[بابكر مخير]

وبتفرج ذيي وذي زول سوداني مليان وحشة للبلد، قلبو عليها من الوحوش.
بتفرج في القنوات اللاها جاية من بحر ولا نهر ولاها صابة في خور ولا جدول يزقي الشتل...
في الأول بدت بقصة السر قدور الراجل السمح. ما قولت الجمال ليها مواصفات ممكن البعض ما يشوفا فيهو وإن كان أنا غير ذلك. بشوفهو جميل من دواخلهو وجميل في كلمة قالها لكنهو برضهو زولن سمح قبل وبعد للي صفاتهو وكرم خلقهو. حكى عن نفسهو وتاريخ مسيرتهو وعلى قول قاسم بدري أنهو فعلن السر قدور حكآيي...
تانيها حلقة لي شباب جميليين ودآ حسب وصف بعضهم البيفهم الجمال أنهو الوشيش والقامة وكانوا ديل الشباب السمح العديل. ناس مسلسل أحمد ود الجقر وما ظلم لي المجموعة المتميزة من بنياتي الحلوات ولا وليداتي الفالحيين الهم عصب المسلسل وروحه. لكن لأنهو أحمد هو وليدي كان أبوهو أخوي وكان أمه بت عمي وما خاب إبن الوز إن طلب منهو العوم.. أبوهو زولن مسرح كامل ومتكامل وأهله البناويين حياتهم فن بي أصول، كان قول، كان غنا، كان حركة وحضور.. مسلسل عشتهو وأعجبت بيهو فشكرا كتيييييييير ليهم..
أها بعد دآك جات اللازمة تكون مدام اليوم فرح وشيتهو مربوط بالدين؟؟
جابو حلقة لي ناسن نظاك في هندامهم، رويانيين في عروقهم. الوشوش تقول نازة دهن واللبس التقول من بياضهو ينعمل دعاية لصابون "تايد" والجميل بالجد فيها أنهو الناس ديل سمحيييييييين عديل ومنعميين..
ودآ ياهو المجنني.
ليييييييه ناس الصوفية موولس والنغنغة في محياهم الناعم وجميل..
لييييه؟؟
سايبين لينا الغبشة وهم خضرت لبسهم إلا تلال الحبشة
يدينهم ناااااعمة، لا جرحة لا خدشة
وركوبهم المرسيدس سايبين للخلق ركوب الرقشة
ما قلنا شيخ فرح بيقول الحق والبصيرة ست الهترشة