((( 2 )))
عماد بابكر بقي قرداتي
معلوم يا أخوان ... دكتورعماد طبيب نفساني, واكيد بشوف حالات كتيرة زي حالتي وما ظنيته يا خد في خاطره ... بس علا قولي يا زمان ... واحدا هز البلد وقفل الجامعة زمن الكيزان ... والحين جاء يتحدى العالم كله أن اصل الانسان قرد من القرآن ... في ذمتك دي مو عمائل قرداتي؟.
البارح سالت ود الفادني اخوي من سرية الانترنت دي ... كلامي ده نعل مو بيصل الجماعة اياهم ... اصلي شايف في المصيبة ده اسلاك و خراتيش كتيرة ما تكون بتوصل للقصر ولا المنشية ... طمني قال لي اخد راحتك كلها توصل لي امريكا بس, والجماعة اصلا كلهم بقو امريكان ... بي سلفاكير ابو طاقية ... يعني لا تخاف وفضفض ... انت ممكون بالحيل.
اكمل ليكم قصة اليوم الما انساه داك .....
اتهوطت فوق وريقات الجكسوية المبروكة ... شويتين واسمع صوت حناجر بنوت تقول مستوردة من اليابان ... جايات من جيهت الميدان الشرقي في شارع اللابات ... يهتفن ويكبرن ... شايلات جنازير وسيخ وقالن دي كتيبة (الخنساء)... طلعت في سبيل الله تدافع عن شرف النساء... قلت يا لطيف اليوم دا ما ياهو ....
قبلت شمالي ... عيني وقعت علي كتيبة (اليرموك) ... كيزان زي اسود سعرانة ... جنازير وعكاكيز وسيخ ما يديك الدرب ... طلعوا من كلية القانون بعد ما شلعوها, وقالوا عندهم تعلمات يقطعوا الطريق المين ... يا لطيف.
...
في يميني نزلت كتيبة (صخر) من المكتبة بعد ما شلعوها تب ... اتجمعوا قدام المكتبة ووقفوا ... قالوا في انتظار التعليمات....
وانا المهموم ... يومي كله نوم ولمن اصحى اقعد في البنشات اخلط بنات العلوم ... كنت متوهط في البنش الاول في الجنكشن مقابل غرب .............
ما اكضب ... الخوفة بدت تدخلني لاني ما كنت فاهم الحاصل بالضبط شنوا ... لكن قلت كل زول في حاله.
..
فجاة اشوف اربعة شباب مبرطعين زي الحصين من جيهة النشاط,
ووقفوا جمبي ياخدوا نفسهم ... عرفت منهم اتنين وجوهم ما تغبي علي ... ديل من اولاد الهندسة الكانوا عاملين لينا وجع قلب ...
اولاد الهندسة ديل يا جماعة كانوا مفترين افترا ... كانهم يا جامعة ما فيك الا انا... لكن نحن في الآداب كنا بالحيل مغبونين منهم ... طالعين يشتمونا نازلين يشتمونا تكنوا بيننا وبينهم تار.
لمن تكون في كورة في الميدان الشرقي ... ان شاء الله بين الطب والزراعة ... تلاقي اولاد الهندسة يهتفوا من الضهر " كوم تراب ولا آداب".. الكورة لمن تنتهي سبعة صفر كالعادة ... لصالح الزراعة ... اولاد الهندسة يزفوا الدكاترة للبصات " الي البصات يا دايات" ... لكن ناس الطب ما بيزعلوا لانهم واثقين من نفسهم ... عِلا نحن كنا بالحيل نتحرق ... بعد ما يودعوا الدايات يرجعوا فوقنا تاني : "كوم تراب ولا آداب"..
المهم اولاد الهندسة وقفوا في الجنكشن يتلفتوا برعب ... في شنوا يا جماعة؟. واحد قالي لي: الجنوبيين نشروا البيان في جريدتهم والكيزان قطعوا الجريدة واحتلوا النشاط ... قاموا الجنوبيين اتسلحوا واحتلوا الميدان الغربي ... الجامعة ولعت يا زول ....
الزمن داك قرنق كان يا دابه دخل الغابة وسلاح الجنوبيين منه خوف ... قبل ما يكمل كلامه سمعنا اصوات من الباب المين وعينينا تشوف حصين ... واحد قال ل التاني: ديل الانصار جو ... يهتوفوا يا لثارات عماد ... دمك الطاهر لن يجف!..
يمين بالله بديت اترعب ... قلت ليهم في شنوا يا جنون؟. قالوا لي في اشاعة قوية ان عماد اتكتل والانصار قرروا ياخدوا بالتار ... يا زول قوم اتخارج ... الناس دي كلها ناوية موت ... اتكتل؟؟؟؟ يا لطيف ... اليوم ده ما ياهووووو ... قال لي ما متاكدين لسه لانه عماد مختفي وخلينا علاء الدين اخوه بيحاول يتصل في البيت من مكتب العميد ... المهم قوم اتخارج ....
واحد قال ليهم: يا خوانا ما في حل الا نزوغ وراء المكتبة ونتلب
بشارع النيل ... التاني قال ليه الجيش والاحتياطي المركزي مرابطين في شارع النيل... صاحبه جراهوا وقاليهم يا خوانا الجيش ارحم من الكيزان ديل يلا نجري ... قلت ليهم يا مهندسين ارجلوا شوية ... انتوا مالكم بالبيان ... واحد قال لي: شوف يا زول الرجالة ملحوقة والبيان قالوا فيه شيطان... واالله زي المطر ممكن تلاقيه في جيبك من غير ما تعرف ... الله معاك نحن جارين ... فت جروا.
اخوكم ضحككككك...اتوهطت في وريقات الجكسوية, و حمدت ربنا وراني يوم في وليدات الهندسة بيقولوا (الرجالة ملحوقة)
شويتين ولاقي نفسي بقيت زي السندوشت ... كتيبة اليرموك اتقدمت ناحية الجنكشن وكتيبة الخنساء وقفت وراء ضهري وكتيبة صخر اتحركت للجنكشن من ناحية المكتبة...
جاني واحد يمين بالله تقول في معركة احد: انت باين عليك مركز توزيع موش كده؟. قلت ليهوا توزيع شنوا يا مولانا الله يرضي عليك؟. قال لي بطل استعباط ... المقعدك هنا شنوا؟!. هات النسخة العندك؟. قلت ليه يسعلني الله ما معاي عِلا الحقة ... بتسف يا مولانا؟. الله اكبر ... نحن نسف يا قذر؟. ... نحن اطهار وطالعين نجاهد ونطهر الجامعة من امثالكم .... يمين بالله قبل ما يكمل كلامه ما احس الا بسيخة تخبط راسي كانها صاقعة ... راسي لفة وبلعت السفة.
يا جماعة والله العظيم انا ما عندي علاقة بالبيان ده ... طيب بتعمل شنوا هنا؟. قلت ليهم والله انا مركلساتي من الاداب بقعد هنا اخلط وبس ... يا مولانا انا شريف ... يمين بالله جابني النسوان مو البيان!. حتي بالامارة المكان المتوهط فيه ده كانت قاعدة فيه جكسوية زي الملبن من بنات كمبوني ... ختت ليها ورقا ابيض اظنه من لندن, قلت اقعد واتبرك فيه ... غلطان يا مولانا لكن يمين بالله نسوان مو بيان ...
ما كملت كلامي واتنين من الكيزان قلبوني ورموني في الارض ... اقلبي الورق ده يا اخت ... قال لي واحدة من كتيبة الخنساء ... الورق كان مقلوب وكله ابيض ... وانا المهموم من شلعوها البشاقرة بنت كمبوني شربتني المقلب..............
قلبوا الورق وانا ماني دريان اني كنت قاعد متوهط فوق البيان ... بيان الشوووم يالمهموم ........... يمين بالله يا جماعة لمن قلبوا الورق وعيني وقعوا علي العنوان صرخت زي المجنون: الكترآآآآآآآآآآبـــــــــــــــــــــــــة! امانة ما راح فيها راجل.
اكمل ليكم بكرة ............ اصلوا القصة لمن اتذكرها بتجيني خمة نفس لليلة....
لكن قبل ما اروح ... ضروي اسعلكم سعال ..........
الكوز الخبطني اول بالسيخة لمن سعلته: بتسف يا مولانا , كان غلطان ولا مو غلطان؟. انا قصدي تسف تمباك واخدت سيخة فوق نافوخي ... امال لو قلت ليه بتسف بير بترول كانوا عملوا فيني شنوا؟.
دحين يا اخوانا بعد اتين وعشرين سنة منوا الكان صادق؟. .......... ولا نمارس الديمقراطية تاني؟. ... البيقول بيسفوا يرفع اصبعه ... وبالله يا جماعة اصبع واحد كفاية بطلوا الفوضى.
|
