكا نكابس التُكل
- المطبخ.. المطبخ يا بابا «الكوزينة»
- كمان جابت ليها مغربي.. امشي قدامي
- التلاجة فيها ويكاب يا ولدي ودمعة جداد تقول يا ليل.. عشرة دقايق واظبط ليك القراريص
ناس امك ديل ما اظن يجوا هسي
- يا بابا انا ما عايز قراصة
- يا ولدي القراريص دي بترقدنا كاويق ونمشي نديها تكية جنب التلفزيون
- لا ما عايص قراريص
- طيب عايز شنو يا فقُر انت
- اندومي
- شنوووووووو
- اندومي يا بابا
- دي موش الشعيرية البي شوربة ديك
- شوربة شنو يا بابا اندومي
- طيب ما نسوي لينا شعيرية بي لبن بتكون سنينة
- يا بابا انا عايز اندومي
- اها واندومي دي انا اجيبها ليك من وين
- الرف الفوق داك يا بابا امي قاعدة تختها هناك
- طيب النشوف.. دي
- ايوة يا بابا دي
- اها ودي بيسوووها كيف
- ماما قاعدة تخت في الحلة الصغيرة ام غتاية قزاز شوية موية وتختها في البوتجاز
- سمح.... اندومي يا محمد والدمعة ام اوراك الجداد قاعدة؟؟
سويناها وختيناها في الصحن وقعدنا في الطربيزة
- بابا موش قلت جعان
- جعااااان
- اكل لذيذة يا بابا
- أنا آكل البتاعة دي الممصرنة دي المتل الدودة الشريطية دي
انا ود جبرين ود نفيسي بت البغاديد آكل اندومي يا ولدي
جملة الايمان نفيسي كان عايشي وشافتني باكل في ديدانك دي يا ولدي
جملة الايمان كانت حلفت علي طلاق تاني ما اخش شبا..
اندومي يا حمودي
اندومي..
دي ولادة شنو دي..

[طارق جبريل]

لباس الدمورية...

تتذكروا لباس الدمورية داك..
البيعملوهوا من باقي الدمورية حقت المرتبة
ويقولوا ليك امشي جيب لستك بي شلن
اللستك داك البيكون ملفوف في ورقة بيضاء فيها كتابة بالازرق
وبيكون في نفس الرف مع السفنجات الصينية..
الحاجة تكون قاعدة في بنبر بتنجد في المرتبة
وتناديك وتمشي جنبها في نص الحوش تمرق ليك اللباس القديم
وتخليك ميطي وتقيس ليك اللباس الجديدابو استك
يا سلام ياخ لمن تلبسوا وتمشي تلعب بلي ولا كمبلت
ولمن تجي ترتاح تحت النيمة من اللعب تقعد تحكحك في الحتة
بتاعة اللستك ديك وتدي اللستك جرة كدة لي قدام
تلقى مكان اللستك كراضم كراضم كدة والحاجة خنقتو ليك
ولمن تتني وتنيش بي الجلة اللين وتديها مطة
ويقول كدي اللباس يقول كرررررررررررررررر والهوا يدقشك
وترجع تاني للحاجة وانت لابسه يخيطوهو ليك والابرة تديك طعنة
وانت تقعد تقول آي آي وتنقنق..
ياخي الفقر دة مرات فيه حاجات سمحة يعلم الله
هههههههههههههههههههه

[طارق جبريل]

علاء
رواية نادي السيارات للأسواني..


الأسواني في الرواية دي بيسوقك سوق..
كلما تقرأ فصل تشتاق تمشي للفصل التاني بي شوق كبير..
رغم انه مرات بتحس انه الفصل رواية في حد ذاتها..
لكن اثناء القراية بيخليك بالخيال تمشي للفصول التانية وتربطهم..
بيخليك تدخل في الشخصية كأنما تحكي عن نفسك وعن محيطك..
يمكن بحكم الدراسة في مصر في حاجات كتيرة كان ساهل علي اتخيلها
لكن رغم ذلك القوة السردية لدى الاسواني بتخليك سابح في حيز الرواية
وتجبرك لغته المحكية على المتابعة بذهن متقد ومتحفز..
المجتمعات المخملية تجد في الجنس متعة وخروج عن المألوف..
المجتمعات البسيطة تجد في التعاضد والتلاحم والمساعدة متعة فوق التصور..
رواية ممتعة حد التخمة..
ــــــــــــــــــــ
ملاحظة عابرة:
«المثلي» الموجود في رواية «عمارة يعقوبيان» كان سبب مثليته
خادم اسود كان يفرغ مكبوته ذاك في طفولته..
«المثلي حميد» الموجود في رواية «نادي السيارات»
هو اسود أيضا ونتاج لعلاقة محرمة..

لا تعليق

[طارق جبريل]

المشاركة الأصلية كتبت بواسطة أمين محمد سليمان

أنا مسؤل من كلامي يا طارق ...
مسؤل من انك أصلع ...و مسؤل من انك باذخ ...و مسؤل من إنو مافي زول حاليا بكتب حكاوي يومية بلغة عالية زي لغلتك !!
اكتب ياخي ... ربما يرفع بك الله قليلا من قبحنا المنثور في هذا المكان !!

يا أمين
أيضا سأكتب وفاء لخالد
الرجل دة يحتل في دواخلي كما هائلا من المشاعر..
رحمه الله..

ووفاء لعكود لعهد قديم بيني وبينه

ووفاء ليك انت ونبراس وسارة (ستنور) وكل الجميلين هنا

[طارق جبريل]

حنين..


ريحة لِبيني مقننة في مُغربيي..
صوت حملان ترضع في أماتها..
حَرِف أليل طبطاب في «دُوكي» من نار الجريد..
صوت نعجة تلحس في جناها بعد مخاض..
ريحة «لِبِى»..
«روبا» بي فطير في قدحا من الدبكر..
قرقوشا سمح و«طَبِق» كبابي الشاي..
قمرة من تالا «السقوف»..
نِغيمي ألت طمبور من لااااااااااافوووووق..
رمال وصُحبة ووَنَس..
ضو فانوس من تالا التُكل..
خُصل أسود من سواد الكون..
خِصر يتمايل متل «العرجون»..
عيون متل القمرة في سماها..
حكاوي حبوبة..
فاطنة السمح.. و«مرة الأمير»..
وشمطت قمطت..
دغشا بدري..
صلاة الصبح.. وليك يا الله الحمد..
«الكرجة» في «طاقة» التُكل..
«طير الجنة» في «كفاي الجداد»..
صوت قمريتين فوق «كروقتين»..
«طوريي» و«أربل» و«لبقة برسيم»..
«الجدول الفوووق»..
«الجدول التححححت»..
حوض الملوخية..
قصيبة «تَقنَت»..
عرقا يَخُر..
«فكة» ريق..
«قِفيز تَمُر»..
«دِفيقات» «خودور»..
«أم راس»..
«بركاوي» و«قنديلا» و«كُلوم» و«رَشا» و«تَمُود»..
رصيص «هديمات»..
قطر كريمة «اللحد» و«اللربع»..
لواري «قَبَلو»..
وشوق شديد ومحنة حدها السماء..
حبوبة «نفيسي»..
عمي «الطيب ونورة»..
«السواعير» و«البغاديد» و«القرونة» و«الكنيشاب» و«الكرسناب»..
«حبوبتي الفردوس بت الريح»..
«بت الجدي» و«خدوم» و«حواء بت الخضر ود كنيش»..
«سعاد بت الجدل».. «زينب بت ابو دية»..
برج ود درقي..

إنا لله ياخ

[أمين محمد سليمان]

المشاركة الأصلية كتبت بواسطة طارق جبريل

يا أمين
أيضا سأكتب وفاء لخالد
الرجل دة يحتل في دواخلي كما هائلا من المشاعر..
رحمه الله..

ووفاء لعكود لعهد قديم بيني وبينه

ووفاء ليك انت ونبراس وسارة (ستنور) وكل الجميلين هنا

و ده بالظبط العشم يا طارق !!

[طارق جبريل]

«شات» نفيسي وبت بلولة...


-نفيسي: ياولدي اقطعولي خلوني اللمشي البلد
- إنت ضايقي كدي فوق شنو
- يا حبيب قساي هناك حباني وصحباتي وبلدي وهني شيتكم كله كُتور
- نان نحن مانا حبانك.. بعدين مو ياها بت بلولة دي بنخليكي تنضمي معاها
- إنت باقيلي جنيت.. انضم معاها كيفن وانا هني وهي في البلود بهنوك
- أصبريلي دقايق انا بخليكي تنضمي معاها
- أنا ما قلتلك شيتكم كله ماهو ياهو..
(ضرب تليفون لي ود العم وقاله أدخل في الاسكايب وشغله وادي حبوبتك بلولة خلها التنضم معانا)
- أها جيبي إضنيك النخليكي تنضمي مع بت بلولة..
- ودة أكنو شنو الخرابات ديل العلي الدفيق اليابس في راس الشوكة ألت الكروق (سماعات اللاب توب)
- إنت بس غزيهن في اضنينك واتكلمي مع بت بلولة..
- ودي مني دي المتقولعي كدي وخراباتها في لاااابرة في الطلزيون دي (شاشة الاسكايب)
- دي بت بلولة انت بس انضمي معاها قوليلا ألو..
- نان الشي مالو مو متل تاالفون دكان ود تميم
- أماني ما حجتك كتيري إنت بس قولي ألو
- هلوووووووووووو
- أييي... نفيسي
- هي وووووووووووووووووووب علي إنت يا بلولة جيتي من وين الشي دة لا يبقى كافته جن
- شن عرفني آآآنفيسي تراهم البطان ديل قالولي أنضمي مع بت بغداد وغزولي خرابات سوود كدي
في اضنيني علي حصاية التمُر وختولم طلطزيون في عِبي وقالولي انضمي
- وحات نضري الشي لا يبقى جن.. كيفن اشوفك وانت في شبا
- آآآآبعرفه آآآنفيسي اصلو قلبي دة بقى يسوي في الررررب ررررب رررررب
- نان آآآبلولة مالك متقولعي كدي و«شــ.....» يتلولحن علي المشلعيب كدي.. جنيتي
- نان يا بت بغداد جانا جنس سموم من ولدوني ما شوفتة زيه.. دحين فطرتو شي
- أييي.. جابولم قراصة وشيتا كدي يقولوا السُجك هش ورُخوص متل البُطان
الملَقِنَهم للطهار..
- ههههههههههه هيي سوووووود علي ودة أكنو شنو
- آآآبعرفه تراني مسكتو لوغدتو أماني ماهو طاعم.. خليت «الحَرِف» ضومة ضومة وقَبَل عليهو ههههه
- إنت عاد آآآآبتتقدري باقيلي فسحوكي وشبعتي في الحوامة
- أسكتي يا بلولة.. نحن مو ميتين بهنوك ضومة ضومة
- كيفن
- من دخل هني دخلوني في أويضة فيها طلزيون وفيها شيتا كدي علي راس الكُنوش
قالوا كدي هبشوهوا إن كان كدي يجيني الهواااا بااااااااارد متل اللكني قاعدي في قيفة بحر الساموري
وقلت كدي اتشنقلت علي قفاي وقلعت توبي ورفع رجليني والمحفضة مدلدلة من نصي كدي
والهوااا دة ضربني في «جـ.....» لااااامن بقيت ارجف وقلتلم الشي أغمتو.. أنا ضومة بِرِد هههههه
- ههههههههه بت «الغلــ......»... ههههههههه (النسوان الكانن قعدات جنبها ختن الطرح في وشوشن
ميتات من الضحاك والبنات قامن جاريات كلو كلو)..
- هههههه نحن مانا عايشين يا بلولة ضومة ضومة موسى غمتني في بيتو في شبا وود عمو غمتك
بهنوك وبقينا نرمي في البُطان لانا فارزين شي لانا عارفين اليخربنا..
- ايييي يوما اسود عرسولنا القرونة ديل هههههههههههههه
- دحين قاعدي تشوفي الطيب ولدي..
- أيي شوفته امبارح مندلي علي تمركم
- لا يبقى الراجل «اللـــ...» ود «اللـ.....» حماهو يسقي برسيمو تاني وضبلن عليه
- بري آآآبعرفه لكن فتح ولدي جاء طالع قالي سقينا البرسيم.. إنت البرسيم اليغمتك
قاعدي في الطراوة البرسيم وين تطيري..
- اسكتي يا بلولة... جابولي «حُقة» جديييييييد وليها غتاية صفرا (علبة بندول فوار)
وأصلو عندهم صعوط هني يكهرب يخليكي راقدي علي الدِلِق ضومة ضومة
- لا يبقى أليل نصارى يا خرابة هههههههههه
- آآآبعرفه... وحاتك من أختلي سفة أموع علي كعك العيد ههههههههههههههههه
- الرسول آآآنفيسي جيبيلي منو
- إييي شيتا كتير يدوني ليه وأغمتو فشان أجيبو ليكي معاي.. وعندهم جيران كدي سمحين خلاص
جابولي تياب وملايات... أماني ماهن عندهم نسوان سمحات
- كيفن
- وحاتك يا بلولة المرة من شدة ماها سمحي أقرب أقرصها في «صُـ.....» واليدين متمرات وفيهن حِني
ماها متل ألتنا علي «نوريق» العيش.. ملولوة كدي في الاصابعين علي بيت الزنانين...
- صلاتي علي محمد
- أييي وقالولي حتى البكيات هني عندهم حني في قعر الرجلين
- هي سووووووووود علي
- نان إنت قايلاهن متل رجلينك المشققات علي قَعَر «القِحِف»
- ههههههه الله لا كسبك
- وحاتك يا بلولة الكرعين من تحت مللللللللللللللللللللللللس لا تعرفن كرعين لا تعرفن «ضراع» ههه
- وووااااااكغستنا نحن الرجلينا لدغن بالعقارب
- إييي العقارب اليلحقنك أبوي
- ههههههههههههههههههههههههه
- وأصلو بلولة ما شوفتلي واحدي ساولا مشاط.. وكتين التياب ديل يقعن من روسيهن
تلقاهن مدردمات شعرن علي درادم «البقنيي» ههههههههههههه

تيت تيت تيت تيت النيت قطع
هههههههههههههههههههههههههههههههههه

[طارق جبريل]

لِعِب لِعِب....


أربعة علب لبن وسكين قديمة.. وسفنجتين قدام..
شوية جمُر.. علبة صلصة.. شوية سلوك..
سلك طويل للدريكسون.. ضُل نيمة..
تفتح العلب الأربعة.. اتنين ترسم فيهم جنب اللوري..
وبي نص علبة الصلصة تعمل نص دائرة قدام وواحدة ورة للعجلات..
تمسك علبة تعمل فيها تنيتين قدام واتنين وراء للعجلات.. شاسي وكدة..
بي مسمار تبدأ تعمل فتحات في جنبات اللوري والشاسي..
تبدأ تتني العلبة الاخيرة من مقدمة اللوري وانت طالع،،
بالسلوك تربط الاجناب في الاول.. وبعداك تربط التصادم..
بعد تنتهي تمشي تخت علبة الصلصة جنب حلة الملاح بالجنبة كدة..
لحدي ما تسخن تمسكها تقد بيها السفنجات القديمة عشان تعمل اللساتك..
تسخن السيخة وتعمل ليك خُرم في اللساتك..
تركب لستكين قدام بي سلك في التنية القدامية من الشاسي وتضغطهم
بي قطعة من سير السفنجة في الجنبتين..
تركب اربعة لساتك في الجنبات الخلفية وبرضو تضغطهم بي قطعة من سير السفنجة في الجنبتين..
تدخل الدركسون في سلك اللستكين القداميات..
والجزء الفوق تعمل فيهو دائرة.. وتربطه بي سلوك ملونة كدة كنوع من الكشب..
تقوم تديهو لزة عشان تشوف حركة اللساتك ما تكون مضغوطة..
تملأ ضهرية اللوري «فِريد».. والشحنة كدة تكون ظبطت..
وتديها اتنين تلاتة عننننننن. عننننننننننننن..
وتبدأ تخيت شوارع الحلة بي لوريك دة..

كنا بنلعب ياخ..
بنلعب جد جد ياخ..

[طارق جبريل]

نوستالجيا...

ما أحلى تلك المساءات... برنامج (لقطات) وفريد عبد الوهاب... ABBA وThe Eagle.. صوت ديمس روسيس العذب.. وboney M.. وزمهرير رأس السنة.. ثلاثة عناقريب... تلفزيون في طربيزة.. جلسرين في الشباك وبرطمان كركار.. علبة فيكس.. شقوق في الرجلين والوش.. (يا ود اتمسح بالجلسرين).. (يمة البرد ياخي)... (اصبروا مديدة الحلبة قربت تنجض).. كانون وفتحة بالجنبة وشوية رماد وفحم يطقطق تحت (حلة مكرتبي) فيها مفراكة بالجنبة... وشوش تحت البطاطين شايلة (كورية رمضان كريم الصغووويري) بتتفرج في الساحر وهو يحول الاوراق إلى حمامة.. اندهاشات على المحيا.. تمتمات زولة حنينةالله يغتي عليكم ويطرح البركة فيكم)..(قوموا صلولكم ركعتين في السنة الجديدي دي فشان الله يفتحها عليكم).. فرقة جاز وابتسامة فريد.. سنة جديدة وإمنيات حد السماء.. فيلم (western) او اعادة لحلقة من (the little house).. صوت الريح في شباك الخشب.. صوت الطشت جنب الماسورة بعد أن عبثت به الريح... ثبات ونوم عميق.. ريحة (لبيني مقننة) في دغشا بدري.. بستلة فيها لقيمات.. صوف البطانية احمر احمر في الراس.. فرشة اسنان جنب الماسورة.. كباية (شوب).. خشم منفوخ من لقيمات مغتسة في الشاي..كورة شراب و(ضقِل) و(حجلة).. و(حلة سخينة) وصاج وحطب و(طبطاب) وونسة فوق الحيط على ضهر البنابر.. ومحبة لله وشوق للبلد..

إنا لله ياخ

[طارق جبريل]

شووووووق..

المُغربية ياخ.. المغربية ديك.. وتباشير الخريف هابة كدة..
مساءات الخرطوم كانت عجيبة ياخ..
وتسمع صوت الملاية وهي بتهب في العنقريب..
ويجيك صوت عمنا محمد صالح ينادي للمغرب.. صوت رخيم وجميل..
رجال الحي وهم بي عراريقهم وسراويلهم يضحكون وهم ماشين الصلاة..
ريحة الشاي المقنن والفانوس في طربيزة المكوة..
ظلال امك هي داخلة وهي طالعة من التكل..
ريحة اللقيمات.. كباية الشُب.. بنبر الحبال وبنبر البلاستيك..
الماشة يحركوا بيها الجمُر عشان براد الشاي..
صوت غنم خالتنا أم النصر وهي بترضع في العتتان..
الهبابة معلقة في مسمار قدام باب التُكُل..
علبة «الختة» في عنقريب صغير جنب التكل وفيها قلم كوبيا واسامي ناس الختة..
صوت حمامة انزلقت من راس الصفيحة المعلقة في بورج الحمام..
«هنا أم درمان».. الرادي معلق من جلدة كدة في مسمار كبير في شِعبَة الراكوبة..
نشرة تمانية.. اخبار الموت في ارجاء هذا المليون ميل وأماكن الدفن..
خلف الله حمد:
أنــا فــي الـتـمني ديـمـه هـديلي سـاجع
مـا لـقيت لـي مـغيث ولا لـقيت لـي مـراجع

الله الله ياخ..

داير أشوف حبيبي اليوم داك شفته رايق ودمعه ناقع
أســود شـعـره حـالـك أمـا صـفاره فـاقع
تـتـلاصف خــدوده لا حـجـاب ولا بـراقـع
أشـوف لـعسو ونـواعسو جـل الـباري صانع
أشـوف فـي خـده شخصي وفي صدري المضارع

صوت الريق والشيالين.. طرب من جوة ياخ... من جوة شديد

يـفـر خـيت بـسـمه يشبه بـرقـاً لـيـله هـاجـع
يـرفـع لــي رشـاشـه يـسبل نـظره واقـع
دايــر أشـوفو غـافل ودايـر أشـوفو جـاذع
محنن دون قنله وحدو وتوبو واقع
يـتـغطى بــي سـواعده ويحنو كـانه واجـع
ويلتجى بى مرافقه واطراف المضاجع
وتتلب فوق شفاهه لؤلؤة المدامع
يــردد لــي نـغـيماً تـشتاق لـي الـمسامع

عجيب يا ود الرضي انت ياخ كلامك بيدخل توووووووووش للوجدان

أعـاين فـيه وأضـحك وأجـري وأجـيه راجـع
مـتـلاعب لـيـس إلا مــا مـوضوع مـطامع
أقـيـس بـالليل بشـعره ألـقى الـفرق شـاسع
اقيس الفم بودعه القى الودع واسع
دي مــا بـيـلقاها زول زي صـيـده نـاجـع

وصف مبالغة ياخ.. حُب... حُب شديد..

صوت وهمهمة غناء وصوت صحون بتتغسل..
بختها العِدة بيك.. سعيدة في عضمها دة.. سعيدة ياخ..
سعيدة ليفة العدة في أناملك..
سعيد الجردل الشاف عيونك ومويته الوسخانة راقت..
سعيدة السوستة وعرق الرقبة نازل فيها..
سعيدة الريح البتمايل ضفايرك ياخ..

قمرة في نص السماء.. رفعة رجل حد الركبة..
حِلِم بعيد.. جميل ممتع.. أماني حدها السماء..
ضمة إيد.. همسة ريد.. بسمة ثقر..

«هنا لندن».. صوت «المدفعجي» تجوب أركان الكون..
«صوت العرب».. الأبنودي يقرأ «يا عبد الرحمن»

ثم..
صوت مسجل ما بابه مكسور..

أي قليل يا طيف أقيف وأرجاني
وين فايتني عابر
وأنا شن حارس وراك أنا تاني
ياني معاك مسافر
وين حتى الطيف رحل خلاني
ما طيّب لي خاطر

الله عليك يا محمد كرم الله ياخ..
رنة طمبور تدخل الوجدان من غير استئذان..
ومحمد سعيد دفع الله يجعل الحروف تتموسق..

رنة طمبور تاني:
حبي فارق تاني ما ظنيتو يرجع..
آه يا خلايا لي قلبي الموجع..

إنا لله ياخ..