هل انت غاضب ياعسوم؟ هل انت مغبون؟ هل تشعر بالظلم؟ هل تشعر بالخذلان من عدم وقوف الناس معك ونصرتك؟
حسنا ياعسوم حا ارد عليك، ماعشان ازيل عنك احساس الغبن ولا اخفيك انه يسرني جدا ان تشعر اخيرا بهذا الاحساس الفتّاك، سأرد عليك ربما لانني لازلت تحت تأثير مداخلة النور الوضيئة وماتدفعه داخل المرء من احساس بالسلام والمسامحة
تقول انني ادعو ان لايتم اعتبارك انسان ولك حقوق مكتملة، نعم صحيح وقد اوضحت هذا الامر في حينه وسأوضحه لك الآن بشكل اوضح
انا لمن قلت الكلام ده ماكنت قاصدك انت شخصيا، انا لا اعرفك ياعادل ربما تكون فعلا كما تقول زول (كويس) وعندك سياقات وتكتب كتابة جزلة ولك الكثير من (الايجاب) والخ من بطيخ، وللحق انا ماشفتك بتشتم زول وبتكتب بي لغة عالية فعلا، ولكنني لا استطيع ان ارى ذلك كله! انا مغبون وغاضب يا عادل، والمغبون كالذي نفسه بغير جمال لا يرى في الوجود شيئا جميلا (او كما قال بابكر عباس في لحظة تجلي) انا اتخذتك كمثال للكوز عديم الاحساس وبقيت اطرح كلامي متخذك مثال ولا اعنيك انت شخصيا كده كعادل عسوم وانما اعني الكوز فيك، اي كوز!
طيب.. اختصارا للوقت والنقة خليني اقول الكلام عديل... انا (كخالد غالي) اعتقد انك فعلا مورس معاك هنا نفس القاعدة تمارسو حكومتك والبتدافع عنها، الادارة هنا بيستندو على اللوائح ويطبقو عليك عقوبات قاسية، نفس ده بيحصل في السودان للناس مع فارق انك هنا بيوقفوك من الكتابة شهر وهناك بيدخلوهم معتقلات ويعذبوهم وينتهكوا آدميتهم شهر
في جزء كبير من الناس هنا بيشوفو ده بيحصل ليك ومابيدافعوا عنك، كمثال الاغلبية الصامتة في السودان البتشوف الناس بيتم حرقهم يوميا في جبال النوبة ومابيقولو شي، في واحدين بيشكروا ناس الجيلي والنور وبيقولو جيلي القوم ونور الله البيضوي، كمثال زي نوعك ده البيجي يشكر صلاح قوش ويقول ده ابن المنطقة وحايفتتح الفضائية المروية، ولمن الناس يجو يقولو ليك الزول ده بيعذب الناس في المعتقلات ويظلمهم ويجيبو ليك شواهد، بتجي انت تبتسم وتقول العندو مظلمة اليمشي القضاء، وهل يعقل ان رئيس جهاز الامن يمشي بنفسو ويعتقل زول من المطار.. هل يعقل؟ وتمضي مبتسما مقتنعا بكلامك!!
اها ياعادل زي نوع كلامك ده ياهو البيجيب الغبينة والغضب المابخلينا نشوف سياقاتك وايجابك وبطيخك! والغبينة المتولدة عندك لمن تسمع عكود بيقول للجيلي ياجيلي القوم ياها البتخليك مابتشوف طيبة وظرافة وانسانية الجيلي!! هل تستطيع ياعسوم ان ترى بهاء وضياء النور يوسف؟؟ هذا الضياء الذي يراه الجميع الّاك .. هل تستطيع؟؟ لا والف لا فانت مغبون والمغبون اعمى!
مع الفرق الكبييييييييير طبعا في مقدار الاذي الناتج من الناس البتدافع عنهم انت وتقول الخروج على الحاكم المسلم حرام ومن الاذى البتتعرض ليهو انت من شتايم واهدار انسانية وتوقيف في منتدى اسفيري!! ياعزيزي الكاس الشربت منو انت وحرقك شديييد ده، دي قطرة صغييييرة ومخففة الاف المرات من الكاسات المركزة القاعدين يتجرعوها الناس يوميا بسبب الحكومة القاعد تتصور انت مع صلاح قوشها وتجي تشكرو هنا، صدقني ياعادل زي صورتك مع قوش وزي صورة الصادق المهدي وهو واقف زي الحرباء بالظبط عشان عمر البشير يكرموا، زي الصور دي بالظبط هي التي خلقت من اجلها الشتايم والالفاظ النابية، الناس بتشتم ياعادل عشان مايطق ليها عرق، وبتنزع عنك انسانيتك ومابتشوف ليك ايجاب عشان ماتموت كمدا وحسرة
من الجيد انك جربت الاحساس ده ياعادل، احساس الظلم واحساس انو مافي زول حاسي بي ظلمك، احساس انو الناس طبيعيين خاااالص وعلاقتهم حميمة ولطيفة جدا مع الناس البتظلم وتشتم فيك، بس ياهو ده الاحساس الانت قاعد تجرعوا للناس مضاعف اضعاف كثيرة كثيرة جدا لمن تجي تقعد تشكر في زي صلاح قوش وتبتسم!!
هل انت مغبون ياعسوم؟؟ هل تشعر بان لنا جعفر ومهند ظلموك؟ مافي مشكلة امشي اركب انتنوف وامشي اقصف المساكين في جبال النوبة وصدقني الفعل ده حايتسبب في آلام مهند ولنا عسى ان تتفش غبينتك!
امشي امسك زول فاض بيهو وطلع مظاهرة وعذبو في بيوت الاشباح واشتموا لي سنسفيل اجدادوا وتعال قول الكلام ده هنا، حاتلقى الجيلي متألم وبينزف من جوة الجوة وبي كده تكون فشيت غبينتك منو!
طبعا ما اظنك محتاج اقول ليك اني ماقاصد انك تمشي انت شخصيا تقصف الناس في جبال النوبة او تعذب في بيوت الاشباح، يكفي فقط ان تعرض صورتك مع صلاح قوش او ان تقول الخروج على الحاكم المسلم حرام ليصيبنا جميعا الغبن والالم اضعاف مضاعفة مماتشعر به الآن!
ياعادل ان كنت فعلا كما تقول (زول كويس) فربما اراد الله بك خير في انو يوريك بي ام عينك مقدار الاحساس السالب وتهشم الدواخل الممكن يصيب زول مظلوم من جراء دفاعك عن الحكومة في السودان، ربما سلط الله لك هؤلا القوم ليظلمك بعضهم ويتجاهل مظالمك البقية حتى تشعر في داخلك بمقدار الالم الذي يسببه تجاهلك لمظالم الآخرين!
خذها مني ياعادل واعتبرها نصيحة من الاخ الاصغر او الابن خالد غالي... اقعد مع نفسك براك وشوف انت واقف وين، راجع مواقفك وشوف مقدار عدم الانسانية لمن بس تقول كلمة موجبة في حق زول زي صلاح قوش، شوف مقدار الاحساس السالب الهدام والمؤلم للغاية الجربتو انت براك الممكن يتولد في دواخل زول اتعرض للتعذيب وما اكثرهم على يد صلاح قوش وامثاله، شوف دموع وحسرات الامهات البيموتوا اطفالهن يوميا في مناطق الحروب المختلفة نتيجة سياسات الحاكم المسلم البتقول الخروج عليهو حرام! يا اخي شوف اهلك في الشمال والضنك والعوز العايشين فيهو من سوء توزيع ثروات هذه البلاد المعطاء، شوف كميات المظالم والظلامات البتتولد كل يوم من خمسة وعشرين سنة! عاين لي ده كلو وعاين لكمية الغباين الممكن تتولد والاحاسيس السالبة والهدامة والنفوس الممكن تسقط في وهدة جب الغضب والغبن والالم ومايترتب على ذلك من ضياع... قارن بس باحساسك انت من الجرعة المخففة ملايين المرات الاتعرضت ليها واستصحب الفارق الكبير في المقدار بين الحياة وبين منتدى اسفيري ممكن تقفل اللاب توب بس وتنسى كل شيء.
فكر في ذلك كله بعدل ياعادل وراجع مكان قدميك
واعلم انك لاتهمني في شي وموقفك معي او ضدي لن يضيف او يخصم مني شي، فان تراجعت فانما لنفسك وان مضيت فيما انت فيه فلنفسك فما انت الا رجل واحد لن يقدم ولن يؤخر، وسوف نلتقي جميعا عند من لايظلم عنده احد، وعندها سنرى من يقول فزت ورب الكعبة