العَجِين المُرْ
هاشم صديق
سَكّيتى
السحابة السمرا
من قيسان
ولي قِبلة
سما أمدرمان .
......
يوم الجمعة
صلّينا
دعينا المطرة
شان تنزل
جات المطرة
بالبمبان .
.....
إتحرّينا لي رؤية
شهر رمضان
إتفاجئنا بي رمضان
كان حاضر .
مَرّ الحول
وما فاتنا
كان واقف
وكان حارِن
تقول حردان .
......
تمام حولاً
ونحنا تملّي
ناس صايمين
وماعارفين .
ما حللنا صوم
بي تمرة
ما بلّينا بي حلومر
حلق نشفان .
......
شن الصوم
وشن الرؤية
يا ( عشمانة )
كان عزّ القِرِش
في الإيد
واتقدّد
جِلِد جُزلان ؟!
......
لا زِرّيعه
لي الآبري
لا عجالي
لي شرموط
لا (تيبار)
عجيناً مٌر
ولا في عصيدة
بي ملاحاً
لذيذ ويسُر
.....
لا في بليلة
في حلة
ولا تمراً كُبار
في كورة
يتبلا.
.....
لا فحماً
ولا ملحاً
ولا قِرشاً
يجيب شيتاً
من الدكان .
.....
إتشققنا
لّما نشفنا
وإتقلّينا
لما نجِضنا
وإتفتفتنا
لما كملنا
وأسيادنا السُمان
(كيزان ).
.......
قرصنا الجوع
مرقنا هتفنا
ضد والينا
ضد خانقنا
ضد كاتلنا
كان صوت
الوجع عالي
وكان نقحي الجروح
مسموع
ضحكوا علينا
ناس (كاكوما)
و (ود برهوما)
قالوا علينا
أحسن لينا
(لحس الكوع)
سبحان الخلق
أشتات
ديل ناس الشرف
ناصل
وناس أصل الخجل
مجدوع .
......
صعاليك البلد
حاكمين
أشراف الوطن
صاغرين
يمرقوا غلابة
للبمبان
وتتكندك
سما أمدرمان
والفراجة
و (المهراجا )
بس لابدين .
......
سمح والِينا
لما يفور
ولما يثور
علي منصة
ويهز الايد
كمان تجديد
في أصل
( العرضة )
والرقصة
يهيج فينا
وكمان يدينا
كم حصة
عشان كوركنا
من جوعنا
كسرنا الخوفة
والرصة
طلعنا هتفنا
مرقنا دفرنا
زي سيلاً نتر
دفَاق
و بقينا وصرنا
عند الوالي
متآمرين
كمان شماسة
ضد الدِين
وناس عُملا
و( شذاذ آفاق ).
.......
مسكينة يا عشمانة
قالوا تقاطعي
حسه اللحمة
كان حمرا
وكان بيضا
تحاربي طماطمة
حُمرة عين
وتبعدي من البيض
حت إن بيضة
أو بيضتين
دحين
قبال كلامهم ده
كنتي مقاطعة
اسرائيل
أو الكفار ؟
كنتي بتاكلي
يا عشمانة
ديمة سخينة
أو كافيار ؟!
......
مسكينة
يا عشمانة
يا حيرانه
جاتك حسه
نار كُربه .
حتي الكهربا
شوف عينيك
سماع اضنيك
جن ضَرَبا
ووقدت نار
كمان قَدَلَت
رافعة النخرة
وإتنفَشَت
تقول سد مروي
إتْلبّش
بجن حبشي
ونازل ظار
......
شنو الخلوهو
ما زادوهو ؟
غير نَقَص العُمر
والحيل
شنو السابوهو
ما قطعوهو
كان حتي الوطن
قصوهو
من مليون
صبح كم ميل
|