[رأفت ميلاد]

المشاركة الأصلية كتبت بواسطة ماريل

صباح الخير يا سيدى
كلامى يدور حول عنوان البوست فقط ولسه ما جيتك لى لب الموضوع ما قصدته انا كله منصب حول المرة الكويسة تمسك الراجل الكعب

هو الراجل وقت سجمان ورمدان وكعب انا الكواسة لى شنو والجابرنى شنو زمان نوع الكلام ده بقولو لى حبوباتنا وامهاتنا لكن هسه ما بقسم

زمان الوحدة تمشى لى بيت ابوها مقنجرة ومكسورة جناح يرجعوها مكسورة عين ويقولو ليها ما عندك حل غير بيتك وراجلك ولادك ديل البعيشم

ليك منو؟؟وقع ليك كلامى ولا ازيدك؟؟ لمان يشجعو المراة او يجبروها انها تستحمل الراجل الكعب ده ببقى تمييز وله ما تمييز وليه ما بشجعوا

الراجل انو يستحمل المرة الكعبة؟؟كان غيرت عنوان البوست بنكون ملزميين نجى لابداع المراة البموت بعد الزواج لكن العنوان المستفزنى

ده لازم اقزقز بيهو معاك شويتتن نظام تسخينة وكده حتى اجيك للعب جوه مقصدك،

كلامى ده كوووووووووولو حول العنوان فقط يا سيدى

المشاركة الأصلية كتبت بواسطة كيشو

تحية واحترام للجميع
لم أقرأ المداخلات، والجابني العنوان
أنا ضد إنو المرة ندخلا في تجربة تقويم الراجل الكعب، الفكرة دي تصيبني بالغضب
الاستثناء الوحيد هو أن يكون اﻷمر برغبة المرأة
ياخ المرأة ليست إصلاحية
أكيد في زول سبقني على الراي دا
يجب علينا محاربة هذا المفهوم

المشاركة الأصلية كتبت بواسطة ماريل

عبرت عنِى ياخى
انا ذاتى جابنى العنوان وعمو رافت قال لى كلامك بعيد خالس خالس هو ما شايف انو العنوان هو البعيد خالس خالس

يا جماعة ما فطيت زى بابكر عباس وراجع لكلامكم المفيد .. لاحت لى فرصة ألبع ماريل وكيشو ديل .. وفرصة زى دى ما بتتعوض ..

مولانا ماشى أديه مع الرأفة عشان أتملص بعدم قراية الموضوع .. لكن ماريل بالحتة الفيها الحديدة

العنوان مهم جداً يا ستى عشان يكون جاذب ويجيب ناس متسكعين زى مولانا ده ثم العنوان (مثل سودانى أنثوى) .. ما ذكورى المنشأ .. وبعدين مقدمة البوست أستهليتا بالعنوان فى ونسة دردقة للموضوع .. حقوا تقروا قبال ما تدبوا ساكت

كسرة زى ما بقول الفاتح جبرة

تحليل كيشو للعنوان جه على مزاجى شديد .. وكتير من أمثلة النسوان بتجعل من الرجال زى الجهال وعليهن تربيتهم وتقويمهم .. فى مثل بقول (أبنك زى ما بتربيه وراجلك زى ما تعوديه)

كيشو أداكى بالشومة يا داقسة