راكوبة المجادعات.. النمة والدوباي

[أبو دعد]

قلبتوا الصفحات ورانا و كترتوا النم
و انا بى غادى غرقان فى بحور الهم
ادونى فرصة اخد راحى و شوية انجم
بضاير الساكنين مع العرب و العجم

[سارة]

المشاركة الأصلية كتبت بواسطة حافظ حسن مختار

قول لي ام سماح هجرانك نار لافحانا
و كاتمنو ريدك الا الأشواق فاضحانا
الخلاني بين حجر الرحى ومسحانا
في سوق هواك تجارتنا مي ربحانا

كر ساي...

كاتمين الوجع وقاطعنو جوة حشانا
نتدارى وندارى الا الدموع فاضحانا
سكنتو الوريد ولا بشوفنا لا بيطرانا
زى ابل الرحيل شايلة السقى وعطشانة

وتانى كر مهداة لخالد غالى وليك يا حافظ مختار

[حافظ حسن مختار]

المشاركة الأصلية كتبت بواسطة سارة

كاتمين الوجع وقاطعنو جوة حشانا
نتدارى وندارى الا الدموع فاضحانا
سكنتو الوريد ولا بشوفنا لا بيطرانا
زى ابل الرحيل شايلة السقى وعطشانة

وتانى كر مهداة لخالد غالى وليك يا حافظ مختار

نشتل في الريد والبحصدو سوانا
ونكتب في الغنا كايسن رضاها فلانا
مكتوب في لوحنا فرحه محال تغشانا
ما نسعدبو حبيب لامن الاجل يوفانا

هدية مقبولة يا سارة

[حافظ حسن مختار]

طالت الغيبة ونار فراقك شبّت
والجوارح اتملت بالشوق وإتعبـّت
يا الريدك فرهد في الدواخل ونبّت
كل ما اطراك ألقى العيونات كبّت

[مي هاشم]

المشاركة الأصلية كتبت بواسطة سجمان

والله في البال لكن الوكت داهمني فعذراً أختي..

أردب عذر معاو مكنتل حزني
ما ودعت ناس "فيحا" الوكت أوجزني
يا مي النضم بي عذري تب أعجزني
طالبين السماح الشيخ حسن يحجزني

لا اله الا الله..
عاد كان قاصد سيدي الحسن اب جلابية أو سيدي ود حسونة أو سيدي حسن الشيخ قريب الله بتكون عصرت علي شديد ياخ..انا مسكينة


طنّين شوق معاو صابّات همايل مُزني
ما شفت الحليق سيف الألم حاززني
الخلاّ الحرف يمرق علي ناغِزني
متحوّي الكرام بي ريدتهم بارزني



تُبت لله والرسول..
مدد

[سارة]

المشاركة الأصلية كتبت بواسطة حافظ حسن مختار

نشتل في الريد والبحصدو سوانا
ونكتب في الغنا كايسن رضاها فلانا
مكتوب في لوحنا فرحه محال تغشانا
ما نسعدبو حبيب لامن الاجل يوفانا

هدية مقبولة يا سارة

نشتل فى المحبة وغير الجحود ما جانا
وفى لوحة كتوفنا كتبنا (انت منانا )
يا مقنع غطاى قليبى عندك امانـــــــة
سو فيهو البعجبك وانا بالحكم رضيانا

تانى كر

مى يا جميلة سلامات

[سارة]

المشاركة الأصلية كتبت بواسطة مي هاشم

لا اله الا الله..
عاد كان قاصد سيدي الحسن اب جلابية أو سيدي ود حسونة أو سيدي حسن الشيخ قريب الله بتكون عصرت علي شديد ياخ..انا مسكينة


طنّين شوق معاو صابّات همايل مُزني
ما شفت الحليق سيف الألم حاززني
الخلاّ الحرف يمرق علي ناغِزني
متحوّي الكرام بي ريدتهم بارزني



تُبت لله والرسول..
مدد

التوبة لله الكريم

[مي هاشم]

سرورة يا ست الكل.. سلامات


ياختي ده شنو الصّقع ده؟؟!!
الكلام ده كبير علي ياخ..وكمان جابت ليها تِحِوّي في أهل الله!!
بري يا يُمّة.. وكُر

[حافظ حسن مختار]

المشاركة الأصلية كتبت بواسطة سارة

نشتل فى المحبة وغير الجحود ما جانا
وفى لوحة كتوفنا كتبنا (انت منانا )
يا مقنع غطاى قليبى عندك امانـــــــة
سو فيهو البعجبك وانا بالحكم رضيانا

تانى كر

مى يا جميلة سلامات

الفارع قواما ونور وشيها يلالي
آسراني بي ذوقه ونغيم لهيجه الحالي
الأسعد دواخلي وغبن ترك عزالي
لمّحت لي براها يا خلاي رايده وصالي

[أبو دعد]

يا ود مختار اول مرحبتين حبابك
و سعبد يوما لينا بالنميم جابك
بشوفك بين سارة ومى دفق تبرابك
بوصيك شمر ضرعاتك و غرز نابك

[حافظ حسن مختار]

المشاركة الأصلية كتبت بواسطة أبو دعد

يا ود مختار اول مرحبتين حبابك
و سعبد يوما لينا بالنميم جابك
بشوفك بين سارة ومى دفق تبرابك
بوصيك شمر ضرعاتك و غرز نابك

حباب ابو دعد المستف بالمعاني جرابك
رجاله وكرم جارات بالاراضي تيابك
شربت النميم بلغت منو نصابك
مع سارة ومي بنجادع وكلامنا ماهو مشابك

[أبو دعد]

المشاركة الأصلية كتبت بواسطة حافظ حسن مختار

حباب ابو دعد المستف بالمعاني جرابك
رجاله وكرم جارات بالاراضي تيابك
شربت النميم بلغت منو نصابك
مع سارة ومي بنجادع وكلامنا ماهو مشابك

الكلام اوزنو معاهن و اختا العترة
ديل حديثن واضح زى سحاب النترة
و الواحدة فيهن بى الطيبة منسترة
مقفات و ما بجيبن كلمة شترة

[أبو دعد]

المشاركة الأصلية كتبت بواسطة حافظ حسن مختار

حباب ابو دعد المستف بالمعاني جرابك
رجاله وكرم جارات بالاراضي تيابك
شربت النميم بلغت منو نصابك
مع سارة ومي بنجادع وكلامنا ماهو مشابك

الكلام معاهن اوزنو و اختا العترة
ديل بنات عز و فوقن خت الشكرة
الواحدة فيهن باينة زى سحاب النترة
وتماضر النميم عندها سجية و فطرة

[حافظ حسن مختار]

المشاركة الأصلية كتبت بواسطة أبو دعد

الكلام اوزنو معاهن و اختا العترة
ديل حديثن واضح زى سحاب النترة
و الواحدة فيهن بى الطيبة منسترة
مقفات و ما بجيبن كلمة شترة

المشاركة الأصلية كتبت بواسطة أبو دعد

الكلام معاهن اوزنو و اختا العترة
ديل بنات عز و فوقن خت الشكرة
الواحدة فيهن باينة زى سحاب النترة
وتماضر النميم عندها سجية و فطرة

هسه انا مشغووول بجيك بي مهله امسك دي عربون

اتلومت يا الدعد لامن اللوم رجح ميزانو
وتبع ترى الرهاب الما شرب عطاشنو
عكرت صفاي وتورت للغضب شيطانو
والراجل الخفيف يا خوي عيبو لسانو

انا الهيلي الكلام موزون وماهو ملتق
بارع في الحديث من تب عودي وبتق
انا الولد الاصيل معروف وعزي معتتق
حاشاني الغلط... وكرامتي ما بتتفق

[حافظ حسن مختار]

هذه المرثية كتبتها في والدتي الله يرحمة

الليل ساق وروّح والعيون فاض ماها
وغير سهر الاماقي حزناَ كبير تلاّها
يامولاي عاد بالرحمة اتولاها
وفي جنات عدن فيض جودك يتوالاها
. #### .
مفجوع فيك ..وياداب ما فرقتِك بانت
ويا زينة الحريم اللي الحديث ماشانت
مفقودة وبلاك خربانة دار ما انصانت
باكينك رجالاً للاسود ما انهانت
. #### .
يبكنك بناتن شايلات حدادن وحفن
يبكوك الضيوف والطلبة واقفين صفّن
باكيك قلبي بالدم والدموع ماكفّن
يابت الكرام الدوام عهودك وفّن
. #### .
فاقدك بالكتير وصبري اصبح ناجع
وخبرك جانا صاروخ فوقنا تلّب واقِع
يالكرمك مطر كاب شووو وخاتي صواقع
للجار والبعيد لون سنك ابيض ناااصع
. #### .
دامي القلب ناعيك ونفسي عليلة
وين المتلك ؟آآ المهلة النقول ياحليلة
عشاية الضيوف يالساهرة لي حد ليلا
مافي مثيلا فاجعنا القدر بي رحيلا
. #### .
عيني دميها تقطر والكبد متفوفة
وكيف اقدر اقابلها وامس ليها كفوفة
ياخلاي مناي من تاني مرة اشوفة
ادعو معاي لأمي الكتير معروفة
. #### .
ويوم الجمعة ياغالية الخبر تب جاني
قاسي علي مرير عجل علي جناني
انا الكت يمة حافيك بي وداد وحناني
كيف القاك ويبسم لي الزمن من تاني
. #### .
نزل خبر السواد وكل البلد حزنانا
فاقداها الخلوق الناهلة من تحنانا
يا سحب الخريف الكنتي ظالة سمانا
من بعد الفراق حزن الحرازة كسانا
. #### .
وانا لا يوم النشور دائماً عليكي بنوح
يا البعدك صبح قلبي الصميم مجروح
لو كان بالمراد افديك براي بالروح
يالذكراك صدي من داخلي تب مابروح
. #### .
فاقداك البيوت من كهله لي اطفالا
يبكو علي فراق الحاشا مي نقالا
فراقك يمة شااال وهطني في الملالا
حار حارق حشاي واعضاي ست بي حالا
. #### .
وكيف الشورة يا خلاي عاد دلوني
ومن قل الصبر جف ويبس ماعوني
سيل الوادي الجارف ما بجاري عيوني
وكت أنسى وادق وأرجاها في تلفوني
. #### .
كل الناس تنوح تردح عليك مفجوعة
وزينوبة الصغيرة بتبكي فيك موجوعة
عينها محاربه للغميد كملت إسبوعة
وكان المات بعود أمي درنا رجوعه
. #### .
وعاد كيف الصبر يا خلا ادعو معايا
فراق الام مرير وكلامي ماهو كفاية
يارب العباد لزمني حكمة وآية
ارحم امي ياربي استجيب لي دعايا
. #### .
حد مافيك أقول وأكتب وأجيد تعبيري
أعجز عن بيان الكاتمو جوة ضميري
من حب واحترام ومودتي وتقديري
بي فقدك شقيت بقت التعاسة مصيري
. #### .
دموع العين عليك صبابه هادره هميله
وفقدك طامة مابتنطاق علينا تقيله
ياست الخصال الما اتوجد تفصيله
فراقك هد صبري ونفسي باكية عليله
. #### .
سالك يا كريم وليك دوام بترجه
تفوز بالجنة أمي وفي النعيم تنفجه
الموت حق علينا أبدا ما بنحتجه
الا فقدنا الحار زلزل نفوسنا ورجه
. #### .
كل الحروف لي فضلها ما بوفن
و كل سنين عمري دعوات ما بكفن
الخلا الحواس يا خلاي يهاتن يرفن
ميت بي فراقة وفاضلي بس اتكفن
. #### .
يا مولاي في دنياي اجبر كسري
ومن سجن الذنوب ياربي حلحل اسري
يا خالق الفجر وليلاتً كراماً عشرِي
أمنا في جنان رضوان تقيّل وتسري
. #### .
بترجى الكريم يغفر لساني ذلاتو
وبصلي علي النبي المعظمة ذاتو
يا مولاي ارحم جميع اهلنا الماتو
بالصلاة والسلام حافظ ختم كلماتو