شعر منداح تماماً

[imported_عماد الماحي]

شعر منداح تماماً
طبعاً زي ما عارفين زير السبيل بغطوهو لي شنو بنشوف ليه نحن بنكتب الشعر المنداح و هو لون شعري ابتكرته هسسسسسسسسسسسسسسسسسسسسسسع دي و من كل البحور يعني ما تقولوا الفراهيدي عمل سطاشر بحر و بعدوا جانا الأخفش ببحر سبعطاشراوي – على وزن البحر الأدبراوي – و سماهو المتدارك عشان ما يكون الحوار السبق شيخو وكدا .. أها زير السبيل بغطوهو عشان هو ما بقدر يتغطى براهو صاح ؟ .. نواصل و طبعاً اندياح الشعر لا يخرجه من كينونته من حيث إن كذلك الذي هو و هذا سنعود له في حينه باقي ألحنا مستعجلين تسعجل مبالغ فوقو آآآناس .. و أحب أن اضيف أن هناك ضرباً – ضرباً دي لذيذة حتى الشعر بقى ما بجي إلا بالضرب حكمتو بالغة – شعري اسمه أو اسميته – أبيات شعر فصيحة جنس فصوحية – و هذا لعمري إيغال – ايغال ليك كدي منو ؟ - ايغال في الفصحى لا مندوحة فيه تصب في الشعر و تأخذ منها و تلحنه بطريقة محببة للنفس ..
الشعر المنداح تماماً برضو خشم بيوت – يا حليل خشم البيوت زمان لمن تجي البت تدفق موية غسيل العدة – قال الشاعر ( أو تكشحي ماء الغسيل بجردلٍ .. يا أحلى جردلٍ شالته أحلى يدان) .. شفتو الكشح دا كيف مش زي العربي القديم ( وكشحاً قد جننت به جنونا) أنا لا افضل كشح على كشح بجامع الجمال في كل و الانسياب الجميل في كل لأن الكشح للماء مسبباً لانسيابه على أرض الشارع و قلب الحبيب و أما كشح المحبوب الجنن الشاعر العربي القديم هو ما كشح برضو مبالغة مستحيل رائع و الكشح قد يأتي في اللغة دالاً على السرعة قال عباس ود السارة – و الله اللمام كشح لينا المغرب في تلاتة دقايق بس – و الكشحة تعني العمل الذي يعمل لخلق الله و يوضع في كورة ولا كوز موية و يكشح في طريق المكشوح له مما يتسبب في مسه بشيء من الجن و الله أعلم وكدي النكشح ليكم الأبيات دي و قبل الكشحة أحب اقول ها هنا أن من أنواع الشعر المنداح مثلاً أن تقف في الطريق العام و تصف ما تراهو على السليقة و الفطرة – قطع أخدر بكلام أهلنا – نضرب مثال بصورة الناس شافتا كتير و نشعر فيها :
حاجة فيك تقطع نخرة خشم كراع عين ابو البعرفك
شوف الخلقة و الحلاة البت تقول مافيها ذرة شناة
ما منها من رقتا لبست ليها جزمة ما حقتا
عملت ليها بقاقة في نخرتا ..!!
و منه أيضاً :
الدنيا عقاب شهر
و أنا زي ماشي على الرصيف المكندك بالوجع
رجعت لي بيتي الهناك و معاي سلطة الدكوة الشتات
و شخرت قبل المسلسل ينتهي
لمن لقيت في الحلة ماف حبة ملاح
و الكسرة كملت و انتهت ..
و جانا ليك حرامي الوجع المعاي
لملم ملايات الوهن الفي سلك الغسيل
و بنطلوني الوحيد حق الشغل
مش ثقيل؟ بالغ ياخ كدي ما حلو
وأنا زي بعافرفي الحلم أصبح رحيق لفراشة
الحلم القبيل
صحيت من اندياح كراع الحرامي
في حيط الفريق و اتخذت الشوق زبادي