بفوتك ...خوف
 

بفوتك... خوف
متل خيبة رجاي الفيك
لقيت الليل
يتلوى من الألم موجوع
وماتلبس قناع الزيف
براك خداع بلا مقنع
ومتل قدر البقيف محتاج
على باب البخيل عشمان
راجي اللقمه من ايديو
يصد العشم بابو ويفوت يقنع
ومثل روح البصارع الموت
ويعيش لحظة ألم سكرات
ويكون حلمو
تفارق روحو بس تطلع
متل فرحة غريب ناقصه
وسعادة زول بلومو ضمير
يقولو حرام تسيب وطنك
تفوت تنجع
متل كل الكلام الشين
ومتل كل الكلام الزيف
ومتل كل الكضب كلمات
بفوتك قول بفوتك ريد
ومحال ياسيدي لو ارجع
بفوتك شايلة ترياقك
تلاوي كبيدتي من الجوع
مصراين الفراق نبحت
وماك الزاد
وكت مايجيك خشيم الريد
عشان يشبع
بفوتك ريد بيسرق في خطاوي الخوف
هروب باليل وقبال شمس
الخلوق تسطع
بفوتك شوف عيونو عمت من الخدعه
ولابرجع يحس بيك ولابسمع
بفوتك خوف من التاريخ
عشان مانكون للخداع مرجع
بفوتك موج هجر قيفك
وموية ملحك المره
خسارة قلبك المنبع
بفوتك ماك فارس القدله
ولاك لضعيف قبله
ولاك عشى البايتات
ولاك لي الحوبه يوم تنفع
بفوتك فالصو من الريد
نحاس الحب
وكت ماكتا مغشوشه
وشفتك ذي دهب بلمع
بفوتك مابتشبهني
ولابتشبه تكون ليا
بتشبه روحك المخدوعه فيك
وزول مخدوع وفيهو
الخوف دوام بخدع
وبيتك من قزاز الزيف
حذاري تشيل حجار اللوم
تفلع بيتي يوم تجدع
تجقلب خيلك انت وجع
وشكرك ديمه لي حماد دوام يرجع
وليك بفتح ثلاته ابواب
براك اختار عشان تطلع
اطلع من عروق الدم
اطلع وشيل معاك الهم
اطلع وتاني مافي ندم
اطلع وكت يبقى الفراق اشعار
كلامو رماد حرفو سجم
اطلع وكت يبقى الأسف مجنون
يهضرب بي حلاوة الريد
ويشيل حق الوفاء المسكين
يشيل اقلع
أطلع
صباح محمد الحسن 3/1/2012

بسم الله الرحمن الرحيم


الأخت صباح ..
الأمانى والتحيات ..
لك ولمن حولك وللزمن الجميل ..

قرأت هذه القصيدة وشقيقتها (ودعتك الله )
وأسرتنى الموسيقى المنبعثة من أركان النشيد ..
تآلف الحروف أفاض عليها مسحة من الهدوء المدهش ..

شكراً لك على هذه الألوان ..
ونطمع فى زهرات وردية المنبع ، مكحولة العينين ..

شكرا يوسف على المرور واهلا بك كلمة وسهلا بك حرف كم جميل ان يكون الالق والبهاء شخوص ......تحيااااااااتي

بفوتك مابتشبهني
ولا بتشبه كون ليَّ

سلامات صباح
شكرا على احساساتك هنا:)

تماضر..............تحيااااااااااتي ..........شكرا ثمينا"

ياالله ... من هذا الصباح ..ياصباح

استوقفتني حروفك وتلك الصور جد صادمة
واسعدنىكثيرا رشاقة حرفك بنسياب وزخيرة
تصويرية دون تكلف.
سلمتى..
واحة