غناء البنات بالسودان هل هو مؤشر انحطاط ام مرآة صادقة لواقعنا ؟

[hatim ALi]

الموضوع غنا البنات يا جماعة

يصر الكثيرون على تجريم اغنية البنات بالسودان

وكلنا بنعرف غناء البنات

البقولوهو في الاعراس

و المناسبات

كان حنة

كان عرس

كان سيرة

كان طهور

هوووي ما قصدي ختان الاناث بالمناسبة

المهم

الناس بتقول

غناء البنات دا هابط

و كلام فارغ

وقلة ادب

واسفاف

الخ

دايريين نناقش غناء البنات يا جماعة

بين التجريم ام البراءة ؟

بين الانحطاط ام صدقية التعبير ؟

بين ابتزال الكلمة ام بساطة العبارة ؟

بين هبوط اللحن ام خفة الايقاع و التطريب ؟

دا نقاش مفتوح

و انا حاحاول ابتدروا هنا

و منتظرين مشاركاتكم

[hatim ALi]

فذلكة تاريخيه لغناء البنات
==============

اغنية البنات كانت على مدى التاريخ ثيرومترا حساسا لواقع الاقتصاد و الاخلاق بالمجتمع السوداني
.
في الماضي كن يغنين للفارس الشجاع و البطل المغوار
زمن ود المك نمر و بنونة ابنته " مادايرالك الميتة ام رمادا شح ، دايراك يوم لقا بدميك تتوشح ، الميت مسولب و العجاج اكتح " مرورا بمهيرة بت عبود و اخريات

ثم جاء زمن عشة الفلاتية و كانت الحرب العالمية و اغاني الجنود و الضباط " طلعت فريد يا ماما يوم لبسوه الكمامة ، ودوه صحراء ليبيا ، يالله عودة سلامة للعاصمة " واغاني " يجو عايدين ، و ابقا قمرة فوق القطر " و غيرها

بعد الاستقلال و ظهور الخدمة المدنية وموظفيها الافندية دخل الاقتصاد كعامل مهم في تقييم الرجال ، نظرا لهدأت امور الحرب فظهرت اغاني تمجد الموظفين مثل " يا ماشي لي باريس ، جيب لي معاك عريس ، شرطاً يكون لبيس ، من هيئة التدريس "" و كذلك اغاني من شاكلة "الدكاترة اولاد الهنا ، و المهندس رسم البنا"

و جاءت حقبة الثمانينات و ما صاحبها من ركود اقتصادي و هجرة و اغتراب الشباب من جهة و علو شأن طبقة التجار خصوصاً القادمين من غرب السودان لتواكب المرأة ذلك باغاني " المغترب و تاجر الغرب" و ظهر التباين الاقتصادي في سنوات المجاعة حيث شنت المراة هجوما على المزارعين نظرا لتدني مدخولاتهم " ما بدور المزارعية "

ثم جاءت التسعينات و ما صحبها من تدني الاخلاق من جهة و انعدام فرص عمل الشباب و تفشي العطالة من جهة اخرى و كانت اغاني البنات حاضرة بقوة و لسان حال المجتمع من خلال اغاني " ابشرا و بالضرا " و حنانة ودق الباب و جانا

و كانت المراة حاضرة بقوة ايضا عند الانفتاح الاقتصادي حيث تغنت للعربات بمختلف انواعها و الموبايلات و الستلايت و الانترنت و العولمة

وكانت المراة ايضا تسجل ظواهر تعانيها من العنوسة و الطلاق و تعدد الزوجات من خلال " راجل المرة حلو حلا " و غيرها

وفي الاونة الاخيرة ظهرت اغاني غريبة يؤديها رجال لكنها تدرج ضمنياً ضمن اغاني البنات نظراً للونية اللحن و الكلمات ، مثل اغاني ما يسمى "حمادة بت " و قدورة المرحوم " و طه سليمان و اخرين ، تحضرني من اغنياتهم فقط العربية و الجلابية و قنبلة ، و هي ظاهرة محيرة و كيف انو الرجال اصبحوا ينافسون المراة في غنائها كمان سبجان الله

اغاني البنات هي انعكاس لواقعنا و كاميرا دقيقة ترصد العيوب و الشروخ في مجتمعنا و مثلما كانت تغني في الماضي للبطولة و الرجالة و الجنود و الحرب اصبحت تغني الان لراجل المرة وناس النظام العام وجو الحرب الملئ بالقنابل جمع قنبلة

المرأة ليست مسئولة عن انحطاط المجتمع و هي ليست حرة في اختيار من تحب و ما تغني و لطالما كان العامل الاقتصادي هو المتحكم في خياراتها

[بابكر مخير]

الإبن الحبيب حاتم
(تعرف حكاية إبن وإبنة دي، أنا بقولها حسب إسم صاحب؟ة البوست أو المداخلة، لمن يكون إسم جديد ذي حاتم ورشا ولؤي وياسمين، يبقى الإبن؟ة وإن بقى ناس حسن وزينب وفضل الله والسمح جيبو، يبقى الأخ؟ت وعشان إسمك تبقى الإبن وعشان عظمة تناولك للمواضيع برضو تبقى الإبن لأنه دآ بيشرفني)
من كلامك ظاهر أنك زول راقي ومتحرر وفاهم...

المشاركة الأصلية كتبت بواسطة hatim ALi

كان طهور

هوووي ما قصدي ختان الاناث بالمناسبة

وأنك بتقدر الآنثى..
طيب يابا!!!

المشاركة الأصلية كتبت بواسطة hatim ALi

فذلكة تاريخيه لغناء البنات
==============

وفي الاونة الاخيرة ظهرت اغاني غريبة يؤديها رجال لكنها تدرج ضمنياً ضمن اغاني البنات نظراً للونية اللحن و الكلمات ، مثل اغاني ما يسمى "حمادة بت " و قدورة المرحوم " و طه سليمان و اخرين ، تحضرني من اغنياتهم فقط العربية و الجلابية و قنبلة ، و هي ظاهرة محيرة و كيف انو الرجال اصبحوا ينافسون المراة في غنائها كمان سبجان الله

اغاني البنات هي انعكاس لواقعنا و كاميرا دقيقة ترصد العيوب و الشروخ في مجتمعنا و مثلما كانت تغني في الماضي للبطولة و الرجالة و الجنود و الحرب اصبحت تغني الان لراجل المرة وناس النظام العام وجو الحرب الملئ بالقنابل جمع قنبلة

زمان كانن السيدات عندهن حق في حرية الحركة والمشاركة، حسي دآ إنعدم...
يبقى صوت الشارع يصل كيف للمتلقي،،
بما أنه دنيانا بقت حكر للرجال يبقى شكرن للذين إتطوعو وحملوا المهمة بعد تغييب المرأة...
بعدين لمن نسمع غنا الغرب، أكان ريقي ولا جنقل ولا غيره والكتير، تلقى كلمات ناس العربية والقنبلة، بس المعلقات، يا أخي حتى غنا ناس إيهاب ونانسي (خليها كدآ، فاتحة وشاملآ) مش ناس الجلابية أرقى منو؟؟


بعدين يابا حكاية الرجولة وتقول لي منو ودآ كله شغل بروبقندآ،، يا أخي الإنقاص عشرين سنة قاصا ضهرنا وينهم خوان فاطمة،،،
تقول ليا؛ للبطولة و الرجالة و الجنود!!! هو إحنا الطلع روحنا منو غير أسياد الحق ديلا، كل من ختا دبورة عايز يحقق للبنات قولن، بالله عنهم ما جو عايدين وأريتهم محروقين بالفليت والجمكسين...

ليك مودة وموضع جميل ويديك الف عافية

[الغبيشة]

غناء البنات بالاضافة الي كونه انعكاس للواقع الاقتصادى والاجتماعي وتيرمومتر حقيقي لقياس القيم السائدة فهو ايضا وعلي مر التاريخ مسرب سري للنساء للتعبير بحرية اكبر عن مايعتريهن من احباط ومن مشاعر قد تكون مرفوضة اجتماعيا ذلك انه في الغالب الاعم لاينسب لقائل بعينه وقد ادى هذا الدور من اغاني (المرحاكة) ايام كان فعل الطحبن قصرا عليي النساء فنجد من اغاني ذلك الزمان مثلا
احمد نايلو لبش بيا
اريت احمد حليلي وليا
هكذا في زمان لم يكن من حق المرأة فيه ان تختار زوجها ولكنها من خلال مسربها السرى تستطيع التمني
وغناء البنات كما اسلفت يتبع حركة القيم صعودا وهبوطا ففي الوقت الذى سادت فيه قيم العمل وتميز بصعود المد الثورى غنت النساء للشغيلة والعمال
سواق الترتر بمنديله اشر
انا عيانه ودوني بعشر
كذلك في الزمن الذى ساد ت فيه حركات التضامن في العالم كانت من اغنيات السباتة اورقيص العروس اغنية مثل
الله لي كوريا يا شباب كوريا
وبعد اكتوبر غنت النساء
رصاصة القرشي ترصصني
طلبة الجامعة يشيلوني وبالاعلام يلفوني
وفي القراصة يدفنوني
ام القرشي بتبكيني
اه بالله الله لعيوني
اما قنبلة وراجل المرة فهي نتاج طبيعي لما ساد من قيم استهلاكية وزواج سرى وترويج للتعدد واستخلاف و غيره من انحطاط وتراجع للقيم يسال عنه االواقع الاقتصادى والاجتماعي الذى افرزته الرأسمالية الطفيلية
كذلك سادت في فترات الديمقراطيه المتقطعة في السودان اغنيات بنات ذات طابع سياسي
في الديمقراطية الاولي وفي اطار الصراع بين حزبي الامة والاتحادى نجد مثلا
عان عوينتو شوف دقينتو سيدكم فلس باع جنينتو
فترد نساء الاتحادى علي نساء الامة صاحبات الاغنية الاولي باغنية مثل
جيتو زايرة ماني غايرة
سيدكم فلس باع الدايرة
اوفي الديمقراطية الثالثة عندما غنت نساء الجبهة القومية
يا الله انت حنين الجبهة خريجين
ما مهم سقوط ياسين شيوعية بس اتنين
وتغنت النساء للحزب الشيوعي
ديامة يا صعبين
ديامة ناس فاهمين
لاسمنه لا ساردين لا تجارة باسم الدين
في اشارة لفوز السكرتير العام للحزب بدائرة الديوم
وهكذا يمكننا القول ان اغاني البنات تتبع الواقع صعودا وهبوطا
ودمتم

[rubs]

زمان لمن كنا صغار كنا بنفرح بى الغنايه وغناها ونتبسم كان هبشت احساسنا بى كلمه حلو وكان كلام فيه محنه وطيبه وتفأول بعدين كبرنا شويه وبدينا نفهم المعانى الحقيقيه لمعنى كلمة اغنيه وبقينا ننظف اضنينا ونسمع اغانى ذات معانى رايعه وهادفه وعرفنا الفرق بين اغنى البنات ومفرداتها ومعنا الاغنيه الحقيقى بس عمرنا ماحسينا ولافكرناانها ثقافه رديئه بل افتكر مرحله بتخلينا نعرف الكان بدور فى الايام السابق واحتمال مساله التعليم كان ليها دور عشان كدا مفرداتها كانت ما عميقه .. بس الكارثه لمن بقت حكر لى الرجال بقى الواحد بسمعها ويبكى اسفا على رجوله الرجل البقى اغنى بصوت النسوان .. وبتمن ترجع فعلا اغانى زمان اغانى حبوباتنا المليانه محنه وصدق وطيبه وكانت الفرحه بتكون نابعه من قلب لابعرف الغش ولاالنفاق البقى سيمه من سمات هذا العصر ..

[hatim ALi]

المشاركة الأصلية كتبت بواسطة بابكر مخير

الإبن الحبيب حاتم
(تعرف حكاية إبن وإبنة دي، أنا بقولها حسب إسم صاحب؟ة البوست أو المداخلة، لمن يكون إسم جديد ذي حاتم ورشا ولؤي وياسمين، يبقى الإبن؟ة وإن بقى ناس حسن وزينب وفضل الله والسمح جيبو، يبقى الأخ؟ت وعشان إسمك تبقى الإبن وعشان عظمة تناولك للمواضيع برضو تبقى الإبن لأنه دآ بيشرفني)
من كلامك ظاهر أنك زول راقي ومتحرر وفاهم...



وأنك بتقدر الآنثى..
طيب يابا!!!



زمان كانن السيدات عندهن حق في حرية الحركة والمشاركة، حسي دآ إنعدم...
يبقى صوت الشارع يصل كيف للمتلقي،،
بما أنه دنيانا بقت حكر للرجال يبقى شكرن للذين إتطوعو وحملوا المهمة بعد تغييب المرأة...
بعدين لمن نسمع غنا الغرب، أكان ريقي ولا جنقل ولا غيره والكتير، تلقى كلمات ناس العربية والقنبلة، بس المعلقات، يا أخي حتى غنا ناس إيهاب ونانسي (خليها كدآ، فاتحة وشاملآ) مش ناس الجلابية أرقى منو؟؟


بعدين يابا حكاية الرجولة وتقول لي منو ودآ كله شغل بروبقندآ،، يا أخي الإنقاص عشرين سنة قاصا ضهرنا وينهم خوان فاطمة،،،
تقول ليا؛ للبطولة و الرجالة و الجنود!!! هو إحنا الطلع روحنا منو غير أسياد الحق ديلا، كل من ختا دبورة عايز يحقق للبنات قولن، بالله عنهم ما جو عايدين وأريتهم محروقين بالفليت والجمكسين...

ليك مودة وموضع جميل ويديك الف عافية

عم بابكر ، عافي لي يابا ، ولدك سارح و ما جايب خبر انتا كتبتا لي بيجاي المشكلة النظام هنا ما بيعمل
notification

لمن يكون في رد على موضوعك
فما بعرف في زول ردا علي ولا لأ

اتشرف بكوني ابنك ، و يكفيني هذا الشرف

يابا عساكر الجبهة ديل وناس السياسة ديل خليهم كدي بالجنبة كدي ، بعدين نحنا في السودان و باقي دول العالم الثالث العسكر مجبولون و مجبرون على التداخل في امور السياسة و الحكم ، بالتالي الاولى ان لا نلوم العسكر بل نلوم الساسة الذين يراودون و يغازلون العسكر ليقفزوا فوق دباباتهم و يزيعوا البيان الاول للثورة

يا عمي كدي احكي لينا شوية عن غنا البنات زمان

[hatim ALi]

الاخت ام ومضة

اتفق معك تماماً ان المرأة تستطيع التعبير عن ذاتها و ما لا تستطيع ان تقوله بواسطة غنائها لأنها مكبوتة و مغيبة في كثير من الاماكن و الازمان

اعجبني تعبيرك - مسرب سري بشدة - و سأستلفه منك بالطبع

مداخلتك عن التأثير السياسي و الانعكاس للون الحزبي في أغاني البنات استفدت منها بشدة

ياريت لو تواصلي

انتظر منك المزيد
تحياتي

[hatim ALi]

المشاركة الأصلية كتبت بواسطة rubs

وبقينا ننظف اضنينا ونسمع اغانى ذات معانى رايعه وهادفه وعرفنا الفرق بين اغنى البنات ومفرداتها ومعنا الاغنيه الحقيقى بس عمرنا ماحسينا ولافكرناانها ثقافه رديئه بل افتكر مرحله بتخلينا نعرف الكان بدور فى الايام السابق واحتمال مساله التعليم كان ليها دور عشان كدا مفرداتها كانت ما عميقه ..

الاخت

اتفق معك في كامل مداخلتك و و لا أخفي اعجابي بصدق العاطفة و حرارة التعبير فيها كلام من القلب كما يقولون

لا اعتقد ان غناء البنات يحتاج الى ان ننظف اضنينا منه ، بالعكس هو غناء حقيقي و صريح و مباشر و كلماته بسيطة و معبرة ، و عمرو القلم ما زال بلم ، بالعكس انا ممكن اسمع و اطرب لكلمات اغنية لي غناية من اسمع اغنية مليئة بمفردات شاعرية معقدة ، و على العموم الحالة النفسية للسامع بتحكم

تحياتي

[بابكر مخير]

المشاركة الأصلية كتبت بواسطة hatim ALi

يا عمي كدي احكي لينا شوية عن غنا البنات زمان

الإبن الحبيب
تعرف عمك مع فوتان أيامو، إلا أنو قضي معظم أيام حياتو خارج البلد،،
يستحضرني، التقيت هاشم بدر الدين حوالي سنة 1992 أو 93 في لندن وكنا مع بعض في الخليج، أولها أيام جعفر تانيها أيام عمر..
قال ليا ربنا كتب لينا نلتقي دايمن مشردين، ما نتلاقى في البلد!!!
قبل التمنتاشر لي القراية وبعد التخرج شغل لمدة خمس سنين وكانت قبل الزواج، يعني الواحد ملتزم..
وبعدها تلاتا سنوات وبس،،
من أصل شوية وتبقى تلاتة وستين
غنا البنات ليا كاسيتات وعشان كدي هو نضارتي البشوف بيها الحاجة الطشاش في البلد،،
ويمكن دآ السبب المخليني أحبو،، وأدافع عنو ديما،،
وبفتكر الزول البيقول هابط، معناها زول ما بيقدر الشفافية..
وبما أنو بوصل المعلومة عن حالة البلد، إجتماعيا، إقتصاديا أو سياسيا،، ببقى ما بفرق، راجل ولا مرأة المقدم،،،
يعني في قنوات التلفزيون بتفرق سيدة ولا زلمي البقرآ النشرة؟؟؟
شكرن ليك يابا الف، على كلامك السمح القلتا ليا...
دمت وإبن أفتخر به كما يفتخر بك والدك،،
بي ألأكيدآ

[فيصل سعد]

سلام لصاحب البوست و المشاركين و المشاركات
الكرام الافاضل و عساكم بخير و طيبين :

اولا و بالتبادي غناء البنات خشم بيوت و هو غناء حنين عفوي و بسيط و ملان بهجة و ريدة و مودة و رقة و تطريب و شكر و تراث و تصوير جيد للمجتمع ، انا استمتع برزينه و خفيفه و هادئه تمتم و عشرة بلدي و سيرة و بديكم نماذج :

المهيرة عقد الجلاد وين يا عروسنا عريسك غلبه الثبات..
الليل ليل العروس بت السرور العظمة ..
الله لي الليمون سقايته علي يا زول انا..
الليلة مسافر انا انا و ما جبر الخاطر كم سنة..
يا قلبي لا تهوى تاني لقيت في الغرام ذلي و هواني..
هجروني و هجروني الليلة ما ذنبي..
الناس اتغيروا الزول دا كان زولي قرار اتخذته لازم يتم ريدي..
انا يا ليالي انا تعود الليالي بالهناء..
فريع البان انتنى و الله يعلم جننتنا..
انا غيرك ما حبيت يا حبيبي و لو مت ذنبي عيك ..
عزاز علينا شالو نوم عينينا فراقهم جبري لا لا ما بايدينا ..
تسافر كيف تخلينا لشوقنا و ذكرى ماضينا كيف بعدك يكون الحال كيف تصبح ليالينا.
تقوم بينا العربية تودينا للسادة..
بلالي وين نادوا لي و الريد قسم يا عيني..
الاقي وين انا الفي العصر مروره..
انا يا ناس الله لي الليلة..
ما ردالي تحية دموعي سالت و المنام ابى لي العجب حبيبي..
عزيز علي البكاء ما بجيبه لي انا وينه عيني..
عزيز و عزيز غنانا يا ليل و دا العكر صفانا يا ليل..

[align=center][rams]http://sudaniyat.net/up/uploading/Faisal)NY09.ram[/rams][/align]

اما الغناء الهابط فدا براو و هو غناء مبتذل و سخيف يفتقد الحس و الذوق السليم و تصاويره مخستكة و مجلية ، بعدين حقوا ما نبهت بيو غناء البنات ساي و ندرعو فيه و بغنوه اولاد برضو و كدا و نماذجه يا حاجة ما تقولي كاروشة، و ناس فلان و فلانة مع سيد العدة، و سمح الدش و ادونا منقتكم، و وائل قفل الموبايل، و بابا علا البوابة، و راجل المرا حلو حلا، و الشمار كتير، بالضراء بالضراء يا ابشرا ان شاء الله راجل مرا، و هكذا خستكات و شحاوير و قرف فما يتخلط و و يختلط و يتشابه عليكم الغناء، و افرزوا، لانه الفرز هنا واجب وطني و مطلب شعبي

ختاما لا ننسى بان حب الناس مذاهب، و الشاهد في الموضوع و الحاصل
انه في ناس بحبوا الغناء الهابط دا و بستمتعوا بيه و هم احرار و مخيرين ..

مجدد التحايا و وافر الود والتقدير ..

[hatim ALi]

المشاركة الأصلية كتبت بواسطة بابكر مخير

الإبن الحبيب

غنا البنات ليا كاسيتات وعشان كدي هو نضارتي البشوف بيها الحاجة الطشاش في البلد،،
ويمكن دآ السبب المخليني أحبو،، وأدافع عنو ديما،،
وبفتكر الزول البيقول هابط، معناها زول ما بيقدر الشفافية..
وبما أنو بوصل المعلومة عن حالة البلد، إجتماعيا، إقتصاديا أو سياسيا،، ببقى ما بفرق، راجل ولا مرأة المقدم،،،
يعني في قنوات التلفزيون بتفرق سيدة ولا زلمي البقرآ النشرة؟؟؟
شكرن ليك يابا الف، على كلامك السمح القلتا ليا...
دمت وإبن أفتخر به كما يفتخر بك والدك،،
بي ألأكيدآ

عم بابكر دمت بخير كما دامت مودتك
تسلم يابا

اتفق معك تماماً
أن غناء البنات هو نضارة كبيرة البشوف بيها الحاجة الطشاش في البلد،،
ويمكن دآ السبب المخليني أحبو،، وأدافع عنو ديما،،
وبفتكر الزول البيقول هابط، معناها زول ما بيقدر الشفافية..
وبما أنو بوصل المعلومة عن حالة البلد، إجتماعيا، إقتصاديا أو سياسيا،، ببقى ما بفرق، راجل ولا مرأة المقدم،،،

وركز معاي على حتة أمرأة دي ، يعني زي ما قالت ام ومضة مسرب سري للنساء لأن صوت المرأة دائماً مغيب في سوداننا ، و غير مسموح لها بالتعبير عن ذاتها حتى بالغناء !

و كان قالوا هابط مالو يعني ؟ ما الواقع ذاتو هاااااابط ، يعني حنخلي البنات يغنوا للملائكة في السماء ؟؟؟؟!!!

ما ياهو دا الواقع !

[الغبيشة]

في اشارة لم سبق فان اغاني البنات في كونها مسرب سرى لما لايمكن ان يقال علنا تصبح احيان مسربا لما تتطلبه النظم الاجتماعية ولكنه لفرط وقاحته لايمكن التعبير عنه مباشرة مثالا لذلك طمانة العريس وكل المهتمين من الاهل بان العروس صاغ سليم وانها خالية من اى تجربة سابقة مثلا في الخمسينات كانت واحدة من اغنيات السباتا (لم اجد لها اسم )ترقص بيها العروس تقول
(الصيني الما اندقش عند تاجر ما انفرش)
والاشارة هنا واضحة جدا
كذلك في الستينات كانت اغنية عينيا من اهم اغنيات رقبص العروس وتحمل ذات الدلالات
عينيا يا عينبا عيني حلاتا بنية
يا خالاتا يا عماتا ما جابت حديث في حياتا
ما غلتت علي جاراتا
(يا عريسنا ما تتغفل اظبط الساعة قطرك صفر
جاك صيد الخلا البتجفل وجاك صالون قزازو مقفل)

[بابكر مخير]

المشاركة الأصلية كتبت بواسطة فيصل سعد

سلام لصاحب البوست و المشاركين و المشاركات
الكرام الافاضل و عساكم بخير و طيبين :

اولا و بالتبادي غناء البنات خشم بيوت و هو غناء حنين عفوي و بسيط و ملان بهجة و ريدة و مودة و رقة و تطريب و شكر و تراث و تصوير جيد للمجتمع ، انا استمتع برزينه و خفيفه و هادئه تمتم و عشرة بلدي و سيرة و بديكم نماذج :



اما الغناء الهابط فدا براو و هو غناء مبتذل و سخيف يفتقد الحس و الذوق السليم و تصاويره مخستكة و مجلية ،

فوفو الحبيب النسيب...
طبعن الفقرة الأولى دي جات حسب رأيك وإحساسك،
ربنا يحفظك زول متعلم، مثقف وإتا مرآية لثقافة أسرة، العلم هو نهجها ومسارها والياهو الورثة الوحيدة التركوها ليكم...


في الفقرة التانية في حقايق يمكن تمر علينا، عفوآ...
السودان بلد فقير وفقر وأغلبية ناسو ما متعلمين، هامشيين، أسر العين من علم ما عندها،،
آها ديل نحرمهم من ترفيه، أساسو الدارجية والبسيط من اللغة،،،
طيب!!
إحنا ما بنقول: لا لتهميش الرأي الآخر،،
أنا شايفها سمحة وبحبها وبهتز فيها،،
بتحتحت وبنبرش (للمعلومية ما قصدي أنا ظاتي، لكن لسان حال،، أغلب الشعب)..
والحبيب؛
لو لا تبيانت الآراء وإختلفت الرغبات لما كان هناك تعدد وتنوع...
دمتا الحبيب

[hatim ALi]

المشاركة الأصلية كتبت بواسطة فيصل سعد

اما الغناء الهابط فدا براو و هو غناء مبتذل و سخيف يفتقد الحس و الذوق السليم و تصاويره مخستكة و مجلية ، بعدين حقوا ما نبهت بيو غناء البنات ساي و ندرعو فيه و بغنوه اولاد برضو و كدا و نماذجه يا حاجة ما تقولي كاروشة، و ناس فلان و فلانة مع سيد العدة، و سمح الدش و ادونا منقتكم، و وائل قفل الموبايل، و بابا علا البوابة، و راجل المرا حلو حلا، و الشمار كتير، بالضراء بالضراء يا ابشرا ان شاء الله راجل مرا، و هكذا خستكات و شحاوير و قرف فما يتخلط و و يختلط و يتشابه عليكم الغناء، و افرزوا، لانه الفرز هنا واجب وطني و مطلب شعبي

ختاما لا ننسى بان حب الناس مذاهب، و الشاهد في الموضوع و الحاصل
انه في ناس بحبوا الغناء الهابط دا و بستمتعوا بيه و هم احرار و مخيرين ..

مجدد التحايا و وافر الود والتقدير ..

الاخ فيصل
شكلاً على مداخلتك الجميلة و ايرادك نماذج سماعية لغناء البنات الامر الذي احيا البوست بشدة

اختلف معك في تصنيف كلمة هابط دي

ما تنتقده في غناء البنات من هبوط

يعكس حالة الانفصام لجيلنا الحالي و انا منهم و لا ابرئ نفسي بالطبع

لايمكننا العودة بالمجتمع للوراء

بمعنى ان التغيرات الحاصلة في المجتمع الان تنسكب على الواقع الفكري و الثقافي و الاجتماعي و حتى الرياضة و الكورة و غناء البنات بالطبع

لا يمكننا ان نطالب الناس بالمستحيلات

اذا كان المجتمع هابط و ملئ بالتناقضات و - و ما يخدش الحياء - الله يكرم السامعين

لا يمكن للمرأة

ان تعمل UPLIFTING للمجتمع دا في غناها

ودا دليل صدقية و صراحة و مكاشفة غناء البنات
===================

يعني لا يمكن ان تشكر المرأة الرجل السوداني
________________________

وتصفه بانه مقنع بنات العم و اخو البنوت و فارس الحوبة و مدرج العاطنات
========================================

انا متاكد انو في بنات و اولاد هنا كلامي الفوق دا ما فاهمنو اصلاً معناهو شنو خلو يغنوهو

للاسف الصفات الجميلة انتفت من المجتمع - و لن نبحث عن الاسباب لماذا ؟
==============================

لاننا بصدد الحديث عن الظاهرة اي غناء البنات و ليس المتسبب في اسباب غناء البنات ، حتى لا يتفرع الموضوع

اعود للموضوع

كذلك المراة غناءها يمتاز بالصدق و الصراحة و المكاشفة

لربما انها ليس لها صوت اخر تعبر به عن ذاتها غير هذا الغناء

اديك مثال

ظاهرة خطف العرسان

الاغنية تقول

"الخيانة جارتنا
بتشرب في جبنتنا
ختفت الراجل حيرتنا"


"فوق الحلة دي
انا تاني ما بجي
طارت عرستي"

كذلك ظاهرة راجل المرة

"تقول شنو المراة يعني

ما ياهو راجل مرة

تحياتي

[فيصل سعد]

المشاركة الأصلية كتبت بواسطة بابكر مخير

فوفو الحبيب النسيب...
طبعن الفقرة الأولى دي جات حسب رأيك وإحساسك،
ربنا يحفظك زول متعلم، مثقف وإتا مرآية لثقافة أسرة، العلم هو نهجها ومسارها والياهو الورثة الوحيدة التركوها ليكم...

شكرا يا الحبيب و كتر خيرك اديتنا اكثر من حقنا و زيادة ..
و اسرتنا و اسرتكم واحدة في ظلال الحب و الحق و الخير و الجمال..

في الفقرة التانية في حقايق يمكن تمر علينا، عفوآ...
السودان بلد فقير وفقر وأغلبية ناسو ما متعلمين، هامشيين، أسر العين من علم ما عندها،،
آها ديل نحرمهم من ترفيه، أساسو الدارجية والبسيط من اللغة،،،

عمره الفقر و الجهل ما كان سبب للتدني في اي نوع و لا تجعلة شماعة للغناء الهابط ..
طيب!!
إحنا ما بنقول: لا لتهميش الرأي الآخر،،
أنا شايفها سمحة وبحبها وبهتز فيها،،
بتحتحت وبنبرش (للمعلومية ما قصدي أنا ظاتي، لكن لسان حال،، أغلب الشعب)..
والحبيب؛
لو لا تبيانت الآراء وإختلفت الرغبات لما كان هناك تعدد وتنوع...
دمتا الحبيب

كلام سليم، و الظاهر انت ما قريت مداخلتي كويس و خصوصا دي :

(ختاما لا ننسى بان حب الناس مذاهب، و الشاهد في الموضوع و الحاصل
انه في ناس بحبوا الغناء الهابط دا و بستمتعوا بيه و هم احرار و مخيرين ..)

عموما نحن لسنا ضد غناء البنات او الغناء الخفيف الدكاكيني طالما ابتعدت كلماته و معانيه و اوصافه عن الابتذال و الاسفاف و الفحش و الرزيلة و هلمجرا ..

يديك العافية يا حبوب..