[منال]

الجاب خروفو حسب ظروفو
أكلوه ضيوفو، ما خلوا صوفو
***
كبشي البجيبو ماكن مدغلب
شحمو البمرقو ودكا يتعلب
شافوا السماني قام جاط وجقلب
شرق الحلفايا شارب لو مقلب
غشوه جماعة وباعو لو ثعلب
***
الجاب خروفو حسب ظروفو
اكلوه ضيوفو ما خلو صوفو
كُلُّنْق كُلُّنْق كُلُّنْق * كُلُّنْق كُلُّنْق كُلُّنْق
***
خروفنا داير اورنيك جمارك
سيدو اب عريريق بسوطو بارِك
كم فيه راغب كم ليه تارك
سماسرة خايضين جنبو المعارك
ما بشتريه أستاذ مشارك
إلا المقاول او دكتور مسالك
***
الجاب خروفو حسب ظروفو
اكلوه ضيوف ما خلوا صوفو
***
كُلُّنْق كُلُّنْق كُلُّنْق * كُلُّنْق كُلُّنْق كُلُّنْق
***
الناس غلبانة تجف وتعرقْ
الما بضحي بصبح مطلَّقْ
لازم ضبيحة وفرار مطَرَّقْ
لو ما قدرت اضبح ود ابرقْ
***
الجاب خروفو حسب ظروفو
اكلوه ضيوفو ما خلو صوفو
كُلُّنْق كُلُّنْق كُلُّنْق * كُلُّنْق كُلُّنْق كُلُّنْق



هاك دى