فن كتابة القصة

[أبوبكر عباس]

سنة أربعة وتزعين كنت شغال في شمبات المرسى ومؤجر في شمبات الأراضي مع صديق صيدلي إسمو عماد عبد العزيز عندو هايلكس موديل تزعة وتمنين. تقريباً تقريباً، كل يوم بعد المغرب ما عدا الخميس والجمعة، كنا بنمشي نزور صيدلي تاني بأبي روف إسمو نادر حُسين إبراهيم، بيتم فاتح على البحر.
بمجرد وصولنا لبيت نادر قاعدين نلقى الكراسي مطلعة قدام البيت والواطة مرشوشة والشاي باللبن جاهز. أول ما باب الهايلكس بتاع السائق ينقفل؛ صوتو بجيب حسين الصغير ود أخت نادر لبرا البيت ومعاهو ألعابو وبطلع ضهر البوكس يلعب. حسين دا، كان عندو ميزة في كلامو وهي إدخال كلمة "جنّكم" في أي جملة يقولها، مثلا:
أول ما نكب الشاي يقول وهو بلعب في ضهر البوكس: جنّكم تشفطوا الشاي باللبن!
أو أول ما نكورك لعمك بانقا بتاع الدكان عشان يصلح الفتة، يقول: جنّكم تضربوا الفتة بالزيت!
أو أول ما نبدأ الونسة، يقول: جنّكم تتونسوا بالدويات!

إنتهى الجزء الأول من القصة وباقي جزء قدر الفات دا.

[أبوبكر عباس]

إستمرّ هذا البرنامج بنفس هذه التفاصيل لثلاثة شهور إلا انو كان في تفصيل آخر شال ملل التكرار وساعد على إدماني للروتين دا، وهو خروج رحاب عصام العاقب بت جيران ناس نادر متلفحة بتوب الصلاة وشايلة جك بلاستيك أصفر تجيب فوقو فول بانقا. كان حسين الصغير ينبهنا بمرورها بقوله: جنّكم تشتروا الفول فوق الجكاكة!
طبعا الزمن داك، الصعلكة لسع ما كانت إتمكنت، وكونك تشوف ليك بنوتة بهذا المشهد الرومانسي المتكرر؛ بتحبا بتحبا...
واحد ح يقول لي ما دام عشتوا زمن قبل التمكين، كيف عرفت إسمها بالكامل؟
مرة، بعد فتات كتيرة، أصريت أدفع وأنا بحاسب في عمك بانقا خليت ليهو الباقي وسألتو عنها حتى كمان قال لي باقي ليها شهر تتخرج من كلية الاداب.

إنتهى الجزء الثاني والظاهر تاني باقي جزء صغير أخير

[حجة امنة]

gap

[أبوبكر عباس]

آخر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟
يوم الخميس العصر عماد جدع لي مفتاح البوكس وقال لي: عليك الله، يا بلبل* قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة بالصافية!!
قلت ليهو: جنّكم تلخبطوا للناس سينماتم بحبكم!
وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي وطلع نزّل لعباتو وهو جاري قال لي: جنّكم تشيلوا لعبات الاولاد الصغار!
قلت ليهو: حسين، أقيف، دا، عرس منو؟ قال لي أسأل بانقا.
مشيت الدكان وقبل أسألو قال لي: صاحبتك
قلت ليهو: جنّهن يعرسن بدون يكلمننا!
اليوم داك بدل السينما قعدت في كبري شميات أُراقب إنعكاس أنوار الزينة على شاطئ أبروف.
إنتهت
ـــــــــــــــــــــــــــــــ
* إسم الرآوي في القصة نبيل

[جيجي]

gapgap

[مواهب عبد العزيز نقد الله]

ما فن .....
دا جن كتابة القصة ....

[باسط المكي]

المشاركة الأصلية كتبت بواسطة بابكر عباس

آخر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟
يوم الخميس العصر عماد جدع لي مفتاح البوكس وقال لي: عليك الله، قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة بالصافية!!
قلت ليهو: جنّكم تلخبطوا للناس سينماتم بحبكم!
وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي وطلع نزّل لعباتو وهو جاري قال لي: جنّكم تشيلوا لعبات الاولاد الصغار!
قلت ليهو: حسين، أقيف، دا، عرس منو؟ قال لي أسأل بانقا.
مشيت الدكان وقبل أسألو قال لي: صاحبتك
قلت ليهو: جنّهن يعرسن بدون يكلمننا!
اليوم داك بدل السينما قعدت في كبري شميات أُراقب إنعكاس أنوار الزينة على شاطئ أبروف.
إنتهت

كل عام وانت بخير
متابعة وحضور

[ياسر كبوش]

المشاركة الأصلية كتبت بواسطة بابكر عباس

قلت ليهو: جنّهن يعرسن بدون يكلمننا!
اليوم داك بدل السينما قعدت في كبري شميات أُراقب إنعكاس أنوار الزينة على شاطئ أبروف.
إنتهت

شواكيش قبل التمكين

[أبوبكر عباس]

شكرا للزارونا بالوشوش، وباسط التحايا والحضور، والجنّنوا مواهبنا وشواكيش كبوش.

[ام التيمان]

اها يا الرايق بعد النكسة دى
نجى نشخت فى الوطا معاك و لا لا

[ZEIN ABDALLA]

المشاركة الأصلية كتبت بواسطة بابكر عباس

اليوم داك بدل السينما قعدت في كبري شميات أُراقب إنعكاس أنوار الزينة على شاطئ أبروف.
إنتهت
ـــــــــــــــــــــــــــــــ
* إسم الرآوي في القصة نبيل

اتصلت زوجتى رحاب العاقب بى طالبة منى ان احضر معى من السوبرماركت
جبنة مازرلا وايسكريم جلاكسى الذى يحبه ابننا تامر......
وفاكهة( كاكى) وكاشونت عشان عايزة تعمل بسبوسة بالمكسرات.
تملكنى الغضب فقلت لها كاشونت بتاع شنو؟ انت متين نسيتى فول
بانقا البتشيليهو فى جك البلاستيك الاصفر. صرخت فى التلفون وقالت
لي.... كمان بقيت تكضِب.
عند عودتى للمنزل قلت ليها انا كضبت فى شنو، فقالت الجك كان لونه
اخضر فشنو الخلاك تشوفه (اصفر)

[جيجي]

المشاركة الأصلية كتبت بواسطة ZEIN ABDALLA

اتصلت زوجتى رحاب العاقب بى طالبة منى ان احضر معى من السوبرماركت
جبنة مازرلا وايسكريم جلاكسى الذى يحبه ابننا تامر......
وفاكهة( كاكى) وكاشونت عشان عايزة تعمل بسبوسة بالمكسرات.
تملكنى الغضب فقلت لها كاشونت بتاع شنو؟ انت متين نسيتى فول
بانقا البتشيليهو فى جك البلاستيك الاصفر. صرخت فى التلفون وقالت
لي.... كمان بقيت تكضِب.
عند عودتى للمنزل قلت ليها انا كضبت فى شنو، فقالت الجك كان لونه
اخضر فشنو الخلاك تشوفه (اصفر)

هههههههه
عليك الله جد يادوك
طيب اخونا دا هسه يودي وشه وين

[ZEIN ABDALLA]

المشاركة الأصلية كتبت بواسطة جيجي

هههههههه
عليك الله جد يادوك
طيب اخونا دا هسه يودي وشه وين

قبل فترة وصفت الكاتب النبيل بكاتب (الادب الواقعى) وطبعآ هو افتكرنى
بحاوِل (أقَرِق) عليه. حسع عليك الله فى واقعية اكتر من كده.....غايتو
القصة دى ممكن تكون مشروع مسلسل تركى .

[أبوبكر عباس]

المشاركة الأصلية كتبت بواسطة جيجي

طيب اخونا دا هسه يودي وشه وين

مداخلات أعمامك رأفت وزين يا جيجي، بأكدن إبداعي في جعل النص يبدو واقعياً.

عمك بروف زين داير يقول لي نقطتين:
الأولى حول إرتباط النص بالواقع: وكأنو بقول: من شدّة واقعيتك، نحن خائفنك تكون جايب الشخصيات بلحمها ودمها ودي، ممكن تعبر خط خصوصيات الأفراد؟؟ ببساطة شخصياتك دي ممكن تكون من معارف القراء!!
التانية داير يسأل فوقها عن مدلول اللون الأصفر بتاع جك الفول؟؟
قبل اللون خلونا نشوف فكرة جك الفول إرتبطت عندي بشنو؟ مرة كنت بتونس مع صديقي الجميل محجوب شريف (واخدة بالك يا حجة آمنة) وعرف انو أنا جاي السودان وعزمني أجي أبيت معاهم وقال لي يا أخي، أصلو ما تفتكر نفسك ح تكلفنا حاجة، أول ما تجينا بنديك الجك بتاع الفول تمشي تجيب الفول من بتاع الدكان....
أها شيطان القصة قال لي دخل جك محجوب دا، في نصك كدلالة على البساطة والجمال..
طيب مع تلفح رحاب عصام بتوب الصلاة، هل يعقل انو جك محجوب شريف هنا يحافظ على لونو الاحمر؟! طوالي الشيطان رسل لي الآية: "صفراء فاقع لونها تسر الناظرين"

[كيشو]

المشاركة الأصلية كتبت بواسطة ZEIN ABDALLA

اتصلت زوجتى رحاب العاقب بى طالبة منى ان احضر معى من السوبرماركت
جبنة مازرلا وايسكريم جلاكسى الذى يحبه ابننا تامر......
وفاكهة( كاكى) وكاشونت عشان عايزة تعمل بسبوسة بالمكسرات.
تملكنى الغضب فقلت لها كاشونت بتاع شنو؟ انت متين نسيتى فول
بانقا البتشيليهو فى جك البلاستيك الاصفر. صرخت فى التلفون وقالت
لي.... كمان بقيت تكضِب.
عند عودتى للمنزل قلت ليها انا كضبت فى شنو، فقالت الجك كان لونه
اخضر فشنو الخلاك تشوفه (اصفر)

ياخ دا ابداع حقيقي يا دكتور زين أشكرك عليه جدا
دخولي للبوست دا ما ضاع
وتاني شكرا لي خالة مهند