قروب سودانيات
 

فكرة لعلها تصب في خانة لم الشمل وعودة الغائبين ... اضافة الى انها وسيلة تواصل قوية بين الاعضاء ... قد تسهم في تقارب الاعضاء والتعارف اكثر ... وتكون رافدا للمنبر .. انشاء قروب سودانيات

وكل عام وانتم بخير

التواصل عبر الخاص طبعا مفعل وشغال ولي العديد من الاتصالات عبر الواتساب مع بعض الاخوة الاعضاء ... بس القروب بيلم الناس الحضور والمتغيبين

أهلاً زول الله

تتذكر زمان (ماعارف كنت موجود الزمن داك وال لا) .... لمن القنوات الفضائية يا دوب ظهرت المقاومة اللقتا من هيئة الأمر بالمعروف وتحذير الناس منها وأنها الشيطان ومحاربتها واجب ..... وما قدرو يحاربوها وإنتصرت عليهم في الآخر لسبب بسيط .... وهو التطور ...

الأخ الواتس ... بيختلف شوية ... شغلتو ساهلة ومريحة ... خصوصاً للونسة العادية ... لو نعمل قروب تحت إشراف ومتابعة إدارة المنبر نفسه .... شوف كم المكاسب البتتحقق:

وأهمها هو التمهيد لعودة الغائبين لو إستطعنا إستقطابهم في الواتساب.

غايتو هي فكرة قابلة للقبول والرفض أنا طرحتها للنقاش كمساهمة ذات فاعلية للم الشمل

تسلم كتير يا حبوب

السلام و التحية أخي عبد المنعم و أخي زول الله
و عساكم فاينيين و بالف خير و عافية..

يا منعم انت فاتح البوست و ماك عارف انه قروب سودانيات في الواتساب موجود و شغال و راشح زي الترتيب و حركته أسرع من حركة المنبر ثلاتة أربعة أضعاف.. اتفق مع زول الله أنه أي تجمعات و قروبات خارج المنبر بتضعف الحركة و التواصل و بتاثر سلبا هنا، و لكن في نفس الوقت لا نستطيع أن ننكر حق الناس بإنشاء ما يختاروا من وسائل تواصلهم، و يبقى الرك انه القروبات دي ما تطشش الناس من تجمعهم و تواجدهم هنا تواصلا و محبة..

ابقوا طيبين..

مرحبتين فيصل وعساك طيب
من وين نعرف .... عمرك بالغلط سمعت ليك واحد جاب سيرة قروب لسودانيات ... اهو الحمد لله عرفنا ... طيب عاملنو دكاكيني ليه ما يدو الناس خبر .... كل قصدي من الموضوع هو جمع الشمل وتعميق المعرفة واللمة ... لاني لمست ان البعض يعزي اسباب اختفاء الاعضاء لاجهزة التواصل الاخرى ... فقلت ليه سودانيات ما تقتحما وتتحكر في نصها

تحياتي

أستاذنا عبد المنعم الحضيري
مساءك خير
كل وسيلة عندها حاجاتها . . إيجابي وسلبي .
الواتس فيه تواصل حميم . . وأنا مع قيام قروب
للواتس يخضع بالكامل لإدارة وتنظيم إدارة سودانيات
. . ممكن نعتبره الذراع غير العسكري للمنبر
تحياتي وتقديري

عبد المنعم وضيوفك الكرام
تحية واحترام

نعم وزي ما قال الباذخ

قروب سودانيات في الواتساب موجود
انا كنت عضو فيه وغادرته مع مغادرتي لقروبات كتيييييره في الواتساب
بل وازلت برنامج الواتساب من جوالي نهائيا

بالنسبة لي شخصيا ..
الواتساب مزعج جدا .. بالنسبة لحالتي انا

وفي رأيي انو تواجد أهل سودانيات في قروب سودانيات عندو ايجابيات من ناحية وسلبيات من ناحية تانية
الشئ الموجب هو التقاء عدد مقدر من أهل سودانيات المتواجدين الان في سودانيات بالاعضاء المختفين منها في تواصل طيب

لكن الشئ السلبي حتي اللحظه

انو القروب ده ما ساهم بعودة الغايبين من البيت الوسيع
وما عندي ادني فكره لو مسألة الغياب عن سودانيات اتناقشت هناك ولا لأ

مشكلة قد تواجهكم في قروب الواتساب
الحد الأعلى المسموح به لعضوية أي قروب هو 100 عضو فقط
اها مع عضوية سودان الضخمة دي اقل حاجة بنكون عاوزين 15 او 20 قروب في الواتساب

وهو كذلك ... أعني الذراع غير العسكري للمنبر ... بمعنى أن تتواجد سودانيات ككيان عبر إدارتها في الواتساب كوجه آخر للمنبر ... أعتقد أن الفكرة جميلة لو تلقفتها إدارة المنبر .... سواء كان هنالك قروب قائم أو لم يكن.

تحياتي أديبنا الكبير عايد

شكراً يا ناصر

طالما ما أكدت أن هنالك عضوية متغيبة عن المنبر ومتواجدة في القروب فدا بيدعم كلامي حول أهمية القروب في دعم المنبر ....

مشكور

نعم يا أشرف دي حقيقة ... ولكنها لن تعيق المشروع إذا تبنته العضوية وأمنت عليه الإدارة ... وكما ذكرت يمكن أن يكون أكثر من قروب ...سودانيات ون ... تو ... أو قروب خالد ... قروب عكود ... قروبات تحمل أسماء من رحلو تخليداً لذكراهم ... وهكذا.

لك التحية والتقدير

قلت ليك يا حبوب لغاية هسي مافي حد جاء داخل سودانيات من الغايبين وكان القروب هو سبب جيته ،،، لغاية هسي يعني

ربما لا قدام تنتفي أسباب غيابهم من بيتهم ويعودو بسبب قروب سودانيات

يا ريت ياخ

ناصر سلامات

القصدتو أنا طالما المتغيبين موجودين في القروب فأمر عودتهم سهل والمسألة مسألة وقت

تحياتي