الليلة من الصباح بتحصل معاي حاجات عجيبة ..... وأنا ماشي علي الإمتحان لقيت حافلة ما اترددت ركبت فيها مباشرة .... قعدت في الكرسي الأخير كراسي الطلبة .... عاينت قدامي قريت كلام غريب شوية مكتوب فوق السواق مباشرة ( عز الخيل لجم وعز الحريم وليان) حكمة الله الحافلة كلها غيري وغير تلاتة اربعة تنفار اضافة للسواق والكمساري كانن حريم ....
أنا كل الإتذكرتو في اللحظة ديك قضية المرأة ... إتضاربت كمية من الحاجات جواااي .... جات في راسي برضو قصة المرأة كان بقت فاس ما بتشق الراس ... اتذكرت سهي وهي ماشة الجامعة من الصباح وهي بتنجز في حاجاتها طق طرق طق طرق ... اتذكرت شابات البلد اتذكرتهم والله العظيم وأنا أمام هذا المشهد . راسي جاط ..... المهم قدرت اصور اللقطة دي ونزلت في السوق العربي . اها في ميدان جاكسون لقيت الخلايق كأنهم ديدان الأرض تحس بأنينهم وأوجاعهم تسمع منهم الطنين يا زول .... وتمشي .....
الحوت ينطلق من كافتريا مجاورة .... شحادين ما يدوك الدرب ... جزارين عوووك عوووك كيلو اللحمة العجالي الضاني البتلووو .... تتمني يا زول لو تصرخ أوقفوا الكرة الأرضية دي ياناس أريد أن أنزل .... ويا حليلك والفؤاد ملكوه غيرك .... وردي ويافطات كبيرة ترقبوا حدث الموسم محي الدين اركويت ..... محمود تاور المسرح القومي فئة التذكرة 20 جنيه والعجالي .... والطماطم تفترش الأرض ... وأنا أمشي وأكورك وزول شغال بي مافي .
من حسن حظي إنني إبتسم كلما حدث قلبي هم .... لقيت صف طويل ... ركبتو ... ما سألت حتي القدامي الصف ده بتاع شنو ... كنت مستغرب ده صف شنو ده المافيهو ونسة حتي ... اي زول بجي بقيف بكل تودد وإحترام ... وأنا وقفت الما بوقفني شنو أنا ياخوانا ؟؟؟؟؟
خلالالاس والدور قرب يجيني لاحظت انو الناس شايلين صحانة اي زول شايل صحنو وربما كنت الوحيد الشايل شنطة ـ في الحقيقة البلد دي ما مضمونة وأنا لمن وقفت افتكرت انو الصف ده نهاياتو قد تكون سعيدة .... وقفت بعد شوية لاحظت انو اي زول بصل الشباك بقول بي أدب : لو سمحتي يا عشة عايزين تلاتة بي تقلية واتنين بي روووب وأنا لي الوكت داك ماعارف الحاصل .
في النهاية لقيت روحي واقف في صف عشة .... عشة ما بتبيع العصيدة لو الناس ما اتنظمت ووقفت صفوف ..... صفوف طويلة لأجل العصيدة فأي قصيد ننشد ؟ يا لحظك يا بلادي
