اقتباس:
المشاركة الأصلية كتبت بواسطة تاج السر الملك
صحوت على صوت ( انجيلا)
|
أكيد آحتراماتي وود ...
تعرف يا تاج ... بلا شك (الموفمنت) الذي يخرج من وراء عدسة أسهل بكثير من الخوض في تفاصيل يخطها بنان ويقراؤها بشر ويترجمها عقل كصورة مشاهدة فعلا وقد تختلف هذه الخاصية من شخص لآخر كما لا تختلف( نيكون وجي في سي) في تصوير ما تقع عليها تلك البؤرة العجيبة ... لتكوين صورة خيالية وتفاعلنا مع أحداث معينة نحتاج للتفاصيل والكثير مما أوجد هذه التفاصيل وليس العكس ... تماما كما أقرا أياً من نصوصك المزدحمة جدا والمتشعبة ... تكاد لا تترك مجالا رحبا أو متسع تتحرك فيه الشخوص على مرأي من البصر و هي التي بلا شك صنعت الحدث ... كالذي يدس السم ويدعونا لوجبة دسمة بالرغم من كلامك في بوست سابق !!! شنو يعني عاوز تكتلنا وبنات عمي ما سمعن بي !!!
اقتباس:
المشاركة الأصلية كتبت بواسطة تاج السر الملك
و لكن الكتابة افش الى مرارتى لأن فيها المشاركة ، و هى مثل طبق حديد ساخن تقذفه من يدك و تقعد تتفرج على من يمسك به.
|
وعارف زي شنو :تقوم تجيب لي صحن كبدة حار شديد ... اخد لقمتين تقوم تشيلو مني ... وتجيب بدالو صحن فول برضو سخن شديد آخد لقمتين تقوم تشيلو ... وتجيب تاني صحن كمونية وسخنة شديد اخد لقمتين وتقوم تشيلو لحدي ما توصلني للسلطة وفي الوكت داك اكون انا رقدت سلطة!!! ولو سألوني فطرت بشنو اقول ليهم ما عارف ... بالضبط دي حكايتي معاك ... وما عيب اقول ليك احساسي المباشر حتى اذا كنت بفضح بلادتي إن صح التعبير ... وبعدين ما تفتكر دي رؤية نقدية ... دي رؤية شخصية حقتي براي ... مع انو ما مطلوب مني افهم كل حاجة في الدنيا دي ... لكن اهو الواحد بقابض لحدي ما ربنا يقبض روحو امكن نطلع منها بنتيجة تخفف على الواحد حاجات كتيرة ... ما اكضب عليك بتتعبني جدا وكان من المفروض توديني براحه براحه لمكان انت ماشي وبأقصر طريق ... لكن زقاقاتك كتيرة ومطباتك أرضية وهوائية دشدشتنا معاك ... وبعدين لم تقعد ترسم لينا بالكلام صورة واقعية أو حتي لاند إسكاب بقلم ثري اتش بوينت ثري ... اصعب بكتير من لوحة ممكن الواحد يقيف فيها دقايق معدودة ممكن يكون فكرة وممكن لا على حسب ظروف اي واحد ووقتو البسمح ليو ومدى شطحة تفكيرو وغالبا الغاوون هم الببراو الشغلانة دي ... وثلة من الآخرين ... وآخرين يجذبهم اللون الصارخ ليس إلا ... فيا عزيزي انت مزدحم جدا وبتدينا zip file وتقولينا فكفكو بطريقتكم وطريقتك دي متعبة جدا لزول زيي بدخل المنتديات على عجل (حديد) لانو لساتك راسي كلها بتكون مبنشرة في اللحظة دي وبدخل اخد ما قل وزنو وشنو كدا ما عارف ... واقوم اخش اقرا لى زول زيك والوقفة الياها ... اتنح لم ما افهم حاجة مع اني شفت صورة قدامي كاملة بس ناقصة كم تراك صوت ومؤثرات جانبية دي بجيبا من عندي ... وكمان انت عارف الفهم العام للنص برضو في حد زاتو مشكلة ... وقد لا يصيب ما تذهب اليه في مقتل ... لذا إما ان تفرد مساحة اكبر لتتجول كاميرا الكلام في اكثر من مساحة لتعادل شخصوك كمية التفاصيل الموجودة في النص ... او تخلينا واقفين في النُص وما نعرف نمشي وين !!! ودي ممكن تخلق في الواحد تخوف من الدخول في دهاليزك ومن خاف سِلِم ...
وسلّم لي على طيارة الرش والصرصار الواقف بى جاي
الكلام دا من زول اخوك وبحبك .. اقسم بالله بحبك...
ملحوظة: مفروض نكون فترنا من يا سلام وسرد جميل وإديك العافية ... اااااي إديك العافية لكن لو بتتعبنا عندنا فيها راي !!!
تحياتي من جووووووه