التونسية
الخطوط التونسية في فترة من الفترات كانت واحدة من أكثر الخطوط وجاهة ً ودقة ً في المواعيد وفي جميع أنواع الخدمات .. وكان لا يستغل خط (الخرطوم – تونس) في ذاك الوقت إلا وجهاء القوم من السفراء والدبلوماسيين والعرسان المقتدرين وبعض السياح من ذوي اليسار .. وكان هناك خط طويل للتونسية يربط ما بين (الخرطوم – جدة – القاهرة – تونس) .. ونالت الخطوط الجوية التونسية شهرتها وسمعتها الطيبة في ذاك الزمن الجميل (نهاية السبعينيات وحتى منتصف الثمانينيات) مثلها مثل الخطوط الأثيوبية.. حكي لي أحدهم أنه في واحدة من مدن السودان إتخذ بعض من إبتلاهم الله بفقدان العقل بصا ً متهالكا ً قديما ً قابعا ً على الأرض إتخذوهوا مقرا ً لهم يجتمعون فيه دائما ً ليلا ً ونهارا ً .. وكـُتـِب بالخط العريض على جوانب ذاك الباص (الخطوط التونسية) تيمنا ً بالخطوط التونسية وشهرتها في ذاك الوقت وأصبح ذاك الباص المتهالك مشهورا ً بالتونسية ... وأصبح الناس ينعتون كل من أصابه الله بفقدان العقل بأنه ركب مع الجماعة في التونسية (والمقصود الباص طبعا ً) وأصبحت تلك الجملة متداوله على نطاق واسع في السودان على شاكلة: أركـّبك التونسية .. أو ح تركـّبنا التونسية .. إلخ وهي كناية عن فقدان العقل. ما دعاني للتوضيح أعلاه هو كثرة إستخدام هذا التعبير (التونسية) في منتدانا هذا وفي كثير من المواقع أو إستخدامنا للكثير من التعابير دون أن ندرك معناها أو دلالاتها .. الأمر الذي قد يوقعنا في الحرج أحيانا ً. شكرا ً لكم ،،، |
سلام يا شبارقة
أول مرة أعرف إنها تستعمل كناية عن فقدان العقل! كنت أتخيل انو الإستعمال مربوط بسرعة الخطوط التونسية ودقتها، مثلا: - واحد مكيس واحدة، وجاء واحد تاني حلّ محله، طوالي بقولوا ليك: فلان داك، ركبو التونسية، كنت أعتقد أنها تعني طفشوهو بسرعة ودقة! - المادة الصعبة بالكلية الممكن تفصل الطلاب، يقولوا ليك: أعمل حسابك من المادة دي، بتركبك التونسية، كنت أعتقد إنها تعني بترجعك أهلك بسرعة وفي الزمن! |
اقتباس:
وشكراً على التوضيح غايتو في منتدانا دا يجوز استخدام التونسية خاصة بعد التوضيح يعني الحكاية حتزيد :) |
سلام واحترام ياشبارقة
وشكرا لك على اعادة تلك الذكريات . وشوف الحكاية دي عن التونسية التى تفنن فيها الجميع . عريس مغترب ركبوهو التونسيه دي قصه واقعيه حصلت لي احد المغتربين بالخليج .. زي اغلب المغتربين اخونا كان بفكر في الزواج وكالعاده رسلو ليهو شريط عرس عشان يشوف ويختار (تقول داير يشتري شوال رز) قام لقط ليهو واحده كدا خطفت قلبو من اول نظره وقال بس دي شكلها كدا بت عسل قام كلم اهلو ومشو اتقدمو لي اهلا والبت عندها اختها اكبر منها لسا ما جاها النصيب قامو اهلا قالو يعرسو البت الكبيره عشان ما تبور وعملو العرس ورسلوها (كالعاده زي الطرد) للعريس القاعد منتظر في المطار مستني يشوف العروس المرتقبه لما وصلت بالسلامه العريس من شدة الخلعه عيونو مرقت متر بره قام قاليها انتي ما العروس الانا شفتك في الصوره ؟؟؟؟ ردت قالت : اي انا اختا واهلي عرسوني ليك بدل اختي (تقول قاليهم شوفو لي اي بت منكم اعرسا ورسيلوها ) قام قليها شوفي يابت الطياره الجيتي بيها ترجعي بيها سريع . قالت ليهو اخوي والله انا ما عندي ذنب دي امي العملت الحركه دي وهي غلطانه وانت معاك حق لكن انا منظري بكون بايخ شديد لمن ارجع طوالي كدا والناس حيقولو شنو (دايرا تحنكو .. ان كيدهن عظيم ) خليني اقعد يومين وبعدين رجعني شويه اهون من رجعة طوالي دي قام صاحبنا حنا ورأف بها قام ساقا البيت .............................. لليوم دا لسا ما رجعت اخد عليها ورضا بيها كيف الله اعلم ( الستات بعملو المستحيل ) سبحان الله دا نصيبا |
اقتباس:
الزول دا ما كان يختها في أمانات المطار طالما هي طرد غايتو دا لو كنت أنا كنت حأرجعا حتى لو كانت هي الأجمل، جني وجن سياسة الأمر الواقع دي هسي الزواج دا كيف من الناحية الشرعية والقانونية؟ |
اقتباس:
مرحبا كيشو لو قمنا اتلكمنا عن الناحية الشرعية والقانونية حا نخرب بوست شبارقة الراجل الطيب خلينا في نكهة التونسية ، وامكن نعمل بوست مستقبلا مستقل عن هذا الموضوع . احترامي وتقديري |
سلامات يا شبارقة
جميل جداً نتملك قصة ميلاد المثل .. لكن تطور المثل عن الحقيقة ليهو عوامل كثيرة منها النقل وتلاعب الظرفاء فيه فى مختلف الأحداث. لكن ما أعتقد مشكة إذا شرح المعنى المقصود .. زى أغلبنا يقول (وأتت جهينة بالخبر البقين) وأنا من الناس العرف الأسم جهيزة هنا .. وأصل المثل (قطعت جهيزة قول كل خطيب) .. وبرضو قصة المثل ما معروفة للجميع .. لكن بتأدى المطلوب :D أنا سمعت قصة (سنة) البقولوها زمان .. قالوا حصلت فى بانت فى مدنى فى البيوت المبنية على الخيران .. الحيطة من برة بطول الخور ومن جوة قصيرة .. قالوا الحرامى صحوا بيهو قام نط الحيطة بكل رشاقة .. طلعوا الشارع لقوهو مكوم .. واحد قال صاحبك لامن دق الواطة قال سنة يا الحيطة :D:D |
اقتباس:
هلا ومرحبا بدكتورنا بابكر نعم فالكثيرون يستعملون هذا الرمز (التونسية) أو يمر عليهم (وبالذات في الأسافير) وهم لا يدركون معناه أو مناسبته . الغريبة يا د. بابكر بنستعمل مصطلحات أو ألفاظ كثيرة ونحن ما عارفين أصلها أو معناها ... مثال : الما عارف يقول عدس ... تستخدم كثيرا ً وإذا سألت أحدهم عن قصة المثل تلقاهو ما عارف ... علما ً بأننا لو عرفنا القصة الحقيقية لأمتنعنا عن ترديد هذه المقولة وتوارينا خجلا ً منها. شكرا ً لك على إثراء الحوار :) |
اقتباس:
وعليكم السلام يا مولانا بـُعد الشر على ناس المنتدى ياخ .. لكن بيني وبينك الراكبين التونسية ماهم شوية :) بالمناسبة يا عصام أنا في يوم من الأيام ركبت التونسية .. التونسية الأصل ما الباص ياخ :).. مشيت بيها من الخرطوم إلى القاهرة عن طريق جدة في العام 1984م.. عشان كده حكيت عن إنطباعي لمن قلت في المداخلة الأولى إنو الخطوط التونسية واحدة من أكثر الخطوط وجاهة ً ودقة ً في المواعيد وفي جميع أنواع الخدمات. تشكر يا كيشو . |
اقتباس:
اقتباس:
اقتباس:
حباب أخونا فتح العليم .. الرجل الذي تشرفنا بمعرفته عن قرب ياخوي البوست قضى غرضو :) إتكلمو ساي إنت وكيشو عن النواحي الشرعية والقانونية . شكرا ً يا غالي ،،، |
اقتباس:
ف قلنا نخلي الناس تعرفا بي شرح شبارقة المحترم دا:D:D اهو في النهاية كلو ترحيل:D سنة يالحيطةlooool اقول قولي هذا واستغفر الله لي.................. |
شبارقة والبوستات ذات الطعم واللون والرائحة
ياخ شكرا ليك كنت فاكرة بقصدوا زول مشي ومابرجع تاني زي بن علي كدا:D شكرا ابو البنات |
اقتباس:
سلامات حبيبنا ود ميلاد قصتك صحيحة ولكن نحن سمعناها بأنو الحرامي لما نط الحيطة تلب ليهو في مستراح محفور جديد ولسه ما أنعرش (أقل حاجة عمقو يكون 7 أمتار) .. دي حيطة شنو دي ؟ :) وبمناسبة سنة دي .. زماااان وأنا طالب في تانية ثانوي (في حلفا الجديدة) وأول مرة أشاغل في حياتي شاغلت لي طالبة جميلة في الشارع وأنا جاي من المدرسة قلت ليها : سنة يا أنا .. ومن الخوف ما أستنيت ردة فعلها .. المهم كانت أول وآخر مرة وعشان كدة كلما أسمع (سنة) بتذكر الموقف داك .. براءة وزمن جميل ياخ. شكرت يا رأفت ياخ .. أثرت شجوننا ،،، |
سلامات يا شبارقة،، ومبروك البوست الجديد (بعد غيبة):D
في منتدي كوورة سودانية في عضو فاتح نفس البوست دا، وفي النهاية نوّه لي إنو البوست فاتحو شبارقة في سودانيات وهو قام بنقله للفائدة العامّة، في البداية أنا قلت يمكن شبارقة دا، مشترك في منتدي كوورة وهلالابي كمان. في رأي إتكتب في نفس البوست ومخالف للرواية الإنت جبتها كاتبو عضو مسمّي نفسو (أبو عكّاز) بقول: اقتباس:
http://forum.kooora.com/f.aspx?t=32719379 |
اقتباس:
سلامات أخونا خلف زمااان ناسنا حكو قصة الصقر الكان طائر ومحلق في سماء القدنبلية وشايل دبيب في خشمو وبعدين الدبيب وقع منو .. وقع منو في لوري مليان ناس .. قام الدبيب عضه ليك واحد من الناس ديل والزول مات في الحال .. والناس يحكو في القصة دي بإنفعال طفولي وشايلاهم الهاشمية وهم يتطرقو للقصة دي .. المهم في الموضوع أنا سمعت القصة دي يمكن عشرين مرة بعد داك وكلو واحد يحكيها يديها كوز ويقول ليك حصلت في بلدنا :) المهم قصتي حقت التونسية دي هي المقبولة والمعقولة لأنو مافي غيرها في زماننا ذاك. |
اقتباس:
أوووو بت الشيخ شخصيا ً .. حبابك عمي قرفان طوالي وزهجان من مرتو .. يوم قلت ليهو : ياخ مالك مع مرتك دي .. قال لي : والله المرة دي مجنناني في رأسي ده .. ما باقي ليها إلا تركبني التونسية :) وسألتو شنو يعني تركبك التونسية؟ ولقيتو ما عارف وأنا ذاتي كنت ما عارف. تسلمي يا آمال ،،، |
اقتباس:
تحياتي يا الرشيد اقتباس:
البعد غيبة أنا ولّ البوست الجديد ؟ :) زمااان كان في كازينو في الخرطوم إسمو : كازينو حمـّاد العائم .. قام واحد قال للتاني : العائم دي قاصدين بيها حمـّاد ولّ الكازينو ؟ الغريبة البوست بتاع التونسية ده أنا فتحتو صباح اليوم وطوالي ناس كوورة ديل شالوهو (صرة في خيت) .. معناها إنو الأخ الطوفان الأزرق إما عضو معانا هنا أو متابع لنا وفي كل الحالات نحن نشكره طالما ذكر المصدر .. صاحبنا أبو عكاز قصتو معقولة إذا لم نستصحب إنو أيام نميري كان ممنوع منعا ً باتا ً كتابة أي عبارات على عربات الحكومة وبالذات عربات الشرطة والجيش بخلاف الباص بتاعنا الذي كان (خردة) وخارج الخدمة ولك أن تكتب عليه ما تشاء. شكرا ً يا الرشيد ،،، على جنب: أظنك يا الرشيد إنت بحثت في النت عن قصة التونسية عشان كده ظهر ليك الموضوع بتاعي في نفس اليوم هنا وهناك. |
سلامات ياشبارقة
القصة الانا بفتكرها لكلمة التونسية دي هي انو في ثمانينات او تسعينات القرن المنصرم :) حصل حادث لطائرة الخطوط التونسية واظن ماتو كل الركاب وبعد داك ظهر المصطلح بتاع ركوب التونسية ده |
اقتباس:
عموماً: روايتك بالنسبة لي أكتر منطقية من حقت أبو عكّاز:D |
سلام يابلدياتنا
البعجبني في كتابتك تجويد الفكرة ودائما الواحد بطلع منك بجديد. فشكرا ياخي على كل شئ. بيني وبينك كانت فكرتي مشابهة لفكرة اخونا خالد غالي،ويبدو كنت راكب التونسية:) تحياتي |
اقتباس:
صباح الخير يامولانا تحياتي ليك وللاخ فتحي وسيد البوست وضيوفو يثير هذا التساؤل الكثير من النقاط القانونية حول عيوب العقود ، وبالفعل ذاك مبحث كبير الحديث فيه يطول ويتفرع ليشمل عيوب العقود كالغبن والغرر والتدليس وغيرها. وبحسب ماورد في القصة، ان استمرار الزواج يرفع الرضا المعيب في أول التعاقد، الذي كان سبباً كافياً لفسخ العقد مباشرة، كما أعتقد. خلوني أوعدكم ببوست إسمو( نافذة قانونية) سأشرع فيه قريبا جداً، نتناول فيه البنقدر عليهو ونتعاون فيه جميعنا. ـــــــــــ من شفتك ركزت على سيد اللبن قلت النحلق الزول ده نشغلوا بالقانون:D |
اقتباس:
تعرف يالرشيد مشيت بهناك فى زول ولّ زولة ما عارف علق قال (يمكن الكتبا على الكومر قاصد تونيسية شبارقة) وده وارد شديد وشغلانية الكومر كشات .. غايتو ناس كوورة ديل شكلهم رشاشات ومتعودين على التونسية :D:D |
اقتباس:
|
اقتباس:
تعرف مدنى كانت المصدر الأكبر للحاجات دى .. كان فى مشاغلة كده ما عارف قصتا .. بقولوا فيها (وشك) ويضيفوا ليها يا جميل .. يا عسل .. يا أنت ولّ حاف كدة .. فى دكتورة مفلقصة كده زمن الدكاترة النسوان يتعدن على اليد .. طالعة فى الكفر وسايقة ليها عربية .. قام واحد شرامى كده ناداها (وشك) .. أندرعت فيه لامن دخلتو الحراسة .. من اليوم داك غلبتا المرقة .. تدخل سوق الخدار كلو يكورك (وشك) من بياعين وزباين .. المستشفى (وشك) السينما (وشك) لامن طفشت من البلد |
اقتباس:
مرحبا ً بالأخ خالد ما ينفي هذه الفرضية إنو الخطوط التونسية كانت مميزة جدا ً في كل شئ .. لم تتعرض لأي حادث طيران في ذاك الوقت .. بحثت في النت ووجدت إنو أول حادث ليها كان في إيطاليا في سنة 2005م وكان حادث لطائرة صغيرة تحمل 34 راكبا ً إيطاليا ً (سواح) بالإضافة إلى طاقم الطائرة وكانت في طريقها من مدينة باري الإيطالية إلى جزيرة جربة التونسية وهبطت إضطراريا ً في البحر ونجا منهم 24 راكب. شكرا ً يا خالد ،،، |
اقتباس:
شكرا ً يا الرشيد تسلم ،،، |
اقتباس:
هلا وحباب أخونا ود كانديك تشكر يا طارق على ذوقك وكلامك الطيب طبعا ً كما كتبت في ردي على الأخ خالد لم تتعرض التونسية لأي حادث في تلك الفترة .. وهذا ما يدحض الفكرة بتاعتكما :) |
اقتباس:
هو زول يا رأفت ومسمي نفسو (الحلفاوي) وكلامو منطقي في إنو العسكري الكتب التونسية في كومر الحكومة (إذا كـُتبت فعلا ً) يكون سامع بالتونسية الأصلية المكتوبة على الباص. |
شباااارقة...مشتاقين ياعاصم ياخ
ليك وحشة.... امس اتذكرناك بي حاجة جميلة انا وبعض الشباب صحيت لقيت بوستيك...توارد غريب المهم انا محيرني ياخ السودانيين ديل :D:D:D لي قصة واحدة تلاقي تمنمية مصدر وانت كرطاني ومن (خير) غير الناطقين بها تكون مسططططح ومستمتع:D والمدهشني اكتر رأفت الما نستو مدن التلج الحكاوي دي :D بوست جميل وزي ماقال كانديك بتوصل فكرتك من الاول وتقعد تقابل المتونسين والمتونسات اتوحشناااك يازول انت وبوستاتك تحايا للجميع الهنا ومحبة برضو |
اقتباس:
أهلا ً وسهلا ً ومرحبا ً بالأستاذة / لنا غايتو مداخلتك دي حقو أقشر بيها .. أعرض بيها وأقعد أدوبي :) اقتباس:
فعلا ً .. خيالنا واسع ياخ :) اقتباس:
شكرا ً ليك تاني يا لنا ،،، * غايتو المثل دا إلا يشرحو ليكم طارق كانديك أو فتح العليم |
اقتباس:
مهاتفة جميلة من الأخ حامد العضو (البديري) الحردان:) يبلغ الجميع تحياته، ويخصك يا شبارقة والرشيد. الرشيد: تكرماً راسل العضو (الطوفان الأزرق) في منتدى كورة، ذاكم هو صديقنا البديري. له ولكما تحياتي وتقديري. زمان الناس بتقول الدنيا ضيقة، هسي مع التكنلوجيا دي، الأسافير برضو ضاقت:D:D |
شبارقة والزمن الجميل
كيفيك والأسرة الكريمة. لك تحياتي وتقديري واحترامى |
| الساعة الآن 09:55 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.