[align=center]رجعلك قليبي المهضلم
محمد طه القدال
رجعلك قليبي المهضلم
يراجع صنوف الغناوي العصية
يراجع معاك الكلام القبيل إستباك
الكلام المبهرج وخاوي
الكلام المزيف
ولافيه غير إحتلام وإنفصام
تموت الحروف يوم تقوم القصائد
مقام الطبول والبخور
بشوفك جرايد شواكر حوامد
ولا هامي فيها
عليها المصائب تمام التمام
مغائص بتفرم حشاها
وغبائن بتنفخ بطون البسفو التراب
وحايح لهيب البتلفح
تلهلب وتكوي الجلود
أتف القصائد
إذا ما القصائد دايرة ليك البُكا
البصاحب .. رضا .. السردار
واتف القصائد إذا ما لقصائد
بتنزل مُريدة وتسبح بحمد الذي
إبتلاك وهدَاني الودار
طِريتك وأنا الكنت قايل
خيالك معشعش جواي
سكنتك وما لاقي فِجة
أخير ليك اقول البحرق حشايا
أخيرلك أفضفض جراب الخبايا
أقول الكلام الفكفك سوارك
يوقف جدارك ويرفع عضايا
تضيع الرموز التبكى الكلام
أقول السكاكر ابتني ورمتني وكفانا
أقول العساكر تباري الكباري
وتفتش قلوب الجهال الشلوخهم هوية
واغني الزيود والكنانة
كضب ..
أقول البنات البفتحن صدورهن
يقالدن رشاشك ويخلن حبيبهن
كضب ..
عريب الجزيرة الببيعوا الزيوت
ما شروكه وفكة واخته اكتزام
عقال الجزيرة المرسول لضهورهم
قريب ود رباعة
مودك بطونهم مراتب قطن
جلودهم حرير
بنات مونت كارلو الجواهل
جوافل ضنب عم سام
مراحك يعشي ويغشي
خضارك مرطب يندي الضهاري
ترابك مقوسب يقوم دخن
لو زرعت الحجارة
بلادك ولادك كروها السحالي
تسفر سعيتك تفنب تباري
الجداد العقالي
تجوع يا البشدر خريفك
سواقي البطانة
ويمطر رزازك
عزازا حصايا
وقموحك سنابل
مشاط كردفاني
أبيت الكلام المغتغت
وفاضي
وخمج
ولادك قصادك شعاع التحايا
يضووا الشقوق التلم الدوابي
يوروا الدروب للقلوبهم عمايا
عرقهم حبالك
وصوتهم مشانق
تلم الدقون الكبيرة
وتحدر فقر سمنتها الليالي الضليمة
بتهدر حرائق وتحمي البياكلوا المطايب
تسمم بطون الجياع العرايا
وشوشهم سمر حر أباطك
صفوفهم مرامك وحلمك حلمهم
رغيفة وكرامة وسلامة
مصانع بتخرب قبل تبدا فيها
مزارع بتيبس ونيلك ممدد جنازة
وعقيدك وسيدك بيكتب ويمحي
وتبق المحايا[/align]
|