هنا التذكر سوف يكون جزء من العبط الذي لا لزوم له فيما يختص بقصة المريسة ...فأنا لا أتذكر أول مره رأيتها و لكن عندما صرت أميز بين الاشياء و أكون ذخيرتي اللغوية كان من بين تلكم الكلمات كلمة (مريسة)... المهم في النهاية وجدت نفسي أشرب المريسة كأي ممارسة حياتية يومية الي أن دخلت المدرسة و هنا تفشت لغة الحلال و الحرام , الجنة و النار , الاقرع الشجاع و كم و كم من التهديد و الوعيد ....عندها اختل تجانسي الداخلي مع المريسة للابد و حتي لا اتهم بعدم الموضوعية فسلامي الداخلي حتي تجاه أسرتي قد إختل.... و أصبحت بين شد التهديد الديني و جذب أن أكون ضمن مجموعة من افراد لم يختاروا طريقة تكوينهم .... مجموعة بها أب , أم , أشقاء و كلب تسمي أسرة .... عدة مرات حاولت الإقلاع عن المريسة لانها حسب معتقد مدير المدرسة تعتبر من ام الكبائر .....
و بمناسبة ام الكبائر فوالدي قد ترقي حتي صار امام المسجد بعد موت الامام القديم .... كدا واحد يجي ناطي لي هنا و يقول لي ما في ديمقراطية في اختيار أئمة المساجد ...بس منصب الحاج الجديد دا عندو تباعتوا يعني كل يومين ناطي لينا زول جديد في البيت ...زول خارج في سبيل الله و بدل ينوم في الجامع ابوي بقرر يجيبو معاهو البيت ....لكن تصدقوا حاجة ياخي الناس البخرجوا في سبيل الله ديل ناس بسيطين بساطة كدا مبالغة و صدقوني انا بشفق عليهم اكتر من اني بكرههم ... عمك الخارج دا ما عارف لقط من وين انا بسكر... المهم لفا الكلام و دورو خشي بحمد و طلع بخوجلي لحد ما جاني لي كلام مدير المدرسة الابتدائية القبل عشرين سنة عن الخمر و انها ام الكبائر .... و دار بيننا الحوار التالي:
الخارج: انت عارف يا ولدي الخمر دي سموها ام الكبائر ليه؟
انا: حاولت ان افتح شهيته للحديث بفتح فمي دلالة البله و التعطش للمعرفة ببساطة لاني ما عندي لحظتها اي موضوع فقد كنت في عام العطالة الذي يلي الخدمة الالزامية ... فرديت ابداً يا حاج ليه سموها ام الكبائر؟
الخارج: اعتدل في جلسته و بدأ خطبة من النوع ابو لستك .... انت عارف يا ولدي في راجل صالح ... ربنا داير يمتحنوا ... الزول دا لاقا ليهو مره جميلة (يعني جكس من امو يا فرد) جداً , معاها طفلة و قزازة خمر. قامت المره قالت للرجل الصالح دا: اسمع يا تزني بي (دي يكتبوها كيف بالدارجي)...او تقتل هذه الطفلة , و اما تشرب الخمر ....المهم عمك الصالح دا حمر دنقر... ضرب اخماس في اسداس و لقي ان ابسط حاجة ممكن يرتكبها هي شرب الخمر ... شرب ليك الخمر دا ... اول حاجة عملها قام ليك علي المره ...تانياً كتل الطفلة ... يعني عمل التلاتة جرائم ....
|