سودانيات .. تواصل ومحبة

سودانيات .. تواصل ومحبة (http://www.sudanyat.org/vb/index.php)
-   منتـــــــــدى الحـــــوار (http://www.sudanyat.org/vb/forumdisplay.php?f=2)
-   -   *** مصطلحات عامّية سودانية *** (http://www.sudanyat.org/vb/showthread.php?t=6873)

فيصل سعد 07-12-2007 09:36 AM

*** مصطلحات عامّية سودانية ***
 
الاحباب الكرام :

تحية طيبة ،،

اتمني مشاركة الجميع في تسليط الضو علي المصطلحات العامية السودانية قديمها و جديدها و الامثال و الحكم و التراث و تبادل المعلومات حولها و بسم الله نبدأ :-

ود اللحد : المكان الذي يوضع فيه الجثمان داخل القبر.
الضانقيل : الطوب الاحمر.
الانداية : محل لبيع و تعاطى الخمور البلدية .
المريسة : خمرة بلدية تتكون من تخمير الذرة .
الصارقيل : دودة صغيرة تعيش في الطين تستخدم كطعم لصيد الأسماك.
المساير : الجزء الامامى للشعر فى المشاط.
العنقريب : سرير من الخشب ينسج بالحبال .
القرقريبة : تصنع من السعف وتستخدم في العواسه.
السعن : جلد يستخدم في حمل الماء او اللبن.
الصاج : قطعة من الحديد توضع على اربع حجارة وتعاس عليه الكسرة و الحلومر.
الكشف : المشاركة المادية فى المآتم و الافراح.
القدوم : آلة نجارة لقطع الاخشاب.

فيصل سعد 09-12-2007 06:20 PM

التكل : المطبخ

النملية: دولاب لحفظ ادوات المطبخ

مترار: جهاز يدوي لغزل الخيوط

برطوش: حذاء

الاستبالة: المستشفى

سبلوقة: مجري تصريف المياه في راس البيت

المستراح: الادبخانة ، بيت الادب، الحمام

السهلة: الحوش، ساحة كبيرة داخل البيت

اللقيمات: فطائر تقدم عند الصباح مع الشاى

omrashid 09-12-2007 06:55 PM

المعراكه -بضم الميم --قطعه من القماس لزوم مسح الصاج قبل العواسه

المشلعيب---علاقه مصنوعه من الحبل لوضع الطعام وحفظه (تلاجة المساكين

الخماره --بضم الميم --اناء مصنوع من الفخار لتخمير العجين لزوم العواسه

Haimoura 09-12-2007 08:22 PM

البو
 
البو
ربما نطق الكلمة يختلف قليلا من كتابتها ويمكن تسكين الواو..

وهو تحنيط وليد البقرة الميت واحضاره بالقرب من البقرة لتدر اللبن ...

فيصل سعد 12-12-2007 11:53 AM

كونشبر : قفة صغيرة يستخدمها المزارع في نقل التراب لسد الماء.
الهضليم : الشعر
التكم : قفل الباب.
الدوكه : مكان لوقد النار علي الارض.
التيوه : نواه ثمره الدوم
الدافوري : لعب كره القدم في شوارع او ميدان وسط الحله.
كدندارة : حشرة تطير حول الزرع
جربوكس : ترس ناقل السرعة في العربات.
دكوة : زبدة الفول السوداني.
مررو : فول حاجات ، فول مدمس
الدفتر : ورق شفاف رهيف يستعمل في نظافة النظارات

أشتر 12-12-2007 03:43 PM

سمعت اغنية لمحمد النصري فيها كلمة العميوق
فما هو العميوق يا فيصل ؟

نسايم 12-12-2007 04:00 PM

اقتباس:

المشاركة الأصلية كتبت بواسطة محمد أبوعاقلة (المشاركة 83248)
سمعت اغنية لمحمد النصري فيها كلمة العميوق
فما هو العميوق يا فيصل ؟

دي مابعرفها الا شايقي
الشوايقة ديل غتااات كلامهم زاتو غتيييت
نقوم نسأل عكوود
بيعرفها

فيصل سعد 12-12-2007 04:31 PM

اقتباس:

المشاركة الأصلية كتبت بواسطة محمد أبوعاقلة (المشاركة 83248)
سمعت اغنية لمحمد النصري فيها كلمة العميوق
فما هو العميوق يا فيصل ؟

يا محمد مرحب بيكم انت و نسائم بجاي. ما عارف الكلمة و الله و يكون جميل لو تدونا رصة بمعانيها قبل ما تغادروا انتوا الاتنين، الاتنين ادونا عين :D:D

عكــود 12-12-2007 05:31 PM

سلام يا فيصل،

بوست جميل ومهم للجميع . .
وشايفك ما قصّرت
وما دام السبلوقة والأسبتالية بقوا دايرين شرح . .
ما ألوم أبو عاقلة ونسايم في سؤالهم عن العميوق
الأغنية بتقول في واحدة من مقاطعها:
"قام إتمطّق العميوق"
العميوق: شجيرة طفيلية تقوم في المزارع وتنتشر بسرعة
ريحتها بطّالة
وطعمها تعافِه البهايم

سلام وبجيك راجع أدّيك من القديم.

نسايم 12-12-2007 06:13 PM

اقتباس:

المشاركة الأصلية كتبت بواسطة فيصل سعد (المشاركة 83255)
يا محمد مرحب بيكم انت و نسائم بجاي. ما عارف الكلمة و الله و يكون جميل لو تدونا رصة بمعانيها قبل ما تغادروا انتوا الاتنين، الاتنين ادونا عين :D:D

حااااضر انا بحضر ليك في كلمااات
بس انا براااي محمد داا ما تشملنى معاهو في جملة مفيدة

إيمان صالح 12-12-2007 07:36 PM

ووووووب علي
عاد يا فيصل ياخوي
نكتوا لينا كلاما يطرشني عمري ما سمعت بيه ولا بعرفه
ده اظنه من زمن حفروا البحر
وانا صغيرة وجاهلة وحنكوشة
بري يا يمة من جنس كلامكم ده
شعرة جلدي كلبت وحاة نظري




ايمان

أشتر 12-12-2007 09:15 PM

اقتباس:

المشاركة الأصلية كتبت بواسطة فيصل سعد (المشاركة 83229)
الدفتر : ورق شفاف رهيف يستعمل في نظافة النظارات

:D:D:D:D:D
no comment





اخوي عكود ... عُلم
وتسلم يا حبيب

أشتر 12-12-2007 09:26 PM

اقتباس:

المشاركة الأصلية كتبت بواسطة Haimoura (المشاركة 82922)
البو
ربما نطق الكلمة يختلف قليلا من كتابتها ويمكن تسكين النون ..

يا حيمورة ... ازيك
النون البنسكن فيها دي وين ؟ !!!
بالايجار ما لقيتا !!!
اديتنا الصقيعة ...

والصقيعة ... هي المكان الواسع الفسيح او الخلا
الخلا ولا الرفيق الفسل ...

والفسل ... هو الزول البخيل

شبارقة 13-12-2007 08:47 AM

تراثنا الجميل
 
ووووووب علي
عاد يا فيصل ياخوي
نكتوا لينا كلاما يطرشني عمري ما سمعت بيه ولا بعرفه
ده اظنه من زمن حفروا البحر
وانا صغيرة وجاهلة وحنكوشة
بري يا يمة من جنس كلامكم ده
شعرة جلدي كلبت وحاة نظري

تشكروا على هذا البوست الجميل
بالله يا إيمان هسع ده كلام حنكوشة .. نكتوا لينا .. وشعرة جلدي كلبت ..ده ذاتو ما تراث وعاوز ليهو ترجمة

وهاكم:-

التبروقة : مصلاية من السعف (بت عم البرش) ما تقولوا لي البرش ده شنو؟
الفروة : مصلاية من الجلود
الدردقو : ود عم العجور ، ينبت في الجروف .. وما تقولوا لي الجروف دي شنو؟
الغباشة : الروب المضاف إليه قليل من الماء وقليل من السكر (حاجة مريحة جداً.. أحسن من إكتيفيا)
اللداية : مجموعة من الحجارة توضع عليها حلة الطعام (لزوم رفعا قليلاً عن الجمر)
السيارة : ما تفتكروها العربية ، السيارة هي الطايووق الذي يمسح به صاج الكسرة (عشان الطرقة تسير بسرعة وسهولة) عارفين الطايوق؟ شكراً
الكُنُش : المُفراكة
أم تكشو : وجبة طعام من الماء الحار المضاف إليه مسحوق الخُضرة (الملوخية) الجافة (لا لحمة ولا يحزنون)
أم شعيفة : وجبة طعام من الماء الحار المضاف إليه مسحوق البامية الجافة (نفس شرح أم تكشو)

وشكراً لكم مرة تانية لأنكم أرجعتمونا لتراثنا الجميل الذي نتمنى أن لا يندثر .. ولنا عودة مع المزيد إن شاء الله

شبارقة 13-12-2007 11:54 AM

اقتباس:

المشاركة الأصلية كتبت بواسطة إيمان صالح (المشاركة 83267)
ووووووب علي
عاد يا فيصل ياخوي
نكتوا لينا كلاما يطرشني عمري ما سمعت بيه ولا بعرفه
ده اظنه من زمن حفروا البحر
وانا صغيرة وجاهلة وحنكوشة
بري يا يمة من جنس كلامكم ده
شعرة جلدي كلبت وحاة نظري




ايمان

الحمد لله نجحت في الإقتباس ومعذرة للأخت إيمان

إيمان صالح 13-12-2007 01:28 PM

اقتباس:

المشاركة الأصلية كتبت بواسطة شبارقة (المشاركة 83291)
تشكروا على هذا البوست الجميل
بالله يا إيمان هسع ده كلام حنكوشة .. نكتوا لينا .. وشعرة جلدي كلبت ..ده ذاتو ما تراث وعاوز ليهو ترجمة


الكُنُش : المُفراكة

الله يا يابا الكنش اليخبتوك بيه في دقنوسك
هسه الرسول فوقك انت سالوك من عمر ايمان؟
عاد يا شبارقة يا ولدي تغالطوا الزولة في عمرها وحكنشتها
لا حكت لا بقت
بري يا يمة منكم يا ناس سودانيات




ايمان

إيمان صالح 13-12-2007 01:35 PM

اقتباس:

المشاركة الأصلية كتبت بواسطة شبارقة (المشاركة 83322)
الحمد لله نجحت في الإقتباس ومعذرة للأخت إيمان


بعد شنو عاد؟
لافي البلد والبلدين شايل حسي
ولا مرة لا مرتين
تاني كدي النشوفك تجيب سيرة عمري ولا حنكشتي




ايمان

أشتر 13-12-2007 02:52 PM

نرجع لمحور حديثنا وبلاش خرمجة !!!!



خش يا فيصل >>>>>>>> المايك معاك

فيصل سعد 13-12-2007 05:02 PM

بسم الله و الحمد لله و الصلاة على رسول الله.
اللهم ابعد فتحي مسعد حنفي و شبكه عن هذا البوست :D:D
الو..تست..الو ون تو..
شكرا باشمهندس ابو عاقلة :):) شكرا اختي نسايم

اولا مرحب بالعمدة عكود و تم تعيين سعادتك مديرا عاما للفحص و المراجعة هنا :D:D
و نرحب بايمان و بطلي حنكشة :D و كان دايرة ونسة دقاقه تعالي في الديوان بهناك :)
و مرحب شبارقة مقيما دائما معنا هنا :D:D و اكسر الفيزا كسر الله كل اعدائك :D:D

إيمان صالح 13-12-2007 06:31 PM

اقتباس:

المشاركة الأصلية كتبت بواسطة محمد أبوعاقلة (المشاركة 83348)
نرجع لمحور حديثنا وبلاش خرمجة !!!!



خش يا فيصل >>>>>>>> المايك معاك


بـِـسْ

إيمان صالح 13-12-2007 06:37 PM

اقتباس:

المشاركة الأصلية كتبت بواسطة فيصل سعد (المشاركة 83352)
و نرحب بايمان و بطلي حنكشة :D و كان دايرة ونسة دقاقه تعالي في الديوان بهناك :):D:D

ما دايرة
فاعدة هنا دا
عاجباني الحتة دي




ايمان

فيصل سعد 13-12-2007 06:40 PM

اقتباس:

المشاركة الأصلية كتبت بواسطة إيمان صالح (المشاركة 83359)
بـِـسْ


شكرا يا ايمان على الاضافة، و بـِـسْ معناها غور و اقطع وشك و شتت يا مطرطش يا فقر يا غتيت.
و نحنا ناس روحنا رياضية و كدا :D:D:D

اطيب التحايا.

أشتر 13-12-2007 11:58 PM

اقتباس:

المشاركة الأصلية كتبت بواسطة إيمان صالح (المشاركة 83359)
بـِـسْ

أرد بياتو كديسه من الكدايس
واحدة في راسي وكان قامت بتهرِش
والتانية معاي في الأوضة وكان قامت بت خربِش
والتالتة في كرعي ... ودي بتطير جوز وبت دَقّش ...
والكديسة في كلامنا = السحلبة وهي بت عم الجقلبة وبت خال العنكبة
وكان للعنكبة ... سكلبة وشنكبة ...
وكلمتك دي ... عملت لي كركبة ... ونص الراس حِرِق والباقي ني ...
وهل كديستكم (اذا عندكم) بتخربش ولا بتهبش ...
اذا بتخربش ... نقوم نهبش
واذا بتهبش ... نقوم نخربش


والاتنين بى طينة !!!

إسْ ...

أشتر 14-12-2007 12:07 AM

اقتباس:

المشاركة الأصلية كتبت بواسطة فيصل سعد (المشاركة 83361)

شكرا يا ايمان على الاضافة، و بـِـسْ معناها غور و اقطع وشك و شتت يا مطرطش يا فقر يا غتيت.
و نحنا ناس روحنا رياضية و كدا :D:D:D

اطيب التحايا.


(ودي بى عجينة)
وصهين ثم صهين (ودي من وصايا جدي الكتيرة)

شبارقة 15-12-2007 09:35 AM

سلامات ..وهاكم:-

التيبار : الزير
مريسيلا : سراج (مصباح) يضي بإستخدام الجاز
الرتيلا : نملة (إن شاء الله ما تضوقوا قرصتها)
العُكارة : الكسرة المخموجة بالموية والسكر وتسمى أحياناً (الموصة)
المربعة : الأوضة (الغرفة) المنفردة
الدلجة : الواطه القوية
الشتم : ود الدلوكة (آلات إيقاعية)
العمبلوق :بهيم (سخل) يتراوح عمره ما بين 4 إلى 5 شهور
السحسوح : السفنجة (الشبشب)
البيرون : السحلية
الغُلغُل : بذور القطن
الغوغاية : آلة خشبية لفصل الغلغل عن القطن.

نسايم 15-12-2007 02:02 PM

سلاااااااام جاااكم
انا جايبة لي شوية كلمااات
المترار
المحويب
الغوغاية

نسايم 15-12-2007 02:07 PM

النجامة
الملود
الواسوق
الضناب
التوريق
المرحاكة

نسايم 15-12-2007 02:08 PM

يا ايمان حبابك
وهوووي يا محمد انت وفيصل
فارقو البت
وما تقعدو واحد يصلح والتانى يرمى
روقووو
تقعد في المكان البيعجبها بي الطريقة البتعجبها

إيمان صالح 15-12-2007 04:29 PM

اقتباس:

المشاركة الأصلية كتبت بواسطة فيصل سعد (المشاركة 83361)

شكرا يا ايمان على الاضافة، و بـِـسْ معناها غور و اقطع وشك و شتت يا مطرطش يا فقر يا غتيت.
و نحنا ناس روحنا رياضية و كدا :D:D:D

اطيب التحايا.


شكراً يا فيصل على الترجمة
يلا اقطع وشك




ايمان

إيمان صالح 15-12-2007 04:35 PM

اقتباس:

المشاركة الأصلية كتبت بواسطة محمد أبوعاقلة (المشاركة 83394)
أرد بياتو كديسه من الكدايس

وهل كديستكم (اذا عندكم) بتخربش ولا بتهبش ...
اذا بتخربش ... نقوم نهبش
واذا بتهبش ... نقوم نخربش





رد بكديستكم الفي البيت عندكم مع اخواتك
ونحن ما عندنا كدايس
ياها الشلناها من اخواتك ديك
وجن قلعنها مننا
بركة القلعنها
جاتنا منهن خرباشة وهباشة




ايمان

إيمان صالح 15-12-2007 04:37 PM

اقتباس:

المشاركة الأصلية كتبت بواسطة نسايم (المشاركة 83541)
يا ايمان حبابك
وهوووي يا محمد انت وفيصل
فارقو البت
وما تقعدو واحد يصلح والتانى يرمى
روقووو
تقعد في المكان البيعجبها بي الطريقة البتعجبها


تسلمي انتي يا السمحة وعديلة
خليهم ياختي
كان فارقوني انا اتسلى بمنو؟



ايمان

رأفت ميلاد 15-12-2007 04:44 PM

والله يا عمر سعد بوست ظريف
وتوثيق مفيد

إستوقفتنى كلمات كتيرة إترسبت عندنا من لغات أخرى ونستعملها بدون إنتباه

مثلآ فى الجزيرة للـ Main Canal بنقول الكنار

الأدبخانة : الأدب خانة وخانة بالتركى "مكان" أو بيت

الكورجة : ما عارف أصلها لكن غالبآ من شرق آسيا .. ممكن واحد يقول تركى لكن التركى نفسه مجموعة لغات .. سمعتها أنا عند الأفغان والأندونبسين .. ويوجد سوق فى جدة يبيع بالكورجة .. وهى أكوام تقريبية (بدون ميزان وعداد) للبضائع .. وتستعمل لدينا فى وصف عدد غير معلوم من الناس

من الأشياء القابلتنى هنا "الكارته" ونحن بنقول "الكرتة" ونحن بالنسبة لنا بقايا الأكل غالبآ التالف .. ولكن هنا باقى الأكل للأسبوع .. وغالبآ يُقدم يوم الثلاثاء .. ويكون وليمة معتبرة من ستة أصناف قُدمت خلال الأسبوع المنصرم .. ونحن الكرتة للفقراء ..

بعدين يا فيصل "المرارو" كلمة نيجيرية وهو فول الحجات

وبتزكر وأجى راجع

سلام

شبارقة 15-12-2007 04:51 PM

اقتباس:

المشاركة الأصلية كتبت بواسطة نسايم (المشاركة 83538)

انا جايبة لي شوية كلمااات
المترار

الغوغاية

سلام يا نسايم .. وصحصحي معانا ..المترار (راجعي مصطلحات فيصل) والغوغاية (راجعي مداخلات العبد لله).. لكن خشي بالباقي وما عليك
مع تحياتي

رأفت ميلاد 15-12-2007 04:58 PM

هوووى يا فيصل ومحمد أبو عاقلة
الواحد يدخل يعمل مداخلة يلقاقكم قلبتو على إيمان

أبعدو دمكم .. وأعملوا حسابكم

على كيفا .. والبوست زاتو بنصادروا كان عايزين

بطلوا الكواريك

والكواريك جمع لمفردين

كوريك : ويستعمل لإخرج التراب من الأرض بعد الحفر فى البناء والزراعة وضرب اللصوص
كوراك : ومرادفها السكلى وهو الصياح بصوت عالى .. وتستعمل أيضآ مع اللصوص فى غياب الكوريك :D:D

أشتر 15-12-2007 04:59 PM

اقتباس:

المشاركة الأصلية كتبت بواسطة إيمان صالح (المشاركة 83560)
رد بكديستكم الفي البيت عندكم مع اخواتك
ونحن ما عندنا كدايس
ياها الشلناها من اخواتك ديك
وجن قلعنها مننا
بركة القلعنها
جاتنا منهن خرباشة وهباشة




ايمان



إسْ ...إسْ



وتُطلق على الحاجة المرقت من نفسك

نسايم 15-12-2007 05:01 PM

اقتباس:

المشاركة الأصلية كتبت بواسطة إيمان صالح (المشاركة 83561)
تسلمي انتي يا السمحة وعديلة
خليهم ياختي
كان فارقوني انا اتسلى بمنو؟



ايمان


يا امونة
ماف داااعي
هم بيشتغلوووك بس
وما بتسلووو عليك
بي الزات فيصل محمد اعملي فيهو ما بدااالك

أشتر 15-12-2007 05:02 PM

اقتباس:

المشاركة الأصلية كتبت بواسطة شبارقة (المشاركة 83538)
الغوغاية : آلة خشبية لفصل الغلغل عن القطن.

اقتباس:

المشاركة الأصلية كتبت بواسطة نسايم (المشاركة 83538)
الغوغاية

عملتي شنو يعني !!!!!! لكن لحنك جميل
وتمي لينا جميلك اذا تكرمتي
إن وُجد !!!!!!

نسايم 15-12-2007 05:04 PM

اقتباس:

المشاركة الأصلية كتبت بواسطة رأفت ميلاد (المشاركة 83565)
والله يا عمر سعد بوست ظريف
وتوثيق مفيد

إستوقفتنى كلمات كتيرة إترسبت عندنا من لغات أخرى ونستعملها بدون إنتباه

مثلآ فى الجزيرة للـ Main Canal بنقول الكنار

الأدبخانة : الأدب خانة وخانة بالتركى "مكان" أو بيت

الكورجة : ما عارف أصلها لكن غالبآ من شرق آسيا .. ممكن واحد يقول تركى لكن التركى نفسه مجموعة لغات .. سمعتها أنا عند الأفغان والأندونبسين .. ويوجد سوق فى جدة يبيع بالكورجة .. وهى أكوام تقريبية (بدون ميزان وعداد) للبضائع .. وتستعمل لدينا فى وصف عدد غير معلوم من الناس

من الأشياء القابلتنى هنا "الكارته" ونحن بنقول "الكرتة" ونحن بالنسبة لنا بقايا الأكل غالبآ التالف .. ولكن هنا باقى الأكل للأسبوع .. وغالبآ يُقدم يوم الثلاثاء .. ويكون وليمة معتبرة من ستة أصناف قُدمت خلال الأسبوع المنصرم .. ونحن الكرتة للفقراء ..

بعدين يا فيصل "المرارو" كلمة نيجيرية وهو فول الحجات

وبتزكر وأجى راجع

سلام

مين عمر سعد
الزول دااا اسمو فيصل
ودخلنى في زرد السبيييب لما قلت ليهو
اسم تااانى

أشتر 15-12-2007 05:07 PM

اقتباس:

المشاركة الأصلية كتبت بواسطة نسايم (المشاركة 83540)
النجامة
الضناب
التوريق

يا بت اتكلمي زي الناس ... دي (ديييييب لوكال لانغويتش)


وبعدين شكّلي عشان نقراها صاح

وخليني اقراك مرة صاح !!!!

أشتر 15-12-2007 05:12 PM

اقتباس:

المشاركة الأصلية كتبت بواسطة نسايم (المشاركة 83575)
مين عمر سعد
الزول دااا اسمو فيصل
ودخلنى في زرد السبيييب لما قلت ليهو
اسم تااانى

الناس دي ملخبطة خلطبيطة عجيبة جدا
بين عمر سعد بتاع هناك وبين فيصل سعد بتاع هنا
اتعودو على داك ولسه ما اتأقلمو مع الهنا
داك بسب ودا ما بسب ...
يا جماعة حاولو تنفصلو عن جميع موجاتكم العاملة وقتئذٍ
عشان ما تحرجونا ... وتدخلون في مناطق ضيقة لا قِبل لكم بها ...


الساعة الآن 10:49 PM.

Powered by vBulletin® Version 3.8.8 Beta 2
Copyright ©2000 - 2021, vBulletin Solutions, Inc.