السوداني بين المظهر والجوهر والشغل الدُراش

[شبارقة]

المشاركة الأصلية كتبت بواسطة عكــود

سلام يا شبارقة،

كوباني قال : يعني نحن بي شناتنا دي مافي لينا طريقة أبداً نبقى فنّانين وللا شنو يا عاصم؟
ردّ عاصم: والله كتّر خيرهم الخلّوك تقدّم برنامج.

المظهر مهم يا شبارقة . .
وللفنّان أهميتو تتضاعف.

[align=justify]لقد إستمتعت بهذه الحلقة كاملة ومعظمهم كانوا مهندمين ....وكوباني رغم شناتو (وبإعترافه عن نفسه) إلا أنه أنيق ومهتم بمظهره ...لأنو ما معقول يكون شين ومبشتن كمان...ساعتها يبنطبق عليهو : أعاين فيهو وأضحك وأجري وما أجيهو راجع ..ونجري للرموت جري [/align]

[همس الشوق]

الاستاذ عكود

بصراحة تطرقت لموضوع بجد حساس ومهم وشغل بال كثير منا ............نحن السودانيين بنعتبر انه الاهتمام بالمظهر هو من فوارغ الامور وما مفترض يكون من الاولويات ... بس في اعتقادي وكما سبقت انه هو إنعكاس لشخصية الانسان ..... خصوصا في مجالات العمل فالاهتمام بالمظهر هي اول شهادة يجب ان نقدمها للحصول على وظيفة ...
وليكم مثال بسيط ..........
بحكم عملي في مكتب محاماة تقدم احد السودانيين لوظيفة محامي ....
وللاسف شأنه شان كل سوداني بساطة ما بعدها بساطة ...أولاً عدم اهتمام بالمظهر يعني المظهر (0) ومن ثم الشهادات في ظرف والظرف ملفوف في شكل اسطواني .... ومن ثم طريقة الجلسه والانتظار لمقابلة صاحبة المكتب ............ وقام ختمها بي نومه على الكنبه ..... والاشد اندهاش انه وبالصدفة صاحبة المكتب طلعت ووجدته يغص في نوم عميق ... سألت السكرتيره من هذا ؟ قالت ليها واحد عايز يقدم لوظيفة .... ضحكت ... وقالت ليها ... صحيه وقولي ليهو أمشي كمل نوم بعدين تعال ابحث عن عمل .. عليك الله دي حالة دي ... وبعدين انا أشك انه الظرف الاسطواني ربما كان يحوي على شهادات لا يستهان بها ولكن كيف الوصول اليه ... وشيخنا نائم ..........

[عكــود]

المشاركة الأصلية كتبت بواسطة شبارقة

[align=justify]لقد إستمتعت بهذه الحلقة كاملة ومعظمهم كانوا مهندمين ....وكوباني رغم شناتو (وبإعترافه عن نفسه) إلا أنه أنيق ومهتم بمظهره ...لأنو ما معقول يكون شين ومبشتن كمان...ساعتها يبنطبق عليهو : أعاين فيهو وأضحك وأجري وما أجيهو راجع ..ونجري للرموت جري [/align]

سلام يا شبارقة،

أتّفق معاك في إنو الحلقة كانت من أجمل الحلقات . .
أعتقد السبب الأساسي لنجاحها كان، كوباني وتمكّنه من إدارة الحوار، توزيع الفرص، وروح الفكاهة العالية التي يتمتّع بها.
ده طبعاً بالإضافة لأناقة كوباني وكل المشاركين.
لم أسمع عاصم البنا يغنّي أفضل ممّا غنّى في تلك الحلقة.
ترباس كان متكيّف جدّاً والجميع كانوا في أحسن حالاتهم.

ندمان إنّي ما سجّلتها.

تسلم يا شبارقة.

[عكــود]

سلاااام يا حلم الأماسي،

إنتي بتغيبي وين؟

[align=justify]وليكم مثال بسيط ..........
بحكم عملي في مكتب محاماة تقدم احد السودانيين لوظيفة محامي ....
وللاسف شأنه شان كل سوداني بساطة ما بعدها بساطة ...أولاً عدم اهتمام بالمظهر يعني المظهر (0) ومن ثم الشهادات في ظرف والظرف ملفوف في شكل اسطواني .... ومن ثم طريقة الجلسه والانتظار لمقابلة صاحبة المكتب ............ وقام ختمها بي نومه على الكنبه ..... والاشد اندهاش انه وبالصدفة صاحبة المكتب طلعت ووجدته يغص في نوم عميق ... سألت السكرتيره من هذا ؟ قالت ليها واحد عايز يقدم لوظيفة .... ضحكت ... وقالت ليها ... صحيه وقولي ليهو أمشي كمل نوم بعدين تعال ابحث عن عمل .. عليك الله دي حالة دي ... وبعدين انا أشك انه الظرف الاسطواني ربما كان يحوي على شهادات لا يستهان بها ..........[/align]

زولك ده يبدو إنّو متعدّد المواهب . .
من طوْطوَة للسي في ، للبشتنة في المظهر
علاوةً على تأكيد مقولة (السودانيين كسالى)
وذلك بعد إنسداحته وشخريبتو.

ولكن كيف الوصول اليه ... وشيخنا نائم

ممكن جدّاً شيخنا النايم ده يكون عبقري زمانو و تتسابق عليه مكاتب المحاماة . .
بس على قولك من وين الناس تعرِف؟
لو ما حسّنّا من مظهرنا لنكسب الجولة الأولى . .
والإنطباع الأوّل؟

لكِ كل الشكر.

[فيصل سعد]

حمد الله سلامة يا عمدة و اظهر بيجاي

[عكــود]

تسلم يا فيصل على تعمير الكومر.

بالمناسبة دي أحكي ليك دي:
أوّل أمس بحضر في حلقة في قناة الشروق وكان لقاء مع مسؤول في جمعية حماية المستهلك . .
بالله المذيع ما أدّى الضيف أي فرصة عشان يرد على سيل إتّهاماتو.
كان بيسأل زي 5 أسئلة مرّة واحدة (الأسئلة كلّها تجريم)، كل سؤال يحتاج لمدّة من الزمن عشان الضيف يرد. أوّل ما يبدأ في الإجابة، المذيع ينط تاااااني بزي 7 أسئلة كده . .
وهكذا إلى أن قال:
نسبة لضيق الوقت المتبقّي من الحلقة، نشكر فلان الفرتكاني من الخرطوم.
بدون مبالغة، والشاف الحلقة ممكن يؤكّد، الضيف لم تُتح له أكثر من 10% من فرص الحديث . .
الباقي قام بيهو المذيع.

يعني شُغل ما شفت أدرش منّو.

[فيصل سعد]

[align=center][/align]

[فيصل علي]

الاخ عكود
الاخوة المتداخلون الكرام
الاخ فيصل ناكت البوست
لكم التحية
تناولتم موضوع اللامبالاة والاستهتار الذي اصبح كما هو واضح من مداخلات الاخوة انو واسع الانتشار .انا مررت بكثير من هذه التجارب وكنت بحاول اقنع نفسي بي انو يمكن تكون دي حالات فردية .وفي تقديري انو نحن ناس متطرفين ومفرطين في اي شيئ وذلك هناك صورة اخري قد تكون مقابلة او تمثل وجه اخر لموضوع البشتنة والاهمال وهي محاولة ابراز الاتيكيت والتحضر والبريستيدج .اذ اصبح الاحتفال باعياد الميلاد ..وعيد الحب ..والتشبه بزي وقصة شعر بعض المغنيين والمغنيات هذا طبعا ممارسة عند فئة الشباب .لكن الموضوع لا يخلو من موافقة من او الاستحباب من اولياء الامور والمسالة وصلت مرحلة التصنيف بالتخلف اذا انت ما اهتميت بعيد اليلاد او الحب او ما شابهها من اعياد ويمكن تجيب ليك اللوم يعني المسالة وصلت حد الاستلاب .انا شخصيا بشوف اذا كان ما في خيار او منطقة وسطي بين البشتنة والبريستيدج احسن لي سوداني مبشتن من سوداني مسخ
شكري

[عكــود]

[align=justify]الفيصلان،

نهاركم سعيد وكل عام وأمنياتكما قد تحققت.

انا مررت بكثير من هذه التجارب وكنت بحاول اقنع نفسي بي انو يمكن تكون دي حالات فردية .وفي تقديري انو نحن ناس متطرفين ومفرطين في اي شيئ

كلامك صاح يا فيصل . .
متطرّفين في كل شي، بس في مظهرنا وشغلنا الدُراش ده زايدين المحلبية شويّة.

اذ اصبح الاحتفال باعياد الميلاد ..وعيد الحب ..والتشبه بزي وقصة شعر بعض المغنيين والمغنيات هذا طبعا ممارسة عند فئة الشباب

ديل النوع البيقولك "واااااو" و "يااااي" غايتو اللهم طولّك يا روووح.

في إجازتي الفاتت، كنت عايز إشتري جزمة من مكان في الشهداء، وبعد لف كتير عشان أعرف المحل، دخلتو نصّة نهاريّة كدي، في واحد قاعد في كرسي خلف الكاونتر، وقف (قلت فيهو الخير والله)، وفرش جريدتو فوق الكاونتر و واصل يقرا فيها. قلت ليهو (عايز جزمة مقاس 42 )، نادى زميلو الجوّه (عليك الله يا فلان كدي شوف في الكرتونة الفي الركن ديك، جيب مقاس 42) وهو مواصل قراية ويتشهّق. عشان ألفت نظرو، قلت ليهو (إنت الظتهر عليك نعسان!)، ردّ، من غير ما يعاين لي (آأي والله فاطر لي بي فول تقيل). جرّبت الجزمة وحبّيت أشوف موديلات تانية، قلت ليهو (لو تسمح ممكن أشوف موديلات تانية؟)، ردّ لي - مع شهّيقة كدي وما زال مكبّس في الجريدة - (النوع الفي إيدك ده كويّس جدّاً). هنا ما إستحملت، لمّيت الجريدة من قدّامو وقلت ليهو (يا خينا هوي، ركّز مع زباينك بالله، والجريدة الفي إيدك دي خلّها ساعة يجيك زبون). عاين لي كدييييي وقال لي (يا زول إنت مالك زهجان، روّق المنقة شوية وطلبك بنجيبو ليك).
الحقيقة لله تاني ما كبّس على الجريدة لامن إشتريت غرضي وطلعت، لكن بكل تأكيد بيكون شايفني . .
يا مجنون . .
يا كمان راميني جمل.

عليكم الله ده يقولوا عليهو شنو؟
قال تسويق قال
[/align]

[طيبان]

بوست أنيق ومهندم رغم البشتنة والدُّراش وأيّ شي ..
جبتو فوق /بعد إذنكعشان أتم قرايتوفي الصفحة الأولي بدل يغتس ..والواحد يقوم يكسل يفتّشو..
خصوصا والدنيا برد ..وهجوم برّي وكدة
_____

سلامات ياعمدة ...

[فيصل سعد]

سلام يا عمدة
و ليكم وحشة يشهد الله ..

[فيصل سعد]

التحايا يا ريس و عساكم طيبين ، و مالك قاطع تواصل و اسلاك ..
اها الجديد شنو هنا في البوست و هناك في مواضيعنا و كدا ..

[rubs]

المشاركة الأصلية كتبت بواسطة همس الشوق

الاستاذ عكود

بصراحة تطرقت لموضوع بجد حساس ومهم وشغل بال كثير منا ............نحن السودانيين بنعتبر انه الاهتمام بالمظهر هو من فوارغ الامور وما مفترض يكون من الاولويات ... بس في اعتقادي وكما سبقت انه هو إنعكاس لشخصية الانسان ..... خصوصا في مجالات العمل فالاهتمام بالمظهر هي اول شهادة يجب ان نقدمها للحصول على وظيفة ...
وليكم مثال بسيط ..........
بحكم عملي في مكتب محاماة تقدم احد السودانيين لوظيفة محامي ....
وللاسف شأنه شان كل سوداني بساطة ما بعدها بساطة ...أولاً عدم اهتمام بالمظهر يعني المظهر (0) ومن ثم الشهادات في ظرف والظرف ملفوف في شكل اسطواني .... ومن ثم طريقة الجلسه والانتظار لمقابلة صاحبة المكتب ............ وقام ختمها بي نومه على الكنبه ..... والاشد اندهاش انه وبالصدفة صاحبة المكتب طلعت ووجدته يغص في نوم عميق ... سألت السكرتيره من هذا ؟ قالت ليها واحد عايز يقدم لوظيفة .... ضحكت ... وقالت ليها ... صحيه وقولي ليهو أمشي كمل نوم بعدين تعال ابحث عن عمل .. عليك الله دي حالة دي ... وبعدين انا أشك انه الظرف الاسطواني ربما كان يحوي على شهادات لا يستهان بها ولكن كيف الوصول اليه ... وشيخنا نائم ..........

,والله ضحكتينى جدا حاسه انى بحضر فى متاعب ولا الهيلاهوب هاهاهاها بالغ .... الله اكون فى عونا ... بس مفروض نتعلم من المواقف دى والحمدلله فئه كثيره البقت تأرقها المساله دى ودا معناه ممكن نغير الفهم دا بالتربيه الصح للجيل الجاى ونبدا نعكس صوره معينه ..
بس كنت عايزه احكى موقف عن بعض السودانيين البفتكرو ان اللبس المرتب والكلام البصوت واطى دا ما من سمات الرجوله .. كنا فى منفا اسمو الفلبين وكان فى ماده بتتكلم عن طريقه كيف انو الشخص اتكلم بى تهذيب والبس شنو واتكلم مع الاكبرمنو والاصغر منو كيف وياكل كيف وكل التفاصيل البتخلى الانسان راقى ولبغ فى الكلام بس للاسف الماده دى ما كان سودانى واحد بحضرها والبتجبر بشيلها فى السمر كلاس عشان زمنها بكون اقل وبرضو فى كتير ما بيباصو ...

[همس الشوق]

المشاركة الأصلية كتبت بواسطة rubs

,والله ضحكتينى جدا حاسه انى بحضر فى متاعب ولا الهيلاهوب هاهاهاها بالغ .... الله اكون فى عونا ... بس مفروض نتعلم من المواقف دى والحمدلله فئه كثيره البقت تأرقها المساله دى ودا معناه ممكن نغير الفهم دا بالتربيه الصح للجيل الجاى ونبدا نعكس صوره معينه ..
بس كنت عايزه احكى موقف عن بعض السودانيين البفتكرو ان اللبس المرتب والكلام البصوت واطى دا ما من سمات الرجوله .. كنا فى منفا اسمو الفلبين وكان فى ماده بتتكلم عن طريقه كيف انو الشخص اتكلم بى تهذيب والبس شنو واتكلم مع الاكبرمنو والاصغر منو كيف وياكل كيف وكل التفاصيل البتخلى الانسان راقى ولبغ فى الكلام بس للاسف الماده دى ما كان سودانى واحد بحضرها والبتجبر بشيلها فى السمر كلاس عشان زمنها بكون اقل وبرضو فى كتير ما بيباصو ...

هههههههههههه يباصو كيف .. فاقد الشي لا يعطيه

والله يا روب دي حقيقة انا وجعني الولد دا لانه بي منظورنا نحن السودانيين شكله من الناس البتبان عليهم الشطارة من وشهم .......
لكن أحيييييييييييييييييييييييييييا انا

الوجع كتير في الحته دي

ياخي الراجل السوداني ( هنا بقصد فئة معينة ) ما بلبس البدلة الا يوم العرس ......... وبعدها تكون معلقة في الشماعة لحدي ما المراة بعد عشرين سنه بتدل بيها العدة ...

[jezabell]

المشاركة الأصلية كتبت بواسطة همس الشوق

ياخي الراجل السوداني ( هنا بقصد فئة معينة ) ...

احيييييييييييينا
دي هرشة والا كبكبة هسي؟