عام سعيد ... قصيدة جديده
عام سعيد .
ياحابسه من عينى الغميد .
ياواقفه قدامى وتضج ...
عاطفه وحنان وافراح وعيد .
يامهرجانات من الق ..
ياروعه ..
يابت ياسماح من كل لون .
يابت تصب مطره وتولع نار شجون .
ياروح مدسدسه فى وهج ..
ترجاكى بالشوق العيون .
يوما تمرقى من العدم ..
وتبقى من صمت الليالى المترفات ..
فوران سكون .
وتشعى نور ..
تنشرى كون .
قبال تمرقى من المسام ..
قبل انفجار المستحيل
ميلاد حياه وسكه واكون .
لاحوله من زمنا يجيبك ومابتجى
لاحوله من هادى الظنون .
غنيتلك الآهات لحون .
ياسارجه خيلك ليل عشم .
كم من سنين كم كم وكم .
مابحه صوتى ولا انكتم .
راجيك سنين .
متحدى بيك زمنى الضنين .
شايلك نغم .
عايش معاكى على يقين ..
بلقاكى ماعشتك وهم .
ماخنته جيتك ذات صباح ..
لاشوقى فى يوم انهزم .
بس وين صهيلك منتظر ..
واقف على طرف الدرب .
راجيك تجى ..
تمطر علىّ سحبك تكب .
افتح علىّ باب المروق ..
وادخل عليك فاتح على روحك
مسارب روحى شوق
باكر خلاص عكرك يروق
يابت موزعه فى العصب .
وهاجه انت كما الشمس ..
معطونه حن ..
هطاله حب .
ممزوجه بى طيب الارض
حبك فرض .
خاطرك معاك ..
لاقينى من داخل دواخلى الضمتك .
فاتح مسامى على هواك ..
عاينى المداخل حقتك .
يلا ادخلينى كما يجب .
والشوق يحب .
تلقينى جواك ضحكتك .
د. ازهرى الحاج شرشاب
دبى 1/1/2012
|
