حد يصحي الجيلي احمد(يوجد حوت)

[الجيلى أحمد]

فدولة جنوب السودان لها مشاكل متلتلة و مطالبة بتسديد فاتورة الانفصال لشعبها و الوفاء بالوعود القطعتها ليهم ... و علي فكرة مطالب لا تحتمل التأخير و هي البنية التحتية لدولة وليدة, صحة المواطن, التعليم, البطالة...
حافظ حسين

الأصعب ياحافظ هو السؤال عن مقدرة دولة الجنوب على صنع استقرار سياسى ومجتمعى لايحوجها الى طغمة الرأسمال ذات الشهية المفتوحة على الاستثمارات والشركات عابرة القارت, فى ظل انعدام البنى التحتية, والحوجات الأساسية ..

هنالك تبدل كبير حدث فى حركة الاقتصاد عالميآ, فالدول ذاتها فى العالم الأول لم يعد لها موضع يد فى تحريك غول العجلة الاقتصادية النهمة , هذا التبدل يتمظهر فى الاندماجات بين الشركات العالمية (الخطوط الجوية الفرنسية, والخطوط الملكية الهولندية ) واندماجات البنوك, وحتى نطاق الاتصالات والبريد لم يسلم من أفعى السيطرة الرأسمالية الجديدة , فمثال لهذا بيعت شركة( تى ان تى) الى شركة (يو بى سى ) فى أكبر صفقة فى هذا المجال ,

الاقتصاد العالمى ينكمش بشكل فظيع ومريع ,
وأجراس الخطر قد دقت .. فوزير مالية هولندا قال بشكل واضح فى وسائل الاعلام عند بداية السنة, مايعنى "شدو الأحزمة , فى 2012 " , ولهذا تتبعت هولندا خططآ تقشفية قاسية فى الصرف, حاذية حذو ألمانيا (أقوى اقتصاد فى أوروبا) وحذو بقية الدول الاروبية التى وجدت نفسها مرهونة للبنوك وأرباح المستثمرين الخرافية ..
ولم يكن مدهشآ بأن صفعة الضمور الاقتصادى العالمى قد أتت من قطاع البنوك والعقارات..
النظام الاقتصادى فى أمريكيا وأروبا ياكل من سنامه,
فأى بنك ينهار يعنى معضلة فى سوق المال, وتخوف من الشركات وسحب للملايين من العملات وشراء الذهب مقابلآ لها, هذا طبعآ بجانب التخوف على مصير أموال البنسيون (التقاعد) وغيرها من أموال دافعى الضرائب التى أصبحت فى حيزة الشركات العابرة للقارات والبنوك ..

فى هذه الدائرة المهلكة يطل فجر جديد للنهب والسرقة ,
جنوب السودان وشماله ..
سيسرقون منا حتى العطر , وخواطر الأطفال, قبل أن يسرقوا اللقمة والأمن

[الجيلى أحمد]

والله ياسلفى
هبابى الفوق دا , وزير مالية السودان ذاتو بيكون ماجايب خبرو,
ياأخى هو فاضى من التهليل والتكبير البلا عرفة ,
ومن تجيشش الناس عشان يحشرهم فى خشم الغول ,
لغمة سائغة
تمهله مسافة دخوله الى القبر

[نبيل عبد الرحيم]

ت

مام يانبيل
ولك التحايا من قبل

انت كدا جيتنى تمام فى محل الغربلة..

كتبت:

اقتباس:
محمود عبد العزيز فنان إنتهازى
محمود دا يانبيل من ماقام ماعندو غير حنجرتو دى,
يقوم بيها ويقع بيها,
البعرفو أنا انو التكتحو من متاع الدنيا دى ماعندو فيهو كتير رغبة,
يعنى زول قاعد يدور فى مفهوم الفن بتاعو دا حسب فهمو ..
أها يازول لمن تجى ترمى ليك توصيفة قدر الضربة
وتقول عليهو انتهازى ,
تقوم تجى تشرح توصيفة انتهازى دى! وماتبقى شايلا وحايم بيها ساكت ..
أوعا بس تكون فاكر انو محمود بينتهز فى الفرصة عشان يشتهر؟؟
كان كدا الرماد كال الانتهاز

سلام ياجيلى
طيب حنجرته دى إستخدمها للنفاق للبشير وأنت تعرف جيدا أنه صاحب مزاج عالى .
أشرح لك إنتهازى أكيد تعرف الإنتهازى مرادف للوصولى وه منافق وإنتهازى وأصبح بوق للنظام يغنى والبشير يرقص وكلام عادل عسوم لك واضح.
محمود عبد العزيز فنان ماقلنا حاجة لكنه إنتهازى ووصولى ومعه فرفور لأن من يغنى لنظام فاسد ورئيس النظام الفاسد يرقص على أغانية وجود محمود والجمع فى القاعة لمناصرة النظام .
عارف ياجيلى تبرهنى أحيانا بمواقفك الغريبه ماركسى وضد النظام ولك مواقف تحسب ضدك وتحير ودائما خلافاتك مع الشيوعين .
الطبيعى ياالجيلى إن تنتقد تصرفه ولا تأخذك العزة ولكن كثيرا تتخذ موقف خالف تعرف .

اقتباس:
وأنا لا أحترمه بظهر عندما جلد أكثر من مره خاف
غايتو كلامك دا عايز الواحد يتفرغ ليهو عديل كدا,
انت يامعلم عايز ليك مسيح يتصلب ..

انت اذآ فى حوجة لمن يحمل عنك خطاياك وييمم صوب النبؤة..
يانبيل
كونو انو الانسان يتجلد ..دى فى حد ذاتا مسألة غير انسانية

هى كانت دعابة فقط ولكن أنت تعترض على جلده ولا تعترض على موقفه المخزى

وعنى بها أن تحيق بانسان عصور ماضية موغلة فى سحقها وهدرها لقيمة الكرامة
وازلالها لجسد الانسان ,
فى عصر الحقوق هذا لايليق بك أن تحترم الذى يرفع عصاة الدين ويضرب بها ,
بل الأوجب أن تكاتف حق الانسان فى أن لايتم ازلاله واهانته وتمريغ أنفه فى التراب..
ان زهد الناس فيما هو قادم ليس تخوفآ منه فقط,
بل توجسآ من عدم احتماله لما يدعو له من ديمقراطية وحرية وعدالة..

أنت لاتحترمه لأنك تظن بأن الجلد قد أدمى خاطره وأثر عليه فخاف ,
ففيما العجب اذآ ؟
هذا انسان وليس قطعة فولاذ..

أتفق معك إن الجلد مساءلة غير إنسانية

تعليقى هذا بأى حال لايصب فى مجرى حديثك عن تخويفآ ألَم بمحمود
بل هو محاولة نفاذ الى مضمون خطابك .
فمن يجد فى نفسه مسوغآ لعدم احترام المواطن الذى يجلد ويهان ويمرغ أنفه بالتراب , عليه أن ينظر حوله جيدآ , ليدرك أين يقف.

ظلمتنى هنا أنت تركت جوهر الموضوع ومسكت فى الجلد
هوإنتهازى منافق للسلطة وانا لا أحترم المنافقين
لك المودة

[نبيل عبد الرحيم]

كتب أحد أبواق النظام صلاح غريبه

في لقاء الاستنفار والنصرة، بدار المؤتمر الوطني، الذي شرفه رئيس الجمهورية المشير عمر البشير أمس (الأربعاء)، كان لافتاً مشاركة فنان الشباب محمود عبد العزيز، وهو يرتدي الميري، ويردد السلام الوطني، ويغرد للحماسة، في تحول تجاوز الـ(180) درجة، وربما لم يكتفِ الفنان محمود عبد العزيز الذي كان يتقاسم صفة (كمندر) باعتباره كان أحد منسوبي الحركة الشعبية وجيشها بمفاجأته للحضور مغنياً في هكذا أحوال، بل تجاوز الفنان المثير للجدل انتظارات جمهوره ومستضيفه عندما أعلن تقدمه على الفور صفوف المجاهدين نحو هجليج لقتال الغزاة.

وحصدت خطوة الفنان محمود عبد العزيز تصفيقاً حاداً خالطه تكبير وتهليل دفعه لإلقاء خطبة عصماء، توعد فيها رفاق الأمس بأن السن بالسن والعين بالعين والبادئ أظلم، وبعبارات دارجة ارتجلها ارتجالاً قال محمود عبد العزيز: “العاوز دواس بنداوسو والسواي ما حداث”، وحث الشباب، ومعجبيه تحديداً، الذين تتجاوز أعدادهم عشرات الآلاف، على تجييش عشرة آلاف مقاتل أسوة بجيش النبي الأمي عند فتح مكة، وزاد: “دايرنهم يمشوا من الحفلة ومن البيت والشارع وأي حتة”.ذلك عندما تغنى محمود بأغنيات وطنية، وشارك المشير عمر البشير رئيس الجمهورية وتفاعل مع حماس الحضور، وأكد محمود عبد العزيز استعداده للمشاركة في الخطوط الأمامية لدحر العملاء من منطقة هجليج، وقال: (نحن جاهزين للدواس).

[نبيل عبد الرحيم]

http://www.sudaneseonline.com/cgi-bi...msg=1334868249

[نبيل عبد الرحيم]

http://www.sudaneseonline.com/cgi-bi...msg=1334834069

[الجيلى أحمد]

المشاركة الأصلية كتبت بواسطة محمد مصطفي

والله لولا أن هناك واجب لا يقل عن واجبي تجاه الوطن
لكنت بجانب المقاتلين هناك في هجليج أحمل سلاحي وادافع عن ارض هذا الوطن
هنا تصطف الناس جميعاً يا امال ... الولاء للوطن فقط ... لا للكيزان ولا للشوعية
ما زالت تطربني لهيب الشوق بصوت هذا الحوت

تحياتى يامحمد
ويطيب يومك ..

ياأخوى حلايب والفشقة ديل محتلات ليهم زمن مابالهين (حمرة عين, ورجالة) ,
عليك الله الناس البكبرو وهم ماشين على هجليج , قول ليهم فى الأول
يدوهم غشوة ويحرروهم معاهم..

هذه حرب التراكم بتأثرات مشروع الجبهة الجهادى, وحرب للبقاء فى السلطة
, وليس حرب حقوق,
الحقوق يامحمد أخوى ياها ديك مهدرة فى حلايب والفشقة وعلى عينك ياتاجر ,
ومافى زول من الناس البكوركو فى الميديا ديل قادر يقدر يقول (أم المك)

[ام التيمان]

المشاركة الأصلية كتبت بواسطة الجيلى أحمد

جارى التفتيش عن المعنى فى كل زقاق وكلمة


جارى البحث

عشان البوست احقق ايراد عالى
سجمى يا شيخنا
تقوم جارى و تفتش
زنقة زنقة
بيت بيت
لى حدت ما تقع

[الجيلى أحمد]

تحياتى يانبيل

طيب حنجرته دى إستخدمها للنفاق للبشير وأنت تعرف جيدا أنه صاحب مزاج عالى

دعنى فى المبتدأ أعلن اندهاشى لتوصيفك للرجل بالانتهازى والمنافق و (الوصولى)
مع انو كلمة (وصولى) دى حيرتنى ومالقيت ليها معنى منطقى , الا تبقى من ضمن جوقة الكلام القاعد يتم ترديدو ساكت..
مافعله محمود لايجد عندى القبول , ولكنى أقوم بتشريحه بشكل دقيق ودون القاء للاتهامات المجانية, ماحدث فى داخل الوطن فى معضلة هجليج هذه وضع أناس كثر فى متاهة , وفيهم الراح ليهو الدرب فى الموية, والبورد هنا أمامك لتحكم بتمعن وتدقيق ودون هتافيات , فمثلآ محمد المصطفى , وزول الله, وقيس , وأميرى وغيرهم من بعض الزملاء والزميلات هنا ليسوا بكيزان, ولكنهم جزء من هذا الوطن ومن صوت شارعه , والرأى بتاعهم مامختلف من رأى محمود, يعنى لايمكنك أو يمكن لأى شخص تجريمهم, فأقصى ما باستطاعة المرء هو مناقشتهم فى موقفهم وتبيين نقاط الخطل والقصور فيه , وذات الشئ مع محمود وكل الناس الزغردت فى الشوارع وهللت لتحرير هجليج ,
الامتحان دا عويص يانبيل,
ولكن ليس فيه مكانة لرفض الناس ورأى الشارع , دا رأى بتاع قطاع كبير من الشعب السودانى ولايمكنك أن تصفهم بالانتهازيين وال(وصليون), لأن مفهموم الوطنية عندهم قد تواضع على هذا الموقف

[الجيلى أحمد]

طيب حنجرته دى إستخدمها للنفاق للبشير وأنت تعرف جيدا أنه صاحب مزاج عالى

(التحمير من عندى)
قصة مزاجو العالى دى , حاجة بتخص محمود , وماعندك بيها كتير شغلة ,
أول مرة اقابل زول تقدمى قاعد يعاير الناس بسلوكهم الشخصى فى حياتهم الشخصية ,
شغلتك يامواطن بى فنو وكل ماله علاقة بالعام , أما قصة مزاجو دى, فتخصو هو براهو..

[الجيلى أحمد]

عارف ياجيلى تبرهنى أحيانا بمواقفك الغريبه ماركسى وضد النظام ولك مواقف تحسب ضدك وتحير ودائما خلافاتك مع الشيوعين

أيوه يانبيل ماركسى لل ليفة,
لكن حكاية مواقفى البتحير وتتحسب ضدى دى عايزا ليها وقفة , أولآ عشان الواحد يستفيد من المسألة دى , وثانيآ عشان الكلام مايبقى مجانى ساكت..
دلايلك يامواطن

ودائما خلافاتك مع الشيوعين

انت يانبيل قايل الكتابة فى الانترنت هينة كدا , تجى تجدع ليك (دائمآ ) قدر الضربة, وتمضى الى حال سبيلك؟
ياتم الشيوعيين ديل الاختلفتا أنا معاهم؟
وكان فى شنو؟
و(دائمآ) المنطرا عينيها وقاعدة متكية فى وسط كلامك دى نسوى معاها شنو؟

أيوة عندى رأى فى حاجات كتيرة , وبقولو داخل القنوات وجوة دار الحزب , وفى هذا الفضاء أيضآ, لكن والله انت ماعارف ذاتو الخلاف فى شنو , (ومعلومة مجانية مابتلقاها عندى )

يانبيل انت قايل المؤسسة العريقة والمتينة دى قامت على حماسة الرضاء عن أى شئ, وفتح مناحات تواريخ البكاء, ولا قامت على اكتاف الفكر والتشريح والنقد والصراع الايجابى؟
الحزب الشيوعى دا مؤسسة تعلم الانسان معنى أن يكون له رأى وموقف , داخل الحزب وخارجه فى الحياة العامة وفى شارع الله أكبر, وأى فكرة عكس ذلك تتسرب لمنتمى اليه, هى فكرة ماحقة, وموغلة فى التيبس والقشرية..

قصر الكلام

يانبيل أنا عايزك تجيب لى خلافاتى مع الشيوعيين , وتقول أساميهم , وتحدد بتين وكيف ؟
انت قايل رمى الكلام الزى كلامك دا بتمشى بالهين؟

[الجيلى أحمد]

الطبيعى ياالجيلى إن تنتقد تصرفه ولا تأخذك العزة ولكن كثيرا تتخذ موقف خالف تعرف

انت الطبيعى دا بتقرروا عنى أنا؟

انت يامواطن سوى الطبيعى الليلك , وأنا بسوى الطبيعى الليلى..
والله عفارم عليك ,

عليك الله المرة الجاية صلَب لى الطبيعى عشان أفرزوا من الماطبيعى ,
تلحقنا وتنجدنا يانبيل راجل لندن...

خالف تعرف

العرفة فى الحياة بتدور الرأى البتدَور فى الرأس لمن الفكرة تبقى فى مراق روحا , وماهو الرأى البجدعوهو بلا عرفة ولاساقين..
العرفة بتدور الصبر وزاد معرفى , وعين تبصر الأشياء, فتراها,
لاقلبآ يلمح الماء فى شاردة أى كونفلكت , ويمضى نحوه وهو السراب بعينه..

[عكــود]

فمثلآ محمد المصطفى , وزول الله, وقيس , وأميرى وغيرهم من بعض الزملاء والزميلات هنا ليسوا بكيزان, ولكنهم جزء من هذا الوطن ومن صوت شارعه , والرأى بتاعهم مامختلف من رأى محمود, يعنى لايمكنك أو يمكن لأى شخص تجريمهم, فأقصى ما باستطاعة المرء هو مناقشتهم فى موقفهم وتبيين نقاط الخطل والقصور فيه
,

سلام يا جيلي،

ده كلام معقول، بس الفقرة البلأحمر دي دايرة إعادة نظر؛ لأنّك إفترضت الموقف المخالف لموقفك، يشوبه الخطل والقصور، وده ممكن يعيق الحوار.

[الجيلى أحمد]

تحياتى ياعمدة,

كتب الجيلى أحمد:

لايمكنك أو يمكن لأى شخص تجريمهم, فأقصى ما باستطاعة المرء هو مناقشتهم فى موقفهم وتبيين نقاط الخطل والقصور فيه

بضعة نقاط ياعكود وليس كامل الموقف,

من المهم عندى بشكل شخصى أن لايتم التجنى على الناس بشأن الهم الوطنى

[نبيل عبد الرحيم]

كتب الجيلى

قصة مزاجو العالى دى , حاجة بتخص محمود , وماعندك بيها كتير شغلة ,
أول مرة اقابل زول تقدمى قاعد يعاير الناس بسلوكهم الشخصى فى حياتهم الشخصية ,
شغلتك يامواطن بى فنو وكل ماله علاقة بالعام , أما قصة مزاجو دى, فتخصو هو براهو..

أ
كلام مامنطقى لأن مثلا لو شخص مدمن , أكحول, مخدارات أو قمار سلوكه البتسميه شخصى يؤثر على سلوكه العام خاصة لو كان شخصية عامة لأنه ملك لهذه الجماهير التى تحبه .
والإدمان يؤثر على على تصرفاته وسلوكه يكون غير متزن .
ويظهر إنك مفهموك عن التقدمى مختلف عن فهمنا , لأن هناك بند فى لائحة الحزب الشيوعى السودانى تحاسب العضو على سلوكه العام لأنى العضو واجهة للحزب لو شرب الخمر فى مكان عام أو وقام بأعمال تخل بالآداب فى مكان عام بسبب أنه كان سكران أو مخدر من حق الحزب أن يحاسبه لأنه لم يحترم مشاعر الغير ولأنه مدمن لم يستطيع أن يميز بين المكان العام والخاص .
إ