الموضوع: ترنيمة
عرض مشاركة واحدة
قديم 02-02-2015, 03:13 PM   #[2]
أبوذر بابكر
:: كــاتب نشــط::
الصورة الرمزية أبوذر بابكر
 
افتراضي

يا جايه من عمق الألقْ
مرسومة بى لون الصفا
زاهيه زى معنى الوفا
ومسقيه بى روح العبقْ

جايه ومعاكِ الأغنيات
وكل الدروب
مرقت تبارك طلتك
تحكى وتقول
السمحه جات
وتتمعنِك
مندهشه كيف
إنه الفراش إنضمَ ليك
سوَاك حديقة
وفيك سرحْ
وكيف الكلام
شايل حروفو ومشتهيك
سمّاك حقيقة
عشان يحاول يكتبك
عنوان فرحْ

وكيف الشمس
فرحانه بيك
ساعة الغروب
سوت وهج جيتك شفق
يا جايه من عمق الألق


جايه ومعاك الأمسيات
نشوانه ساحات الحضور
وبيك تصبح اللحظات هدايا
شويه ريد
وشويه عيد
شويه زهرات للفريق
وشوية غنوات للصبايا
وكل ألوان البريق
تشعل تفاصيل الحكايه
تعلن صباحك
ونشوة الضو الدفَق
يا جايه من عمق الألق


يا جايه زى لحناً رزين
ممدود على وجع الوتر
موسق خطاويك بالحنين
يا طلتك
ضحكة نجيمه بعيدة عاشقه
وغمزة فى وجنة قمر
فرحة رذاذ جوه الغيوم
يا طلتك
شبَال مزخرف بالنجوم
يا طلتك
إشراق سنا
وإيقاع مدوزن فى نسق
يا جاية من عمق الألق

يا مارقه من ضو القصيدة
وطالعه من زهو النشيد
نشوان مقام الريده
فى زحمة غناى
طربان مبلل بى شذاكِ
ودمعة الفرح العنيد
روّضْتّى حزن الليل معاى
جيتك وطن
خليت اساى
ومعاكى خلتنى المحن
معاكى فارقت الشجن
جيتك وطن
فُتَّ المواجع و الرهق
يا جايه من عمق الألق



التوقيع:
يا سرَها يا لونَها
كيف إحتمالُك للعبيرْ
جلستُ على رخامِ أغنيةٍ
تنسابُ ناصعةً من هديلِ لونِها
من مسامِ سرِها
فزملنى الحرير
أبوذر بابكر غير متصل   رد مع اقتباس