تفاصيل حوار مع رجل يسخر الجن: بلة الغائب: هاكم تفاح كالفورنيا الجابو ليكم الجن ده..!

[أمير الشعراني]

[frame="7 80"]تفاصيل حوار مع رجل يسخر الجن
بلة الغائب: هاكم تفاح كالفورنيا الجابو ليكم الجن ده..!
(الحلقة الأولى)
حوار: أحمد يونس
إجراء حوار صحفي مع (الجان)، فكرة مثيرة تلهب خيال أيّ صحفي، هذا ما ظل يعشعش في تفكيري منذ اتفاقي مع الشيخ بلة (الغائب) على مقابلة الجان المسلم (صخر)، ومحاورته في الغيب والعلن..
جاء الشيخ بعد أن حددنا الموعد ثم ذهب ليتوضأ -كما قال لي- وحين عاد، أحسست أن شخصاً ثالثاً في الغرفة معنا، لم أره، فأصابني الوجود الشعوري له ببعض التوتر والتهيب.. لم أكن خائفاً لكني كنت مثل صحفي صغير في أول تجربة له مع مسؤول كبير، إنه شعور ممتع ومهيب، لم أكن خائفاً بل على العكس كنت مصراً، حاول بعض الزملاء إثنائي وتخويفي، لكني لم أشأ أن ألغي الحوار هكذا.
(1)
كنا والشيخ بلة وحدنا في الغرفة، لكن الإحساس بشخص ثالث موجود معنا كان طاغياً، وزاد حضوره قوة مخاطبة الشيخ بله لشخص غير مرئي، فجأة مد يده الفارغة، وتحدث إلى شخص ما وقال له:
ـ جيب الحاجة دي..!
ثم وضع أمامي على الطاولة (تفاحتين كبيرتين)، كأنهما قطعتا للتو من الحقل.. تفاحتان لم أر تفاحاً بجمالهما وحلاوتهما، أكلناهما وثلة من الزملاء، ولم نذق تفاحاً أشهى طعماً منهما، لم تكونا مثل تفاح السوق الذي يفوح منه طعم التخرين.
ويبدو أن (شيخ بلة) لاحظ توتري، فخرج وطلب من بعض الزملاء، الحضور والمشاركة في الحوار لكنهم رفضوا جميعهم، فقال لي دع الأمر لوقت آخر..
وهكذا فاتتني وقائع أول حوار صحفي مع الجن على الأقل مؤقتاً، لكن الحوار استمر مع (بلة الغائب) الذي يزعم أنه يسخر الجن لخدمته..!
(2)
سرد الأحداث الخارقة التي يحويها الحوار، ليس مقصوداً به الترويج للعوالم الخفية أو نشر الدجل والشعوذة، بل يستهدف إثارة حوار حول (العالم الخفي)، الكثيرون يحكون عنه ويتعاملون معه همساً.
(حكايات) تفتح هذا الملف، وستراجع فيه علماء النفس والمختصين ورجال الدين وغيرهم، عله يرمي حجراً في بركة موارة الأعماق، هادئة السطح.
(3)
* شيخ بلة، لاسمك (بلة الغائب) سر.. الناس بقولوا إنك (غبت) من السجن وأنت مقيد ومكلبش وظهرت في مكتب الرئيس الأسبق جعفر نميري، ما هي حكاية (أول غياب) سموك بيهو الغايب؟!
ــ ما أقوله ليس افتخاراً، بل على سبيل (أما بنعمة ربك فحدث).. اعتقلت في القضارف على زمن الرئيس نميري بتهمة المشاركة في محاولة انقلابية، ومعي أربعة آخرون، قدمونا لمحكمة عسكرية وثبتت عليهم الاتهامات، أعدموهم وخلوني و(الكلباش) في إيديني والقيد على رجليني، وسدوا عليّ الزانزنة.. لمّا الجماعة المعاي أعدموهم خفت لأنو (ما في جوف بدون خوف)، كما يقول أهلنا.
* الأعدموهم ديل منو، فاكر أسماءهم؟!
ـ واحد أخونا اسمه تاور، وعبد العزيز، وعبد الرحمن حسن، كانوا ثلاثة.. في الحقيقة خفت، بعد ما ختوا الكلبّاش في يدي، قلت لرئيس المحكمة أنا برئ، كيف تكلبشوني، فقال لي:
ـــ (إنت ذاتك حتتحاكم زي أخوانك، نحن ما بنعتبرك برئ)
وأنا فعلاً برئ بمعنى الكلمة.
كنت أقول لهم أنا لا أغشكم، لأن المصطفى عليه السلام قال:
ـــ (من غشنا ليس منّا)، بعد ثلاثة أيام جاتني حساسية، رجليني ويديني اتورموا، وفي الصباح جاء اللواء التاج حمد، الله يرحمه، سأل الضابط النبطشي عنها، وقال ليه:
ـــ (دا شنوا الحاصل على الزول ده)؟!
فرد عليه النبطشي:
ـــ (الظاهر عندو حساسية من الكلباش والقيد).
وأنا فعلاً كان عندي هذه الحساسية، فقلت للضابط:
ـــ الكلباش والقيد ديل أذوني
فرد علي:
ـــ (إن شاء الله ربنا يخفف عليك)
ثم خرج، فلجأت لربي، ولأني لم أؤذ مخلوقا بأيٍ من جوارحي، استجاب ربي لدعائي، قلت لربي:
ـــ (أنت قلت وقولك الحق، من اتقاني جعلت له مخرجاً، أين مخرجك الآن)؟!
انفك مني الكلباش القيد وقتياً، وخرجت والباب مقفول، وجد الحرس الكلباش والقيد مفكوكين والباب مقفول، فأبلغوا الضابط النبطشي الذي أبلغ بدوره القائد التاج حمد وقالوا ليه الزول ده شرد، وفي الحقيقة ما شردت، ذهبت للمسجد وصليت الظهر وجيت راجع، فقال لي أفراد الحرس:
ـــ خرجت كيف؟
فقلت ليهم:
ـــ طلبت من ربي فك أسري فخرجت صليت الظهر وجيت راجع، ولو كنت ما برئ ما بجيكم راجع!
فأبلغوا التاج حمد في الكركون، لقاني قاعد في كنبة، قال لي يا زول منو الفتح ليك من الأفراد أو الضباط؟!
فقلت ليهو ناجيت ربي واستجاب لدعوتي وفتح لي ومشيت صليت الظهر وجيت راجع، فقال لي:
ــ (لا أصدق هذا)
فرديت عليه:
ـــ (أنا رجل مؤمن وأنت رجل مؤمن)
فقال ليهم أقفلوه وأدوني المفاتيح، وكلبشوني وقيدوني وحين وصل المكتب لقاني واقف قدام مكتبو!.[/frame]

[أمير الشعراني]

[frame="7 80"]تفاصيل حوار مع رجل يسخر الجن
هل استطاع (جني) بلة الغائب خداع الاستخبارات في بوابة وزارة الدفاع؟!
أيوة.. وعدت أكلم الرئيس نميري بأي انقلاب عليهو قبل ثلاثة أيام ولكن..!
(الحلقة الثانية)
حوار: أحمد يونس
قلنا أمس، إن إجراء حوار صحفي مع (الجان)، فكرة مثيرة تلهب خيال أيّ صحفي، خاصة أن وسيطي الشيخ بلة (الغائب) عند الجان المسلم (صخر)، ابتدر حلقاته الحوارية معي بأن قال لشخص لم يكن في مقدوري رؤيته:
ـ جيب الحاجة دي..!
ثم وضع أمامي (تفاحتين كبيرتين)، أكلناها ولم نذق أشهى طعماً منهما!
* قلت لشيخ بلة إن الناس يقولون إنك (غبت) من السجن وأنت مقيد ومكلبش وظهرت في مكتب الرئيس النميري، ومن يومها وأنت تمتهن الغياب، هل هذا صحيح؟!
ــ والله ليس الغرض من غيابي هذا، (شوفوني أنا بعمل شنو)، ولو أنا كنت غلطان فعلاً لما كان ربنا أعانني، ولو كان في بطني حرام لما آزرني ربنا.
وتقول القصة إن رجلاً كان يتعبد أربعين سنة، وحين ناجى سيدنا موسى ربه وقال يا ربي عبدك فلان يعبدك في ظل الشجرة الفلانية من أربعين سنة وعنده غرض يريد منك أن تتمه له، قال المولي لسيدنا موسى، يا موسى في بطن هذا العابد حرام! الحرام أربعين سنة ما خرج من بطنو، فلو كنت مداناً لما أعانني الله..
قائد السجن سألني لما لقاني واقف قدام المكتب:
ــ إنت بلة؟!
قلت له:
ــ نعم..
فقال:
ــ عملت كده كيف؟!
قلت ليهو:
ــ بعد دا ما حيقعد في إيديني أو رجليني كلباش أو قيد، وما حأقعد في حراسة، لأني مظلوم، لازم تحاكموني بالسجن أو البراءة.
فقال لي:
ــ أقعد في مسجد الجيش دا، وأنا حاكتب لجهات الاختصاص، والبقولوا لينا اعملوه فيك بنعملو.
وبالفعل رفع تقريراً..
* ماذا حدث بعدها؟!
ـ بعد يوم جات طيارة هيليكوبتر أخذتني من القضارف جابتني القيادة العامة في الخرطوم، وكان معي ملازم اسمه عنتر ضربو لغم في جبيت وكتلو، الله يرحمو، ومن شبّاك الهليكوبتر كنا شايفين ناس شايلين كلابيش وقيد، وكان مولانا الحسين الحسن، الشاعر المعروف، بيعمل في فرع القضاء العسكري في الوقت داك، فقال لي الملازم:
ــ يا شيخ بله أنا بسلمك بعد ده وبمشي، لكن الكلباش والقيد ديل شايلنهم ليك، لكن أقيف وقفة زي وقفتك بتاعة القضارف، وكان ما وقفتها الناس ديل ح يحاكموك..
فقلت له:
ــ أبشر بالخير، أنت تريد وأنا أريد والله يفعل ما ما يشاء.
أول ما نزلت من الطائرة كان في واحد اسمه أحمد محمد الحسن، كان مدير فرع القضاء العسكري، قال لي:
ــ ليه تكون عميل للشريف حسين الهندي؟
كانت لهجته مصرية، فقلت له:
ــ سبحان الله دا المثل البقول جدادة الخلا تطرد جدادة البيت، هسع السوداني منو أنا ولا إنت؟!
فقال لي:
ــ دي مش القضارف، ما عاوزش كلام كتير معاك، يللا قيدوه وكلبشوه..
ولما جوا دخلوني الحراسة القريبة من وزارة الدفاع، سألته:
ــ إنت اسمك أحمد محمد الحسن؟
قال لي:
كيف عرفت اسمي؟
فقلت له:
ــ أنت رجل مفروض تنفذ العدالة تدخلني الحراسة زي وزي أي (بغبغان)؟ كنت أظنك حتنصفني وتقدمني لمحاكمة، وما دام الأمر كذلك فأنا سأصل للنميري محل ما هو موجود..!
الراجل ما صدق حكاية اني ممكن امشي لي نميري في مكانو، وقال لي:
ــ شايف الشبابيك الفوق دي، هسي النميري موجود فيها.
وكان التقرير قد وصل النميري وقال ليهم جيبوه نشوفو هل الكلام الحاصل ده صاح ولاّ ما صاح..
سألت ربي وما قعدت في الحراسة أكثر من عشر ثوانٍ وخرجت، ومشيت لوزارة الدفاع ودخلت البوليس الحربي ما شافني، وكانت الطيارة لمن جابتني كان في عدد من الضباط فيهم واحد ما كنت بعرف اسمو، ولمّا دخلت وزارة الدفاع لقيتو اسمو الخير عبد الجليل المشرف، كان مديراً لمكتب الرئيس، ثم تدرج في الخدمة العسكرية ليصل رتبة اللواء.
أول ما طلعت في الطابق الثاني قال:
ــ يا مولانا إنت مش بلّة؟!
فقلت ليهو: نعم، قال:
ــ تعال داير شنو؟ قلت ليهو:
ــ داير أقابل الرئيس.
خلاني في مكتبو ودخل على الرئيس، فجاء الرئيس ومجرد ما لاقاني سلم عليّ و(قلدني) وقال:
ــ إنت مش جابوك هسع من القضارف، كيف خرجت وجيت هنا؟!
قلت للرئيس نميري:
ــ طلبت من ربي فأجابني لأني مظلوم..
فقال لي الرئيس:
ــ والله والله والله (ثلاث مرات) إنت برئ، بدون شك، مش مقفول جوه وجيتني هنا؟! إنت برئ ونحن من هسع حكمنا عليك بالبراءة، وأطلقنا سراحك!.
في الحقيقة فرحت فرح شديد، وقلت ليهو:
ــ زي ما إنت حلفت ثلاث مرات، أنا كمان أعاهدك بالله ورسوله، وما دمت إنت في السلطة أي انقلاب عليك ما ينجح، وقبل الانقلاب بثمانية وأربعين ساعة أو ثلاثة أيام أجي أكلمك..
والحمد لله كنت بكلم النميري بأيّ زول يحاول يعمل انقلاب قبل مواعيده، لأنه رجل منصف!.[/frame]

[مكي محمد الحسن]

الاخ امير الشعراني
رمضان كريم وصوما مقبولاً ان شاء الله ..
بالله الشيخ ده ما تجيب لينا قصتوا دي الا بعد ما خلينا ( التمباك ) في رمضان والحمد لله
اسع زولوا أو جنيهوا ده ما كان ريحنا لا DHL ولا اي بوستة سريعة ويحزنون ..
كان نديهوا ليك تفاح وفراولة وكريز كندا الفاخر والطازة ويجيب لينا العماري الجيد ممطر في كيسوا ..
علي الرغم من انني خليت التمبكة لكن ممكن نعمل بزنس مع شيخ بله الغائب ؟
بالله رسل لينا رقموا ولا اليميل بتاعوا ...
يديك العافية ..

[كيشو]

المشاركة الأصلية كتبت بواسطة مكي محمد الحسن

الاخ امير الشعراني
رمضان كريم وصوما مقبولاً ان شاء الله ..
بالله الشيخ ده ما تجيب لينا قصتوا دي الا بعد ما خلينا ( التمباك ) في رمضان والحمد لله
اسع زولوا أو جنيهوا ده ما كان ريحنا لا DHL ولا اي بوستة سريعة ويحزنون ..
كان نديهوا ليك تفاح وفراولة وكريز كندا الفاخر والطازة ويجيب لينا العماري الجيد ممطر في كيسوا ..
علي الرغم من انني خليت التمبكة لكن ممكن نعمل بزنس مع شيخ بله الغائب ؟
بالله رسل لينا رقموا ولا اليميل بتاعوا ...
يديك العافية ..

ما تستعجل يا ميكي الراجل بيجيك تلب بدون إيميلات ولا يحزنون
إنت خليت الحزب للفقرا وجاي تفتش التجارة مع آخرين

[أمير الشعراني]

[frame="7 80"]تفاصيل حوار مع رجل يسخر الجن
بلة الغائب: قلت لنميري إذا مشيت أمريكا ما حتلقي كرسيك ده..!

الحلقة الثالثة


سرد الأحداث الخارقة التي يحويها سلسلة حوارنا مع الشيخ بلة الغائب، ليس مقصوداً به الترويج للعوالم الخفية أو نشر الدجل والشعوذة، بل يستهدف إثارة النقاش حول (العالم الخفي)، الكثيرون يحكون عنه ويتعاملون معه همساً.
و(حكايات) إذ تفتح هذا الملف، ستراجع فيه علماء نفس ومختصون ورجال دين وغيرهم، علنا نرمي حجراً في البركة المسكوت عنها..!
وأمس قال شيخ بلة أنه (غاب) من السجن وهو مقيد ومكلبش وظهر في مكتب الرئيس النميري، ومن يومها إشتهر بلقب (بلة الغائب).
(1)
* شيخ بلة قبل إعتقال نميري لك، هل كانت تأتيك مثل هذه (الغيابات)، أم أنها جاءت فجأة بعد اعتقالك؟!
ـ أنا منذ أن قمت كنت ذاكراً وما كنت أعلم بهذا الشيء، كنت أعلم منه القليل، لكن بعد الإعتقال عرفت أن ربنا يحبني شديد، وأي ذاكر كما هو معروف يتعرض للجنون العلوية والسفلية وتقدم له إغراءات لإلهائه عن الذكر، ويقولون له أنت بتذكر ربنا داير شنو، لو داير الدنيا نسهلها ليك، دي كنت عارفها ورافضها، لكن في العميق ما خشيت فيه إلاّ بعد الإعتقال.
* بعدما أطلق النميري سراحك وتعهدك بكشف أي إنقلاب عليه، كيف سارت علاقتك به بعدها؟!
ـ كانت علاقتنا ممتازة، وأسأل الله أن يشفي النميري ويحفظه، نميري كان رجلاً يحب الصوفية ويتفقد أحوالهم ويزورهم، وكنا مع بعض نزوره ويزورنا، ويقدم لينا الدعوات في كل المناسبات، وكانت علاقتنا حميمة.
* لكن سوار الدهب إنقلب علي النميري في انتفاضة أبريل، لماذا لم تخبره قبل الإنقلاب؟!
ـ أنا قلت للنميري قبل ذهابه لأمريكا، إذا مشيت واشنطن تاني ما حتجي تقعد في كرسيك ده، وكان بصدق كل كلامي، لكن (المكتولة ما بتسمع الصايحة)، ما سمع كلامي وسافر، وجات الطامة الكبري وشالوه من السلطة..!
* النميري كان بشاورك يا شيخ بلة؟!
ـ نعم كان بشاورني في بعض الحاجات (الغميسة)، لمصلحة المليون ميل مربع..
* زي شنو مثلاً..؟!
ـ والله.. النميري كان في تلك الأيام باذل جهد شديد عشان يطلع البترول.. وزي ما أعلنت بعد مجئ ثورة الإنقاذ الوطني أعلنتها صراحة بأنك إذا كان عندك سر ينتفعوا منه الناس ما تدسو، صرحت في قاعة الشارقة جامعة الخرطوم كان في مؤتمر دعوني ليهو، وقلت ليهم أنا مستعد أوريكم مناطق تبعد من العاصمة في حدود أربعين إلي ثلثمائة كيلو، بها بحيرات من البترول، أحفروها وإذا لم تجدوا ما قلته حقيقة أنا مستعد أدفع التكلفة.
أول ما بدأ النميري التنقيب في البترول، وكان أخونا مأمون عوض أبو زيد وزير الطاقة، قلت ليه أول بترول وأقرب بترول في هجليج لأن منطقة هجليج كلها بترول، وثاني قلت ليه البترول ياهو جنبك هنا في الكلية الحربية، كل جبال كرري عبارة عن بحار بترول يكفي السودان لألف سنة.. ودي كانت واحدة من أستشارات الرئيس النميري.
* ثم ماذا..؟!
ـ والله حاجات كثيرة، لكن ما دام هو كأخ ورجل دولة وما أباح بيها قد تكون من الأسرار الأمنية.. لكن كان الحاصل الكثير.
* في موضوع البترول، وفي عهد الإنقاذ، راج حديث عن الإستعانة بالجان المسلم في استخراجه، هل كنت على صلة بالأمر؟!
ـ نعم.. هذه حقيقة اليوم كل الشركات ما دام السؤال متعلق بالتنمية والخيرات التي فرح بها الشعب السوداني باستخراج البترول.. أغلب الشركات، أخوانا الصينيين جزاهم الله خير، ومهندسين عديدين جوني، ومشيت للوزير صلاح كرار وكلمته باستعدادي عشان أوريهو البترول في الجزيرة وين، وقلت ليهو منطقة السديرة، التي تبدأ من السديرة القدّامية وأنت ماشي لحدي أبو جن، وقلت ليهو المنطقة دي كلها بحار بترول، فقال لي تعال لينا بكرة أو بعده عشان نطلع معاك مهندسين، كنت شايف إنو ما في حاجة أهم من الموضوع الجيت عشانو، ولما يقول لي تعال بعد بكرة، ما قبلتها، وطلعت وتاني ما جيتو، لكن كل المهندسين جوني شايلين خرائط أشرت ليهم، أغلب الشركات الجات هنا كنت بوريها المنطقة العاملة فيها وبقول فيها بترول واصلوا، أو بقول ليهم لا.
وبمناسبة سؤالك.. هسّة مفروض نبدأ استخراج البترول الموجود بينا والبحر الأحمر والبترول الموجود بين الخرطوم والدمازين، وده ما في بترول في العالم قدرو، ماشين بعيد ليه؟.. البترول ليس في الجنوب بس، السودان كله بحيرة بترول.
وأنا اعتبر السودان مشمول بدعوة سيدنا إبراهيم، وجاء الوقت في عهد الرئيس البشير، وأول مجئ البشير قابلتو وبشرتو وقلت ليهو أبشر بالخير وإن البترول سيطلع في عهدك ومعه كل الخيرات، قلت ليه إنت حتحكم السودان ده لوقت طويل..![/frame]

[أمير الشعراني]

[frame="7 80"]تفاصيل حوار مع رجل يسخر الجن
بلة الغائب: أدعو الشعب لتنصيب البشير ملكاً على السودان..!

الحلقة الرابعة

سرد الأحداث الخارقة التي يحويها الحوار، ليس مقصوداً به الترويج للعوالم الخفية أو نشر الدجل والشعوذة، بل يستهدف إثارة حوار حول (العالم الخفي)، الكثيرون يحكون عنه ويتعاملون معه همساً.
(حكايات) تفتح هذا الملف، وستراجع فيه علماء النفس والمختصون ورجال الدين وغيرهم، عله يرمي حجراً في بركة موارة الأعماق، هادئة السطح.

* قلت في الحلقة الفائتة أنك إلتقيت المشير البشير، فماذا دار بينكما؟!
ـ قلت ليه إنت ح تحكم السودان سنوات طويلة وذكرت ليهو الرقم، بحضور الأستاذ كمال حسن بخيت رئيس تحرير (الرأي العام)، فقال لي مولانا دي ما كتيرة، فقلت له ويضاعف الله لمن يشاء..
أنا أؤيد البشير، وأدعو شعب السودان للخروج في مظاهرات والمطالبة بتنصيبه ملكاً على السودان، وأريد أن أحذره من الطابور الخامس الذي أخترق حكومته، وصارت له مناصب في المؤتمر الوطني ومجلس الوزراء.
* علي ذكر البترول، فقد حكي لي أكثر من صديق أنهم استعانوا بك إبان أزمة البترول الخانقة، والنتيجة أن عرباتهم كان بتتملي للآخر بالبنزين.. هل هذه الرواية صحيحة؟!
ـ من مثلاً؟!
* قلت له بعض الأسماء.. وروى لي بعضهم أنه كان برفقتك، وعربيتو بدون بنزين ووجدتم سيارة مرسيدس فاخرة على الجوار، فسألته عن مالك السيارة هل هو خواجة، فأجاب بنعم، فأمرته بإيقاف سيارته جوارها، وبعدها كان تانك عربية صديقك مليئاً!!
ـ هذا شيء عادي..
* كيف يحدث هذا؟!
ـ عندنا في الإسلام أموال اليهود والنصارى غنيمة للمسلمين، وبالفعل كان كل الأخوان إبان الأزمات الخانقة في البنزين، بتكلموا معاي، فأقول للواحد منهم: خلاص تنك عربيتك مليان الآن، وهذا من فيض المولي علينا، وكان عندنا أخوان عندهم مشاوير مهمة وما عندهم بنزين بقول ليهم أمشوا تنكيكم مليان..
* شيخ بلة أنا الآن تانك عربيتي فاضي ممكن ألقاه مليان..؟!
ـ في وقت البترول والخير والنعمة والبترول.. لا .. لكن إذا كنّا مسافرين أنا وإنت وطال علينا المشوار لن نحتاج لأكل أو شراب أو وقود، وسنأكل من فيض المولي عز وجل، ويمكن أن أقول أقيف جنب الشارع، وتجينا صينية مكلفة من جميعو، نأكل ونشرب ثم نواصل، هذا ليس فيه حساب أو وزر عليّ وهو من فيض المولي عز وجل..
* آخرون يقولون إنك تطوي الأرض وتسافر في بلاد الله بدون جواز سفر، وبدون طائرة مثلاً، وقال لي بعضهم.. إنك تذهب للقاهرة مثلاً في لمحة عين، وإنك تكون معهم، وبعد لحظات يتصلون عليك في رقم هاتف دولي ـ يحمل رقم القاهرة مثلاً ـ فتجيب عليهم؟!
ـ مرات بسافر بجواز سفر، ومرات بسافر بدونه..
* متى تسافر بجواز سفر، ومتى تسافر بدونه؟!
ـ لو أضطريت في قعدتي دي أكون في مصر، أصلي الظهر هناك وأصلي العصر هنا، هذا شيء عادي، لأنه من كان مع الله فإن الله معه.. بسافر بجواز السفر لو كان معاي أخوان لو ماشين عمرة أو لو ماشين حج.
* أحد إخوتنا قال لي إنك كنت بتجيب ليهم الفواكهة غير الموجودة في السودان زي التفاح أيام كان فاكهة الصفوة، وفي غير موسمها.
ـ هذه معلومة صحيحة، ومثلما قلت لك لو أننا كنا مسافرون فما فيها أية إثم.. هنالك أحداث كثيرة، منها قصة الكاتب سليم اللوزي في قاعة الصداقة، دعاه الرئيس النميري ومعه حسن عباس زكي وزير الإقتصاد المصري، كان اللوزي قد قال لي أنا لا أومن بهذه الأشياء، (البابا عمل كذا، والشيخ عمل كذا)، فقلت ليه طيب لو أنا جبت ليك حاجة من بيتك في لبنان الآن ونحن في الخرطوم، هل ستسلم؟! فقال والله أسلم، قلت ليه داير أجيب ليك شنو، فقال لي أنا عريس جديد، وصورة زفافي موجودة في غرفة النوم بجوار رأسي جيبها لي، فقلت ليه وصف لي بيتك.. فوصفه لي وكنا وقتها في جلسة وجوارنا جلسة أخرى، فقلت له في الحال زي الصورة ديك في الجلسة التانية، فنظر إليها الجميع وكانت صورة زفاف سليم اللوزي، فقال آمنت بالله والرسول، إني أسلمت، بشهادة الرئيس نميري، أول ما رجع لبنان قتلوه.. هذه أشياء للأسف ينكرها المسلمين ويؤمن بها اليهود والنصاري، والأمريكان اليوم بدرسوا العلم الروحي في الإستخبارات والمباحث، البريطانيين، الروس، وغيرهم، وعندنا يقولوا ليك دا دجل وشعوذة.. دون أن يعرفوا الدجل والشعوذة شنو.
* شنو الدجل والشعوذة في نظرك..؟!
ـ الدجل والشعوذة أفعال يقوم بها إنسان عشان يشيل قروش الناس، يكتب ليهم بخرات وما شابه بمقابل، لكن أهل البصيرة والذاكرين، الذين أكرمهم المولى ما محتاجين لزول.. لأن لله كنوز السماوات والأرض، المال والثراء ليس حكراً على بنك السودان.. لأن لله خزائن السماوات والأرض لو أحبك الله يعطيك من خزائنه ومن فضله، ولا شك في هذا.. هذا هو منهجنا الذي نتبعه، وكان يتبعه آباءنا من قبلنا..
ـــــ
طالع غداً في الحلقة ألاخيرة:
نعم، علاقتي بالجن مثل علاقة الحكومات مع سفراء دول العالم..!
أنا لا أتعامل مع السفلي لانه أكثر مخلوق مراوغ في الدنيا[/frame]

[فتحي مسعد حنفي]

يا أمير سبحن الله دايما تجيب مواضيع مع ناس بتربطني معاهم صداقة..في الأول كان شيخ الأمين وهسع دخلت في شيخ بلله الغايب ساكن سوبا اللعوتة .
أنا مستني نهاية الحلقات عشان أكتب عن حاجات كنت فيها شاهد عيان.تثبت ان هذا الشخص ليس دجالا ويمكنك الاتصال به الآن علي موبايلو وتقول ليهو فتحي مسعد بيسلم عليك من القاهرة وبالمناسبة الراجل دا حل لي مشكلة عويصة مع شيوخ الامارات وجاني بي نفسة الي الامارات..
ت. شيخ بللة: 0912304343

[أمير الشعراني]

[frame="7 80"]تفاصيل حوار مع رجل يسخر الجن
بلة الغائب: أنا لا أتعامل مع الجن السفلي لانه أكثر مخلوق مراوغ في الدنيا..!
(الحلقة الأخيرة)

سرد الأحداث الخارقة التي يحويها الحوار، ليس مقصوداً به الترويج للعوالم الخفية أو نشر الدجل والشعوذة، بل يستهدف إثارة حوار حول (العالم الخفي)، الكثيرون يحكون عنه ويتعاملون معه همساً.
(حكايات) إذ تقدم الحلقة الأخيرة لهذا اليوم مع الشيخ بلة الغائب، تعد القراء بفرد مساحة موازية لكل من يود الرد عليه، مع أكيد سعينا بمراجعة علماء النفس والمختصون ورجال الدين وغيرهم، علنا نرمي حجراً في بركة هذا المعتقد.
* شيخ بلة هل لك علاقة بعالم الجن..؟!
ـ والله.. علاقتي حسب صراحة سؤالك، وأرجو أن تسألني بدون تردد عن أية سؤال، وسأجيب عليه، أنا أولاً لي علاقة بكل الجن وأصنافه، وأشكاله، اختصر ليك علاقتي مع الجن وتعاملي معاه، وهو يشبه علاقة تعامل الحكومات مع سفراء العالم..
* هذه تحتاج لشرح..
ـ الجن فيه من لا دين له، فيهم المسلم، والوثني، وفيهم الوثني، أنا أتعامل مع كل الجن، وأخذ المفيد منهم كصديق، والجن فيه المارد، وفيه العادي، وفيه ملك البحار، وفيه ملك الصحاري، والجبال، الجن أشكال وألوان، وفيهم العلوي والعلويين مسلمين، أنا ملوك الجن الثمانية أصدقائي..
* هل هم ثمانية فقط؟!
ـ نعم.. سألتني هذا السؤال وما عارف ما بعده..
* بعض الناس يقولون إنك تتعامل مع السفلي..
ـ أنا لا أتعامل مع السفلي.. السفلي مراوغ، وهو أكثر مخلوق مراوغة في الدنيا.. أنا آخذ منه الفائدة، فإذا كانت هنالك حاجة مستعصية وجابها لي بعد تأكدي منها آخذها، وأقول له يا صديق صدقت فيما فعلت، لكنه لا يأمرني..
* أي نوع من أنواع الفائدة يمكن أن تأتي من الجن السفلي؟!
ـ مثلاً خبر في مدني في الأبيض، لأنه زي الريح والهواء، وقتي يقول لي الحاصل كدة وكدة يا شيخ بلة، في مرة من المرات كنت قاعد مع بعض أخواننا ومعنا أخونا حسن محمد علي التربي الشهير، جاني السفلي وقال لي أخوك رماه الجمل و(كضم) في منطقة الرهد وكان ماشي مع البهائم، خليتو لأنو مراوغ وأرسلت جن علوي، وقلت ليه اتأكد لي من الخبر ده، فقال لي الخبر صاح، وأخوك نقلوه مستشفي الرهد والآن (فتّح)، فقلت للأخوان الحاصل كذا وكذا، ومشى معاي الأخ حسن محمد علي للرهد، وجدناه في المستشفى وبقى كويس واليوم الثاني خرجوه، نبأ مثل هذا من السفلي ما بصدقوا لأنه في الأساس مراوغ، لكن الجن العلوي المسلم زينا لا يكذب..
* انت قلت إنك توظف الجن لخدمة المصالح.. ألا تفعل حراماًً؟!
ـ ما في حرمة على الإطلاق.. لأني أوظفها لخدمة الناس، قبل فترة قلت في الجرايد للرئيس البشير، سير على الطريق الإنت ماشي فيهو، إذا خالفوك وأنزلوا قوات بريطانية أو أمريكية، فنحن عندنا قوى خفية سنسلطها عليهم، هي جيش الرحمن وهو النحل، الذي لا يعد ولا يحصى، يدخل عليهم في الطيارات ويخبط دا في عينوا، والآخر في آذانوا، ولن تبيده مبيدات ولا رصاص ولا مدافع..
* هل يمكن استخدام الجن في علاج الأمراض؟!
ـ نعم الجن متطور في الطب أكثر مننا ومن كل العالم بصورة غير عادية..
* هذا أمر يحتاج لتفسير..
ـ الجن خلق قبل البشر.. بيمرضوا ويتعالجوا وبموتوا وما خدين هذه العلاجات من بدري..
* هل يقومون بإجراء عمليات جراحية مثلاًً..؟!
ـ أطباء الجن يجرون العمليات بدون جراحة، يفتحوا بطن المريض ويجروا ويزيلوا الداء بدون عملية..!
وقد عالجت ناس حالتهم مستعصية بنفس الصورة..
* أي نوع من الأمراض..
ـ أبسط شيء يجيك زول يقول ليك عندي داء الكبد، وهذا دواءه بالنسبة للجن لا يتجاوز جرعة ماء من عشب أقل من الفنجان، والمريض المصاب الغضروف مثلاً يكلف علاجه عند الدكاترة 16 مليون يمكن تنجح ويمكن لا.. بينما عند الجن لا يزيد على خلطة عشبية مع العسل يتحقق بعدها الشفاء التام..
وبالمناسبة لو اتبع السودانيين كلام الإسلام لما جاتهم كل هذه الأمراض، لأن الرسول (ص) قال: (العلاج آية قرآن، أو جرعة من عسل، أو كية من نار، وأنا لا أحب أن أكتوي)، والرسول لا يقصد أنه لا يحب أن يكوي، لأن الجسد الشريف النار لا تأكله.. هنالك علاجات كثيرة عند الجن متقدمة أكثر منّا..
* شيخ بله قبل هذا الحوار لم أكن من الذين يمكن أن يصدقوا مثل هذا الكلام الذي تقول.. كيف أقتنع بصحة كلامك من عدمها، وكيف أقنع القراء يا ترى..؟!
ـ أقول ليك أنا هسي معاي واحد ـ يصمت ثم يقول ـ أنا جيتك جية مفاجئة ـ وكل ما تريده في هذه الدنيا من مائدة، من رؤية الجن إذا كنت بتستحملوا..
* هل استحمل رؤية الجن أم لا.. لم أدخل تجربة بمثل هذه الإثارة من قبل..
ـ كلامك دا كلام حلو وجميل جداً.. حكاية أجيب ليك فاكهة أو مائدة تأكلها، هذا بالنسبة لي ليست ذا أهمية، ربما يكون بالنسبة لك مهم.. أنا اديك فرصة لغاية بكرة حدد الساعة البجيك فيها، بجيك داخل وأخليك تشوف الجن المسلم على هيئته وحقيقته، وتجلس معه..
* أنا داير أجرى حواراً صحفياً مع واحد من الجنون ديل؟!
ـ ما عندي أي مانع.. هذا شيء ممكن، تلفوني عندك إتصل على باكر وقول حددت الساعة كدة بجيك طوالي..![/frame]

[فتحي مسعد حنفي]

علاقتي بالشيخ بلة الغايب ترجع لعدة سنوات مضت كنت قد تعرفت عليه عن طريق نسيبي مجدي شفيق الذي وعدني بأن يعرفني علي شخص كنت أعرفه سماعا..ذهبت مع أخونا مجدي الي منزل الشيخ بلة في سوبا اللعوتة وهناك وجدناه في انتظارنا بعد أن أبلغه مجدي هاتفيا برغبتنا في مقابلته.
الرجل قابلنا ببشاشة وبسمة تنم عن الحميمية وبادرنا بأهلا يامجدي انت وقريبك الجاي من الخليج علما بأن مجدي لم يخبره عني أية معلومة..فقلت ربما عرفني بسبب الملابس وروقان اللون.
المهم أدخلنا في غرفة بها سريرين متقابلين وجلسنا متقابلين نحن علي سرير وهو مقابلنا علي السرير الثاني
نظر الي وبدون مقدمات سألتي :انت يافتحي البدخلك في مشاكل مع الشيوخ شنو..تعجبت ونظرت الي مجدي الذي قال لي أنا لم أجيب سيرتك معه من قبل.بالطبع تعجبت فقد كنت بالفعل قد دخلت في مشكلة كبيرة مع أحد الشيوخ الذي كان وزيرا وكنت مدير مكتبه في أبو ظبي.ثم طلب مني أن أمد له يدي اليمني فأمسكها وجعل يكتب بأصبعه عليها رموزا ونقطا ثم قال لي أنت ليس عندك مشاكل صحية فيما عدا البلغم الذي يضايقك ولا تستطيع ان تتخلص منه فقال لي سوف أعطيك خلطة من العسل وقشر الرمان تم خلطها بواسطة الجن سوف تجد فيها الراحة انشاءالله..ثم نظر لي وقال: لأ أنا لست سفليا وكنت بالفعل ساعتها أفكر في أنه شيخ سفلي لأنه بدأ يروي لي لأشياء عني لا يمكن أن يكون قد سمعها من قبل لأن حتي مجدي لم يعرفها.ثم أعطاني ملعقة من تلك الخلطة وطلب مني أكلها وبالفعل نفذت طلبه وقال لي سوف تشعر بالفرق قبل أن تصل الي الخرطوم.أما بخصوص مشكلتك في الامارات فسوف أحضر الي هناك بعد شهر ولا تخاف فلن يحدث لك شيئا وان كانت هناك نية غدر من الشيخ..
ثم قام باعطائي كتيبا به رسم له علي الغلاف وأعتقد كان عنوانه الشيخ بله الغايب ..والكتاب كان بقلم السفير المرحوم كمال عمر الأمين الذي كانت تربطني به علاقة نسب فخالي كان متزوجا من أخته..
ثم بعد ذلك ودعناه وذهبنا في طريقنا للعودة وما أن ركبنا الظلط الا وأحسست بأن بطني قد قلبت فطلبت من من مجدي أن يوقف العربية علي جانب الطريق وبدأت في ترجيع كل ما بي من بلغم وبكميات لا تصدق فقلت الحمدلله الراجل طلع كلامو صاح..
بعد أن عدت تعمدت زيارة نسيبي السفير كمال حتي أعرف منه زيادة معلومات فأخبرني قصة أغرب من الخيال وهو رجل غير مشكوك في كلامه فلا يعقل أن يغامر سفير بسمعته ويصدر كتابا عن موضوع يعتبر من أمور الدجل والشعوذة..
أخبرني سعادة السفير بأنه كان يحكي لأحد الأمريكان عن بلة الغايب فأصر الخواجة أن يقابل هذا البلة لأنه لا يصدق مثل هذا لاالكلام..ثم قال أخذته وذهبنا لمقابلة الشيخ وهناك عرفته عليه وكنت المترجم بينهما وكان الشيخ يسرد للخواجة بعض أفعاله والخواجة يبتسم في استهزاء مما جعل الشيخ يتوقف وقال للخواجة انت لا تصدق ما أقوله وقال له قبل أن تغادر بيتي سوف تقتنع بصدق كل ما أقوله ثم سأله :في أي مكان تعيش فرد الخواجة :في كاليفورنيا فأعطاه الشيخ ورقة وقلم وقال له اكتب لي عنوانك هنا..وهذا ما حصل..ثم سأله هل هناك شيئ عزيز علي نفسك تفتقده هنا؟فقال الخواجة نعم عندي زهرية أضعها بجوار مكان نومي ..لا أنام قبل أن أتطلع اليها..فقال له الشيخ أرسم لي خريطة لمنزلك وبين فيها مكان الزهرية بالضبط ففعل الخواجة ما طلب منه.
ثم استمرت الجلسة في نقاش عن الخوارق والأشياء الغريبة حتي حانت لحظة الفراق وقاموا بتوديع الشيخ وهما في باب الغرفة قال له الشيخ ألم تنسي شيئا هنا فنظر الخواجة الي الطاولة ولم ينطق بل عاد وجلس مرة أخري ومد يده وتناول الزهرية وهو غير مصدق لما يحدث...
الأشياء التي تلت تلك الحكاية كانت الآتي: بعد رجوع الخواجة الي الفندق اتصل هاتفيا بأمريكا وتحدث مع زوجته التي قالت له : عندي خبر سوف يحزنك كثيرا فقال لها خبر عن الزهرية فقالت له متعجبة كيف علمت وقد سرقت اليوم فقط ..فقال لها لا لم تسرق بل هي معي وحكي لها ما حدث وهي غير مصدقة وكيف لا ان كان هو من حدثت معه هذه الحكاية لايصدق ما رآه بعينيه..
بعد بضعة ايام أتت الزوجة هي وابنها الي السودان وذهبوا ثلاثتهم الي الشيخ حيث أشهروا اسلامهم..
يا أمير هذه القصة رواها شخص لا يمكن تكذيبه ويمكنك الاتصال بالشيخ وتطلب منه نسخة من الكتاب وتنشره لنا في المنتدي..
أما بالنسبة لي أنا فقد أخذت معي علاج لزوجتي من النقرس ولأختها من القرحة وتم علاجهم والحمدلله..
بالفعل جائني الشيخ الي الامارات وقضي معنا أياما رأينا فيها الكثير من اللأشياء العجيبة ومنذ تلك الفترة صارت العلاقة بيننا صدقة قوية الي يومنا هذا ويمكنك التأكد منه شخصيا غن كل ما حكيته هنا..

[أمير الشعراني]

العزيز فتحى شاهد العيان تحياتى واشواقى..
لا أكذب عليك أنا لا أومن بكل هذا الحوار ولكنه مادة صحفية عالية التشويق والاثارة وابتدا من اليوم سننشر ما تلى الحوار من ردود ..
مع ودى لك

[فتحي مسعد حنفي]

معليش يا أمير لكن أقسم بالله العظيم أنا بعد ما كتبت صفحة كاملة تابعة للموضوع دا وأنا بظلل في الموضوع الصفحة اختفت ولقيت نفسي طلعت من سودانيات بدون أي سبب..فقلت أستني بعد الفطور أحسن..

[فيصل سعد]

المشاركة الأصلية كتبت بواسطة أمير الشعراني

[frame="7 80"]

زي ما إنت حلفت ثلاث مرات، أنا كمان أعاهدك بالله ورسوله، وما دمت إنت في السلطة أي انقلاب عليك ما ينجح، وقبل الانقلاب بثمانية وأربعين ساعة أو ثلاثة أيام أجي أكلمك...
والحمد لله كنت بكلم النميري بأيّ زول يحاول يعمل انقلاب قبل مواعيده، لأنه رجل منصف!!..
[/frame]

النميري منصف !!! يا امير زولك دا مالو ؟؟؟
طيب ليه ما كلمه بالانتفاضة ؟؟
و لا احتمال يكون قلب مع سوار الدهب و كدا

[فيصل سعد]

المشاركة الأصلية كتبت بواسطة فتحي مسعد حنفي

معليش يا أمير لكن أقسم بالله العظيم أنا بعد ما كتبت صفحة كاملة تابعة للموضوع دا وأنا بظلل في الموضوع الصفحة اختفت ولقيت نفسي طلعت من سودانيات بدون أي سبب..فقلت أستني بعد الفطور أحسن..

سلام يا خواجة يا رايق و نهارك سعيد ..
يا زول احتمال تكون من الشبكة او الكونكشن ،
فما تسرح يا حبوب

[فتحي مسعد حنفي]

المشاركة الأصلية كتبت بواسطة فيصل سعد

النميري منصف !!! يا امير زولك دا مالو ؟؟؟
طيب ليه ما كلمه بالانتفاضة ؟؟
و لا احتمال يكون قلب مع سوار الدهب و كدا

ياظريف ما الانتفاضة لامن حصلت النميري كان برا السودان وبعدين الراجل كان بيتكلم عن الانقلابات والجن ما بيشتغلو يالانتفاضات..عشان العدد بيكون كبير وما ممكن تراقب الشعب كلو...مش زي ما تكون في مؤامرة بين أشخاص قليلين..

[فيصل سعد]

المشاركة الأصلية كتبت بواسطة فتحي مسعد حنفي

ياظريف ما الانتفاضة لامن حصلت النميري كان برا السودان وبعدين الراجل كان بيتكلم عن الانقلابات والجن ما بيشتغلو يالانتفاضات..عشان العدد بيكون كبير وما ممكن تراقب الشعب كلو...مش زي ما تكون في مؤامرة بين أشخاص قليلين..

الاتو ضعيف شديد ، لكنها
برضو وجهة نظر